التليفونات

التليفون بيرن......

( اهواك و اتمنى لو انساك.........)

هنا (برقة شديدة) : الو

امير: ايه الصوت الحلو اللي ع الصبح ده

هنا : ميرسي يا حبيبي مفيش احلى من صوتك

امير : ايه بتعملى ايه النهارده ؟

هنا : مفيش قمت من النوم النهارده و انا بقول ميرو ميرو ميرو (طبعا دي مروة صاحبتها مش امير)

و ماما دخلت عليا و قعدنا نتكلم عنك ساعتين ( و هي اساسا لسة صاحية من 5 دقايق )

و الله يا أمير ماما بتحبك اوي مش عشان حاجة انت بتجيبها وانت جاي

انت عارف دي آخر حاجة احنا بنفكر فيها

امير (في سره) : اخر حاجة دا انتوا خاربين بيت اهلى

اهم حاجة انك تكوني مبسوطة يا حبيبتي

مش انا كنت بحلم بيكي طول الليل

هنا: بجد كنت بتحلم بايه ؟

امير: حلمت ان انا و انت اتجوزنا و الفرح خلص و مروحين و انت كنت لابسة ابيض في ابيض

(طبعا هو اساسا كان صاحي على كابوس عايز الحرق)

هنا : الله انا بحلم باليوم ده يا امير

امير: ان شاء الله يتحقق يا هننونتي

يلا اقفلي بقى

هنا : لا اقفل انت الاول

امير: (ام الموال بتاع كل مكالمة)

خلاص هنعد من واحد اتلاتة و نقفل سوا

1 2 3 و قفل امير علطول

هنا : انت ماقفلتش ليه

امير امير امييييييييير (طبعا دي هتبقى خناقة لرب السما بالليل)

********************************************

بعد الجواز بسنتين

التليفون بيرن

سيد مصطفى(متقلبش المواجع الجرح لسة واجع......)

هنا (بخشونة صوت غير مسبوقة) : الووووو

امير : نعم

هنا : انت هترجع امتى؟

امير: وقت مابرجع بس لو مش عايزاني ارجع ان ممكن ابات بره (اريح)

هنا : عايز تهرب

امير: هو في حد بيهرب من قدره (انا حاسس ان ربنا بيعاقبني) عايزة حاجة

هنا : عايزن حفاضات لابنك

امير: هو انت معندكيش ايدين و رجلين ماتنزلى تجيبي

و لا هو كل حاجة امير امير هو انا امير البحار

هنا : هو الواحد معدش يعرف يتكلم معاك

امير : اه انا مفيش حد بيعرف يتكلم معايا

هنا : يا امير اليوم ده مش بيفكرك بحاجة دا عيد جوازنا

امير: (دا اليوم اللي انا وقعت في في الفخ)

لما ارجع هنبقى نقف دقيقتين حداد على الجريمة دي

وبعدين انا ورايا شغل

سلام