الأربعاء، 30 مارس 2011

واتارى الدنيا مش حلوة كلها مش زى الافلام اللى هو بيحب يخشها


انا بكره الافلام الرومانسية بجد اول حاجة عشان تتفرج على فيلم رومانسى لازم تعمل طقوس معينة تتفرج لوحدك فى اودة ضلمة وتقفل على نفسك الباب عشان لما عينيك بتدمع ممكن دمعة خبيثة تهرب على خدك ( ده بغض النظر عن الناس اللى بتعيط بس خلينا فى الوسط ان العين تدمع بس ) تانى حاجة بعد مبيخلص الفيلم تتنهد فى حسرة وتقول مفيش حب بيقى بالشكل ده وبعد كدة آخر مرحلة حتفكر تانى وحتلاقى ان الكلام اللى فى الافلام ده حرام مخالف للدين .. الشعور فى القلب تقريبا عادى لكن اللى بيحصل فى الافلام لأ مش عادى حتى النظرة حرام .. انا بكره الافلام دى

النهاردة تقريبا مسكوا حرامية فى شارع البحر فقعدنا نتكلم ان يعنى اللى بيسرق تلاقى ظروفه هى اللى دفعته لكدة بس هوة برضه قدامه الاختيار انه ميسرقش احنا لو كنا بنطبق شرع ربنا وكان اللى بيسرق بيتقطع ايده مكنش حد حيسرق الا بعد ما يكون فكر الف مرة قطع الايد دى بجد حاجة صعبة وبعد كدة اتكلمنا عن الزكاة ان لو كل الناس دفعت زكاتها مكنش حد حيبقى فقير يبقى اكيد ناس كتير مبتدفعش فتبقوا يا جماعة تسألوا كل واحد يسأل عيلته وقرايبه ولو ليه اخ بيشتغل بيعمل زكاته ولا لأ كدة .. انا فاكرة مرة سألت واحدة سؤال غبى فعلا لما كنا بنتكلم على فلوس حسنى مبارك لما كانوا بيقولوا انها خمسين مليار دولار سألتها هوة بيدفع الزكاة على الفلوس ولا لأ ؟ قالتلى دى فلوس مسروقة هى للفلوس المسروقة زكاة .. عامة الفلوس دى لازم ترجع ميكونش فى ناس بتاكل من الزبالة والمليارات كدة متاخدة من دمهم عشان ده طلع حسابات فلوس كتير كان فى برنامج الطبعة الاولى حسب لو اتقسمت فلوس عيلة مبارك على الشعب كل اسرة حتاخد ربع مليون جنيه .. انا نوعا ما حاسة بالاحباط من الحال فى مصر ده مش معناه ان انا ندمانة على الثورة لأ الثورة دى كانت لازم تحصل من زمان والفوضى زى مالناس بتقول امر طبيعى بعد اى ثورة بس لسه فى ناس كتير متحاكموش والضباط اللى كانوا بينادوا ان محمود وجدى يرجع انا مش عارفة اقول ايه عليهم واللى حصل فى الجامعة .. شوفتوا الامير بتاع السعودية الكلام ده كان من مدة لما كان بيهدى الناس فى دولته حد سمع قراراته صرف مكافأة شهرين لكل الموظفين وصرف قد ايه لمين وصرف مرتب شهرى للعاطل وبناء مساكن ومش عارفة ايه حل كل المشاكل بالفلوس .. الناس اللى اكبر اللى بيقولوا احنا جيل ملوش لازمة والشباب بيستغربوا هم ليه معملوش ثورة لازم نعذرهم مكنش فى وسيلة للتجمع ما بينهم مكنش عندهم فيس انا بتكلم بجد يعنى الناس مكنتش متواصلة بس مادام الحكاية كدة ازاى اتعملت ثورة 1919 تلاقى عشان كان ليها قائد هوة اللى وحد الناس

حاجة غريبة لما تلاقى نسخة طبق الاصل من حاجة انت شفتها قبل كدة وبتحتار تعرف مين الاصل ومين الصورة على فكرة الحكاية دى مش شرط باللى شوفته الاول يكون هو الاصل .. انا بكره التقليد حاجة اجنية يعملوا منها نسخة عربية حتى نفس الخلفية وتخيلوا بقى نسخة مقلدة من النسخة العربية اللى اتعملت يعنى تقليد التقليد بس عامة التقليد احسن من ناس مبتعملش حاجة خالص

عيد الام اللى فات ولا اسمه يوم الام ده تلاقى امهات الناس اللى ماتوا كانوا زعلانين .. انا بكره اغنية يا بلادى يا بلادى انا بحبك يا بلادى بكرهها




4 قالوا رأيهم:

sony2000 يقول...

:(
معلش

ظروف وهتعدا وكلو هيكون احسن

ملحوظه
بوست التجمع
http://sony2000-sony2000em.blogspot.com/2011/03/blog-post_31.html?showComment=1301526206701#c280027068705387348

Doaa helal يقول...

بصي يا ايمي انا ليا تعليق صغير علي اخر موضعات ليكي بلاش نتطرق للحلال والحرام لانك لو بتقولي الافلام دي حرام يبقي الاغنيه الي انتي مسمسه علي اسمها التدوينة حرام فخلي مواضيعك بره موضوع حلال وحرام خليها راي حيادي

Alice يقول...

بالراحة عليا يا دعاء .. انا كتبت انا بفكر فى ايه بعد ماشوف اى فيلم من النوعية دى ومقولتش انها فتوة او ان على الناس تلتزم بيها ولا قلت انى شيخة و اوعوا التدين بقى .... انا مش عارفة يا دعاء ليه دخلتى الاغانى فى الموضوع انا موضوعى الاصلى مبيتكلمش عن الحلال والحرام

Alice يقول...

شكرا يا صونى

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة