الاثنين، 26 يوليو 2010

لست متخلفا و رجعيا !


بدون أدنى مبالغات أيها السادة ، لقد أوشكت على فقدان الثقة في قدراتي
العقلية (في دماغي) ، لا يمكن تصور أنني الوحيد حتى تلك اللحظة الذي
يريد الزواج من إمرأة لا تعمل !!


نعم ، هذا ما أريده وبشدة ، ومن الصعب أن أتنازل عنه يوما ، ولكن بمجرد أن
تبدى وجهة نظرك في هذا الأمر حتى تلحظ عيون الكثيرين تخبرك بكل ثقة
وبصوت عال " أنت رجعى ومتخلف ! " ، وحتى إن لم تلحظ فهم يقولون ذلك
في أنفسهم .


تجد الجميع يصيح بك : "وهل كانت تدرس كل تلك السنوات لكي تجلسها سيادتك في المنزل محبوسة بين أربع جدران ؟! "
وآخر: " هل ستقدر وحدك على متطلبات الحياة المادية ؟!"

وثالث: "يا أخي ، لابد من أن تشعرها بذاتها وكيانها وأن تساعدك يد بيد ! "

ورابع: " لا بد من أن تعمل حتى تعود مرهقة ، تفعل ما تقدر مع الأبناء،

وتتركك طليقا، بدلا من أن تكون متفرغة لك تسألك أين كنت ، ومع من كنت ،

ولماذا تأخرت ؟!"


أوقن تمام اليقين أن مجتمعنا بحاجة ماسًة لطبيبات وممرضات ومعلمات
وأديبات مسلمات متفوقات ، وبالطبع في غيرها من الوظائف ، بل إن طلب
العلم فريضة على المرأة المسلمة تماما كالرجل ، كما أوقن أن
عمل المرأة الأسمى هو بيتها بما يشمله من رعاية الزوج وتربية الأبناء .


مخطىء إذا أحسست بتعارض بين ما سبق ، فالأمر في غاية البساطة . ما
أعرفه جيدا أن الكل ميسر لما خلق له ، كما يقول الله تعالى : "لا يكلف الله
نفسا إلا وسعها" ، فأنا لا أجد أي حرج أو عيب على الإطلاق في أسرة يعمل
فيها الزوج والزوجة ، فطالما ينظمون أمورهم ولا يضيعون حقوقهم
وحقوق أبناءهم فأمرهم بينهم ، وهم مسؤلون من أعناقهم عن رعيتهم أمام
الله تعالى ، كما أنني لا أرى تخلفا أو جمودا في أسرة يعمل فيها الزوج
وتكتفي الزوجة ببيتها .


أما عن التعليم الطويل وجدواه ، فهذه الزوجة تعلمت جيدا حتى تستطيع التواصل مع زوجها ، ومع المجتمع من حولها ، وبالطبع مع أولادها وقبل كل ذلك مع ربها ، وفرضا أن زوجها قد تُوفى ، فماذا تفعل تلك الأرملة إن لم ترد الزواج بغيره ؟! كيف تربى أولادها بدون أن تعمل عملا يناسب تعليمها ؟!


وأما عن متطلبات الحياة المادية فقد خُلق الرجال للكد والتعب ، وعليهم بذل
كل ما في وسعهم لتوفير المطلوب وليسوا مستعدين لأن تعمل زوجاتهم
لتوفير الزيادة عن المطلوب !


وأما عن ذات المرأة وكيانها ، فمن قال بأن عدم عمل المرأة يقضى على
ذاتها وكيانها ؟!، فكم من نساء ضربن أمثلة وضًاحة في مساندة الزوج وكنً
سببا مباشرا في نجاحاته ، وهل هناك عمل أعظم من تربية أبناء صالحين
يكونون لها فخرا وذخرا في الدنيا والآخرة ؟!، هل هناك أجمل من التاج ذي
الياقوتة الحمراء الذي ُيلبسه الأبناء الحاملون لكتاب الله والديهم ؟!، ما أعرفه جيدا أن ذات الإنسان - ذكرا كان أم أنثى - تتحدد بما أضافه لدينه ودنياه ، وهذه الزوجة بالطبع تضيف ما لا يستطيع غيرها إضافته .


أما عن السؤال الرابع فسائله لا يعرف هدفا للزواج أصلا ، وهذا واضح من سؤاله المستفز!


بالطبع لا أنكر التربية الصالحة على الأسرة الأولى أبدا ، ولكن لا احد ينكر
أيضا أن ثمة فرق ليس بالذي يُهمل بين الأسرتين ، فرق بين الزوجتين في
الوقت والجهد والمزاج والتعامل وفوارق أخرى أيضا .


أؤكد أن هناك عددا لا يستهان به من الأسر التي يعمل فيها الوالدان ، وتسير
فيها الأمور على ما يرام ، وكما ذكرنا نحن بحاجة لهذه الأسر تبعا لحاجتنا
للمسلمات العاملات مثلما الحاجة لتربية جيل مسلم ، ولهم الثواب إن احتسبوا إن شاء الله تعالى .


إذا فليس هناك تعارضا على الإطلاق ، لك الحق في حياة تريدها ، ولى حقي في حياة أريدها ، حياة تكون فيها الزوجة أميرة على بيتها ، وقبله بالطبع قلب زوجها ، توقظه للفجر في نشاط ، ثم تحضر الإفطار للأولاد ، وتعد لهم الطعام ، ويذهبوا لمدارسهم ، ويذهب لعمله لتبدأ في تحضير المنزل وتحضير الغذاء وفى إثناء ذلك تثقف عقلها ، وتنمى مواهبها ، وتفكر في حلول لمشكلات حياتهم ، ويعود الأولاد ، ويعود من العمل ، ليجتمعوا سويا على المائدة ، ويخرجوا في المساء ويلهوا معا ويسافروا معا وبالطبع يعبدوا الله أيضا معا .


لقد سئمت من صورة الكآبة التي يحاول الجاهلون رسمها على البيوت التي لا تعمل فيها المرأة وكأنها حبيسة قهر الزوج والحياة ، فهل إرادة الزوج أن يحافظ على زوجته من المشقة أو لنقل (البهدلة) أمر سيئ لهذه الدرجة ؟؟ هل رغبته في أن تحتفظ برقتها وعدم إرهاق فكرها بهموم ومسؤوليات أخرى أمر غريب يثير الدهشة ؟!


إن من حق الجميع رسم صورة لحياتهم ، وعيشها على إرادتهم الخالصة ، فالأمر يختلف بإختلاف الشخصيات ، والغايات ، والظروف أيضا ، المهم أنني لن أنعتك بالمتحرر المتساهل ، ولن تنعتني بالمتخلف الرجعى ، وهكذا نعيش..لأننا مسلمون .



19 قالوا رأيهم:

Doaa helal يقول...

اولا معلش لان التنسيق المرة دي انا الي منسقاه فمش طالع قد كده والصورة والله دورت كتير ملقتش حاجة مناسبه الا دي
اما الموضوع فعاجبني فكرته جداا ونفسي الكل يشارك فيه ورايي فيه هقوله بعد المغرب ان شاء الله يكون الواحد اكل ويعرف ينزل رايه وهو شبعان

Unknown يقول...

أنني لن أنعتك بالمتحرر المتساهل ، ولن تنعتني بالمتخلف الرجعى
كالمعتاد هيا دى المشكله الأبدية إننا بنظر للأمور من منظورنا إحنا من منطلق دياتنا من فكرنا مبنحاولشى
نشوف اللى قدامك إيه اللى خلاه يقول كده من وجهة نظره
أتفق معاك تماما يابو ياسين غير كده من كام يوم كده كنت قاعد بتكلم مع بنت خالى عن الجواز وفكر البنات والشغل وكده يعنى إبتديت الحوار بسؤال إنتوا شايفنا إزاى .... من ضمن كلام كتير وصلت إن
حتى البنت اللى بتشتغل سواء متزوجه أم لا بتبقى فى
الأول عايزه تحصل على قدر من الإستقلاليه فى حدالمسموح ليها نظرا لفرق الحريه الكبير بين الولد
والبنت أما بالنسبة للمتزوجه أنا معاك تماما فى
اللى إنتا بتقولوا لو أنا قادر ماليا مفيش أى سبيل
إن أخلى زوجتى تشتغل المهم كان ردهاإن فى بعض الرجال بيدورو على اللى بتشتغل عشان توازن البيت
بس ده كان الكلام اللى يتفق مع الموضوع وياريت برده
لو واحده من الدكاتره تشرحلنا وجهة نظرها برده يبقى كويس .... وشكرا

Doha يقول...

كنت قريت جملة فى رواية ليوسف السباعي بتقول : " ان المرأة اذا أحبت فإنها تفضل مسح حذاء زوجها على رئاسة الوزراء "

مبدأيا انا مفتنعة من ان المرأة مكانها فى البيت مش للشغل .. حياتها كلها مكرسة لزوجها وأولادها .. لأن بطبيعتها كمرأة ربنا خلقها كده وحددلها مهمتها قبل ميبقى عندها عقل وتفكر وتقول انا عاوزة اشتغل ويبقى ليا كياني .. لان مهمتها الأولى واللى مينفعش تتغير هي انها تكون زوجة وأم ..


" وراء كل رجل عظيم امرأة "
أنا بحب المقولة دي أوي .. لان المرأة لو كانت صالحة الزوج هيبقى صالح ويقدر يعمل ويبني ويقدم كل اللى يقدر عليه .. لانها هي السكن ومركز المودة والرحمة في الأسرة .. غير انها هي اللى بتراعي الأولاد ويتعلمهم وهي اللى بتبني القادة وأمهات القادة .. هي دي مهمتهم .. والتعليم ده ضروري لانها تكون فاهمة اللى بيجرا حواليها وتشارك زوجها الهتمام والفكر ويبقى مستوى التفكير زى بعضه .. وبرده عشان تعليم ولادها ورعايتهم ..

فى بنات كتير جدا متأثرة بفكرة انها تبقى مستقلة وليها شغل وحياة ناجحة وعمل وفى نفس الوقت يبقى ليها أسرة .. بس فى كتير من الأحيان حاجة بتطغى على حاجة .. وبرده مهما كان فى توازن لازم يبقى فى حاجة ناقصة ..

كنت سمعت الشيخ الشعراوي بيتكلم قبل كده بيقول ان الست دي لو قعدت تحسب مع نفسها وتشوف مسئولياتها فى البيت من شغل ورعاية واهتمام وحب تملاه فى البيت مش هتلاقي وقت أصلا عشان تشتغل ..

بس ده برده ميمنعش ان لو كانت الزوجة بتشتغل فهي بتحمل عن زوجها عبء منقدر ننكره .. ولازم برده الزوج يبقى مقدر انها بتشتغل وتراعي البيت ومسئولياته فى نفس الوقت ولو شاف حاجة مش مظبوطة او تقصير صغير ميعملهاش قضية .


وفى الأول وفى الآخر الزوجة عليها السمع والطاعة لزوجها لو مش عاوزها تشتغل تسمع الكلام حتى لو هي مش حابة كده لان فى ده رضا لزوجها ومادام فى تفاهم بيتهيقلي مش هيبقى فى مشكلة او الزوج هيقسى على زوجته ويمنعها من حاجة هي حاباها .

الموضوع جميل أوي وانا فعلا حاسة ان معظم التفكير دلوقتي متجه لان الست زى الراجل زى مهو بيشتغل ويبقى ليه مكانة ومستقل بعمله يبقى المرأة كمان كده وبينسوا الفطرة والدين قالوا ايه .


بس التنسيق جميل والله والصورة حلوة :)

Ahmed Elfeky يقول...

أيها الوغد العربيد المفروض ان فى موضوع نازل بكرة فى مدونة ناقر ونقير بيناقش نفس الموضوع !! أيها الوغد حرقت علينا الموضوع .. ! انت شرير شرير شرير !!


نيجى للموضوع بقى :D

وهل كانت تدرس كل تلك السنوات لكي تجلسها سيادتك في المنزل محبوسة بين أربع جدران ؟!

ده انا :D

بص بإختصار عاجبنى رد دعاء ورد عادل ورد ضحى .. التلاته بيكملوا بعض يعنى .. بس بص أنا واضح وصريح جدا فى النقطه دى .. مدام اتعلمت يبقى من حقها انها تشتغل ومدام من حقها انها تشتغل يبقى من حقى انى ألاقى رعاية وإهتمام فى البيت .. عرفت تحقق ده يبقى اهلا وسهلا معرفتش تحقق ده يبقى برضه بالتفاهم والتوصل إلى أفضل الحلول .. لكن أنا شخصيا ً أفضل واحده بتشتغل .. شايف انه حرام ان واحده تتعلم وأجى انا اقعدها فى البيت .. انتا شايف انك بتصونها لما تقعدها فى البيت دى وجهه نظرك ومدام هيا موافقه على كده يبقى تمام مفيش مشكله .. بإختصار شديد أنت لا رجعى ولا متخلف لأنك بتفكر انك عاوز تتجوز واحده مش بتشتغل .. وفى نفس الوقت غير مش منحل لأنه عاوز مراته تشتغل .. بس !

Doaa helal يقول...

اولا بجد الموضوع جميل جداااا وجميل اوي ان الواحد يكون محدد اسلوب حياته من حالا
بالنسبه لشغل الزوجه فانا شايفة انه لازم طبعا زي ما الكل بيقول ميطغاش علي اعمال بيتها ولا اولادها ولا حقوق زوجها لان ده عمل مكلفه بيه من عند ربنا اما اي عمل تاني فهو عمل من اختيار الانسان فاكيد عمل ربنا افضل الف مرة من عمل الانسان
وانا عن نفسي لو اقدر اني لما ربنا يفرجها علي الواحد ويستقر يقعد في البيت مفيش اي مانع لاني ليا احلام ببيت جميل واطفال يحبوني وحياه كلها سعاده بس كمان الواحد عنده احلام مش عشان يحقق ذاته لا عشان يفيد اولاده ويفتخروا بيه بعد كده هتقولولي مهما هيتفخروا بيكي وانتي ربه منزل بس انا كان حلمي اكون دكتورة كبيرة برده لخدمه مقدسه هو اني اخلي نساء المسلمين مضطرش تروح لدكاترة رجاله وده هدف كويس برده وتعبت كتييييير عشان احققه
هقول لحضرتك علي حاجة انا والدي كل امله فينا اننا نبقي ناجحين في دراستنا قبل اي جواز او مشاريع تانيه فانا لو فكرت يوم في ارتباط مش هرتبط بواحد هيحطم امل والدي فيا ويقولي اقعدي في البيت لان اهالينا مش هتعيشلنا طول العمر -طبعا الاعمار بيد الله- فانا لما هتقابل مع حد هسال الاول لو مش عاوزني اشتغل هحترم رغبته واقوله يدور علي واحده تانيه ولو موافق يبقي مفيش اي مشاكل وانا من نفسي لو بعد كده لقيت ان عملي ماثر علي جوزي وبيتي هسيبه فورا اذا كان الزوج مضايق
وانا اعرف ناس كتير ازواجها متفاهمه اوي لانها بتبص لمستقبل افضل لاولادها لما والدتهم تكون استاذه جامعه او في مكانه كويسة اكيد ان شاء الله هتربيهم كويس جداا وهتعرف تتابع مذاكرتهم وحياتهم العلميه وكذلك الاجتماعيه هتعلي بمستوي تفكيرهم وهتبقي مقدرة هما هيعملوا ايه
واخيرا انا الاعتراض الاكبر الي انا شايفاه في عمل المراه او انها بكده يبقي عملها ملوش لزمة اذا كانت في مكان كله اختلاط وضحك وتهريج زي معظم المصالح الحكوميه لانهم مش بيبقوا لاقيين شغل اصلا فيبضوا الوقت كلام وهزار ودي تجيب في سيرة دي ومش عارفة مين عملت ايه
ساعتها تقعد في بيتها اكرملها وتسيب الشغل لشاب في بدايه حياته افضل
واخيرا انا اعتقد ان كل بنات طب محدش فيهم بيقعد في البيت الا اذا كانت دكتورة جامعه وواخده كام سنه اجازة عشان تراعي اولادها
انا رايي ملغبط اوي مش عارفة ليه بس اكيد ليا كلام تاني لما اسمع من باقي الناس وشكرااا علي الموضوع الجميل ده

Eslam Fouda يقول...

ويعود الأولاد ، ويعود من العمل ، ليجتمعوا سويا على المائدة ، ويخرجوا في المساء ويلهوا معا ويسافروا معا وبالطبع يعبدوا الله أيضا معا .

هو الباشا هركليز :D

Doha يقول...

انا بس ليا تعليق على رد دعاء
لما حد سألني لو انطلب منك تقعدي فى البيت هتعملى ايه وجوابت ردي الأولاني هو ان حياتي الأول لازم تكون للبيت والاولاد واذا كان مش عاجبه الشغل خلاص مش مهم .. وان ده هيجيبلي سعادة اكتر من اللى هحققها وانا بشتغل ..

وبعدين قلت ان فى نفس الوقت حابة ان يكون ليا هدف واحققه .. واني محسش اني محققتش حلمي واضغط على ولادي انهم يحققوا حاجة مقدرتش اوصلها انا واخلى ابني مثلا يبقى دكتور مشهور غصب عنه .. بس ان كل واحد يحقق حلمه اللى عاوزه وميكونش عدم تحقيق حلمي عقبفة فى طريقهم ..

بصراحة لما قولت الكلمتين دول اللى سألني قالي المرة الأولانية فكرتي فى كل حاجة الا انتي وحبيتي تريحي الكل الا انتي .
والتانية فكرتي في نفسك .. وبس .

بس طبعا لان مينفعش لا التفكير الاولاني ولا التاني لوحدهم .. لازم يبقى فى توازن .. فعلى قد مييقدر الزوج والزوجة يريحوا بعض سواء كانت بتشتغل او لا .. يبقى فى تفاهم .. هو ده الحل
:)

Ahmed Elfeky يقول...

فوده .. تعليقك داخل دماغى .. هوا ليه مفيش هنا لايك ؟ :D

Ahmed Elfeky يقول...

أينعم .. التوازن هوا الحل .. لا القعدة ولا برضه الشغل :D وميت مره يا اخى قولتلك إيه يعنى لما يجى عليك يوم تغسل فى الأطباق او تنضف الشقه .. يعنى تشيلوا بعض .. روح يا ابنى إلهى ربنا يكرمك بواحده مش عاوزه تشتغل :D

AL-Saadany يقول...

غير ما كنت متوقع خالص كنت متوقع ان ياسين هياكل ضرب بس الحمد لله عدت على خير :)
اولا احب اقول ان ملاك الامر فى الموضوع ده هو طاعه الزوجه لزوجها سواء وافق على انها تكون بتشتغل او ان تكون ربه منزل بغض النظر عن ان اسبابه مقنعه او لا
لان انا حاسس ان الموضوع ده يحتمل اكثر من رأى وكلها اراء سليمه ولذلك فكره عمل المرأه قد تجد القبول عند فئه من المجتمع وقد لا تجد القبول عند فئه اخرى ولكل منهم اسبابه المقنعه
لكن مثلا لو عاوزين ننظر للمشكله بعدل وانصاف علينا توضيح السلبيات والايجابيات الممكنه ونختار ايسر الامرين
فمثلا اعتقد ان من سلبيات عمل المراه زى ما يس ما قال انها ممكن متقدرش توفق بين متطلبات المنزل وعملها على الرغم من ان امى تعمل الا انى عمرى ما شعرت بتقصير من امى اتجاه المنزل على الرغم من ان امى تحمل المنزل كله وحدها وعمرى ما تخيلت انى يكون ليا ام غيرها (ربنا يخليها لى) :)
وعلى الجهه الاخرى رايت كثير من الامهات يقصرن فى حق المنزل ويهملن ابنائهن بسبب العمل
لذلك فالامر يختلف من امرأه لاخرى لذلك ما الذى يدفعنى لاخوض هذه التجربه واجعل زوجتى تعمل وانتظر النتائج مع العلم انه سيكون من الصعب ان اطلب منها التوقف عن العمل بعد ان سمحت به فى البدايه خصوصا لو لم يكن لديها ثقافه الطاعه المطلقه للزوج التى تحدثت عنها سابقا
فانا لا اتخيل مثلا رجل يقبل الطعام من ايد الشغاله وهو متزوج ده حتى ميشبعش :)
احيانا اقول انه يجب على المرأه ان تكون عامله تحسبا لحالات الطوارئ خصوصا انى تعايشت مع هذه الحاله فمثلا امرأه توفى زوجها والكل يعلم مشاكل المعاش الذى قد لا يكفى فردا واحدا فما بالكم باسره باكلمها ومن الصعب على المراه لم تكن تعمل من قبل ان تحصل على عمل وبراتب يعوض الاسره عن راتب الاب صعب جدا جدا جدا جدا جدا بل قد يكون مستحيل ويحدث فى حالات نااااادره الا اذا قررت الام ان تعمل بائعه او سائقه تاكسى فيضيع كل ما عوضها عنه الزوج طوال حياته من الراحه
الا اذا كنا فى نظام حكم محترم يكفل لابناء وزوجه الرجل العامل ضمانات كافيه بعد موت الاب او حتى توفير عمل مناسب لكل ارمله (انا بحلم!؟!!)
وقد يكون عمل المراه سببا فى ظهور اعضاء جديده للمراه كالاجنحه والانياب لتصبح بطلا خارقا وتحاول بشتى الطرق ان يكون فى المنزل اب واب اخر بحجه انا بشتغل زى زيك وانت مش احسن منى وربما تستعبد زوجها فيصبح غلام عندها (اقصد بطريقه مهينه ولم اقصد ان يخفض الزوج جناحه لزوجته من باب الموده والرحمه)
مره كنت باشترى عيش من الفرن ولقيت واحده من طابور النساء بتقول للراجل بتاع العيش :مشى الستات وسيب الرجاله عشان الستات وراهم شغل
اذا كانت بتقول كده امام الغرباء فما بالكم بحالها فى المنزل (الله يكون فى عون زوجها)
وللاسف مما ساعد فى ذلك الافكار العقيمه للمساواه بين الرجل والمراه فى امور لا تجوز الا للرجل وامور لا تجوز الا للمرأه ,تخيلوا مره كنت فى الشارع وشفت منظر مش مظبوط فغضيت بصرى وانا لا اعلم هل هذا الشخص ذكر او انثى سالت الله ان يكون ذكر وماخدش ذنوب وصلت لدرجه مش عارف افرق فيها بين الذكر والانثى :)
اما بالنسبه لحكايه انها اتعلمت وحرام عليا ان اتركها فى المنزل فمعتقدش ان ده سبب لانها فى الاول والاخر بتتعلم لنفسها فتخيل الفرق بين امراه حاصله على شهاده من كليه الطب مثلا وامراه حاصله على الثانويه وتخيل الفرق بين المراتين فى المنزل سواء فى معامله الزوج او تربيه الابناء , يعنى هل الواحد بيتعلم امور دينه عشان يبقى عالم ولا عشان يطبق دينه صح ويستخدمه فى حياته , فعلى اى حال من الاحوال امراه متعلمه يكون لديها مهارات اكثر وفرص اكبر للتواصل مع الابناء
ولكن يصح قولك لو قلت انك تركت زوجتك تعمل لتعطيها فرصه للابداع فتعمل فكرها وتشعر بذاتها وتشعر انها فرد فعال لكن دون السلبيات السابقه
:) حتى الان انا شخصيا لم اتوصل لراى معين بعد كل هذا ولكن زى ما قال يس الاول ليس رجعيا والثانى ليس متحرر ولكل اسبابه
لكن كمان قلت ان ملاك الامر هو طاعه الزوج المطلقه :)

Ahmed Elfeky يقول...

حلو الرد ده يا أبو السعادن :D

AL-Saadany يقول...

معلش فى حاجه لسه اسلام مفكرنى بيها
ان عمل المراه هيكسر الروتين المنزلى ويكون نجده من السماء للرجل من كثره الرغى ورايح فين وهتيجى امتى وزعلان ليه ولو مقلتش انت متضايق ليه انا هزعل منك(يعنى هو الراجل متضايق اساسا هو ناقصك كمان تخنقيه وتقولى له هزعل منك) :)
لان امراه فاضيه بالمنزل بمثابه ميكنه للرغى وجهاز مشع للاسئله الى ملهاش لازمه سؤال لمجرد السؤال
اسالونى انا عايش مع 3 بنات وامى :)
تخيلو كل مره اجى اخرج فيها مع اصحابى نفس السؤال من اختى الكبرى :انت خارج مع مين؟
يعنى امبارح كان اسمه يس وانهارده هيبقى فرغلى :)

Doha يقول...

ضحكت اوي لما قريت ماكينة الرغي دي
بجد فى نقط كتير اوي كانت محطوطة فى الحساب انها تتناقش فى للعوانس فقط منها الرغي اللى بيطفش الناس :D
وموضوع ان الزوج يساعد زوجته فى المطبخ
موضوع مهم برده
:D

Eslam Fouda يقول...

الرغي ده لعنة لعنة

Rawan يقول...

موضوع جميل و مناقشه اجمل

قبل العالم الأخير يقول...

WOOOOOOOOOOOW,so impressed and so happy :D

دكتورة دعاء تنسيق جميل وشكرااااا جداااا عليه...ورأى حضرتك احترمه بشدة وانا اصلا عارف ان نسبة كبيرة جداااا من بنات طب عايزين يشتغلوا وطبعا حقهم وفى امثلة كتير مشرفة وحلوة..بالتوفيق ان شاء الله..

عاااادل كلامك مظبوووووط وموضوع الاستقلالية ده مش كلام فاضى لا ده بجد فعلا وبلاحظه كتير كمان..واظن الدكاترة وضحوا ارائهم اهو..لو ليك تعليق مستنيك..



دكتور ضحى بجدددددددد اتحفتينا وكلام حضرتك عاجبنى جداااااااا كله يعنى بصراحة :D

فقى
h3h3h3h3h3h3h3h3h3:D:D:D
حرقتلك الموضوع :P:P خلاص ياعم تعالوا ناقشوه هنا وتنوروا

ورأيك انا عارفه طبعا يا معالى الباشا...بالتوفيق..


ابو اسلام :D
ياعم منا لازم اقول كده مش لازم ابرر موقفى برده ;)
بس لا والله ده بجد اصل ياعم انا هبقى مقدر الموقف كويس جدااااا وعشان كده الواحد مش هيفكر بقى فى نفسه هيفكر فى اسرته كويس اوى اوى ..زوبعدين يعنى شايفنى بقول كده كل يوم..فى الاجازات بقى يامعلم ..هو انا فاضى للعيال...دنا هقطع عنهم المصروف كمان:D..وبرده مهى هتنزل تجيب العيال من المدرسة مثلا تجيب حاجات تروح تزو مامتها ..انا يعنى مش ابوجهل ..ان شاء الله يبقى كله تمام ..واه انا هركلييييييز :P:D

سعدنى:D معنديش غير اللى بقولهولك على طووول...سعدنى يا جاااااااااااااااااامد :D قشطة يا ابو السعادن;)

موضوع الرغى ملكمش دعوة:D:D...ع الاقل نلاقى حاجة نشكى بيها لبعض لما نكبر يا جدعان..واحنا متجمعين فى قهوة كده ولا حاجة ...امال يعنى مش لازم نبان مظلومين ويبانوا مفتريين:D:D...ومعنديش مشكلة اساعد فى البيت طبعا بس مش لدرجة المواعين يافقى وانا قولتلك قبل كده لأنى هكسر الاطباق :D:D


بجد فاتتنى المناقشة ساعتها لأنى مكنتش موجود للأسف
وبجد برده مناقشة رااااااااائعة :D

غير معرف يقول...

والله انا باتفق معاك وباختلف يابو ياسين

يعني طبعا المفروض انها تاخد بالها من بيتها وتسيبله اهتمامها والراجل هو المسؤول عن النفقات

بس برضه لو كانت بتتعلم 20 سنة ودخلت كلية واجتهدت وجابت مجموع حلو اظن خسارة انها ماتعملش حاجة بالعلم ده وانها تدفنه (ماكانت تتجور بعد الثانوية احسن وخلاص)يعني مش معقول كل البنات بيتعلموا ده كله علشان لو حصل ظرف او حاجة

انا رايي انها لو متعلمة كويس وتقدر تلاقي وظيفة كويسة انها تشتغل يومين في الاسبوع او حتى يوم مش علشان الفلوس او حاجة بس علشان برضه تحس انها ماضيعتش عمرها واتجوزت متأخر هباء وعلشان المجتمع يستفيد من خبراتها ولو قليل (يعني ننادي بتعليم المرأة وفي الاخر نركنها لما تشتغل) طبعا العلم لاجل العلم ده حاجة كويسة بس برضه

زائد موضوع انها تحس بذاتها وكيانها ده صح
صحيح انها في البيت مفروض تحس بنفسها اكتر بس برضه لو اشتغلت شغلانة محترمة ولو ساعتين في الاسبوع بيجيب احساس حلو برضه

في النهاية الموضوع على حسب رغبة البنت وموافقة الراجل يعني هي ممكن تكون مش عايزة تشتغل خالص وتقعد في البيت وده صح ,وممكن تكون عايزة تشتغل يوم ولا يومين وده في رايي احسن لو مش حيأثر خالص على بيتها

وفي النهاية القرار قرار الراجل
D :D:D:

علي غرابة يقول...

ايه غير معرف دي؟؟؟؟
:D:D:D

غير معرف يقول...

فقى ممكن تبطل تقول كلمة يا سادة دى عشان بتعلى الضغط عليا و اخوك تعبان انت عارف ظروفى يعنى

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة