الاثنين، 15 فبراير، 2010

*



بسم الله الرحمن الرحيم 

شعور غريب يحيط بي الآن ..مرة أخرى يقف قلمي حائرا لا يدري من أين يبدأ حديث قلبي ...سأترك قلبي يخرج ما في جعبته كيفما يشاء .




الحب ... نعم هو ذلك الحب ...

شعور يألفه قلوب الجميع ...مشاعر تفيض تجاه شخص ما..ترغب في رؤيته...يؤنس وحدتك...تخاف عليه...تقف بجانبه وقتما يكون في حاجة إليك...تسعد لابتسامته...وتحزن لغضبه ...

لكن ذلك الحب اليوم لا يمكن الاستغناء عنه ..هو حب الصديق لصديقه ...

مش عارفة بجد اقول ايه

اصعب حاجة فى العالم ان صاحبك يزعل منك
او انك تزعل منه
انك تبقى ماشي جنبه فى الشارع ومش عاوز تبص فى وشه
اصعب حاجة ان لما يكون صاحبك زعلان منك ومستنيك تعتذر
وانت ولا فى دماغك
تبقى انت متستاهلش انه يحبك او يخاف عليك
ومع الوقت بيستسلم للأمر الواقع وانت بالنسبة له انتهيت 

لو حد يعرف يعيش من غير صاحبه يبقى الانسان ده معقد نفسيا

بيبقى احساس وحش اوي لما تتصل بصاحبك فى التليفون ويرد عليك وهو ملوش نفس يكلمك
ولما تسأله يهرب ويروح لموضوع تاني
حاجة لا تطاق لما تزعل مع صحبك وتفضل لشهرين متكلمتوش ولا حاولت تعرف ايه اللى مزعله وتتصافو بينكوا

ده شهرين

انا مزعلة صاحبتي من سنتين
وبكلمها فى التليفون اطمن عليها بحس انها عاوزة تقفل السكة فى وشى
بفكر كتير اصالحها ازاى ؟
او اعملها ايه 
او ابدأ الكلام معاها ازاى ؟
طب اكلمها امتى 
؟
بكرة ولا النهاردة ولادلوقتي ؟
هتقولي ايه ؟
ولا هتتقبل كلامي ليها ازاى ؟؟

بعيش فى دوامة أسئلة كل يوم وبفكر فى الموضوع ده كتير 

بس السؤال اللي بيتعبني بجد
هي هيبقى عندها استعداد نرجع اصحاب تاني زي مانا عندي استعداد ولا لا ؟

هتقولوا عليا هبلة علشان بحاول ارجع صحوبية بقالها سنتين متعلقة فى الهوا
بس انا عارفة اني غلطت فى حقها كتير

مش مهم نرجع زى الأول
بس على الاقل لما اكلمها ترد عليا كويس
ولما اشوفها متحاولش تهرب مني 

اللى هعمله اني هجيبلها هدية فى عيد ميلادها 
هو بعيد شوية بس هتبقى مناسبة اتلكك بيها عشان اتصل بيها
او حتى اروحلها
ونقعد مع بعض قعدة صفا
هتبقى متعبة 
ليا وليها
بس بعديها هرتاح
حتى لو كان الموضوع بالنسبة لها اتنسى 
بس عشان ضميري يبقى مرتاح
لاني فعلا بحبها
وبعزها اوي

لانها فى يوم كان اسمها صديقتي ...




5 قالوا رأيهم:

Ahmed Adel El-Feky يقول...

وانا بقرا الكلام ده حسيت فجأه ان الكلام ده ليا :D

بصى تقريبا ً أنا مريت بنفس الحاجت دى .. لأ عارفة المصيبة انى كنت غلطان غلطة شنيعة .. شنيعة إلى أقصى درجه :D لأ وبتمادى كمان :D ومش هقولك كنا بنشوف بعض فى الشارع مبنسلمش على بعض .. ولما كنا بنيجى نخرج لو انا خارج مع الشله يبقى مش هيخرجوا ولو هما خارجين أنا مش هخرج .. وبالظبط قعدنا ستة وتسعين يوم محدش فينا يعرف حاجة عن التانى إلا تشاش كده .. بس عارفة صدقينى الإعتذار يخلق المعجزات .. كلمه أسف دى ليها مفعول السحر بس تكونى مؤمنه بجد انك غلطتى فى حقها .. وهيا لو قولتلها أنك أسف على كذا وكذا هتلاقيها هيا كمان تقول انها برضه غلطت فى حقك فى الجزء ده وده .. بس خليكى صريحه إلى أقصى درجه وصدقينى المشكله هتتحل إن شاء الله وخليكى واثقه إن صحوبيتكم هترجع أحسن من الأول وبجد والله ما كلام .. بس إعتزرى أو حتى فوتى عليها فجاه فى البيت وخشى عليها وأعتذرى وقوللها انك أسفه وسيبيها وأمشى صدقينى هتكبرى فى نظرها اوى وهتعرف انك صاحبتها بجد
:)

بالتوفيق :)

Un broken Arrow يقول...
أزال المؤلف هذا التعليق.
Heidenröslein يقول...

جزاك الله كل خير يا اعلامي احمد على النصيحة دي ..
فعلا الاعتراف بالغلط بيعمل المعجزات والاعتذار اول خطوطات الصداقة بجد ..

وانا كتابتي للموضوع والله كانت رد فعل لاكتر من موقف واكتر من كلام بقراه عن الصداقة اللى مبقاش ليها قيمة ..واللى صعب اوي ان حد يضيع صديق بجد مش هيلاقي زيه تاني...وصعبة اوي لما تكون مستني اللى قدامك يعتذرلك وانت ولا في دماغك..

ويمكن الموضوع مع البنات اصعب لان البنات بيبدأو لوم وعتاب ويفتكروا ايام زمان فبالنسبة لي الموضوع مش هيبقى بالسهولة دي ...
والحمد لله والله الواحد بيفرح لما يشوف اصحاب اتجمعوا تاني وربنا يوفقكوا دايما ويخليكوا لبعض
ويهدينا كلنا ...

Un broken Arrow يقول...

it is invain
to put the blame
u and i
have made bad the same

Heidenröslein يقول...

Great that u know that both treated each other wrong....But True Friendship never say INVAIN

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة