الأحد، 7 مارس 2010

مجرد فكرة جاءت على بالى


تخيلوا معى رجل وزوجته عايشين مع بعضهما البعض منذ 7 سنوات ولم ينجبوا اى اطفال ..الرجل كل يوم يذهب لعمله والزوجة تجلس فى البيت وكل منهما يتكلم مع الآخر بالإيميل والرجل لا يعلم ان المرأة التى يكلمها هى زوجته ولا الزوجة ايضا تعلم ان الذى يكلمها هو زوجها هى مغرورة لأقصى درجة وهو حاد المزاج ومتسرع كل منهما عندما كان يتكلم مع الأخر كان يخفى الصفات السيئة به يعنى الزوجة تبدو من كتاباتها انها امرأة متواضعة والزوج يبدو من كتاباته انه رجل صبور وعاقل ومتزن (بصوا سيبكوا من المثل دة ممكن اكون سرحت جامد ودة مش موجود فى مجتمعاتنا الشرقية)

الموجود حقا فى الواقع ان اخين يدخلان على نفس المنتدى بأسماء مستعارة ولا أحد ابدا يعرف الآخر... او ان أصحاب منذ عشرين سنة لو دخلوا على نفس المنتدى لن يعرفوا بعض.. بسبب ان ببساطة لا أحد يظهر على حقيقته من خلال رده او كلامه يعنى لا أحد يقول الشخص ده عبقرى ممكن يكون قعد 3 سنوات حتى يكتب مثل هذه الحروف القليلة...

معظم الناس (ان لم يكن كلهم ) بتحاول تظهر بمثالية زيادة عن اللزوم قبل ما ترد او تتكلم والمشكلة المقابلة ان الناس بتكون راغبة فى تكوين فكرة عن شخصية صاحب الكلام حتى لولم تره نهائيا ...لم يعرف الرجل زوجته من كلامها والصديق لم يعرف صديقه والاخ لم يعرف اخاه فلا تتوقع انك تعرف او تنجم شخصية صاحب هذه الأحرف فالإنسان آخر مكان تعرف منه شخصيته هو النت ...شخصية الانسان تظهر فى مواقفه وسلوكه فى الحياة

نهاية كلامى لا تحاول ان تستشف تلك الشخصية القابعة وراء تلك الأحرف لأنك ستفشل وان لم تفشل فستخدع وان لم تخدع وحقا كانت هذه شخصية صاحب الحروف فسيكون قد حالفك الحظ لا غير

ولو واحدة لا تعرفنى قالتلى بعد ما قرأت هذا الكلام انى مكلكعة حعرف انها لم تفهم كلمة مما كتبتها او فهمت الكلام ولم تقتنع به..

10 قالوا رأيهم:

Doha يقول...

كنت كاتبة مرة موضوع بنفس الفكرة عنوانه من أنت
ومجمله ان كل واحد بيدخل على النت بيتقنع بقناع واحد تاني
فى الأول كنت معارضة الفكرة نهائيا وان كل واحد لازم يكون على طبيعته وميتكلفش
بس اقتنعت فى الآخر ان الأحسن انك تلبس قناع لان كل اللى حواليك لابسين اقنعة ...ولو بنت على حقيقتك هتبقى انت الوحيد المزيف ...

جميلة الفكرة بس عاوزة تنظيم شوية يا جميل فى طريقة العرض ...

miramar يقول...

(( لا تحاول ان تستشف تلك الشخصية القابعة وراء تلك الأحرف لأنك ستفشل وان لم تفشل فستخدع وان لم تخدع وحقا كانت هذه شخصية صاحب الحروف فسيكون قد حالفك الحظ لا غير ))

للأسف هذه هي الحقيقه المره التي لم نعد قادرين على مواجهتها ...ولا ادري هل اصبح من الخطأ ان يظهرالانسان على طبيعته ... ام ان الخطأ هو ان يرى الاخرين على طبيعتهم ...

الموضوع فعلا اكبر من انه يتناقش في سطور ...
استمري ... الفكره جميله ...

Rouan يقول...

مش عيب ان الانسان يتكلم بمثاليه زايده شويه اللى عمرها ما هتتحقق بس هو بيحلم انها تتحقق
ده مش خداع ولا قناع ده حلم بنحاول نحققه

Alice يقول...

يعنى يا شوجر لو واحد قال انا لو كنت مكان الراجل اللى ضرب التانى علشان استفزه انا كنت حمسك نفسى واحاول اكلمه بالراحة لو فى الواقع ولا حد كان حيمسك نفسه ولا حاجة
او حد يدور تلات ايام على كلام ادبى يرد بيه علشان يتقال عليه انه مثقف والمشكلة ان الناس بتصدق
فى حاجة غلط
بصى علشان نكون صرحى كلنا مش حنبطل مثالية فى الرد انا بقول ان الواحد ميكونش اى ادنى فكرة عن اللى قدامه من خلال بعض الاحرف

Think Pink يقول...

انا مش عارفه الفكره دى اتناقشت ادامى كتير
وبرضه انا مش مقتنعه انى ببقى لابسه قناع فى تعاملاتى ع الفيس او النت او المنتديات
اه فيه ناس لابسه
بس فيه ناس مش لابسه
يعنى دلوقتى الكلام اللى احنا بنكتبه هنا ع المدونه ده اقنعه
معتقدش...انا فيه حاجات ببقى بكتبها وانا بعيط
ممكن فى بعض المواقف ابقى مضطره البس قناع
بس مش على طول مش عارفه !!!!!!!

Doaa helal يقول...

عندك حق يا ايمي انا فعلا كتير من اللي بتعامل معاهم علي الانترنت مش بثق فيهم لاني عارفة ان ممكن الكلمة تتقال بكذا طريقة وفي كذا وضح لو مثلا واحده بتقولك انا ارتحتلك هتعرفي هي بتقول بجد ولا اهي كلمة مش هتخسر حاجة لو قالتها ربنا يحفظنا من مكر الناس وكذبهم

قبل العالم الأخير يقول...

انا شايف يا جماعة ان الموضوع ده بيختلف من شحض لأخر
انا ليا اصحاب كتير جدااا ع النت هما هما زى ما بنكون وسط الشلة وده مش صح لأن احيانا بيبقى فى كلام مينفعش يتقال وده مش معناه انه هيرتدى قناع او كده ...يعنى مثلا فى واحد دمه خفيف وكده معنى انه بيحترم المسجد لما بيدخله انه كده غيًر من حقيقته؟؟
وطبعا كده كده محدش هيعرف حد كويس ويثق فيه الا لو اتعامل معاه بجد واكلواوشربواومشيوا مع بعض وكده ساعتها هيعرف شخصيته كويس

قبل العالم الأخير يقول...

لكن بالنسبة للكتابات فهى اكيد بتعبر عن كاتبها وفكره واحساسه ده المفروض يعنى 
وبجد مش الحاجة اللى اشغل بيها دماغى هو صادق و لا كاذب لأن دى بينه وبين ربنا واذا كان ظهر بمظهر غير اللى هو عليه فده منافق ويكفيه عذاب ضميره

واهى فرصة بقى اقول انى بحس ان منظرى توحفة وانا هنا لوحدى كده وسط اّنسات D:D: وعمال اقول للرجالة يخشوا يقروا وهما هيتحمسوا ويكتبوا بس مكسلين و بجد يعنى انتو احساسكم عالى وبستمتع وانا بقرأ وممكن اتفهم غلط اكيد بس انا سايبها على اللهD:D:

Alice يقول...
أزال المؤلف هذا التعليق.
Rouan يقول...

بصى يا ايكو بالنسبه لموضوع الراجل اللى قاله انا لو كنت مكانك ده ع فكره مادام قاله كده يبقى هو كان اكيد مش هيضرب الراجل وده مش قناع ولا حا جه

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة