الأحد، 27 مارس 2011

قصة حياة جوازة !



ييجى الشاب يخلص كليته .. وبعد الجيش يكون على تلاتين سنه كدة ( مش موضوعنا النهاردة ) .. بعد كدة يكون نفسه عشر سنين .. ولغاية متتبنى العمارة اللى حاجز فيها شقة فيها .. خمس سنين , المهم يخرج شاب عمره خمسة واربعين .. خمسين سنة .. لو فى واحدة بتحبه ومخلصه واستنته فحيكون حظه جميل .. يبتدوا حياتهم فى الخمسين .. ويكونوا اسرة .





اما لو مفيش .. فبيروح للست الوالدة يقولها دوريلى على عروسة .. وكمان بيشترط انها تكون خريجة صيدلة او اداب .. غير كدة متجيبش .. تيجى الست الوالدة تكلم جارتها انها تدور معاها فالجارة تكلم صاحبتها وصاحبتها تكلم صاحبتها لغاية ميجيبوا كذا اختيار للشاب ابو خمسين سنة .. المهم يرتبوا لقاء بين الشاب بتاعنا والتى وقع عليها الاختيار .. انهم مثلا يتقابلوا فى النادى حيعرفوا بعض انه حيكون لابس بدله خضراء وحذاء احمر وكرافته سوداء ومعاه كلب .. وهى تكون لابسه فستان اصفر وعاملة اسبنش بوردة لونها فيروزى .. !


ييجى هوة من بدرى يستخبى فى حتة مدارية تمكنه انه يشوف كل الجايين ويشوفها لو عجبته يروح يقابلها وتشتغل الاغنية .. لو معجبتهوش فى ناس محترمة برضه بتروح المقابلة بس يكونوا خلاص اخدوا القرار .. وفى ناس بتمشى ومبتروحش المقابلة وتعتذر بانهم كانوا مرضى ..


للاسف جزء كبير من الكلام دة بيحصل , المحزن ان ايام زمان كان بييجى للفتاة عرسان كتير وهى كانت بتختار , دلوقتى العريس هو اللى بيختار علشان نادر لما تلاقى عريس متقدم جاهز , لكن الفتيات كثر ..


دة طبعا لارتفاع تمن الشقق .. انا مش حقول قلة الوظائف علشان فى فرص عمل كتير بس بمرتبات لو كان مأجر شقة مش حتكفى .. المشكلة انا عارفة اللى حيحصل حتيجى البت على سنة خامسة طب الام حتضغط على بنتها انها تحضر افراح وتتزوق وتبقى خفيفة وظريفة وكيوت عشان العرسان عشان بجد اغلب العرسان هى دى المواصفات بتاعتهم وبيهتموا بالشكل والظرف ويتدبس بس نهاية القصة !

2 قالوا رأيهم:

Doha يقول...

هي مش لدرجة خمسين سنة .. يعني مثلا أنا أويا بيقولي نقيلي من دلوقتي .. وشكله بيتكلم جد والله أعلم .. وكل أما يشوف واحدة تعجبه يقولي حطيها على الليسته .. وهو سيادته دلوقتي بيفكر هيعمل ايه وناعي هم الجيش وكده .. فاللي عاوز يفكر ويحاول هيفكر وهيوصل ..

صح الموضوع صعب أوي وفعلا البنات بتكتر والسوق نايم لازم برده الواحدة تتلحلح شوية وايه يعني اسبانش وشوية بودرة هتتظبط وهتعدي .. يا بت متوقفيش حالنا بقى !

شوفي هو الأمهات الناصحة بيبدأو من سنة خامسة طب
والبنات الناصحة بتبدأ من دلوقتي !! :D :D

أحلى حاجة عجبتني الوردة الفيروزي اللي في الموضوع .. مشكلة بجد الموضوع ده ..

آه حاجة كمان .. عشان البنت كترت تلاقي العريس بيتنك هو كمان وعاوزها يبق طولها قد ايه و مناخيرها مش عاجباني .. وفعلا كله بيهتم بالشكل مش بالجوهر ..

" لكن أين أعين الرجل الكامل ؟! "

جميل الموضوع اللي خلص بسرعة ده وياريت بقى ماجيش ألاقيه متشال يا ست الهوانم ..

إيه رأيك في الإسم ؟! ..

Alice يقول...

الله يخليكى يا ضحى .. حكاية السن دى انا بهزر
حلو الاسم والصورة تحفة

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة