الخميس، 28 أكتوبر 2010

غابة و حظائر و اعملى طرزان !


بدون تلك المقدمات الرتيبة ، والتمهيدات الطويلة دعونى الان أنطلق بدون توقف !!

سأحكى لكم اليوم عن غابتنا .. غابة العلم ( أكيد معروفة ) .. غابتنا يرأسها أسد كبير .. يقال أنه مختلف .. يسمع للطلاب .. ويعشق التطوير ناهيك عن النظام الذى لا يوجد له مثيل فى غابات العالم جمعاء ..

فى غابتنا العديد والعديد من الحظائرعلى رأس كل حظيرة أسد صغير .. يقوم على خدمة حظيرته بعناية فائفة .. ويطور اعماله اليومية من رش المياه و تشغيل اذاعة القراّن الكريم فى الراديو (عشان البركة ) ثم يبدأ بمباشرة أعماله فى ربوع الحظيرة من تعليم البهائم والخرفان الصغيرة .. سأحكى لكم بإختصار الإختصار عن عدد من تلك الحظائر ..

الحظيرة الأولى :: حظيرة تزيد معدلات الذكاء (ان وُجد) .. مش موجود .. فاااااكس

تحمل هذه الحظيرة مهمة تدريس علم وظائف الأعضاء ( ايديك بتاكل بيها .. رجليك بتمشى عليها .. لسانك بتغيظ بيه العيال الصغيرة .. وطبعا فى حاجات بتفرقع من كتر التعليم فى الحظيرة دى .. ده فهم سواق تاكسى لعلم وظائف الأعضاء) ..علم أساسى يطلق عليه أبو الطب .. يحتاج لعقول نابهة بالطبع .. يرأس هذه الحظيرة أسد (غشيييم) .. يعشق النزاهة (ولأنه مصرى على حق فطبعا بيقول للكوسة لأ ) .. يتميز هذا الأسد (بالتكويس) علنا أمام جميع الخراف والماعز .. وبالطبع فى لجنة خاصة .. فليس من المعقول أن ُتختبر الأشبال مع الخراف والماعز .. المهم أن هذا الأسد (الغشيم) قد أخذ يطور فى حظيرته كثيرا كثيرا .. شروحات غاية فى الرقى والجودة .. كميات معقولة من الصفحات .. نظام عالى الأداء .. إختبارات دورية غير مفاجئة .. والأهم من ذلك .. النزاااااااهة .. وفى إحدى الفترات المجيدة التى أرسل فيها الأسد الكبير البيان الرسمى بضرورة الرقى أكثر و أكثر بالحظائر .. وضرورة تطبيق نظم الجودة الحظائرية .. حتى انشغل الأسد المسئول بمحاربة نمر قوى .. او لنقل انشغل بحرب النمور ولكن هذا النمر كان الأقوى و الأشهر فبالتالى كان الهدف الأول .. من الطبيعى أن ينشغل الأسد بهذه الحرب لأن حظيرته تسير على ما يرام .. وتشعر فيها البهائم بكونهم بهائم .. يأكلون .. يشربون .. يــ .. ينامون .. هم فى قمة السعادة فى الحظيرة فكيف لهم أن يذهبوا لذلك النمر الوضيع .. أراد الأسد أن يثبت (غشوميته) فأسرع بعمل اختبار منظم مخبر عنه مسبقا( بأسبوع ) لينال نقطة ثمينة من النمر على حساب البهائم .. لكن النمر هو الاخر غشيم .. فأسرع بالخرفان والمعيز محاولا اثبات انه ( مش بـيـتـثـبت ) .. وبالفعل أثبت ذلك .. ولكن الخراف والماعز لاحظوا تطورا ملحوظا فى معرفة الأسد بما يدبر له النمر .. ما يقول .. ما يرجح .. ما ينهج معهم ( سبحان الله..لا سحر ولا شعوذة ..صلى على رسول الله ).. انتهت الجولة الأولى .. وُهرست البهائم من ماعز وخراف فى المنتصف من هذه الحرب الشعواء ولا حول ولا قوة الا بالله ..


نستنج من هذه الحظيرة عدة ملاحظات هامة :
اولا : يتمتع أسد هذه الحظير بعقل كبيييييير نبييييييه مستنييييييير .. يعرف ما له وما عليه .. مصلحته الأولى هى البهائم وتعليمهم ..
ثانيا : يزداد صيت النمر يوما بعد يوم .. ويزداد عنده عدد البهائم ايضا ..
ثالثا : أن الحرب لم تكن نزيهة شريفة .. بل كانت هناك بعض العصافير فائفة السرعة التى تعمل على نقل اخبار النمر وما وصل اليه حرفيا الى الأسد ( يا ترى ليه؟؟ لو عرفت روح اعمل زيه ياعم حد طايل )
رابعا: خسائر الحرب بالتراكم ستصبح يوما فااااااااادحة !!


الحظيرة الثانية :: حظيرة النظام والدفتر الاسود

تحمل هذه الحظيرة مهمة تدريس علم الكيمياء الحيوية والتفاعلات الحادثة فى الجسم البشرى( لا بجد بتتعبوا يا بتوع الطب وكمان بتاخدوا كيميا دنا شيلتها فى الثانوية المادة بنت التييييييييت دى) ..علم هام للغاية أيضا.. وفى بعض الاحيان تنظر الى قطعة الخبز أو اللحم وتبتسم (قال يعنى عارف مصيرها وايه اللى بيحصلها بالظبط) .. المهم .. يرأس هذه الحظيرة أسد اخر .. عالم .. حصل على الدكتوراه من لندن كما قيل .. يعشق النظام .. لكنه يحمل الكثير من المفاهيم الغريبة والمثيرة للدهشة .. كما أنه لا ينصح بالتعامل المباشر معه.. هو خطير جدااا .. من الاشياء الغريبة تشبيهه لمن يرتدى ( كاب ) بعامل البنزين فى أمريكا .. اهتمامه الشديد بحضور البهائم الجلسات العبقرية حتى وان لم يشعروا بأهميتة تلك الجلسات .. الدفتر الأسود الذى يحمل نسب الغياب والمواجهة المخيفة فى الشفوى أيضا من أحب الاشياء الى قلبه .. الطرد بمجرد النظر .. يمتلك نظرة خاصة للإناث تجبر الذكور قليلى التعاطف مع الإناث بالطبع أن يتعاطفوا .. ناهيك عن كلماته الخاصة بالذكور .. كما أن (التوتوريل) له مفهوم خاص فى مخيلته .. فقد اخبرنا أن (التوتوريل) بالنسبة له يعنى أن يسأل فيما تم شرحه .. وإن لم تكن الاجابة .. كان الطرد والغياب .. أسدنا يدير حظيرة منظمة حقا وليس كالحظيرة الاولى .. تدعوا البهائم أن ُترحم وتنتهى حالة الفصل المنهجى (المهببة) التى لا تتبعها أى من الحظائر سواها .. أسد أسد أسد .. أكفر باللاة والوزة .. أسد أسد أسد !


الحظيرة الثالثة :: احفظ زى الجاموسة تعدى زى الناموسة

تحمل هذه الحظيرة مهمة تدريس علم التشريح( مشرحة بقى وحركات ماشى .. لو عايزين جثث انا ممكن اظبطكم .. بس عارفين أنا كنت عايز حاجة من علوم كده تعملنا خلطة تمام تكيفنا ) .. علم الجراحيين .. من اساسيات الطب كله .. يحتاج للحفظ الشديد والمراجعة المنتظمة والرسم الممل المفصل .. يرأس هذه الحظيرة أسد اخر .. جديد نوعا ما.. بشوش .. خفيف .. صدرت له الاوامر ايضا.. يحاول جاهدا الفوز فى معركته الخاصة .. التى يواجه فيها نمرا قويا جدااا .. يحاول فرض النظام( بغباوة ).. فعنده كراسة العملى من اهم ما يكون ..على الرغم من ان الجميع ( يكروتها واللى ملهوش اكلاشيه بيظبط الغياب بنفسه ).. يعتقد هذا الاسد انه اردانا بسؤال ( الهاند ) فى السنة السابقة .. وياله من واهم .. ويالهم جميعا من واهمين .. أسد هذا القسم يحاول الاستمرار وحقا نتمنى له النجاح ( بس بدماغ شوية اكتر من كده) ..


الحظيرة الرابعة :: روح يا شيخ ربنا يعمر بيتك

تحمل هذه الحظيرة مهمة تدريس علم الأنسجة والخلايا ( ان الحمد لله نحمده ونستعينه الله الوطن المرشد العام ) .. من العلوم الدقيقة الهامة ايضا التى لا يستقيم دراسة الامراض وما يحدث من تحولات على مستوى الخلايا والانسجة الا بفهم هذا العلم .. لكن فى الحقيقة هى الحظيرة الارقى والافضل .. لا يذاكرها البهائم طوال العام حتى فى فترة ( العشرين فى المائة ) كراسة الاختيارى تحفظ وتصم ( وربنا يسهل بعد كده ) .. بعد ذلك يتم تعليم الشرائح (صباع الفرخة ورأس الدبوس) .. ثم تأتى لحظات السباق مع الزمن والمذاكرة والاكتئاب والحفظ والرسم مع النهائيات .. النتيجة جيد جدا .. امتياز .. غياب هذه الحظيرة (عادى) .. اختباراته الدورية ( الكويزات عادى ) .. الاسود القائمين على التدريس يتمتعون بدرجة عالية من الطيبة .. والحمد لله .. اللهم بارك فى هذه الحظيرة حتى ولو لاّخر هذا العام وحسب..


ملاحظات هامة
اولا:: البهائم يعنى الخرفان والمعيز .. بحس ان اللى بيحصل مينفعش يحصل غير لبهائم .. خرفان ومعيز وبط وكله .. هما اه زى الفل .. بس عايزين حظائر تانية و نظام تانى .. هما يسدوا فى اى وضع وانا متأكد .. بس ربنا يستر عليهم لأن ده بيتراكم جوه ويكمن لما يكبروا يطلعوه ع اللى بعدهم .. و ده وارد اوى
ــــــــــــــــــ
ثانيا:: فى اول ثلاث حظائر اقتطعت من كلام سواقين تاكسى عاملين دماغ .. ومنهم واحد ان شاء الله ننزل تجربته مع الحشيش فى تدوينة قادمة .. لأنها تجمع الصعبانيات والفايدة الحقيقة
ــــــــــــــــــ
ثالثا:: لم احدد نوع الاسد .. ذكر كان أم أنثى .. لكننى اقولها بكل ثقة ان عبد الناصر ..لالا .. اقولها ان الحظيرة اللى ماسكها رااااااااجل بيفرق برده .. وحكاية المرشد العام ..لأنه يقال أن اسد هذه الحظيرة منتمى للإخوان .. شايفين النظام ..
ــــــــــــــــــ
رابعا:: سامحونى ع القلش الرخيص ده القلش بقى فى الهوا خلاص .. وربنا يسترها معانا ويعدينا من الغابة سنة سنة على خيييييير ان شاء الله


ما زال هناك الكثير والكثير عن غابتنا وحظائرها المختلفة المتألقة بضروب العجائب و النوادر .. وتذكر اننا لم نتعرض للأشبال حتى الان ..انتظرونا



8 قالوا رأيهم:

Heidenröslein يقول...

بجد والله كل أما أقرا كلمة البهئم دي أضحك .. لفظة معبرة أوي فعلا عن اللي الواحد بيحسه في الكلية ..

وصفت بكل دقة و إخلاص الحال بالظبط .. :))))
ربنا يعينا ..

مشكلة الناس دي انهم مش فاهمينا .. هما لو فهمونا هنبقى زي الفل !

sando يقول...

perfect description and perfect words
won't get better than this
n.b rabena yostor w y3ady el topic da 3ala 5er 2abl ma 7ad mn el kolia y2rah
just perfect

A fugitive يقول...

Heidenröslein : وانا برده بحس بكده و لو انها تقيلة حبتين تلاتة بس ده الواقع..ويارب يفهمونا ..الموضوع معقد جدااا.. المسئوليات والواجبات والحقوق والتفكير العلمى والحاجات دى عايز اعادة هيكلة وظبط فى الدماااااااااغ.. وطبعا شكرااااجدااااااا ع التنسيق الجااااااااامد اوى ده.. بجد معدى :D

sando:thnxxx a lot we rabena yestor isA,,e7na m3'ltnash fe 7ad awlan,,we mafeesh ena 3safeer bardo walla eh:D:D

Doaa Helal يقول...

بصفتي واحده من البهائم احب اقول لاخواتي في نفس المزرعة فصير جمييييييييييل والله المستعان وحسبي الله ونعم الوكيل انا من امبارح بحسبن كتير اوييييييي فكروني بمحمد هنيدي حسبنت كتير يا حاج ربنا هيستجيبلك
واهم حاجة تفرق معايا في الموضوع كله هو التيتوريال وبواسي نفسي واصدقائي الي ربنا وعدهم بذلك الوحش في التيتوريال ومرة تانيه حسيبي الله ونعم الوكيل وادعو ربنا اننا منكنش احد ضحايا هذا العملاق الكبير وحسبي الله ونعم الوكيل حسبي الله ونعمم الوكيل حسبي الله ونعم الوكيل امتا هنتعامل كبشر مش كبقر بقي
موضوع جميل اسلوبه جميل وصوره معبره وفي انتظار الباقي

shahenda يقول...

بجد موضوع جميل ووصف رائع
وربنا يستر بقى ويعديها ع خير

Rouan يقول...

ههههههههههههههههههههههههههه الموضوع دا رااائع اوى

ربنا يطلعنا من الغابه دى ع خيربس متخفوش انا حاسه ان كل حاجه هتبقى كويسه ان شاء الله

A fugitive يقول...

شكرااااا جميعا وان شاء الله نعدى على خير ..

Ahmed Adel El-Feky يقول...

حلو الموضوع .. وحلو الصور .. وحلوه الداخله .. وحلوه صوره أحمد زكى :D

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة