الثلاثاء، 27 يوليو 2010

ظاهرة الشبشب البمبي .. ! !


استعد !

تخيل معي أنك داخل حجرة شات على الياهو أو المسانجر او الهوت ميل - تقريبا الاتنين واحد ! -  أو أى من هذا العك الفاضي .. وأنت متطفل غريب .. في محادثة بين فتاتين  .. - فقط أرجوك ألا تلعن ذلك اليوم الذي تخيلت فيه أنك تسمتع لثرثرات الفتيات التافهة ! -
تقول إحداهن لصديقتها  : شوفتي .. شوفتي  .. شوفتي ؟؟؟؟؟
فترد عليها بعجب وذهول : لا يا ختي مشوفتش  .. ايه ؟
فتطمئن الأخرى إلى أن صديقتها ستشاركها الإهتمام فيما ستقول لتبدأ في سرد ما قد - شافته - باطمئنان : شوفتي بودي كاتب ايه على الفيس ؟
فتتساءل الأخرى بعجب : بودي مين ؟
فترد الأخرى بتبرم : بودي يا بت .. عبد الله  - بسهوكة - .. انا قولتلك عليه قبل كده  !
فترد عليها صديقتها بعد أن أصابها الفتور وتتأفف قائلة : تاااااااااااااااني !! ماله المرة دي ؟
فتجيب الأخرى بعد هيام وسرحان : كتب على الوول .. " بحبك وبموت فيكي وانتي في البمبي يا حبي "
فتبدأ الأخرى بندب نصيبها المشؤوم لدخولها على النت في تلك الساعة لكنه واجب الصداقة يحتم عليها أن تستمع إلى حديث صديقتها الممل .. ثم تستفيق وتحاول أن ترجع إلى صديقتها عقلها فتبدأ بالكلام جادة : وانتي مالك هوا كتب ايه ؟
- يعني مانتيش عارفة .. انا حاسة انه معجب بيا .. !
- هيعجب بيكي ازاى بس هوا يعرفك أصلا ؟
- اه يا بنتي اومال .. احنا زمايل في دفعة واحدة .. وكمان هوا كتب البوست النهاردة .. يعني بعد متقابلنا ..!
- اتقابلتوا فين ؟
- كنت طالعة عالسلم وهو نازل  .. وفجأة .. جت عيني في عينه .. ضحكلي  .. ومشي .. 
- وبعدين يعنى ؟
- وبعدين ايه ؟ عاوزة اثبات أكتر من كده ؟ واهوا كمان بيقول بحبك .. بس انا عارفة انه محرج يقولي .. 
- يا بنتي اعقلي  .. هتلاقيه ميعرفكيش ولا يعرف شكلك أصلا .. وبعدين انتي النهاردة مكونتيش لابسة بمبي .. هيبقى بيكتب عليكي ازاى ؟
- لا انا كنت لابسة بمبي .. انتي نايمة ولا ايه .. مش كنت لابسة شبشب بمبمي النهاردة ؟! .. فوقي انتي بقى شوية !
- ازاى يعني ؟ انتي كتنتي لابسة شبشب لونه أخضر .. داحنا جايبينه سوا يا بنتي .
- مهو كان فيه ورد صغير لونه بمبي  .. يعني خاد باله من حاجة صغيرة أوي زى دي .. يبقى بيحبني أوي .. ياااااااه !


وتبدأ - بينكي - في رسم أحلامها - البينك - بوجود بودي معها  .. وتعيش في خيالات وهمية  .. فتبدأ في تفصيل كلماته عليها .. كأنما لم تحمل تلك الكلمات معاني سوى تلك التي تصل إليها .. ويكون كل - بوست - موجه إليها  .. وكل - لايك - على كلماتها  عربون حبه لها ..

لكن اسمح لى بعد تخيلاتك تلك .. ان تنتقل معي إلى - بروفايل - ذلك الشاب اللطيف .. لتجد ردود أصدقاءه تدل على أنه يتحدث عن شىء آخر  .. بعيدا كل البعد عن أنه معجب بها .. ثم تضحك حتى تكاد تختنق  حين تكتشف أنه كان يتحدث عن حلة المحشي عالغدا والتي صودف - من محض قبيل الصدفة - أن الحلة كان لونها  .. بمبي .. !


باختصار شديد .. هناك ذلك النوع - الفكسان - من الفتيات .. تلك التي لا تعيش سوى لأن ذاك معجب بها  .. وذاك دائما ما يصوب نظراته نحوها .. أما هذا .. فإنه - التقيل - .. قد لا يطيل النظر .. ولا يجيد الـ - لايك - .. ولا يقوم بأى فعل يدل على أنه معجب بها  .. لكنها تعرف أنه يجبها فى أعماقه .. حتى وإن لم يكشف عن ذالك .. 

عزيزتي الصغيرة .. اسمحيلي اقولك  .. انتي واحدة منعدمة الثقة بالنفس تلهث وراء تلك المشاعر .. ولا يوجد - كومنت - لدي سوى أن اقول 

" ياختي اتلهي ! "


12 قالوا رأيهم:

Doaa helal يقول...

والله تحفففففففففة بجد تحفة احلي حاجة فيه كلمه فكسان دي كلمتي علي فكرة بقي فعلا الموضوع ده موجود كتير وبيبقي سببه ان الشخصيه دي فاضيه من جوا واكيد مش واثقة من نفسها خالص انا عن نفسي مبحبش الفكسان انا بحب البت الجامده مش اوي يعني جامده نص ونص مش الي بتقع بلايك ولا بنظرة جت قدراا
اما بالنسبه للشبشب فانتي مختارة لونين اغرب من بعض بجد ههههههههه مش متخيله واحده رايحة الجامعه بشبشب اخضر وبفيونكه بمبي
واخيرا بحييكي بجد الموضوع تحفة جدااا

Doha يقول...

اه فاكسان دي بتاعتك !:D
ده اقتباس على فكرة :P
عااااااااااااااادي
الشبشب ده عاااااااااااااااااااااااااااااادي
اخويا كان قاعد مرة فى محاضره لقا واحدة داخلة بشبش عااااااااااااااادي ووالله قالي لونه بس مش فاكراه .. كان لون غريب برده
وبعدين انا مقولتش فيونكة
انا قولت فيه ورد بمبي .. ركزى انتي كمان
:P:P
:D

omnia saif يقول...

ههههههههههههههههههههههههههههه
جامد جداااااااا ياضحضح اهو انا بقي مكرهش في حياتي قد الفكسان ارحمنا يارب:D:D
هو فعلا كل واحدة تفكر بالطريقة دي تبقي يابختها قوليلي ليه بقي عشان فاااااااااااااااضية:D:D والله فاضية تخيلي لما فاكرة انه بص علي الورد البمبي فرجع جري يكتب عنها طب منين شاف الورد ومنين بصلها وضحكلها هو هيلاحق علي ايه ولا ايه ارحموه:D:D
انا مقصدش الموقف ده بالضبط يعني بس حاجة في نفس الأطار كده
يلا ربنا يهدي بإذن الله بس بجد حلو اويييييييييي ومعبر جدااااااااا

Alice يقول...

بجد مكنتش قادرة ابطل ضحك وانا بقرأ فى الموضوع بجد توحفة
انتى اخترتى اسم بودى ليه بودى دة اسم القط بتاعى طلع انه اسم دلع يلا مش مشكلة
فضحتينا يا ضحى وعرفتى الناس احنا بنتكلم فى ايه (طبعا بهزر) 
بس بجد النوع ده بيقى واهم ولو استمر وهمه كدة حيضيع وحيتجرح لما يعرف الحقيقة
بس وصباح الخير

I love rain drops :) يقول...

الموضوع جميل اوي
خصوصاً الورد البمبى
:)

Rouan يقول...

هههههههههههههههههههههههههههههههههههههه كلام جامد و الله راااااااااااااااااائع يا ضحى
ده كفايه الشبشب اللى فيه اخضر وبمبى مع بعض

shahenda يقول...

ههههههههههههههههههههههههه
هههههههههههههههههههههههههههههههههه
هههههههههههههههههههههههههههههههههههههههههه
مش قادره امك نفسى من الضحك
وكلمه فكسان دى بقى اكتر حاجه عجبانى لان الكلمه دى بنقولها كتير
وبالنسبه للبت اللى متسهوكه دى ربنا معاها فعلا
اغبى حاجه ان الواحد يخيل لنفسه حاجات مبتحصلش اصلا
ويعيش فيها وفى الاخر يقع على بوزوه هههههههههه
حلوه دى
وكمان انا مع امنيه ان البت دى جامده جدا
لان دماغها فاضيه وكمان ياجدعان دى لابسه شبشب اخضر وبورده بمبى حد عنده شبشب بالمواصفات دى
ههههههههههه
لو كان عندنا شبشب زيها مكوناش نبقى فى الوكسه اللى احنا فيها دى ههههههههههههه
بجد موضوع جامد

قبل العالم الأخير يقول...

مكنتش جاهز للضحك دلوقتى بس جااااااااااااااااامد وخصوصا اعتراض _بسهوكة_ ههههههههههههه لا وبودى برده :D:D:D وعلى فكرة المدونة كانت عايزة حبة ضحك فعلا ..

Yasmin lotfy يقول...

انتى عسل والله يا ضحى :D:D:D:D
موضوع جمييييييييييييييييل زيك يا ضحضوحه يا توحفه :D:D:D:D

Doha يقول...

ربنا يخليكوا يا جماعة كلكوا اولله
كنت خايفة يبقى دمه تقيل بس الحمد لله ضحكوا ..

واضحكوا الدنيا حلوة :)

Think Pink يقول...

هههههههههههههههههههههههههههههههههههههههههه

جامد جدا باسلوب رهيب
وتقوليلى ..........
أمال انا أعمل ايه ؟

like
like
like

sando يقول...

gamda
gamda
gamda
funny funny funny
w m3aki in each single word
bgd bte7sal:D:D:D:D:D

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة