شخبطة .. على ورقة مقلوبة !

كانت أول مرة امسك قلم من اول مخدت الأجازة , وأول مرة اكتب عربي من اول مدخلت الكلية !! خطي بقى زى خط تلميذ فى تالتة ابتدائي لسة بيخبط فى الحروف علشان تترسم على ورقة الكراسة في المدرسة وهو بيكتب .. بحبك يا مصر .. ! 

ولا اعرف ايه اللى خلاني خدت القلم وجبت ورقة وقولت هكتب أى حاجة تطلع في بالي .. يمكن بس صعب عليا القلم اللى مرمي جنب الكمبيوتر .. بعد ما استولت لوحة المفاتيح على مهمتة .. أو اني حسيت بوحدته .. فقولت أونسه .. زى زمان !

فاكر انت أيام زمان ؟! أول مرة مسكت القلم وكتبت .. أ .. ب .. ت .. ورا المُدرسة .. فاكر انت الكراسة التسع اسطر ؟! ولا انت مش هتفتكرها .. القلم الرصاص هوا اللى هيفتكر الكراسة دي والكراسة المربعات بتاعة الحساب والأستيكة .. وأكيد البراية .. مكناش بنعرف نعمل حاجة زمان غير اننا نبري القلم ونخلى سنة .. حسونة !

بضحك كتير على أيام زمان .. وأتمنى في يوم ترجع تاني  .. وكالعادة تطلعلي ام كلثوم وتقولي .. قول للزمان ارجع يا زمان !

طب ارجع يا زمااااااااااااااااااان 

ومين قال اني هقوله ارجع تاني .. مبحبش أتحايل على حد !

جربت أكتب على الورقة اى حاجة مفيدة .. ولاني حسيت ان شكل الورقة بقى غبي من نكش الفراخ اللى بقى عليها .. ونكش الفراخ ده خطى .. بطلت اكتب .. يدوبك كتبت الكلمتين دول : 

" أحلام اليقظة .. 

من غير كلام ولا سلام .. تقعد تهاني كل يوم قدام الشباك .. بتعمل ايه ياخويا متعرفش .. "

زهقت وطبقت الورقة على بعضها نصين اتنين بالتمام والكمال .. وبعدين اربعة .. - مانتش مضطر تكمل قراية خالص .. ! - المهم اني حسيت بملل فرسمت حاجة غريبة .. طلعت فى الآخر عنكبوت .. وبعديها رسمت وش واحد مخنوقة منه .. أو حاسه انه مخنوق مني فمش فارقة .. المهم ان فى خنقة فى النص .. قلبت الربع التاني .. وكتبت عليه ضحك ولعب وجد وحب .. رسمت شوية قلوب 

وقلبت الورقة تاني 

حاولت اجيب حتة فاضية .. بس أخيرا النت رجع .. قريت حاجة صغيرة .. والنت فصل تاني ورجعت للورقة .. وبدأت الشخبطة والخطرفة بكلمات ملهاش أى معنى ولا علاقة بأى حاجة  ..اه هكتبها .. تدوينة مملة أنا عارفة بس في رغبة ملحة اني اكتبها .. !

:

ها هو خيالها .. يتمايل في أحلامه .. مرة أخرى .. ترى ؟ هل تعاود ذكريات الماضي الغريب الظهور في قلب مشتت ؟!

هل تحبه هي ؟ .. لا أظن .. كنت أعتقد أنها معجبة به .. أخاف عليها .. حقا أخاف !! 

أكره تلك القصاصات الملقاة على عتبة أفكاري  ..

انتظرت .. وليت انتظاري .. يثمر .. وتكون السعادة قد كتبت لي  !!

أشباه أصوات تتعالى 

أشباه وجوه

حلم .. في منام .. 

بلا نائم !!

بحلم .. بكره .. بحب .. بخاف .. بخرف .. معرفش !!

Mad ?! Crazy ?! Insane ?! At least I've found something I could talk to .. instead of talking to  myself 

خلصت خربشة ورفعت الورقة قدام الشاشة وهي متطبقة .. النور بيعدي من الورقة ويخلى كل حاجة باينة .. بقى كل الكلام فوق بعضه .. اللى مايل واللى متظبط .. واللى مش باين بسبب كلام تاني جه فوقه .. والى واضح اوي لان مفيش حاجة تغطيه .. واللى بالمقلوب ..  عرفت ساعتها ليه بيقولوا أى حاجة بتتكتب يتبقى بتعبر عن اللى جواك !

ورقة ملهاش أى لازمة .. بس أدينا بنغير جو .. !