الأربعاء، 17 مارس 2010

طالب طب الــ ..... مجتهد !!


حكاوي طالب الطب المجتهد
يوم عادي في سنة عادية مع طالب غير عادي
بيبدأ فوقانه من غيبوبة النوم على الساعة 7 الصبح لما ماما تصحى اخوه الصغير عشان المدرسة واخوه الكبير عشان الكلية وتيجي عليه مش عشان تصحيه ...لا عشان تسأله انت رايح الكلية ولا لأ ....

بعد ميقولها " حرام عليكي بتصحيني ليه ..ولا مش هتنيل اروح الكلية الزبالة دي .." يكمل نومه لحد مكل شوية ضميره يصحية ...الساعة 8 وبعد شوية 8.30 وبعد شوية يلاقي ضميره تاني بيصحيه الساعة 9 ويفضل على هذا النوم المتقطع ( ياعيني مش عارف ينام ) إلى أن تقترب الساعة من الحادية عشرة ... معاد سكشن الباشا ..

يقوم متثاقلا من السرير ويغسل وشه ويقف  قدام المراية نص ساعة يفكر يغسل سنانه ولا لا .. وبعد تفكير عميق ( الله يمسيك بالخير ياللي في بالي) يكتشف ان وراه سكشن بايو ولازم يجيب الأدوات والبالطو ويقف ساعتين على رجله يعمل التجربة ... يقف يشاور نفسه يروح ولا ميروحش.. ويقرر انه يروح وأمره قد فوضه إلى الله ..

يركب التاكسى وقبل مينزل يتخانق مع السواق على النص جنيه اللى السواق عاوز ياخده وده مصمصم انه مينزلش غير بالنص جنيه بتاعه ( القرش الاسود بينفع في اليوم الفوشيا ) ... وينزل وخير اللهم اجعله خير يروح السكشن ... أول كلمة هيلاقي المعيدة ( اسم النبي حارصها وصاينها ) بتزعق بصوت مسرسع " كنت فين مش المعاد الساعة 11 جاى 11 ونص تعمل ايه يا افندي ؟؟؟"
يسأل نفسه السؤال ده ويقول انا ايه اللى جبني ويستنى كلمتها وهي بتقوله اطلع برا يا كـــــ...... يلاقيها بتقوله ( اتفضل بس معودتش تتأخر تاني ) ... واتدبس الباشا في السكشن ...

يخلص السكشن من هونا ويروح على عمو أنس من هونا ... يتحرق شوية بالسجاير ويتعلم ان التدخين مضر بالصحة ... يتزعقله شوية عشان مذاكرش ويقعد فول كونسينتريتيد ويطلع من الحصة بالإستفادة التي في بعض الأحيان تكاد تكون الوحيدة ... هو صلي على رسول الله ... ( بيخلينا ناخد ثواب عشان كده لازم ندعيله ... ربنا يكرمك يا د أنس )

يتسنكح شويتين مع اصحابه قبل ميدخل على الكبير ويسمع الأذان بيأذن يفكر شوية قبل ميدخل المسجد ويدخل فى الآخر عشان اصحابة أصحاب خير وبيقولوله ادخل بس يا عم واحنا هنستناك برا .... 

يخلص صلا ويطلع يهزر مع ده ويناكف في  ده وضحكاته تدوى وجايبة من أول الشارع لآخره ... لحد ميلاقي كل الناس دخلت عشان الحصة بدأت ...فيدخل مغلوبا على أمره إلى الأناتومي ..

يستلقى شوية معلومات زى مبيدخلوا زى مبيطلعوا ... وياخدله تعسيلة محترمة يفوق بعديها لما يروح البيت عشان يقعد على الفيش توك يضور على عريش .. أو عروشة ...

المهم ان في يومه الأبيض ده مذاكرش ولا نص كلمة زى مفؤاد قال ... ويرجع برده يقعد على الفيس بوك يعك فى اى حاجة من العك اللى مووجود ... ويتشات مع دي ومع ده ومع دي مرة أخرى ... المهم بعد مضميره يكون صحى .... خلاااااااااااص انا كده خادت كفايتي من الفيس بوك .. اقوم اشوف أخبرا التلفاز ايه ...اشقر عليه بما انه بقاله كتير متفتحش واحنا مقصرين فى حقه بصراحة ....

هوب الساعة بقت تسعة والفيلم لسة مخلصش ... عمك الحج تلاقيه بيتاوب عاوز ينام ...بذل مجهود خارق النهاردة في الكورسات والسكشن اللى ولا تجربة عرف يطلعها فيه ... والحمد لله كفاية على كده يبوس ايده وش وضهر ويقوم يصليله العشا ( ركعتين وسجدتين سهو ... ) ... ويشرب اللبن ويخش ينام ... 

ميفوقش غير الساعة اتنين ونص بليل ... المفروض انه يقوم يذاكر بقى ملوش حجة ... وده تلاقيه رايح بيصحى اخوه الصغير عشان ييجي ينام جنبه ... مدعيا أن السيد تحوتمس الخماستاشر بييجي كل ليله يصحيه وهو يرتدى بذته المومياوية الرسمية عشان يكشف عليه حيث إنه يعاني من ألم حاد في مفصل الكتف .. ( عفاريت الأناتومي  بتجيله.)

يصحى اخوه غصب عنه وينام جنبه ...وميدريش بنفسه غير على امه بتصحيه الساعة سبعة الصبح تاني ...قوم يا منيل مش هتروح الكلية ...؟؟

النهارة الخميس يا ماما مفيش كلية ......!!




3 قالوا رأيهم:

قبل العالم الأخير يقول...

ده بجد :D
كام حاجة كده اللى مش بتحصل معايا انما الباقى كله بالظبط
انا متفائل اوى على فكرة :D:D

غير معرف يقول...

لكل طلبة الطب هما حبايتين أسبويد وشريط نيترو جليسرين وتبقى تمام

غير معرف يقول...

لكل طلبة الطب ؛ هو شريط أسبوسيد أطفال وشريط نيترو جليسرين ومعاهم حقنة فالبام وماتفكرش في حاجة

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة