الأربعاء، 2 مارس، 2011

ادينا بندردش .... القلش سيندروم




      


عودة إلى الكيبورد ... و أحب اقولكم يا جماعة ان زرار
Enter
اتكسر .!!!!!!!!!!!
و محدش يقولي ليه 
المهم اللي عاوزة أرغي فيه النهاردة هو موضوع اقلق الكثيرين
أثناء تجولي حول العالم ( مارة بالإسكندرية و شبرا و راس البر و كل الحتت الحلوة دي )
اتعاملت مع مختلف الشعوب ( الطنطاوية و المحلاوية و الصعايدة و البحراوية الخ الخ الخ )
المهم يعني أثناء دراستي بالسعودية تحديدا كنا متبنيين جروب للمصريين بره
و كنت بسأل الناس من الجنسيات التانية ايه أكتر صفة مميزة للشعب المصري
ناس تقولوكوا
أذكياء
شاطرين في المدارس
فهلوية ( على فكرة هما ميعرفوش يعني ايه فهلوة هما قالولي حاجات كتير فيما معاناها فهلوة )
بياكلوا فول و طعمية كتير (ممممم نو كومنت )
بس واحدة صاحبتي في السعودية قالتلي
ايش جاعدة تدوري عنه ؟؟ انا ما عمري شفت خفة دم زي حجتكم يالمصارية . و الله بتموتون و انتوا عم تضحكوا ( حطوا شدة على الضاد و الحاء )
الترجمة ::
انتي قاعدة بتدوري على ايه ؟؟ انا عمري ما شفت خفة دم زي بتاعتكم يا مصريين . و الله هتموتوا و انتوا بتضحكوا ( بس من غير شدة المرة دي )
فعلا و الله احنا عندنا خفة دم باينة قوي لشعوب بره
احلى نكت النكت المصرية
و الثورة اللي فاتت دي طلعت شوية نكت و مواهب
بس اللي برغي فيه النهاردة مش نكت و هزار المصريين الجميل
انما شيء كده اتسم بالبواخة بس بيضحك و أحلى حاجة انها سيمات بينا و بين بعض بمعنى مش هلاقي حد خليجي جاي يقولي عليها ( الحمد لله )
ألا و هو - القلش -
قلش ليلة و ليلة فهمتوا قصدي
تعرف انك في مصر فقط عندما ترى أبيات الشعر و الأمثال و عبارات الأفلام الشهيرة قد تحولت إلى جمل غريبة
ليخلقوا من كل كلمة مئة معنى
القلش هو فن بلاغي صاعد يعتمد على استخدام الجناس كعنصر أساسي و يا سلام لو حبة تورية معاه هيحبشوا الليلة
ابتدت حكايتي معاه بإعلان شهير !
شوفتوا اللي حصل .. حصل و طحينة .. طحينة من النوم .. نوم من عمري ........... و هكذا
ثم تطورنا إلى الأمثال الشعبية المقلش عليها ::
خير تعمل شرق الدلتا
و اللي اتلسع من شبرا ينفخ في المعادي
ثم أخذنا منعطفا آخر إلى الحكم و الأبيات الشعرية ::
إذا الشعب يوما أراد الحياة ...... فلابد أن يعرف ترددها الجديد
قم للمعلم ( بكسر الميم ) رصلوا الشيشة .. كاد المعلم أن يبيع حشيشا
و بالرغم من ان القلش معروف ان معظمه بايخ إلا ان المضحك هو التريقة على الجملة أو الكلمة الأصلية
ليصبح المقلشاتي هو خفيف الظل بين الشلة
و لكن لا يجب سماع القلشة أكتر من مرة لأن ده ضار جدا بخلايا المخ
كل ده شرح للي هتكلم فيه
أمال كلامي أنا فين ؟؟؟؟
بصوا يا أسيادنا التفسير العلمي للجوء الناس للقلش
هو نظرية ( هم يبكي و هم يضحك )
بمعنى في حاجة اسمها ستوكهولم سيندروم و دي معناها التعاطف الزائد مع المسيء اليك بكثرة
و في حاجة اسمها ميدكال سيندروم و دي معناها هوس نفسي للدكتور انه مريض بكل حاجة بيدرسها
بمعنى ان هناك عامل بيزيد قوي في سيكولوجية البني آدم فيولد عامل مضاد خالص
فالقلش أصلا سيندروم نابع من هم تقيل على الواحد خلاه يفكر في أي حاجة تضحكه فيبتكر التريقة على الالفاظ و العبارات كنوع من التخفيف
فراغ كوميدي في حياة مملة يدفعنا لتوليد ضحكات مضادة لهذا الفراغ و ده بدل ما نموت من الغم !
إذا فالقلش اختراع عبقري من شأنه تسيير عجلة الحياة و قد ارتبط بالمصريين خصوصا لتوفر العاملين الأساسيين لخلق قلشة ناجحة و دول صعب نلاقيهم مع بعضهم في أي شعب تاني
و هما
عامل العبقرية
و عامل الغم
و بالتالي كان الشعب المصري صاحب الصدارة في اصدار النكت و القلشات
لتوافر العوامل البيئية و السيكلوجية بالإضافة للاستعداد النفسي و الوراثي
و لذلك اناشد واضعي الدستور الجديد بإضافة مواد محددة للقلش لأنه ممكن يفلت مننا في أي لحظة
العبقرية الزائدة تولد الجنون
و يا سلام بقى لما يكون مصري عبقري مقلشاتي مجنون
و بكده أكون قلت اللي عايزة اقوله
عندنا في مصر هتلاقي حاجات مش عند اي حد
حتى الطبيعة عندنا تتمصر
ملحوظة : معظم قارئي الكلام الافاضل لم يدركوا ان موضوع التفسير العلمي ده قلش بحت على حالنا
ربنا يصلحنا
و افتكروا أنا لا بحل و لا بربط .... أنا بس بقلش قصدي بدردش

8 قالوا رأيهم:

Heidenröslein يقول...

القلش سيندروم .. لا بجد القلش ده أحانا بيجيب شلل نصفي و رباعي وأحيانا الواحد بيسمع القلشات بيتصدم !

ما شاء الله روان وشاهندة قايمين بالواجب في القلش ده .. بس أنا مش حاسة انه ناتج عن الغم يا رنا .. بحس إنه فضاااااااااااااااااااااا

:D:D
انا مقصدش أزعل أي حد بيحب القلش بس يا ريت بس كل واحد يركز في القلشات عشان بتبقى سخيفة أوقات كتير

تحياتي لرغيك الممتع :)

my own dream يقول...

فراغ كوميدي في حياة مملة يدفعنا لتوليد ضحكات مضادة لهذا الفراغ و ده بدل ما نموت من الغم !

فعلاً ..... فراغ وكوميديا وملل وغم

دردشة ممتعة فعلا

وعزائي لزرار ال Enter

sony2000 يقول...

كلنا معاكي بنطااالب بقانون للقلش
اهو احسن من البلوفر:))

A fugitive يقول...

topic gaaaaaaaaaaaaaaaaaaaaaaaaamed gaaaaaaaaaaaaaaaaaaaaaamed wallahy :D:D:D:D:D:D:D:D

شمس النهار يقول...

انتي رجعتي للتدوين وانا مااعرفش
:))

حمد الله علي السلامة

:)))

Think Pink يقول...

جااااامد جدااا :)
حلو جدا :) :)

Anastasia pop يقول...

THANKS ALL
FOR UR COMMENTS
:D

Amadeus يقول...

مش لاقى زر لايك ,, بس فعلا ممتازة الدردشة الجميلة دى ,, والموضوع كمان رائع :)

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة