الأحد، 15 أغسطس 2010

اديني رمضان


 
رمضان كريم




الله اكرم




كل سنة وانت طيب




كلام كتير اوي بنسمعه في الشهر ده و طبعا اكتر حاجة كلنا بنسترخمها لما عمو او طنت يقولو


هو انت صايم و لا زي كل سنة ؟




( كلمة مستفزة جدا )




طبعا بنرسم ابتسامة صفرا و تقول لا زي كل سنة








***********************




للاسف كل ما بنكبر فرحتنا برمضان بتقل عما كنا اطفال مع ان مسؤليتنا فيه بتكبر


يعني زمان كنا نروح نشتري فانوس


تدفع للمسحراتي عشان يقول اسمك بالليل ( مع ان الناس بتكون نايمة )


تروح الصلاة عشان ترخم على الناس و تمشي بين الصفوف


و دي بصراحة اول ملاحظة المفروض ما نعملهاش


لان بقى فيه لماضة غريبة قي الاطفال


دا حتى النعش اللي في الجامع فاكريته لعبة




****************




السحور الكبير


سحور اول يوم في رمضان بيبقى له طابع خاص


المشكلة اننا كلنا مش بنفتكر ان رمضان بكرة


و يبقى الدكر يبنزل و يعرف يجيب سحور من عند اى بقال


لان اي بقال قدامه 100واحد على الاقل


اصل رمضان بكرة


كل سنة وانتو طيبين



*********************




فطار اول يوم في رمضان


عمرنا ما هنتعلم ابدا لازم ندبها في الاكل


و طبعا بنحتاج مساعدة علشان نقوم من على السفرة


و السنة دي في انتخة غريبة بعد الفطار


الناس بتبقى واقفة في الصلاة مش عارفة القبلة فين


و حالة من التتييس طبعا مع العرق من الحر



*************************




من اهم الاكتشافات السنة دي بالنسبة لي


ان مش كل الناس بتصلى الجمعة في الايام العادية


لان الجامع ما فيهوش مكان لرجل نملة


و تلاقي الراجل ساجد جنبك و بيقول


يا رب استجيب بقى يا رب


ايه قلة الذوق دي  !!!!!!!!!!!!!




********************




التراويح


وجبة رمضانية دسمة


وياسلام على تراويح النادي


بس بيكون تجمع حلو


و اكتر حاجة بتميزها العياط


في شيوخ متخصصة في الموضوع ده


طبعا في ايات الواحد بيقشعر او يعيط فيها


لكن العياط عمال على بطال ده لاي آيه كتير اوي


و ياسلام لما بكون فيه تصوير الناس بتابع الكاميرا


و اول ما تتسنتر عليه


يغوص في بحر من الدموع و يقول مع نفسه كده


ياالله




***************************




و اخيرا المسلسلات


اعلانات المسلسلات السنة دي تعمل لوحدها


وقت مسلسلين على الاقل


بس دي ظاهرة كويسة


لان اللي بيزيد عن حده بينقلب ضده


فالناس ممكن تتضايق من كترها




*****************




لكن رمضان يظل احسن شهر في السنة


ببلحه بخشافه بعرقسوسه اللي انا مش بحبه


و ربنا يوفقنا لصيامه و قيامه ان شاء الله













7 قالوا رأيهم:

Heidenröslein يقول...

موضوع جميل شمل سلبيات كتير
موضوع الفطار دلوقتي الواحد محتاج يشرب اكتر من انه ياكل بس مسمنعش اننا فعلا بندبها
شعب مصر شعب أكول

لكل حاجة جانت سلبي وايجابي
فى ناس لسة بتصلي وبتتقى الله بجد فى الشهر ده
بس للأسف الاغلبية هما الغلط

ربنا يوفقنا لصيامه وقيامه ان شاء الله

Echo يقول...

موضوع جميل وظريف .. بجد يعنى شر البلية ما يضحك
ربنا يوفقنا فى صيامه وقيامه ان شاء الله

shahy shalaby يقول...

موضوع حلو بجد
وشامل لكل اللى بيحصل فى رمضان من سلبيات وايجابيات
بس هيفضل برده احلى شهر بالنسبه لى
لانبحب فيه تجمع الاهل والناس بتبقى طيبه كده وبتخاف على بعض على عكس باقى الشهور
وكمان احلى حاجه ان رمضان بيجى بعديه العيد ودى اكتر حاجه بتفرح كتييييير من الناس
بس الموضوع جميل

Think Pink يقول...

جميل جدا
ومعبر
اسلوبه عاجبنى
:)

miramar يقول...

موضوع حلو ..وفعلا شامل لكل الي بيحصل
وخاصة ان الناس مش ملتزمين بالصلاه ف المساجد ولو حتى يوم الجمعه ..
بدليل ان في اضعاف مضاعفه مش بتظهر غير للتراويح
ربنا يهدي الجميع ..
بس بالنسبه للموضوع .. فهو فعلا ما قل ودل

ربنا يهدينا لصيامه وقيامه

Echo يقول...
أزال المؤلف هذا التعليق.
A fugitive يقول...

تمااااااام يا ابو اسلام..بس نسيت اول يوم رمضان فى بيت العائلة..والدوشة واللمة و الاكل طبعا...بس رمضان السنة دى غريييييب جداااا بالنسبة ليا ع الاقل..تأربع ازازة مية كبيرة او يمكن ازازتين وبس...والله فعلا الاكل ملوش هيبة رمضانات قبل كده..اما السحور فالموضوع ده يفرق مع اهالينا مش احنا يا بتوع هريدى والجعان ;)

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة