ربنا ياخدهم

اسرائيل دى بجد عايزة الحرق حاجة بجد تفرح لغاية ماعينك تدمع لما تعرف انهم اكتشفوا حقل غاز طبيعى فى البحر المتوسط يعتبر اكبر حقل بحرى على مستوى العالم .. فى كمية غاز رهيبة تكفيهم فى المستقبل وتخليهم من اكبر الدول المصدرة للطاقة فى المستقبل ومع ذلك الحكومة المصرية عقدت برضه صفقة تصدير الغاز الطبيعى لمدة عشرين سنة قدام .. واضح اوى يعنى انها عايزة تخلص الغاز بتاعنا اللى بتشتريه بسعر التراب ده لغاية ما بتاعنا يخلص وبعد كدة تحن علينا وتصدرهولنا بس بالأسعار العالمية بقى .. حاجة يعنى منتهى التخلف .. زى الحكومة عشان تهدى المصريين قالت انها رفعت سعر الغاز اللى بتصدره ليهم بس واحد كذب الخبر قال احنا لسة بنصدره بنفس التمن ولا زاد السعر ولا حاجة

زى فى حكاية منتشرة واحد مصرى يشترى حتة ارض فى سينا ويشاركه فيها واحد اسرائيلى ويدب معاه خناقة ومحكمة العدل الدولية تحكم للأجنبى الاسرائيلى وياخد الارض او يتنازل عنها وياخد فلوس بالملايين مهو ده برضه من التخلف اللى موجود فى البلد دى حق تملك الاجنبى .. فى الدول المحترمة مفيش فيها كدة فى قطر مثلا يدوك فيلا وكل اللى انت عايزة بس تسيبها لما تيجى تمشى ناس بيفهموا لكن هنا اى حد ممكن يتملك اى حاجة .. هى البلد خربانة اصلا والمشكلة ان فى ناس عايزة تنتخب حسنى مبارك او ابنه لاتباع مبدأ انهم خلاص شبعوا من السرقة لو حد جديد جه حيقعد ينهب لغاية ما يشبع .. ولا العيال بتوع اعدادى اللى يقولولك ( ان عهد حسنى مبارك عهد رخاء وحلو ده كفاية انه مدخلناش فى اى حرب ) مهى دى المصيبة .. على العموم مش موضوعنا نرجع تانى نتكلم عن الدولة الزفتة دى .. ييجى واحد مصرى يحبلى واحدة اسرائيلية ويتجوزها وتقنعه بانه يشترى ارض فى سينا وتخلف منه ابنها ياخد برضه الجنسية الاسرائيلية من امه

المشكلة ان اسرائيل بتتقدم بسرعة غبية واحنا مبنتقدمش ولو اتقدمنا بنمشى زى السلحفة ومحدش يعيش فى الوهم ويقوللى الطفل المصرى اذكى طفل فى العالم وان المصريين اذكى الناس انا حاسة ان اسرائيل هى اللى مطلعة الجملة دى عشان ينيمونا بيها سيبك من الواد العبقرى ده طفرة حالة شاذة مع نفسه خلينا مع الاغلبية .. يعنى لما تسمع انهم اختاروا احسن 60 بحث على مستوى الشرق الاوسط ولاواحد من مصر و47 بحث من اسرائيل لوحدها

كمان بقى عملية الاستسلام و الرضا بالامر الواقع وبقينا بنتكلم ان فى دولة اسمها اسرائيل والخرايط اللى مكتوب فيها مكان فلسطين اسرائيل بالبنط العريض بس هى خلاص المساحة بتقل بتقل وبيقعدوا يهولهم فى مبانى ويعملوا مستوطنات ومفيش حد عارف يوقفهم احنا مش حنفوق غير لما نلاقيهم على راسنا فى مصر ( كفى الله الشر ) .. كفاية علينا المعونة الامريكية اللى ب250 مليون دولار بس

انا حروح اسمع اغنية وبحب الناس الرايقة