الجمعة، 12 مارس، 2010

بيتسحب بالليل ... مش عيب كده !!




خير اللهم اجعله خير كان عمنا حمادة سبع الليل بطلنا المحبوب كل يوم بالليل الساعة اتنين تلاتة بالليل يمشى يتسحب بالليل فى وسط الظلام الدامس الحالك وطبعا سبب انه يتسحب لازم سكون بيعمل حاجة غلط يعنى ....بالراحة كده يمشى على تراطيف صوابعه ويشمر البنطلون بتاع الترنج اللى هوا لابسه عشان ميخبطشى فى البلاط ويعمل صوت فيتعرف أنه سعته بيتسحب بالليل...



واحد اتنين ....شوية سكوت ويقول استر يا رب ....واحد اتنين......يقف يتلفت حواليه ......احلى حاجة فى المغامرة بتاعت عمنا حمادة سبع الليل ده انه بيمشى ورايح لحتة غلط وهوا عارف أن ده غلط ... وعارف برضه أن ربنا شايفه وماشى ويقولك استر يا رب ....

مش عارف ليه ده فكرنى بفيلم جعلتنى مجرما لما قاللها عاوزين نصحى الصبح درى عشان سى أحمد حلمى يروح يخطف الست غادة عادل أو العكس مش هتفرق كتير .....عاوزين نصحى الصبح بدرى عشان ربنا يكرمنا ....تقريبا الحرامى بيعمل كده برضه ...لازم يصحى بالليل متأخر كده على صلاة الفجر يصلى الفجر فى الدماطى ويحط توكاله على الله ويطلع يلقط رزقه .......


عمنا الحرامى : بيمشى وبيتسحب ويقول استر يا رب .......مش حاجة غريبة لما يكون رايح بيعمل حاجة غلط ويجهز نفسه وبيصلى الفجر حاضر ....طيب ده كويس والله مش بعيد بيتوضى قبل كل عملية او قبل ما ينط عشان برضه ربنا يفرجها معاه .....

يمكن هوا بيردد يا رب استرها عشان اتعود عليها والا يه متفهمشى ....وهوا عارف ان ده غلط طيب صاحبنا ده بيسرق ليه والا عمنا حمادة تاعب نفسه ليه وبيتسحب ...طيب ما تنام فى بيتكم أحسن يا عم الحرامى وأنت يا عم حمادة .......شوية تفكير صغيرين ممكن يوقفوك عن اللى أنت بتعمله ....

ساعات عمنا حمادة يبص للسما ويبص للقمر ويقوله ربى وربك الله ......امتى بكرة يبثى أحسن من النهاردة يا قمر ...يا ترى القمر سامعه وحاسس بيه ؟ ......دايما قمرنا ده بنشوفه فى أى حاجة حلوة وفى لياالى الحب وعشان شهر رمضان ....

طيب عمنا الحرامى ده بيختار وقت القمر ميكونشى موجود فيه ....او بمعنى تانى هوا القمر موجود بس مش ظاهر ....والا يكون معنى تانى خالص ان القمر موجود وهوا مش شايفه


تفتكروا لو ربنا كان الواحد شايفه قدامهع ليل نهار كان هيقع فى الغلط ؟

وليه بنتعمد نختار وقت ميكون احنا غافلين فيه ؟....لانى مقدرشى أققول ان ربنا مش موجود ولكن احنا اللى مش حاسين او بنغفل عنه ؟

طيب  ويا رب استرها دى ....طيب ما انت عارف ان ليك رب ....وعاوز ربنا يسترها عليك وانت بتغلط ....بتناقض نفسك ليه ؟


وفى نهاية البرنامج احب أققولك يا حمادة مش لازم تتسحب عشان توصل للتلاجة وتلهط شوية قشطة كتير ...اصحى الصبح بدرى واقلليلك بيضتين أحسن ................

4 قالوا رأيهم:

Yassin Omar يقول...

دا الاخ حمادة سبع الليل طلع له حكاوى قبل كده كمان:D:D
ع العموم هو الموضوع موضوع ايمان لما بيكون الواحد ايمانه حلو فى فترة معينة بيبقى مراقب ربنا فى كل تصرفاته ولما ايمانه بيضعف بالمعصية اكيد بيغفل عنه

وربنا يسترها :D:D

قلب نابض يقول...

أنا حبيت بس أشيد بالمدونة وبتقدمها الرائع الملحوظ
ربنا يوفقكم

Heidenröslein يقول...

بالنسبة للأخ حمادة سبع الليل فحكاويه مش هتخلص ان شاء الله ...
وصح رأيك د/يس

قلب نابض لك جزيل الشكر على المتابعة والتشجيع ...
منور في اى وقت :D

Echo يقول...

طب فى الامتحان ربنا يسترها يا رب افهمى قصدى بقى
ضحكتينى جامد
هيه انا بهزر دول بيحطوا كاميرات مراقبة اللى انا عمرى ما شفتها

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة