الجمعة، 11 مارس، 2011

خاص بالدستور



بسم الله الرحمن الرحيم

لكل قارىء و لكل مصرى الله يكرمكوا عايزين الثوره دى مضيعش و مش عايزين نرجع تانى للى كنا فيه و سيبكوا بس اليومين دول من موضوع رئيسه الجامعه و العميد و الحوارات دى .. عايزين نعدل من فوق الاول و بعد كدا كل اللى تحت هيتعدلوا فى ثانيه و رئيسه الجامعة دى من اول الناس اللى هتتشال بس لما الوزاره الجديده تاخد وقتها لان كلنا عرفين هيا جت ازاى.. !

ملحوظه رئيسه الجامعه ممكن تتشال فى يوم واحد لو خططنا صح و نفذنا صح ميبقاش مجرد ناس نازله تطالب بكدا و خلاص .. دا غير كمان ان فيه موظفين كتير برده عايزين يقيلوها و لو اتفقنا معاهم ممكن ينضموا لينا و الموضوع يبقى له صوت اكبر .. و متنسوش انهم ممكن يساعدونا فى الحصول ع مستندات مهمه بحكم انهم تحت ايدها .. و دا ممكن يساعدنا كتير بس زى ما قولت لازم نركز فى تعديل الى فوق الاول .. و ممكن لو المستندات و صوتنا وصل للوزاره هتشيلها دا فى حاله لو اصلا هما ما شالوهاش


خلينا فى موضوعها :D
من الاخر هما عايزين يرقعوا الدستور !

دا مينفعش الثوره كانت بتنادى بسقوط الدستور عشان نعمل واحد جديد مش مجرد تغير كام ماده .. لازم ميبقاش للرئيس كل الصلاحيات اللى كانت عند مبارك احنا مش عايزين ديكتاتور جديد

فعشان كدا احتمال كبير ان الاستفتاء بتاع 19 مارس هيبقى عباره عن استفتاء ان احنا نعمل دستور جديد و لا مجرد تعديلات فى الدستور القديم و خلاص؟
و يا رب فعلا الاستفتاء يكون كدا

و محدش يقول نمشى تغير فى الدستور القديم و اما الريس الجديد يمسك نبقى نخليه يغير ..

لازم الكل يبقى حاطط فى باله الدستور مش بيتغير الا بثوره و مفيش رئيس بعد ما هنديله كل الصلاحيات و بعد كدا اما نقوله احرم نفسك من الصلاحيات هيسمع الكلام و يقلل صلاحيات نفسه !

احنا اسقطنا الدستور بثوره و مينفعش بعد ما الدنيا تستقر نقوم بثوره كمان و الدستور مبتغيرش الا بثوره .. و عشان كدا عايزين بناء سليم لأسس الدوله و أساس الدولة هى دستورها و مينفعش نغير كام ماده و نلاقى بعد كدا للرئيس صلاحيات كتير و يبقى هو المتحكم و نلاقى مبارك تانى و جمال تانى طلعلنا و ساعتها لو شيلنا رئيسه الجامعه دلوقتى هنلاقى رئيسه جديده جايه بنفس الاسلوب و هنلاقى منافقين جداد و بلطجيه جداد و احزاب منافقه و هنرجع تانى للى كنا فيه !

احنا عايزين دستور يخدم الدوله مش يخدم الحاكم و تقليل صلاحيات الرئيس شوية .... و محدش يقول عايزين رئيس عشان الاستقرار احنا مقمناش بالثوره عشان اى واحد يجى لمجرد الاستقرار و الا كنا خلينا مبارك و خلاص
:D

و الحمد لله الحكومه الجديده حلوه و لو جالها رئيس دوله له صلاحيات كتير كدا الحكومه دى ممكن تتشال فى ثانيه لو الرئيس مش كويس ممكن يقيل الجكومه فى ثانيه لو مجتش على مزاجه


يا رب ان شاء الله استفتاء 19 مارس يكون استفتاء نعمل دستور جديد ولا مجرد اعداد تغيرات و خلاص؟
و يا رب كلنا ندعى بكدا !

3 قالوا رأيهم:

manar يقول...

بوصى يا روان انا شايفه ان تعديل بعض المواد فى الدستور مفيهاش مشكله عشان موش لازم يعنى نلغى الدستور كله ونبنيه من جديد لو فكرتى هتلاقى هيا هيا عشان الكويس فى الدستور القديم هيتحط تانى فى الدستور الجديد يبقى هيا هيا نعدل الوحش فى الدستور القديم وخلاص واكيد اللى هيعدلوه ده هى المواد اللى فيها مشكله واللى بتمنح الرئيس صلاحيات كتيرة موش من حقه لانه زى اى موظف عادى فى الدوله ولو ساعتها عدلو مواد وتبقت مواد اخرى تحتاج التعديل فى نظرنا من المؤكد ان الاستفتاء عليه هيكون فى صالحنا وانه هيكون نتيجة الاستفتاء برفض هذا التعديل الناقص ..... وفعلا انا معاكى فى الراى انه نهتم بتصليح اللى فوق الاول وانه بعد كده كل شئ هيتعدل بالتدريج وانا من رايى انه لو هيحصل اعتصام بكرة يكون من الافضل للحث ع سرعة تحديد جدول الترم التانى عشان نضمن حقنا فى ان المسافة ما بين المواد فى امتحانات الفاينال تكون زى ما اتفقنا لكن موضوع اقالة العميد او رئيسة الجامعة ده فكده كده هيمشوا بس نصبر شويه عشان البلد تهدى وكل شئ هيتغير بالتدريج .... عجبنى الموضوع وفعلا فى وقته

Rouan يقول...

بس اللى يقلق فى الموضوع ان صلاحيات الرئيس محدش قربلها يعنى لسه الرئيس هو اللى من حقه يشكل الحكومه يعنى برده كدا رجعنا لنفس النقطه و منستغربش بعد كدا ان الطبال يبقى وزير اعلام و عمو بتاع الدبلوم يبقى وزير التعليم
صلاحيات الرئيس هتخلق طبقه من المنافقين تحته و المنافقين دول هما اللى خلو مبارك يغير الدستور ع مزاجه و غير مواد الدستور فى يومين و بعدين طب مدام هنعمل دستور جديد ايه اللى يهمنا دلوقتى فى اصلاح دستور خلاص انتهى
؟!!
و بعدين مش المفروض نستعجل فى الفتره الانتقاليه دى هيا الاساس لبعد كداااا
يعنى ناخد وقتنا و نفكر و عايزين دستور كويس للاجيال الجايه ميكونش فيها ثغرات وانا بجد نفسى يبقى الاستفتاء الجاى ناخد راى الشعب فى انهم نعمل دستور جديد و لا نخلينا زى ما احنا بالتعديلات
؟
و لو كان فعلا فيه حريه و البلد هتتحسن يبقى لازم ياخدوا راى الشعب اللى ثار و اللى طالب باسقاط الدستور

sony2000 يقول...

مش هتكلم تاني فالدستور
علشان جبت اخري
انا هتكلم علي واقف ورايا
ماشي:)

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة