الثلاثاء، 13 يوليو 2010

شوية دردشة


انا فاكرة مرة واحدة سألت استاذنا الكبير قالتله ان زمان كان فيه جهاد ضد الاعداء ويالثواب من مات شهيد احنا فى زماننا ده مفيش جهاد ضد اعداء يعنى راح مننا ثوابه قالها انحنا فى زمن الفتن الواحد المفروض يقاوم نفسه وهواه جهاد النفس اصعب بكتير من جهاد العدو يعنى مثلا لو قامت حرب وناس اتكلمت حتثير الحميه فى النفوس والكل حيندفع للجهاد لكن قول لواحد يقاوم نفسه وميسمعش مثلا اغانى او ميتفرجش على الافلام نادر اللى حيقدر زى مثلا ناس قليلة اللى بتروح تصلى الفجر ناس كتير بتبقى على النت فى الفجر قليل اللى بيروح يصليه فى المسجد المشكلة ان فى ناس واهمين بيقنعوا نفسهم بيقولوا انا صليت الفجر كفاية عليا دة فى ناس مبتصليش الفجر يعنى بيحسس نفسه انه عمل مجهود خارق بأنه صلى الفجر فى البيت... قال رسول الله صلى الله عليه وسلم (حفت الجنة بالمكاره وحفت النار بالشهوات ) المهم يعنى حاولوا تقاوموا نفسكوا وتمنعوها عن الشهوات اللى بيسمع اغانى وكدة اللى مش حيقدر يعرف انه ضعيف


عارفين لما واحد بيقول انا حبى للشخص ده غيرنى خلانى احاول ابقى انسان احسن واعدل من نفسى او يقول الحب غيرنى والكلام من دة انا بجد بكون عايزة اقول للى بيقول الكلام دة ( دى خيبة ) الاجدر كان حبه لربنا ورغبته فى التقرب ليه هوة اللى يخليه يتغير ويبقى احسن ولا قبل كدة سمعت حكاية ان واحد كان بيحب واحدة مسلمة فأسلم علشانها يعنى هوة مأسلمش غير لما حبها


ربنا جميل يحب الجمال الجمال موجود فى كل حتة كونك انك مش شايف الجمال فده العيب منك


فى شهر رمضان تلاقى ان المساجد مليانة بالمصلين يخلص رمضان من هنا ترجع المساجد تفضى تانى انا عارفة ان رمضان فيه رحمة ومغفرة وعتق من النار بس ميكونش فرق رهيب بين رمضان وبين اى شهر تانى فى العبادات كلها بالشكل دة .. رب رمضان هو رب كل الشهور هو ربنا هو الله


حاولوا تستفيدوا من الاجازة اقروا فى الكتب الدينية احفظوا قرآن اقروا تفسير اقروا كتب عادية متضيعوش وقتكم فى حاجات فاضية او قراية حاجات ملهاش لازمة زى الالغاز دى مرحلة وعدت وبرضة بلاش الروايات انا بحس ان ملهاش لازمة مش حتفيد وبرضه فى كتب مثلا زى اكتر ميت شخصية مؤثرة انا قريت فيه شوية حسيت انه ملهوش اى لازمة ... فيه كتب الدكتور مصطفى محمود حلوة وجميلة وبعض كتب الدكتور احمد خالد توفيق حلوة فى كتب كدة بتفهم العملية ماشية ازاى مش مكلكعة حلوة لكن متجيش واحدة تقوللى كتاب برمجة عصبية ولا كتاب كيف تسيطر على حياتك وتضيئها سعادة

16 قالوا رأيهم:

Doaa helal يقول...

بصي يا ايمي انا متفقه معاكي في كل الموضوع لكن معترضه وبشده وبشده وبشده تلاته وبشده في تاني فقرة انا ممكن فعلا حبي لشخص خلاني اخده قدوة ليا وده حصل وبيحصل وابدا اتعلم منه وابقي افضل بسببه وفيه ايه بتقول " انك لا تهدي من احببت ولكن الله يهدي من يشاء " وكلنا عارفين ان الله هو مسبب الاسباب جعل لكل شئ سبب وجعل الشخص سسبب في هدايه الاخر ولكن بامره وباذنه بس هي الفكرة انه بيكون مقتنع من جواه والله انتي لو جيتي تكلميني علي الاسلام وانا اصلا مش حاباكي مش هتقبل منك اي كلام ولو انتي بتتكلمي باقوي الادله والبراهين ولو انا بحبك كل كلامك هفهمه واتمعن فيه واحاول اقبله وده رايي وانا حاسه انك هتقتنعي بيه
وتاني حاجة ليه كلكوا بتقولوا الروايات مش مفيده انتي عندك 24 ساعة هنقول بننام 9 ساعات بما اننا في اجازة متفهمنيش ان الباقي هقعد اقرا قران وتفسير لان مينفعش تبقي حياتك كلها كده ليه مكنش بحفظ قران وبقرا حاجات دينيه وفي نفس الوقت بقرا روايات ليه بتبصي للروايه علي انها حاجة تافهه لو كانت حاجة تافهه مكنتش نجحت انتي بتستفادي من الروايه دي في دنيتك كتير ممكن تغير فكرتك عن فئه معينه عن ناس معينه والمفروض منسفهش اي عمل ايا كان لان صاحبه لو كان عارف انه هو تافه مكنش هيتعب فيه ويكتبه والالغاز علي فكرة انا لسه بلعب بالبازل لحد حالا لانها بتعلمني الصبر وطوله البال وبتنمي الذكاء وانا بصراحة مش شايفة انها مرحله وعدت كل المراحل متشابكه مع بعض وهذا رايي وشكراااااا

Alice يقول...

مين جاب سيرة قدوة فى الموضوع على العموم انا مكنتش اقصد قدوة انا بقول ان واحد مثلا حب واحدة بيتغير علشانها عايز يبقى انسان احسن علشان بيحبها دة غلط كان اولى ان حبه لربنا هوة اللى يغيره
بصى فى حكاية الروايات انا مش فاكرة انى استفدت من روايات قريتها الا نادر منها
ده مش معناه انى بقلل من شأن كاتبها انا عن نفسى مبفضلهاش بحس انها مضيعة للوقت وجهات نظر
مقصدش انا الالغاز بازل وكدة انا اقصد رجل المستحيل وملف المستقبل وما وراء الطبيعة والمكتب رقم 19 دى مرحلة وعدت

Ahmed Elfeky يقول...

هوا بجد ليه موضوع الروايات دى مضايق ناس كتير ؟! مفتكرش أنى كان ممكن أكون انا بالعقليه بتاعتى دى لولا ميكى ورجل المستحيل .. وأه انا بحب بلدى وبحاول اصلح المجتمع بسبب شعور الإنتماء الرائع اللى دكتور نبيل نقله لينا فى سلسلة رجل المستحيل وبرضه عرفت حاجات كتير جدا من كتابات دكتور أحمد توفيق وعلاء الأسوانى وغيرهم ولسه بقرا المغامرون الخمسه لغايه دلوقتى ومازلت حريص أنى أشترى ميكى كل أسبوع ! وفى نفس الوقت بقرا قرآن كل يوم وبنصلى الحمد الله .. ده تعليقى على جزئية الروايات اما باقى المقال فهو رائع جدا ..

Alice يقول...

شكرا
انا بقول ان لو واحد قدامه اختيار يقرا الالغاز ولا كتب د مصطفى محمود اوداحمد خالد توفيق او اى كتب مفيدة يختار الكتب ..دة رأيى
سلسلة رجل المستحيل جميلة بجد بتحسس بالانتماء وكدة حلوة لغاية العدد 150 بعد كدة حسيت مستواه قل ومكملتش .. هى خلاص اخدت وقتها من اعدادى وثانوى
على العموم دى وجهات نظر

Ahmed Elfeky يقول...

إحنا بش خنا عشان نحكم على جوده السلسله :D

بس لأ على فكره بتيجىة أحيانا بتبقى عاوز تقرا حاجهع زى دى .. وإيه يمنع يعنى مع كتب دكتور مصطفى محمود وكتب الغزالى وكتب ناس كتير إنى أقرا الألغاز والحاجات دى .. عموما هى وجهات نظر زى ما قولتى :)

Unknown يقول...

جضرتك أنا ليا شويه إعتراضات أتمنى مناقشتها

سمعت حكاية ان واحد كان بيحب واحدة مسلمة فأسلم علشانها يعنى هوة مأسلمش غير لما حبها
بداية مسأله الإسلام من عدمه بتعتمد على توفيق الله
وهداية القلب للإنسان أه مش هنكر إن ممكن الإنسان
يغير ملته لمجرد إنه حب واحده لكن اللى أنا مؤمن
بيه واللى كمان الواحد لو فكر فيها بعقليه شويه
هيلاقى إن ممكن ربنا يكون جعل المخلوقة دى كسبب
يجعله يتجه للطريق السليم

ثانيا مسأله الروايات والكتب أنا مش هتكلم عن
كتاب محدد حضرتك حددتى نفسك فى كام كتاب وهوا
ده يبقى الحياه معذرة أنا لا أتفق مع حضرتك ببساطه
جدا بالشكل ده مثلا لو أنا لو قريت مثلا فى حضارة
الإغريق يبقى تضييع وقت مثلا لأنه لعبكه لا طبعا
مينفعشى إنى أحط نفسى فى فكر واحد وأعيش عليه ده
حتى الرسول (ص) قال :- من تعلم لغة قوم أمن شرهم
أو كما قال يبقى أنا بقى أفضل على الكتب الدينيه
وخلاص أما بالنسبه لمسأله الروايات أنا شايف إن
مفيهاش مشاكل يعنى مثلا أنا هتكلم من منطلق دينى
زى ما حضرتك وضحتى فى الموضوع فى بعض الأعضاء معانا
هنا فى المدونه المميزين جدا فى مسأله الكتابه
والتأليف ببساطه كيف لهم من تطوير موهبتهم بدون
القراءه تمام وبعدين يبقو قادرين على كتابه مثلا
روايات تحمل أهدافا معينه دينيه بقى سياسيه أيا
كانت
وأسف على التطويل .... وطبعا الإختلاف فى الرأى لا
يفسد للود قضيه

Alice يقول...

هى على العموم وجهات نظر
رأى حضرتك انا احترمه رغم الاختلاف معاه

I love rain drops :) يقول...

كل الكلامــ حلو

بس كون إنسان دخل في الإسلامـ عشان حب واحدة مسلمة دهــ مش غلط

وعموماً
لو هو دخل الإسلامـ لمجرد الحب , لو مش اقتنع والحب بيروح مع مرور الوقت خاصة في الزمان دهـ يبقى اكيد هيخرج عن الإسلامـ

إنما في ناس كتير دخلوا في الأغسلامـ بداعي الحب
وبعد كدهـ
اصبحوا مسلمين بعد الاقتناع

Rawan يقول...

ايه يا اخت ايمان مالك ومال الكتب اللى انا بحبها دى الكتب اللى ببابقى سعيده وانا بقراها ليه احرم نفسى من حاجه انا بحبها و ع فكره ده علم واسع جدا وفى ناس ضيعت عمرها عشان توضح العلم ده والعلم ده هو اللى بيخلى الواحد ميوقفش عند ازمه مر بيها وهى اللى بتخلى الواحد يحس دايما ان الامل موجود وبعدين مهو لازم الواحد ينوع فى الحاجات اللى بيقراها والا هيشعر بالملل من قراءه شىء واحد


وليا اعتراض ع حته تانيه مفيهاش حاجه اما حد يتغير عشان حد انتى لو لاحظتى ان احنا دايما بنقلد اللى احنا بنحبهم من المهد الى اللحد من اول ما اتولدنا واحنا بنقلد اخواتنا فى كل حاجه عشان بنحبهم وكمان لو ليكى حد صغير بيحبك هتلاقيه بيقلدك فى كل حاجه ...........انما لو حد انتى مش بتحبيع عمرك ما هتقلديه فى حاجه حتى لو بيعمل حاجه صح

Alice يقول...

رأى حضرتك سليم وانا موافقة مش معترضة انا بقول ان حاجة غريبة مهو عارف ان فى اسلام من زمان .. الهجرة لازم تبقى لله ورسوله ..متكونش لامرأة .. على العموم ربنا مسبب الاسباب ممكن زى ما دكتور قال ان ربنا حطها فى طريقه علشان يسلم محدش عارف
كتير الايام دى اتنشرت حكايات اللى بيغير او بتغير دينه(ها) علشان ينفع الزواج الله اعلم ما فى القلوب

Alice يقول...

ازيك يا روان على فكرة انا كتبت آخر سطر بهزر معاكى بيه كنت عارفة انك حتعلقى بس اتأخرتى ليه .. براحتك يا روان يعنى تقدرى تقارنى بينه وبين كتاب التغذية والصحة حتلاقى فرق رهيب فى الاستفادة وانتى عارفة كدة
انا مبتكلمش على التقليد او القدوة انا بتكلم اللى بيقول ايه انا حبى لها خلانى اشوف الدنيا اجمل او علشانها حبطل السجاير واعدل من نفسى واصلى

Doha يقول...

عدوانية في كلامك
وظالمة الحب معاكي فى كل حاجة
بصي يا ايمان
انا متفقة مع كل اللى اعترض على نقطة اني اتغير عشان حد بحبه
لان فعلا كل حاجة بتحصل بحكمة وكوني اني حبيت حد وبسمع كلامه عشان بحبه وبحاول اتغير لان حبي فيه هو اللى حببني فى الحاجة دي يبقى مفيهاش أى مشاكل
وخدي بالك ان دي بتنبه العقل مهما كان إلى انه كان لازم يعمل كل حاجة صالحة عشان ربنا
ده اللى اكتشفته ان بعد ميحس انه بيعمل حاجة عشان حد بيفتكر ربنا ووالله فعلا بيفتكر ربنا ..


موضوع الروايات هتنضربي لو نطقتي
وخدي بالك ان كل واحد بيختار كل حاجة مناسبة لميوله وحاجة يستمتع بيها وفعلا بتفيد فى أى موقف يمر بيه لقدام وبتنفع صدقيني


حلوة المناقشة دي أوي
عاوزينها تزيد يا اخوانا

Rouan يقول...

amy bgd 2na lw makontish bkra2 fe 2l NLP we 2l ko6ob 2l mn 2l no3 da makontsh fakart eni 2kra2 ke6at 2l ta3'zia ma3a 2l molahaza eno b 70 geneh
w ana b7s 2n 2l ko6ob deh btfedney gedan kafaya 2ny ba2dar 2qn3k bweghe6 nazary
w ba3din 2nty 3arfa 2ni banw3 w ana 2li gebt ketab 2l ta3'zia mn 3'ir ma7ad y2oli sa7????????????????

قبل العالم الأخير يقول...

حقيقى مناقشة جميلة جداااا...اول فقرة راااااائعة وياريت نكون فاهمينها كويس...تانى فقرة اللى فتحت المناقشة فبرده انا بتفق ان التغيير مش معناه انه اتغير عشان امرأه بهذا التنكير يعنى...يمكن شاف فيها خلق المسلمة الصح وحبها لدينها وحب يكون على دينها ده..عموما الحب سبيل لأى تغيير واى اصلاح....اخر فقرة فأنا باتفق مع حضرتك جدااا بخلاف نقطة الروايات الادبية...انا مثلا عندى فوبيا من كلمة مفكر او اديب...لأن للأسف ارتبطت بخروج عن النص وشطحات للعقل لا خير فيها...وكله تحت اسم الابداع الفكرى..يبقى احنا دورنا ان اللى عنده الموهبة يوري الناس الادب الحقيقى المتزن...وبالنسبة لروايات رجل المستحيل وما وراء الطبيعة وكده فهم حلوين لكن فعلا الواحد كل ما بيتقدم لازم يقرا لحاجات اعلى عشان تفتح دماغه وتحاول تفهمه الحياة والدين....وزى ما كله قال اختلاف الرأى لا يفسد للود قضية

Alice يقول...

ضحى ملكيش عندى غير رد واحد (آه بس لما اشوفك ماشى ..ماشى)
ياروان بكره الفرانكو انتى بتعاقبينى ولا ايه .. براحتك ياروان انتى كدة حتتبرمجى عصبيا غلط
بجد رأى حضرتك صح جامد فى الضيق من كلمة الابداع الفكرى فى كلام بيتكتب عك جامد ويقولوا ده مبدع مبدع ايه بس بالظبط انا بقول كل مرحلة لها حاجاتها كل مالواحد يكبر يقرا حاجات اعلى كلام حصرتك صح

Doha يقول...

ضحى ملكيش عندى غير رد واحد (آه بس لما اشوفك ماشى ..ماشى)

:S

يبقى انكتب علينا الفراق بس ايه اللى مضايقك من كلامي ؟

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة