الأربعاء، 18 أغسطس 2010

كلمات مبعثرة


الدنيا جميلة ..هى فيها حروب وناس بتموت وفقر ومجاعات بس الدنيا جميلة .. فيها الاخ بيقتل اخوه والصاحب بيخون صاحبه ..بس هى جميلة ..فيها امراض وسرطان وناس محتاجة دم ومحدش بيتبرع .. بس هى جميلة .. فيها الناس مش حاسة ببعض وناس بتدوس على ناس وناس بتشترى ناس .. بس هى جميلة .. فيها ناس نايمين على ريش نعام وناس مش لاقيين حتة يناموا فيها وناس بتنام فى الشارع وناس مبتنامش من الخوف من صوت الرصاص والقنابل ...لأ الدنيا مش جميلة

الانسان عندما يكون سعيدا يرغب فى ان يكون كل من حوله سعداء قد تجد شخص لمجرد انه سعيد ممكن يعطى متسول مائة جنيه او كل المال الذى معه .. يعدى اشياء كثيرة كانت ستغضبه فى وقت آخر.. تلمحه يكاد يطير من شدة فرحه ..عينيه يكون لهما بريق خاص غريب يلمعان ممكن ان تلمحهما فى الظلام

ليس من الضرورى ان تعرف الشخص حتى تبتسم فى وجهه او تكون ودودا معه فى ناس عدوانيين مع الغرباء وفى ناس ودودين مع كل الناس حتى مع الغرباء اللى بيستريحوا لشكلهم

الانسان افضل له ان يكون عبد فى مملكة الواقع والصدق و الحقيقة على ان يعيش ملك فى مملكة الاوهام والزيف والكذب

لا تنتقد تصرفات الناس وتدقق فيها معلش شوف نفسك الاول ..لو كانت حاجة قاتلة روح قله علشان يغيرها .. وبعدين انت مين اصلا علشان تنتقد تصرفات حد ..وكل واحد حر فى تصرفاته ..انت مالك يعنى ..مثلا واحد بياكل بايديه مش بالشوكة والسكينة عادى ..

نقل الاعضاء ولا تجارة الاعضاء فى دول كتير بتسمح بيها منها تقريبا مصر هم مش مقدرين خطورة الحكاية دى ولا ايه ؟ .. كده الفقير حيبيع عضو منه علشان ياخد فلوس والغنى يشترى .. ده غير الدكاترة اللى معندهمش ضمير يقوموا واخدين كبد ولا حاجة من راجل بيعمل اى عملية تحت تأثير المخدر ويبيعوا الاعضاء دى .. ولا عمليات الخطف اللى بيكون هدفها انهم ياخدوا اعضائه .. انا سمعت مرة ان وصل بيهم فى الصين انهم بيخلفوا عيال علشان يبيعوا اعضائهم

عارفين حكاية ان الانسان يفضل انه يكون قاتل على ان يكون مقتول لأنها الطبيعة البشرية انا قعدت مدة طويلة انكر تلك الحقيقة بس هى صح للأسف .. بس هى على فكرة على حسب لو حد عزيز عليك تفضل طبعا انك تبقى المقتول

7 قالوا رأيهم:

Doha يقول...

عجبتني الكلمات اللى مش مبعثرة دي
بس اكتر حاجة مبعثرة هو انك تبدأي الجملة بالفصحى وتكملى عامي
بحس انها بتبقى عامي احلى

بس هقولك ان الدنيا جميلة زى مفي حروب وحاجات تانية تخليكي تقولى الدنيا مش جميلة بس فى سعادة واطمئنان وخير كتير لما تشوفيه تقولى الدنيا جنة بس هي دي سنة الحياة .. حلوة ومرة .. ولازم نعيش فى النهاية !!

مش عارفة اقولك ايه على موضوع تجارة الأعضاء ده بجد .. ربنا ينتقم منهم !

موضوع جميل يا ايمان

Alice يقول...

شكرا يا ضحى
مهو اى حاجة بقى فى الاسلوب والعنوان اصلا مش عاجبنى انا قعدت عشر دقايق وملقتش عنوان غير ده .. انا اصلا زهقانه
بس الدنيا مرة اوى

Doha يقول...

بصى لما متلاقيش حاجة خالص سيبيه فى الدرافت وانا اظبطلك اسم
عارفة يا ايمان مواضيعك جامدة وكل نقطه عاوزالها توبيك لواحدة أصلا
والدنيا هتبقى مرة لو احنا شايفينها مرة
زى مفي الوحش فى الحلو يا ايمان
الدنيا عمرها مهتبقى حلوة على طول .. و لا كلها مر وأحزان
بصى لنص الكوباية المليان
وححطى فى اعتبارك الفاضي :))

Rouan يقول...

ايه يا ايمى ممكن تكون الدنيا مش جميله بس انا مش هاقعد انكد ع نفسى و اعيط
انا هاحط قدامى هدف واخليها جميله بطريقتى عارفه انا مره قرات فى قصه الحضاره ل ول ديورانت قال جمله دخلت مذاجى ومش قادره انساها قال نحن لا نريد تحرير الفكر بل نريد ترويض الاخلاق

دايما الناس بتفكر ان الحضاره بتقوم عشان الفكر و الامكانيات و كدا
بس انا مع ول ديورانت الحضاره بتقوم بالاخلاق و لو قدرنا نروض الاخلاق مش هيبقى فى مشكله نهائى

بس زى ما انتى قولتى الاخ بيقتل اخوه و الدكاتره بيسرقوا المرضى و النصب و السرقه كل ده ازمه اخلاق

و كل اللى ممكن نعمله ان احنا نروض اخلاقنا و اخلاق ولادنا و لما كلنا نعمل كدا بعد كذا سنه هتلاقىنا من صناع الحضاره

موضوع جميل يا ايمى بس عايزه اتناقش معاكى فيه اكتر ومن فضلك حضريلى معاد

Eslam Fouda يقول...

الدنيا جميلة للي عايزها تكون جميلة

أبو ربيع يقول...

قال رسول الله صلى الله عليه وسلم: "الدنيا ملعونة ملعون ما فيها إلا ذكر الله "
الدنيا بطبيعتها مره ولا يحليها الا القرب من الله وذكر الله وفقط.
فهى سجن المؤمن وجنه الكافر
سبحان الله وكان الدنيا تزداد مراره وضيقا على الناس حتى يفروا الى الله

manar يقول...

الدنيا حلوة بالخير اللى فيها ووحشة بالشر اللى برضه فيهاوكل محنا كترنا من الخير اللى فيها كل ما كانت حلوة وجميلة اكتر لان عمل الخير بيبعث السعاده فى فاعله واللى معمول فى الخير ولو سالتم اى حد امتى بجد بتشعر بسعاده حقيقيه هيقول لما بعمل عمل خير عشان ربنا اكيد بيكون راضى عنى وزى محنا لازم نعمل خير عشان رضا ربنا وبالتالى تحلى الدنيا فى عيونا لازم برضه نقضى على الشر عشان ميهزم الخير ويضيع حلاوته وبجد الموضوع حلو يا ايمو

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة