الأحد، 18 يوليو 2010

وعجبي !


هوة يعنى ايه الحياة ؟
اكيد مش ان الواحد يتنفس وان قلبه ينبض .. ايه الحاجات اللى تبقى في حد علشان اقول انه حي ؟!
ان يكون عنده معنى للحياة ! ...... يبقى فى ناس ميتة من زمان
ان يكون عنده هدف ! ...... برضه ناس ميتة من زمان
سعات بشك ان الشخص دة حي بس بلاقى انه بتنفس يعنى على الاقل مش جثة بس برضه مش حي !



احنا عندنا ازمة كبيرة فى ترتيب الاولويات بنرتب غلط .. و بنضيع على نفسنا حاجات كتير بالترتيب الغلط دة !

كل واحد جواه قوة جبارة ممكن يطلعها فى اوقات تانية غير الخناقة .. بس يلاقى سبب او حافز قوى يخليها تخرج !

فى ناس بتقول انهم مش عايزين يرهقوا فكرهم بالحاجات التافهة .. بس اصلا التفكير هى تافهة ولا لأ بياخد وقت .. وبيرهق التفكير اكتر من الجهد اللازم فى التفكير فيها !

لو السعادة بتتوزن فى ناس كتير بتوزنها .. بتحط قدامها حجر بحيث كدة كدة تخف كفتها .. ويقولوا ان سعادتهم قليلة ولما تيجى توزن همومها توزنها بتحط قدامها ريشة فكدة كدة كفتها تهبط ويقولوا ان همومهم ثقيلة !!
دول بيقيسوا بمكيالين ولا ايه يعنى ؟ فى ناس تشعر بالرثاء والشفقة حيال نفسها وتبالغ اوى فى انها تعيسة دة كدة بتقضى على لحظات السعادة بتاعتها بالكلام ده !

العين دى فى رأيى هى مفتاح رؤية نفس الانسان .. روحه بتخرج من عينيه .. بتبان لكن خلينا واقعيين مين اللى حيبص فى عين اللى قدامه علشان يعرف حالته ؟ حيفتكروك غريب الاطوار..!

انا عجبانى جملة - الواقع تجاوز الخيال - .. سعات بنقرا احداث حاجات استحالة تكون من تأليف الانسان لأن عقله مهما وصل من العبقرية استحالة يوصل انه يألف حاجة زى اللى حصلت فى الواقع !

حياة الملل والفراغ سم بطئ قاتل .. وبرضه سعات بيكون مقترن بهلاويس بتدفع الواحد انه يدى حاجات ملهاش قيمة اهمية بالغة .. ويحولها لشبح .. طريقة دفاع من نفسه الشاعرة بالملل لتضيف بعض الرونق لحياتها المملة الفارغة !
واحد مثلا حاسس بملل بعد كدة فجأة يشعر انه بيحب واحدة بجد عقله مسكين .. !
الحرية حاجة مهمة اوى .. زى م بيقال بجد الواحد لازم برسف فى اغلال القيد ويطلق سراحه مرة واحدة عندها سيشعر فعلا بالحرية .. لازم يتألم ويعانى علشان يدرك معنى السعادة .. غير كدة مش حيشعر بطعم السعادة او الحرية او لن يدرك انه يعيش فيهم .
احنا بنفهم المشاعر بعكسها .. يعنى مثلا ماهى السعادة ناس كتير حترد طبيعى عكس الحزن ماهى الحرية هى عكس القيد .. لكن المشكلة لو الواحد اخد الدرس بالعكس يعنى يعيش فى حرية وهو غير شاعر بها بعد هذا يقيد حتى مماته او يعيش فى سعادة غير شاعر بها ثم يعانى حتى مماته .. هو حقا عندها يفهم معنى الحرية والسعادة , لكنه ابدا لن يشعر بها مجددا علشان كدة احنا مش فاهمين معنى الحياة علشان مجربناش الموت اللى تلاقيه حاسس فعلا بحياته ومقدرها جامد هو اللى شاف الموت بعينه وكان خلاص حيموت بس ربنا نجاه ..

تخيلوا معايا حياة كلها سعادة .. ايه الملل ده !! بس برضه حياة كلها معاناة برضه ملل !

انا حاسة انى بكرر كلمة المشكلة كتير اصل المشكلة انى اتعودت عليها !

لما الواحد بيكتب بيعرف نفسه دى حاجة كويسة .. بس المشكلة ان برضة الناس بتعرفه .. يعنى قدامه حل من اتنين لإما يكتم ويكف عن الكتابة ويكبت الافكار فى عقله او يسيبها حرة طليقة يتعرف بقى مش مشكلة !

سؤال برئ هو ليه عمو انيس منصور بيكرهنا مع اننا مش اشرار ......يعنى مش اشرار اوى !

متقللش من قيمة نفسك او اللى بتكتبه بس برضه متديهاش ازيد من حقها .. اللى بيستهين من اللى بتكتبه دة ميستحقش انه يقرا كلامك يعنى خسارة فيه اكيد حتلاقى اللى يقدره ..

وعجبي !!

6 قالوا رأيهم:

Doha يقول...

" دول بيقيسوا بمكيالين ولا ايه يعنى ؟ فى ناس تشعر بالرثاء والشفقة حيال نفسها وتبالغ اوى فى انها تعيسة دة كدة بتقضى على لحظات السعادة بتاعتها بالكلام ده ! "

معك حق
:P:P
:D


انا متفقة معاكي فى موضوع العينين ده .. وفعلا بتعرفي الإنسان من عينيه .. انا غريبة الأطوار .. وأفتخر !!


بجد عاجبني أوي التعبير بتاع عقله مسكين .. :)


كل كلامك متفقة معاه معادا أنيس منصور عشان في حد قبل كده قالي اني شبهه ! انتي ايه رأيك ؟!!!!

وعجبي !جامد الموضوع

قبل العالم الأخير يقول...

موضوع جميييييل وخلص بسرعة

بجد كله حلو D:

Alice يقول...

عمو انيس منصور عدو المرأة رقم واحد بيكتب كلام عجيب يوم الجمعة مع انه تقريبا مش متجوز
كلنا غريبى الاطوار يا ضحى فى شئ ما
شكرا على التنظيم وكدة
شكرا

I love rain drops :) يقول...

العين دى فى رأيى هى مفتاح رؤية نفس الانسان .. روحه بتخرج من عينيه .. بتبان لكن خلينا واقعيين مين اللى حيبص فى عين اللى قدامه علشان يعرف حالته ؟ حيفتكروك غريب الاطوار..!

انا كنت فاكر ان انا الوحيد اللي باقول الجملة دي
فعلاً روح الإنسان وشخصيته بتبان من العين


كلامـ جميل جداً

Think Pink يقول...

:):):):):)
ايمان انتى مبدعه

Alice يقول...

الله يخليكى يا بيرى

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة