الثلاثاء، 17 أغسطس 2010

حكايات وبنعيدها


فى احد الدور المصريه من حوالى نصف قرن او ما يزيد .. المشهد التالى :


الجد : دستوووووووووووووووووووور ! حد كاشف راسه ؟


الام : لا يابا الحاج دى البت باتعه..


الجد : ازيك يا بت يا باتعه ..؟


باتعه : الحمد لله كويسه بحسك ونفسك يابا الحج .. انا هاجوم اجيبلك الشاى ..


الجد : ينورلك طريقك يا بت و اشوفك فى الكوشه جنب عريسك .




تقوم باتعه ليجلس الجد مع الام ويدور الحديث :




الجد يتوجه فى الحديث الى الام : تعالى اجعدى فى ريحى .. ويهمس فى اذنيها هيا البت باتعه مجلهاش عريس لحد دلوقتى ؟


الام : لا يا ابا .. دى البت داخله ع الخمستاشر و لسه مجلهاش عريس .. انا بدأت اتخرع يا ابا .. البت بارت يا ابا .. وهتقعد جنبى !!



الجد : عندك حق و الله اديكى شوفتى البت عنبه _ام سحلول _اتجوزت وجابت سحلول و هيا عندها 10 سنين .


الام : وانا سمعت ان هيا حبله فى العيل التانى اهه .!


الجد : خلاص انتى ايه رايك فى الواد هيما ابن كبريته ؟




الام : ايه الواد هيما ده مبعرفش يفك الخط يا ابا .. و البت بتعه ما شاء الله بفوووووو حابس كابس خارجه من 3 ابتدائى انت عايز ترمى البت و لا ايه يا ابا !!!!




الجد : يا بت ميبجاش عجلك تخين .. امال ميعبش الراجل الا جيبه ( و جزمته ) و الواد ماشاء الله كسيب وبواب جد الدنيا .. ده غير الجيراطين اللى ورثهم عن ابوه وعنده شوقه مطرحين وعفشه مايه .!




الام : يادى الهنا يا دى الهنا مطرحين .. ماشى يا ابا اللى تشوفه .. انت برده جدها وعارف مصلحتها .




الجد : خلاص انا هاكلم جده النهارده فى العشيه انا وهو بنقعد نلعب صلح فى الغيط .




ثم يستكمل الجد الحديث : يللا فوتكو بعافيه...... سوكى ع الشاى يا بت يا باتعه !




وينصرف الجد من باب الدوار .






تعالو احنا بقى نتكلم ونتحددث












الحوار ده كان بيحصل زمان .. تفتكروا ده مبيحصلش دلوقتى ؟؟؟ اعتقد ان الفرق انه كان زمان بيحصل فى بيت من الطوب اللبن انما دلوقتى فى بيت من الطوب الاحمر!



انتوا مصدقين فى موضوع ان الفكر اتغير و احنا اتقدمنا و الناس بقت ارقى و جو الكلام الحلو ده؟ ( هه ده احنا اللى طبخينه )
و ان موضوع تاخر الزواج ده مبقاش بيشغل بال الاهل ؟؟


انا شايفه ان كل اللى حصل ان قاسم امين دعا الى تعليم البنت زياده حبتين
فالبنات و الاهل اتشغلوا شويتين
و طلع عينيهم وشيقيوا فسوتين
فالموضوع بان

كان الناس عقلها اتقدم و ان الاهل مبيفكروش فى الجواز طبعا ده غير ان كل البنات بتبقى مشغوله فى الدراسه و بيخلصوا ع 21 سنه ( قابل للنقصان ) .. ده طبعا بعكس بنات طب اللى بيخلصوا ع 24( بس دى قابله للزياده )




بس لسه هو هو الحوار بيحصل فى كل بيت .. بس طبعا بعد سن العشرين و الكلام ده يبدأ ..
البت هاضيع
و البت هاتعيش وتموت وحيده
و تلاقى اللى يقولك البت معمولها عمل و مش هيتفك الا كمان 30 سنه
و اللى يقولك نفسى اشوف حته عيل يقولى يا تيته و جدو (عاجبانى اوى حته عيل طب ما يقولو طفل ؟ مش موضوعنا )

و الله انا حاسه ان مصر معمولها عمل ومش هيتفك اللى الابد
عشان متعلق فى نجم مبيظهرش الا كل مليون سنه
يا ترى معنى ان الفكره تتاخر كام سنه يبقى نقول الناس معدتش بتفكر زى زمان ؟؟؟؟


و بالمناسبه أبشروا اللى بيقولوا الغرب غزونا بافكارهم و ان احنا بقينا نقلدهم و ان احنا هنتخلى عن مبادءنا
متخافوش الناس لسه زى ما هيا الفكر زى ما هو و متقلقوش هيفضل زى ما هو .......... و دى حكايه من الحكايات اللى بنعيدها


( شكر خاص لامنيه سيف لمساعدتى ع اتقان هذه اللهجه وجلوسى معها ساعات طويله فى غرف الشات تسايرنى بهذه اللهجه )



13 قالوا رأيهم:

Doha يقول...

أو لا انا معترضة على اسم هيما اللى كنتي كاتباه بدل عتريس
بقى باتعة تتجوز واحد اسمه هيما
معندكيش حس فني
وضحكتيني اوي وانا بقرا الموضوع
بصى يا ستى هما زمان كانوا بيتجوزا وهما فى الخمستاشر صحيح
وفعلا علشان بقى فى اولويات دلوقتي فى دماغ الاب والام البت لازم تخلص تعليمها الأول
بس نسيوا ان الزواج المبكر مهما كانت سلبياته مهم للولد والبنت
بس المشكلة انهم عاوزينهم يعتمدوا على نفسهم
والفكرة دي كانت جاية من العيال نفسهم مش الاب والام
فعلا التفكير ده متغيرش لسة الناس بتنعي حظها السىء للبت او الواد الى لسة متجوزوش
بس انا حاسة انهم بيبقوا عاوزين يجوزوا بنتهم او ابنهم والسلام
وفعلا بيضوروا على الشوقة المطرحين وعفشة المية :D:D

المهم يا روان ان الموضوع عاجبني
مع ان ردي ملغبط بس انتي اكيد هتفهميني :)

Ahmed Elfeky يقول...

حلو الموضوع :D

Ahmed Elfeky يقول...

واه الجواز المبكر ده كويس بس بصى حواليكى مفيش حد عاوز يشيل مسؤلية بدرى .. يعنى لا الراجل عاوز يشيل مسؤلية ولا البنت عاوزة تشيل مسؤلية

YASMINE يقول...

جمييييييييييييييييييييييييييييييل اووووووووى يا روان :D:D:D:D

Rouan يقول...

@do7a
شكرا بس خلى بالك ده واحد بواب قد الدنيا ده غير الشوقه المطرحين و القيراطين يعنى مش اى كلام و ع العموم انا رجعت الاسم اللى كنت مختاراه

@ahmed el feky
شكرا و فعلا زى ما حضرتك قولت ان فعلا محدش عايز يتحمل المسئوليه وفعلا الناس بتفكر انها تتعلم و تستمتع بحياتها الاول بس الزواج المبكر برده مش بيبقى جميل فى كل الاحيان وو مفيش حاجه بتعلم فى الدنيا دى قد الزمن فكل ما الناس كبرت كل ما تفكيرها بينضج بس الزواج المبكر بالنسبه لزمان كان حلو جدااااااااااا لانه البنت لا بتتعلم و لا حاجه

@yasmine
شكرا يا ياسمين

Alice يقول...

موضوع جميل يا روان

shahenda shalaby يقول...

جامد اووووى ياروان

Doha يقول...

رخمة رخمة يعني
:P:P

omnia saif يقول...

ههههههههههههههههههههههههههههههههههههه
روان يامشرفاني:D:D
انا كده اطمنت عليكي الحمد لله يارب ساعات الشات مراحتش علي الارض:D:D
شكر ايه ياروروووووو ده واجب عليا:D:D
بس بجد موضوع جميييييييل ياروان

Rouan يقول...

شاهى و ايمى
شكرا ليكو جداااااااااا

ضحى
شكراااااااااااااا و ماله مش عيب

امنيه
انا قلتلك مش هاضيع تعبك و مجهودك و الله اخر شات اول امبارح عملت مفعولها

Alice يقول...
أزال المؤلف هذا التعليق.
manar يقول...

بصى يا به ياللى اسمك رورو الفكرة دى دخله جوا جوا اعماق نفوغى وعجبانى جوى جوى بس برضه حبا اتشكر للبه اللى اسمها دودو مهو انتى كونتى جيلالى جبل كده يعنى كلام مطرطش كده انكوا كنتوا بتتودودوا باللهجه دى فى التلفون او فى البتاع الجديد ده اللى نازل جريب وبتقدرى تتكلمى فيه من غير سلك ولا فيشه يا حلاوة يا ولاد وللا النت يا لهوى يا لهوى ده بيقدر لافندى اللى قاعد جواه انه يوصل الكلام بصدق وامانه لى صحبتك اللى بتكلميها على البتاع ده اللى اسمه الشات وللا مجلوكيش بجا على التلفزيون منا عارفه انه جديم بس انا برضه موش داخله جوا جوا جوا اعماق نفوغى انه ممكن يكون فى رجاله بشنبات وبنات زى الجمر يكونوا جاعدين جواه بيتسيروا دنا مرة واحد كان برده جاعد جواه نرفازنى جومت جبت البلغة بتاعة امى وضربته فوج قرعته بس محصلوش حاجة التلفزيون هو بس اللى اتدغدغ دغاديغ وبويا جام زعجلى وضربنى بالبلغة اللى شحتها من الواد حماصه بنت طنط رشا جرتنا وقالى يا جاهله اللى قاعدين جوا التلفزيون دول ناس كبرات فى البلد وممكن يقطعونى قطيع وطلع خايف عليا وانا اللى كنت مفتكرة انه زعلان على التلفزيون مهو برضه بويا وهو من لحمى ودمى مهو حته مني ..........ايه ده يا بت توهتينى هوا احنا كنا بنتحدث فى ايه يوه نستينى آه آه آآآآآآآآآآهانا كنت بجولك ان الفكرة مليحة يللا سلامات بجه عشان اماى بتنادى عليا عشان اروح احلب الجاموسه اللى فى الزيبه ............

هههههههه البت اللى بتتكلم دى متخلفة وعبيطة موش فلاحة ولا من عصر تانى
بس بجد الفكرة جامده طحن

Rouan يقول...

يا نهاااااااااااااااااااااار يا منار لااااااااااااااااا انتى اكيد مش منار صاحبتى لاااااااااااااااااااااا ده

لاااااااااااااا كفايه واحده فى الشله
ده احنا لازم نقعد مع بعض ضروروىىىىىىىىىىىىىى عشان نشوف علاج

بس شكرا اوىىىىىىىىىىىى ع الكومنت الرااااااائع ده وربنا يستر ع باقى اصحابناااااااا

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة