الأحد، 25 يوليو، 2010

وما جدوى شكوانا ؟


مصر هى أمى.......
مقوله تتردد على الألسنه وربما هى مجال للتهكم أو السخريه
يقال أننا لم نر من مصر ما يجعلنا نحبها
ولا نشعر بالحب تجاهها الا فى كاس افريقيا أو حين نسمع أن دوله شقيقه أخطأت فى حق مصر بكلمه
(لكن الخطأ الخارجى فى حق مصر مقبول)
هل أحبها ؟
لا أدرى ........هل تحبها أنت ؟
أعلم حلمى بمصر الجميله ....تعاون ....حب....تسامح....الخ
مصر التى تعطى الأولويه لأبنائها لا لحاملى الجنسيات الأخرى
(أرى فى أنحاء العالم احتراما من البلد لأبنائها وتقديرا لكرامتهم ولا أعلم سبب احترام المصرى لغير المصرى على حساب أبناء وطنه )

لكن على الخريطه (ان كنا لازلنا عليها) ....وطنى ....مليون كم مربع...أرض كثيرة الخيرات ...آمن من يدخلها بشهادة الرحمن....يقال أن بها شعب .....(والأكيد أن بها حكومه)
ويالها من حكومه بل ياله من شعب(ان وجد....يقال اننا 80 مليون مواطن )

وأسمع الشكوى عن الغربه فى الوطن بل أشعرها ....لكن كيف لقطعه من الأرض أن تساعد؟
أليس الوطن بأهله وشعبه؟

كيف لوطن أن ينهض بشعب مغيب؟

لعل الوطن يقول:
كأرض منحتكم خيراتى ....نعم فالأرض لم تقصر ....
النيل يجرى فى ضفافى ليروى ظمأكم.....
احتضنتكم سمائى فى طفولتكم ....وشهدت أحلامكم
كبرتم شبابا صرتم
فمنكم من هو (شعب) ومنكم (حكومه)
حاكم...وزراء...نواب....رجال أعمال....مستثمرين
هم أغلبهم برد جميلى
فباعونى قطعا
((استثمار))
منشآتى ((خصخصوها))
نهرى((سمحوا بالقاء مياه الصرف والمصانع فيه))
أرضى((سمحوا بتجريفها ......نعم.....يريدونها بائره))
ربما منهم من أحبنى بحق ........فنهب أموالى
((سويسرا هى أمه))

شعبى ال80 مليون ....((كما يقال))

يشكو ويشكو ويشكو
ويسخر ويطلق النكات((شعب مرح))
يحتفل بالثوره ((52))
ويقول احنا أحرار وسينا رجعت تانى لينا
تقريبا شعب من 50 سنه

شعب ((صفوف))
حكومه((صف))
بس صف لاعبها صح
صف احتلال داخلى
فرق تسد
الاحظ انتشار ((الكره)) بين صفوف الشعب
بدئا من المؤسسات البسيطه وحتى أكبر المؤسسات
فكيف لشعب أن ينهض دون أن يخاف كل مواطن على حق المواطن أخيه
((ياعم الدنيا كده ياتنهب يا تدوسك))
وبعدين؟؟
نقول البلد مش نظيفه ...((ولو انى أشك :):) ))
ومين اللى بيرمى الزباله من الشبابيك ...هوا أى نعم الحكومه بتلم الزباله وتركنها على خطوط السكه الحديد شويه....وترمى شويه فى البحر...على شويه يحرقوهم.....
((شعب غريب منين بيقول مش لاقى ياكل ومنين تلاقى الزباله نصها أكل ؟؟))
مش بقول ان مفيش فقر لكن قصدى لو بقايا الأكل تحفظ بطريقه لائقه ومثلا يعنى نقدم بقايا الأكل فى طبق للزبال أو غيره .....
وكلنا نرتقب موضوع المياه وتحديد حصة دول المصب ........الغريب ان الناس لسه بترمى المياه ع الارض ((عشان نطرى الجو
))
والجامد بقى بنروى الأرض الزراعيه فى مناطق بالصرف الصحى ((بنوفر فى المياه))
شعب بيخاف على البلد بصراحه
دجاج أو ماعز ..............شعب ؟
حلمت مصر يوما أن ترى شعبا يدافع عنها
وأنا فى انتظار اليوم التاريخى ......التساؤل هنا هل ممكن يبقى 2052 ؟
كم ظلمتى يا مصر معنا .....وندعى اننا من وقع عليه الظلم
لا أتطلع الى ثوره لكن تعاون بين صفوف الشعب والحكومه
خوفا على مصلحة بلد مغلوب على أمره
ضائع ان لم نبدأ نحن بالتغيير
لنغيرمن أنفسنا
نعم كشعب لا أنكر انه قد وقع علينا ظلم كثير
لكن الظلم يبدأ من داخلنا حقا
فنحن أول من يظلم نفسه بصمته وخوفه
ولكن كيف لنا ان نكون شجعانا وكل منا فرد
سهل كسره
ليتنا نتحد حبا فى الله والوطن



11 قالوا رأيهم:

just like a heaven يقول...

والله موضوع كان علي بالي

ازاي انا مش طايق بلدي ولما اشوف ماتش كورة واشوف مصر بتكسب بافرح
واقول دي بلدي

الموضوع جميل
بس في جملة ضايقتني
__كم ظلمتى يا مصر معنا .....وندعى اننا من وقع عليه الظلم__

هو مين اللي انظلمـ بالظبط ؟
مصر اللي اتظلمت ؟
ما هي مصر هي الشعب والحكومة
ولما الشعب ينظلمـ يبقى مصر انظلمت والعكس

وبصراحة رغمـ موضوعية الكلامـ واقناعه
أنا ما زلت على رأيي
إن مصر لا هي أمي ولا تقربلي

Doaa Helal يقول...

عندك حق في كل كلمة بس انا ليه حاسه ان الغلط جاي من كل جانب زي ما بتقولي من الحكومة والشعب بس غلط الحكومة اكبر بكتير لا الظلم وحش جدا بجد بيظلموا الشعب وبالتالي الشعب بيضرب القضيه عرض الحائط ومبيبقاش همه الا مصلحته مبيفكرش في مستقبل البلد
هو غلط الشعب الوحيد انه ساكت وانا حاسه اليومين دول ان الناس بدات تشعل الفتيل وهتنفجر
ااما بالنسبه 2052
فان شاء الله المونديال هيكون في مصر هو ده الي احنا فالحين فيه

elsayed heeba يقول...

كلام حضرتك مضبوط
بس احنا عندنا امل ان بلدنا تبقى بكرة احسن
وبإيدينا مش بيد حد تاني ان شاء الله
وبصرف النظر عن تعبير مصر هي أمي اللي انامش بحب استخدمه لكن انا بحب اقول مصر هي بلدي اللي بحبها جدا رغم حالها الذي لا يسرلكن كل ليل وله آخر
وطبعا مش محتاجين ندور على سبب علشان نحب بيه بلدنا

Think Pink يقول...

د\هشام
اقصد ان مصر مظلومه معانا بادعائنا بانها كوطن هو اللى ظالمنا مع اننا كشعب من يرضى الظلم الواقع عليه
يعنى زى نعيب زماننا والعيب فينا كده

دعاء....تعتقدى اننا ممكن ننفجر ؟

sando يقول...

فنحن أول من يظلم نفسه بصمته وخوفه



so beautiful,powerful and touching

meaningful words:)

A fugitive يقول...

والله عند حضرتك حق فى كل كلمة ...ازاى بلد نامى او لنقل متخلف ويكون فيه 3 من اغنياء العالم حسب المجلة السنوية اللى بتنزل دى...سويرس وعزوطلعت مصطفى...شىء غريب فعلا...الغريب برده اننا نلاقى عربية نازلة جديد..زى ال KIA cerato مثلا :D...تلاقى الشعب كله بيجرى يقسط ويجيبها وفى اللى بيجيبها كاش...بلد عجيبة ..الناس يا فوووووق يا تحتتتتتتت..والناس اللى فى النص دول بدأوا ينقرضوا فعلا..

اااااااااه ...مصر كوطن اكيييييييد بحبها..وهفضلها على اى بلد مهما كانت متقدمة..الحياة فيها حياتنا..وطبعا انا مقصدش النظام العام لأنه فااااااشل واحنا متخلفسن عشان سوء الادراة والتنظيم فى كل حاجة من الحضانة للكلية..من الشغل للمعاش..من المشى فى الشوارع البايظة لركوب اجمد عربية نزلت..

عايز اعلق على نقطة كنت ملاحظها من فترة واعتقد ده وقتها...طبعا ولاءنا الاول والاخير للإسلام..امة الاسلام اقصد يعنى..يعنى واجب عليا اوالى كل مسلم فى اى حتة ..وحبى لمسلم فى روسيا يكون زى حبى لمسلم فى بلدى..لكن فى ناس كتير وبعض الشيوخ بيفضلوا يتكلموا فى النقطة دى لدرجة تهميش وطنك وارضك وارتباطك القوى بيها ..لدرجة مش بحبها ومش بطيقهاا ابدااااا...ده اللى لاحظته يعنى وحبيت اقول ان مفيش تعارض وان مينفعش مع ولائى لدينى انى انكر حبى وارتباطى الجاااامد بأرضى ..مصر...
موضوع جميل وفتح نقاش اجمل :)

Alice يقول...

welcome back ya perry ...missed your writings
موضوع جميل معاكى حق فى كل جملة وكل سخرية قولتيها من الحال فى مصر . طبعا كلنا بنحب مصر مصر دى بلدنا يعنى بتاعتنا بس فى ناس بتنسى انها بتحبها علشان بجد الحكومة وكدة النظام الفاشل لكن ساعة الجد تلاقى كل الناس ممكن تضحى بروحها علشان مصر
دة المصرى برة يبقى حد يقول نص كلمة على مصر علشان المصرى يوريله مقامه
انا بقول ان التغيير يبدأ الاول من الحكومة الحكومة كلها والمحافظين يتغيروا وييجى ناس عدلين كان فى مرة محافظ معروف مسك محافظة قنا نضفها بأمانة ونظمها الناس بقت تخاف ترمى حاجة على الأرض من نظافة الشوارع او يخالفوا المرور علشان النظام
فى حاجة بتتعبلى اعصابى حكاية بجد الناس اللى بترمى الاكل فى الزبالة وناس بتدور علي اللقمة فى الزبالة بجد من الافتراء اللى الناس فيه

rawan يقول...

بجد يا دولت احييكى وبشده ع التوبيك ده بجد انا مش عارفه احنا ليه بنشتم فى البلد دى اللى بيقول انها مش نضيفه هو مين اللى خلاها كده؟؟؟؟؟؟؟؟؟؟ مهو احنا
بجد احنا مش فالحين الا فى تعليق اخطائنا ع شماعه الاخريين

وبجد مصر امى امى امى امى امى امى
مش معقول ناس ضحت بنفسها عشا البلد دى واحنا فى الاخر هو فينرفننكر انتمائنا ليها ولا ندافع عنه

انا والدى كان فى حرب اكتوبر وكان بيحكيلى ع اللى شافه و التعب اللى الناس تعبته قبل الحرب ب 3 سنين و التدريب القاسى اللى كانوا بيدربوه ده غير السفر للاتحاد السوفيتى اياميها من غير ما اهله ولا هو حتى يعرف هو فين ده غير الحرب نفسها و التعب اياميها وشعورهم بالخوف من الهزيمه اما حصلت الثغره فى الجيش

وكان عندنا برده قريبنا اللى كان طيار و اللى ضحى بنفسه عشان كل طيارات ممصر ميحصلهاش حاجه ودخل بطيارته فى دشمه العدو اللى كان القائد ميعرفش عنها حاجه و اللى كانت هدمر كل طيارتنا

ده كله و ناس تقول هيا مصر عملتلنا ايه ؟ انت اللى عملت ايه؟

ممكن احنا مش فى ايدينا حاجه نعملها بس انا شايفه ان احنا نقوم بواجبنا من المذاكره و الاجتهاد و لما نكبر ان شاء الله ونشتغل نتقى الله فى اللى تحت ايدينا

rawan يقول...

ان شاء الله مصر هتبقى متقدمه و اندم عما قريب شاء الله مفيش ليل بيدوم
وزى ما كان فى نكسه وجه بعدها نصر يبقى ان شاء الله احنا هنبقى فى تقدم عما قريب

Alice يقول...
أزال المؤلف هذا التعليق.
Think Pink يقول...

:)
:)
يارب بكره يبقى أحسن :)

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة