الثلاثاء، 1 مارس 2011

أدينا بندردش ..... الناس اللي واقفة ورا أي حد


 
يااااااااااه 
ما صدقت يوم 25 فبراير ييجي عشان أحتفل مع الناس بمرور شهر على الثورة الخالدة .. و بمرور يوم على ثورة الطلبة الشقيانة اللي مصدقت تاخد أسبوع أجازة مرة من نفسها
لأجد النت فصل .. و كأنه بيقولي ارجعي افتحي برنامج وورد تاني بدل ما تفتحي الفيس ولا وكبيديا



يااااه كنت نسيت البرنامج ده بعد ما خدتني أعباء الدراسة و بطلت أكتب عن أي حاجة لا هزار و لا قلش ولا نقد فني و لا تحليل سياسي
فقط استاتس على الفيس بوك تعبر عن مدى سوء الأحوال النفسية
أما بعد .. عودة إلى شخصيتي الرغاية و التي افتقدها الكثيرون ما عدا الكي بورد
كنت من أشد المتابعين للأحداث المنصرمة . من بين قنوات التلفزيون الإخبارية أو صفحات الفيس بوك
و كل صفحة على الفيس ألاقيها .. لازم ألاقي صفحة كارهيها
شبكة رصد ... كارهي شبكة رصد اليهودية الماسونية البتنجانية
أفوض وائل غنيم ... لا لتفويض وائل غنيم أبو حظاظة زرقا باتنين جنيه و نص
أنا آسف يا ريس يا سيدنا يا تاج راسنا .... أنا مش آسف يا ريس
نعم لحكومة أحمد شفيق .... لا للفريق أحمد شفيق
الراجل اللي واقف ورا عمر سليمان .... إعتذار للراجل اللي واقف ورا عمر سليمان
و مع تقدم التكنولوجيا و وسائل الاتصالات الحديثة أصبح الجميع يعبر عن آرائه بإنضمامه إلى الرأي أو الرأي الآخر
( مع الإعتذار لكارهي قناة العربية )
و بمجرد ضغطة ( لايك ) مرحبا بك إلى جيش المؤيد أو المعارض
و لكن وجود فئة بتنضم إلى كل الناس خلى الواحد يفكر
منشئ صفحة الراجل اللي ورا عمر سليمان هو نفسه منشئ صفحة الإعتذار بعد ما حس بغلطته في إهانة رمز من رموز المصريين
( أو بالأحرى الذي أصبح كذلك )
و بعد أيام من الرصاص و الدم و القنابل و السرقة
سأموت في هذا الوطن و سأدفن في ترابه
لنجد الأطفال عيطت و الأمهات زغردت و الرجال طلعوا في مظاهرات ( حقك علينا احنا أخترناااااااااك )
و بعد طيلة اختفاء و مكناش نعرفه يطلع وائل غنيم في برنامج على دريم
ليبكي و يبكي
و احنا نفوض
و بعدين يطلع في برنامج على العربية
ليبكي و يبكي
و احنا نفوض
و يبقى السؤال
هو احنا شعب طيب زي ما بيتقال عليه ؟
كلمة تودينا و كلمة تجيبنا
على كده نسيبنا بقى من الراجل اللي وقف ورا عمر سليمان و الست اللي وقفت ورا القذافي
و نتكلم شوية على نفسنا
الناس الي بتقف ورا أي حد
أنا بقول الكلام ده لأن ناس هترد عليا و تقولي أصل الناس دي مش مثقفة و ميعرفوش يعني ايه ديموقراطية و ليبرالية و مهلبية
الموضوع مش موضوع ثقافة قد ما هو موضوع مبدأ
ما آثار الموضوع هو أثناء تجولي في باحات كليتنا العريقة في يوم الرابع و العشرين من فبراير لأجد الناس تسألني
هتعملوا ايه ؟
ولا حاجة هنلغي الامتحان
طب خلوه قبل الفاينال
لأ مينفعش احنا جايين نوزع درجاته
زي بعضه وزعوه !

مش عارفة ليه صدمني الكلام
مع ان المفروض أفرح ان مفيش معارضين لفكرتنا بس لاقيت نفسي بسأل السؤال ده و بسترجع المواقف اللي فاتت
ليه ميكونش عندنا رأي مستند على مبدأ ؟؟
ليه أي حد بنمشي وراه ؟؟؟

و بالطبع فأنا لا أقصد التعنت في الفكر زي ما لقيت برضه
" مفيش تفاوض هو كده يا إما هيشوف "

أنا مع الإصرار على الرأي طالما ده حقك 
و لكني مع الإستماع للرأي الآخر لأن ده حقه
و لكني ضد الإنصياع للرأي الآخر من غير سبب لمجرد إنه عجبني 
و لكني أيضا ضد التعنت لرأيي طالما في سبب منطقي يخليني أقف مع الرأي الآخر

أظن بهذه الجملة صعبة التفسير أنهي كلامي
و افتكروا انا لا بحل و لا بربط .... أنا بس بدردش

7 قالوا رأيهم:

Doha يقول...

بصي بقى
بغض النظر يعني عن إنك مينفعش بأي حال من الأحول تحرمينا من دردشاتك دي .. بس أنا برده هقولك إن الموضوع له علاقة بالجهل برده شوية .. يعني انا مش عارفة حاجة عن الموضوع مش هطلع مبدأ من نفسي .. يعني هسمع من هنا شوية وأقتنع وأسمع للتاني وأقتنع وبعدين لما ابقى مدركة الموضوع كله أبقى أطلع رأيي .. برده معاكي حق في الناس المتعنتة بغباوة برده لازم أسمع اللي قدامي للآخر ..

وحلو البقين اللي في الآخر دول والله جبتي المفيد :D

تسلم كبيبوردك يا رنا يا إيهاب :))

Anastasia pop يقول...

ربنا يخليكي
فعلا في ناس كتير مبتبقاش عارفة . بس عموما في ناس كتير سهلة الانسياق ورا أي دعاية . و يمكن ده آخرنا في حاجات كتير . هاو ايفر انا بقول وجهة نظر بس ههههههههه شكرا قوي و كويس انك عرفتي تفسري البقين دول ههههه عشان كل ما اقولهم لحد يقولي عليا النعمة ما فاهم حاجة :D:D

قبل العالم الأخير يقول...

A big like

Unknown يقول...

جيد ...لكن لكل واحد رايه وحقه في التعبير .. مع انه هذا ايضا لا يكون كما نراه دائما
على العموم
سرني تواجدي هنا

amany elshaer يقول...

عجبني جدا خاصة كمان في حوار الاراء و اللي بينصاع وراء الاخرين دون ان يكون مقتنع به او يبدي رايه علي الافل و برده الناي التي خلفت لتعترض و السلام بدون ماتناقش و الناس المنفضه خالص و يا سلام بفي اللي ليه راي يتعنت فييه و ميحترمش وجهات النظر الاخري
كل حاجه لازم فيها الاتزان و نحدد راينا و ليه و عشان ايه فلنا كده و نحترم وجهات النظر الاخري

غير معرف يقول...

هو أنا وأنا بقرأ لسه بقول لنفسي دي ثقافة وتعود علي عدم ابداع الرأي وبتاع لقيتك بتقولي الجملة دي ...

أنا بقول الكلام ده لأن ناس هترد عليا و تقولي أصل الناس دي مش مثقفة و ميعرفوش يعني ايه ديموقراطية و ليبرالية و مهلبية
الموضوع مش موضوع ثقافة قد ما هو موضوع مبدأ

أفحمت بصراحة بس طبعا زاد عندي الاصرار اني اجادلك وأقولك إن المبدأ ماهو إلا نتاج الثقافة والفكر

أعتقد ان الفكر الحر والثقافة وحرية الرأي والتنقيب عن الابداع جوانا وغيره هو اللي هايخلينا عندنا مبدأ نؤمن بيه وندافع عنه وماننساقشي وراء كلام فلان او راي أي بني ادم لمجرد ان الكلام شكله حلو او انه منمق ، لازم يكون لينا فكر علشان نقدر نحكم علي رأيه صح ولا غلط

وبجد طريقة عرض روعة
بالتوفيق
وعلي فكرة انا برده ادايقت جدا لما لقيت الناس كلها موافقة علي قرار لمطالبة بالغاء الامتحانات دون معارضة وهكذا في المواقف المشابهة

Anastasia pop يقول...

المبدأ ماهو إلا نتاج الثقافة والفكر

الجملة دي حلوة قوي و بجد صح مية في المية
أنا متكلمتش كده إلا لما لقيت ناس مش على درجة تعليم عالية و لا حاجة و مع ذلك عايزة حاجة معينة و ثابتين عليها
شايفين الفساد اللي بيحصل في البلد و خرجوا يغيروه
و عمرهم ما انساقوا ورا دعايات
ففكرت ان ناس كتير مش مثقفة سياسيا و لكن لديها المبادئ الجميلة اللي بتدافع عنها
العيش . الحرية . الكرامة الانسانية
بمجرد ما ناس كتير قالوا الكلمتين دول شعب بحاله مشي وراهم
و مشي عن اقتناع
ربنا يخلي مصر لشعبها الطيب
و أحييكم على آرائكم الطيبة بجد سعدت بيها جدا

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة