الأحد، 22 أغسطس 2010

موت محقق !


الحمد لله وكفى .. ربما فى حياتى الفائتة قبل تلك اللحظة لم اكن ادرك معنى تلك الجملة العظيمة ..

اكتب تلك الكلمات بدون تحضير مسبق وبدون اهتمام بلغويات او معانى والفاظ .. الامر لا يحتمل فعلا ..

اكتب تلك الكلمات بملابس الكرة اللعينة .. نعم اللعينة :@ .. والعرق عليها .. والرمل والتراب يزينونها ( محدش يتقرف انا هاخد دش على طول ) ..

ربما لم التحم مع أمى فى مشاكل بمعنى الكلمة غير مرات يسيرة تعد على اصابع اليد الواحدة .. فعلا .. لكن فى آلاف المشكلات - بدون مبالغة - بسبب تلك اللعينة ..

كم من اصابات وتورمات وكدمات قد لحقت بى بسببها .. وكم من توبيخ وزعل وآلام جنيته من ورائها ..

كم لجأت لأخفاء شنطة الكورة عند احد اصدقائى .. او ارتداء الملابس تحت ثياب الخروج .. كم اختلقت حجج للنزول ومن ثم الهرب الى تلك اللعينة ..

يا سلام لو دورة رمضانية قبل الافطار .. وانت تموت من العطش ولست مستعدا للإصابات .. الاصابات !! .. ربما هى احدى لعناتى هى الاخرى .. بعد اسمى وعدة لعنات اخرى سأخبركم حتما عنها لاحقا ان شاء الله !

المهم الموضوع بعنوان موت محقق .. نعم اليوم ومنذ لحظات كنت على موعد مع موت محقق ..

كالعادة أمى لم تسمح لى باللعب .. لأن ركبتى لم تتعافى من اخر تورم وجروح من اخر دورة رمضانية .. ولأنى كنت مدمر فعلا .. لكن انا بقى كنت حاسس انى تمام - كفاح كفاح يعنى- وطبعا لبست تحت الهدوم وع التراويح فى الزحمة وسط اصحابى لأن الصدفة ان النهاردة كانت العزومة عندى .. واستطعت تهريب الكوتشى والشراب والحمد لله .

ع الدماطى .. تركنا الشفع والوتر عشان المعاد .. وانا انطلقت وهما انطلقوا .. انطلقت لاّخر الدنيا .. الجلاء !! .. الملعب محجوز فى مدرسة النسيجية فى الجلاء .. طبعا كلفِت الموبايل وخبيته كويس فى الشراب التانى - الناس هناك جزارين طبعا - ووصلنا وبدأنا نلعب ..

كلنا نشاط والناس كانوا كبار ومفيهومش نفس يجروا اوى .. المهم قطعناهم كما يقال .. وفى اللحظة الحاسمة حدثت حادثة لا استطيع وصفها .. بجد .. يعنى الهاجمة علينا وانا اجرى تجاه مرماى .. واذا بزميلى فى الفرقة وجارى ( يلطشنى ) بيده كلها - طبعا مش قصده - لكن لأنى كنت بجرى بسرعة وهو بسرعة ومش شايف فحصل اللى حصل !!

عادى يعنى ياما حصلت وقومنا على طول .. لالا .. المرة دى الضربة كانت من تحت لفوق فى منطقة epigastrium ... من تحت لأقصى حتة فى المنطقة دى .. واديله!!

الضربة قوية جدااا وفى الحجاب الحاجز .. بدون مبالغة .. شعرت برئتى -  بتبظ - من رقبتى وبتطبًق فى قفصى الصدرى .. ههههههه .. معرفتش اخد نفسى نهائيا .. وبعدين وقعت ع الارض ممدا فى انتظار الموت .. كله اتلم ودوارية حواليا .. وهب عمو انس اشتغل ..deep inspiration &expiratory gasps .. بموووووووت والناس حتى زمايلنا فى طب محدش عارف يعمل حاجة .. دقيقتين او ثلاث .. مروا كسنوات ..

شوية شوية بقى التنفس طبيبعى بس عمييييق .. وبعدها الحمد لله .. اهى الحمد لله جت .

الحمد لله .. لم اشعر بها بهذه الصورة من قبل .. وإلهى ما تشوفوها يارب ..

ربما يقال اننى لو لم التحق بكلية الطب واخترت دماغى سابقا لكنت لاعبا مميزا .. لكن فعلا بقى ... طظ .. وطظ اوى !!

ربما لابد ان ألقى بالا جديا لحديث امى و أصدقائى طبعا ان ارحم نفسى وارحم امى .. والم نفسى من الاخر ..

الحمد لله يا رب وان شاء الله هلم نفسى وابطل اللى بعمله ..

(بالمناسبة حاسس ان diaphragm بيوجعنى .. يمكن الreceptors اللى انا ازعجتها من شوية .. ويمكن العضلة نفسها .. المهم ان من كتر جريز اناتومى كمان .. بفكر ان ممكن لو الوجع ده استمر او حتى مستمرش يكون فى نزيف داخلى:D.. ( هقول لإخواتى البنات طبعا لو عشان لو حصل حاجة .. ولو محصلش هيداروا عليا .. ويارب ميحسوش بالخطورة ويقولولها او اخويا يشم خبر باللى حصل )

طبعا مش مبسوط لأن الموضوع مش مجهزله .. ومش مهتم بلغة خالص .. بس بجد والله كله وليد تلك اللحظة .. اخش اخد دوش بقى .. وادعووووووووووووووووولى لأنى شفت الموت النهاردة وربنا يستر:S :D


12 قالوا رأيهم:

Doha يقول...

أولا الحمد لله ..
وثانيا ألف سلامة ..

ثالثا .. آدي آخرة الكورة وآدي جزاء اللى ميسمعش كلمة ماما تقولها :D


حمد الله عالسلامة وابقوا خدوا بالكوا من نفسكوا .. :)

Rawan يقول...

حمد الله ع السلامه و ده ممكن يكون انذار من ربنا عشان يحذر حضرتك
و الله انا مريت بتجربه تشابه تجربه حضرتك نتيجه برده عدم سماع الكلام بتاع امى و لسه السنه دى
بس كان يومها فى السباحه وطبعا انا برده مش بارحم نفسى فى السباحه لانى بامووووووووووووووووووووووت فيها وطبعا بدات باستارت واخدتلى لفيتين بدون تسخين و لااى حاجه و حملت نفسى فوق طاقتها لدرجه ان ضربات قلبى كانت سريعه جداااااا و حسيت ساعتها ان قلبى هيخرج من قفصى الصدرى وكنت حاسه انى باموت ومكنش حد معايا ساعتها وكل اصحابى فوق ومحدش بيعرف يعوم وطبعا مدربه النادى انا باعوم احسن منها اصلا و فعلا و الله حسيت انه انذار من عند ربنا و اهه الحمد لله ربنا هدينى اليومين دول و مبطله

و ناويه لو بعد رمضان هاحاول اقنع امى انى انزل تانى و لو مش اقتتنعت مش هخالفها و عليه العوض ومنه العوض فى رياضتى المفضله و ان شاء الله ربنا يعوضنى
و الغريب ان والدى هو اللى كان معلمنىالسباحه و هو اللى حببنى فيها
يعنى هما اللى يعملمونا وهما اللى يقولونا بطلوا بعد كدا بتعلمونا ليه من الاول؟!!!!!!!!!!!!!!!!!!!!!!!

omnia saif يقول...

معلش الحمد لله علي كل شئ
الموضوع فكرني باخويا اوي وكان برضو بسبب الكورة
مرة راح يلعب كورة بس متهيألي ماما كانت راضية:D
المهم ساعة كده ولا حاجة علي غير العادة لقيناه ياعيني راجع مش عارفة اشوف بقه ولا مناخيره من كمية الدم ياااااااه كان منظر فظيع:(:(:(
واحد صاحبه ومن نفس فرقته كعبله:D فوقع علي دقنه ومناخيره وقعه تمااااااااااااااام
طبعا مش محتاجة اقول ان ماما قعدت تزعق كتيييييييييييير وكانت ليلة زي الفل ودي اخرة الكورة وادي اللي خدناه منها و..و..و..و..:D
اتعقد بقي وقعد فترة طويلة مينزلش ولا كلية ولا كورسات بسببها واتعقد من الكورة بقي وبتاع وما شاء الله اول ماخف الدم حن وابو تريكة اللي جواه فاق ورجع يلعب تاني:D:D ولا كأن كان في حاجة
يلا بقي معلش وان شاء الله خييييييييييير:D

Doaa helal يقول...

اولا حمد لله علي السلامة وربنا يحمي الشباب كلهم من شر الكورة وغيرها من الالعاب العنيفة الي بتلعبوها
انا ليا ملاحظتين اولهم كلام والدتك اكيد هي خايفة علي مصلحتك والله بيبقوا شايفين حاجات احنا مندركهاش فلازم منعترضش علي كلامهم
ثانيا ان انتو سبتوا الصلاه عشان تلعبوا لا خير في عمل اضاع الصلاه خصوصا لو كان العمل ده لعب الواحد والله بيواظب علي التراويح مخصوص عشان الركعة الاخيره والدعاء الي فيها معرفش دعاء الدماطي حلو ولا ايه
بجد ربنا يحفظ الجميع ولاتلقوا بايديكم الي التهلكه والله الكورة دي اكبر هلاك خصوصافي الصيام

Ahmed Elfeky يقول...

شوف يا باشمهندس وعلى عكس الجميع .. مش حمد الله على السلامة .. !

Alice يقول...

ربنا بيستر
الحمد لله .. جت سليمة

Think Pink يقول...

ألف سلامه

جت سليمه الحمد لله

بس فعلا الموضوع ده انا هحاول اخلى اخويا يقراه لأنه تقريبا نسخه من اللى قولته هوا بيعمله من لعب الكوره من ورا ماما بأى حجه
بس بيتقفش
والكدمات أخويا تخصص بمعنى الكلمه

ربنا يكرمكم وحب الكوره المبالغ فيه ده يهدى شويه
:)
:)
:)

أبو ربيع يقول...

ههههههههههههههههههههه
والله مش عارف اقولك ايه يابنى الف سلامه يا بيضه ولا اقولك تستاهل يلا

مش عارف ليه بتاخد لعب الكوره على اعصابك كده اتعلم منى يابنى خليك ريلاكس
لو الكوره طالعه بره تولع بجاز هقطع نفسى يعنى واقعد اجرى وراها ولو معرفتش اجيب جون المره دى اجيبه المره الجايه باذن الله و بجيب اجوان وفرقتى دايما بتكسب :D
حاول يا يس تخلينى قدوتك فى لعب الكوره دانا بكسبك على طول :P او احيانا يعنى

بالمناسبه يا يس كده رصيدك فى لسته الابتزازات الى عندى بيزيد :D

عارف يا يس انت لو سمعت كلام مامتك انت بعد كده ملكش عين انك تتكلم عن السيطره وابقى سيب السيطره لاصحابها الحقيقيين ;)

manar يقول...

معلشى حصل خير وحمد الله على السلامة بس التعبير والله حلو معنك موش محضرله

قبل العالم الأخير يقول...

جزاكم الله خيرا جميعا ..ده من زوق حضراتكم والله..

وان شاء الله اعدل مسارى فى كام موضوع ومنهم اكيد الكورة ان شاء الله..





فقى والسعدنى: مهو عشان انا مبلعبش لعب البط بتاعكو ده..مش عايز اتكلم بس اكتر ..لما تروح تتغلب وتبقى طالع مبسوط يبقى انتو معندكمش دم..ما علينا..سعدنى منا لسه امبارح مكتر بتوعك برده ولا نسيت(سلملى على طنط ها-طنط اللى بتفهم :D:P)..

جزاكم الله خيرا جميعا تانى يا جماعة متشكررر جداااا

amany elshaer يقول...

الف سلامه يا دكتور و ده اخرت الي ميمسعش كلام ماما زي ما بيقولوا ههههههه بس هما اهالينا بيكونوا خيفين علينا من كل شر ولو طالوا يخبونا في عينيهم مش هيقولوا لاه(مع اني مش حسه بكده بش كل واحد و اهله بقي) بس في نفس الوقت بيبقي كل واحد متمسك بهوايه او حاجه بيعملها سواء برغبه اهله او ضدها و بصراحه كل واحد بياخد نصيبه يعني اللي حصلك ده يا دكتور لو مكنتش في لعب كوره برده كان هيحصل ماعدا مبنعملش حاجه غلط او حرام يبقي ده كده تمام احسن حاجه في الدنيا ده ان الواحد يخدها بوشه مش بظهره

قبل العالم الأخير يقول...

شكرااا يا دكتورة جزاكم الله خيرا...وانا اصلا طول عمرى واخدها بوشى:D..وكنت بقول كلام حضرتك واكتر ..وهو صح بالمناسة..لأن دى حوادث قدرية ملهاش علاقة بكينونة نشاطى يعنى :D..بس برده بعد شوط كبير اعتقد يعنى ..لالا لازم نوازن ومنخدهاش بوشنا اوى اوى كده..واكيد كل الاهل بيكونوا خايفين على اولادهم طبعا ..كلههههههم :D

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة