الأربعاء، 15 سبتمبر 2010

ايه النور ده كله ؟! :D



Then from on high
Somewhere in the distance
there's a voice that calls 
Remember who you are ..
If You loose yourself 
you're courage soon will follow
so be strong tonight 
REMEMBER WHO YOU ARE





ولم لا تنير الدنيا وأنا فيها ؟! 

سألت نفسها وهي تنظر إلى النافذة وقد تبدلت الأحوال .. فيعد الضيق والشرود والحزن المتطاول على قلبها المرهف .. قد ابتسمت .. وربما ضحكت .. لكن قلبها ابتسم ابتسامة صغيرة بعد إعياء طال أمده .. أخيرا شعرت بمعنى السعادة النابعة من أعماق القلب !

المشاهد المتلاحقة أمام عينيها في طريق العودة من إجازة .. اعتبرتها فترة نقاهة .. تعيد فيها إنسانا احتضر بداخلها كثيرا .. لكن لرحمة ربها بها لم يمت .. بل ظل ينتظر النداء الأخير .. إما أن يلبي صوتها تريده أن يعود .. أو أن يلبي نداء اليأس .. فيبدأ بالسكون .. !

عرفت أن بداخلها نفس حتضر وعرفت علاجها .. فكانت تداويها بقطرات لا تمنح الشفاء الكامل .. كانت تبحث عن الدواء وعن يد تُمد لها .. لتنتشلها من ذلك القاع المظلم .. كانت تعرف أن أي يد ستمد لها لن تشفيها أبدا .. وحدها تعرف أن علاجها يكمن في قوتها أن تنهض وحدها وتغالب تلك المشاعر المحبِطة اليائسة .. وحدها عليها أن تنهض وتنتفض وتعلن الرفض والخضوع .. ووحدها جلست تنتظر نورا يملؤها قوة  !

وجدته في أيام مرت عليها لا تعرف كيف .. وقف في آخر لحظة واستندت إلى دموع الخشية والخضوع أمام رب العباد تطلب المغفرة والعفو من عنده .. قامت على أقدام هزيلة اعتادت الجلوس والإسترخاء .. وكان وقوعها وشيكا .. 
صمدت وحاولت ونهضت وأخذت خطوة .. !

ووقعت .. ! مرة أخرى  .. حدثتها نفسها بانقطاع الأمل .. وسمعت آخر أنفاس نفسها المحتضرة وهي تصارع الموت لأجل الحياة !

لا تذكر كيف وصلت إلى تلك الإبتسامة .. لا تعرف كيف أصبحت في تلك السعادة .. كل ما تعرفه هو أنها نهضت وأخذت ترقى إلى نور يأتيها من صورة لها أخذت مكانها على درجة عالية .. وعليها أن تحافظ على قواها .. حتى تعود إلى مكانها .. وترقى أكثر  وأكثر  . 




 I never knew it could happen
till it happened to me
I never saw it before
but now it's easy to see
It's the start of something new
It feels so right to be here with you





جميل انك تشوف الدنيا من منظور تاني .. جميل انك تدعبس جوا نفسك وتكتشف جواك حاجات مكنتش تعرفها .. ممكن تطلع حلوة وتفرح انها موجودة وتحاول تخليها أجمل .. وممكن تطلع وحشة وتحاول تصلحها .. 

جميل لما تقف جنب حد بتحبه وبيحبك .. 
جميل انك ترسم ضحكة على وش أى حد .. حتى لو كان عجوز مكحكح خاد من الضحك كفايته ..
جميل أنك تحس باللي قدامك وتقدر مشاعره .. 
جميل إنك تقدر قيمة اللي حواليك وتعرف ان كل واحد جواه حاجة حلوة .. وميزة مش موجودة فيك .. ساعتها عمرك مهتسخر من حد قدامك  مهما كانت عيوبه ..
جميل انك تحس الحياة حلوة وصافية .. 
جميل انك تعامل الناس بقلب أبيض .. 

بس مش جميل انك تقعد تفكر اللى قدامك هياخد انطباع عن كلمتك دي ازاى .. طب علشان افهمه اني كذا يبقى اقول كذا وكده هتبقى كل حاجة زى الفل وهيحبني وهيعرف اني طيب وابن حلال ويرضى يجوزني بنته .. !! 

بجد نصيحة  .. Just Be Yourself !





Coz have you ever been in love .. so love
you could touch the moon light 
you could even reach the stars 
it doesn't matter near or far
have you ever been so in love


 



برغم ان الأغنية حلوة .. إلا إنها في الحتة دي بتخليني أقولها " براحة يا حاجة .. !
الحب .. كلمة مش غريبة خالص .. هنقعد نوصف فيها كتير .. وكتير أوي كمان ..

طبيعي لما تعرف ان في حد بيحبك أو مهتم بيك .. هتفرح .. وكل الناس بتفرح .. بس بينسوا ان الحب ده مسئولية .. آه مسئولية ..
مسئولية انك متجرحش اللى بيحبك لو انت قلبك مش ملكك ..
مسئولية انك تراعي مشاعر غالية حتى لو كانت مزيفة .. ومراعاة مشاعر يعني انك لما تبقى عارف ان فى كلمة هتقولها هتأذي اللى قدامك لانه بيحبك يبقى متقولهاش ..
ومسئولية انك لو بتحبه فعلا تحافظ عليه وتصونه .. وتخاف عليه مش كلام وبس .. بجد الحب ده مش بالساهل كده .. ومش كلمة سهلة تتقال .. لازم تبقى عارف الأول يعني إيه بحب !

وفي النهاية أحب أحيي سيلين لأنها في طلعتها اللي تخض ممكن تفَوق اللى بيقولك بحب .. وتقوله ركز .. يعني ايه حب ؟!







وبلالين بلالين بلالين
منفوخين منفوخين منفوخين 
طب على مين على مين على مين ؟
والله مفرقتش كتير 








بجد الأغنية جامدة .. وأحلى حاجة المؤثرات الصوتية اللى بين الكلام .. والإيقاع نفسه يخليك تقف تتنطط .. والكلام !
الكلام تقعد ترسمه على أى موضوع .. أى مشكلة موجودة في مصر في البيت مع اصحابك .. أحلى اختيار تتسلى بيه في وقت سفرك وانت قاعد مبتعملش حاجة غير انك تفكر ..
وفي النهاية أحب أهدى نفسي والأمة الإسلامية وطبعا كُليتنا العزيزة المقطع اللي بيقول : 

" يا ترى ده اللي جايبنا لورا ؟! يا ترى ده اللي جايبنا لورا ؟! 
فاهمين لا مش فاهمين ؟! والله مفرقتش كتير .."







تمرين أول وتاني 
وسؤال في عنينا تاني
يا بلادي أنا امتى هكبر ؟
وهطول النخل وأقدر ؟ !




أحلى حاجة انك تنسى الدنيا وانت بتلعب مع طفل صغير .. بجد بتنسى أى حاجة قدام ضحكته وبراءته وعينيه اللى كل شوية تسأل سؤال وتلاقي حيرة لطيفة لعالم غريب وخصوصا الكائن اللي قاعد قدامه اللى مش فاهم ده من أنهى كوكب .. 
بس كفاية عليه انه بيلعبه وبيضحكه .. 
وفجأة ترجع من عالمك الطفولي لسنك الحقيقي وتندب حظك انك مش طفل لسة .. تعرف تلعب وتنسى الدنيا .. 
وتلاقيك في الآخر بتبص للطفل اللي انت كنت بتلعب معاه من شوية وفي عينيه رغبة في انك تكمل لعب معاه .. 
فتلعن الدنيا وحكم السن وترجع تلعب معاه وانت بتقول " ياكش تولع " .








كلمة حلوة وكلمتين 
حلوة يا بلدي 
غنوة حلوة وغنوتين 
حلوة يا بلدي 
يا محلى كلمة بلدي فى غنوة بين صدرين
يا ليل يا عين 
يا عين يا ليل

آه يا بلدي حلوة وحلاوتك ملهاش زي .. كفاية انك اسمك بلدي .. وبحبك لأنك وطني .. كل أما تسود والعيشة تزداد هم ألاقي فيكي حاجة حلوة تخليني اتمسك بيكي وأدافع عنك .. وأقول يا بلدي !

حلو الشعر اللي فوق ده .. بس بجد المشكلة مش فيكي المشكلة في شعبك .. فيه البدع كلها والله .. وإحدى العجائب السبعة ليه هوا ان  داء الرفاعنة لسة مراحش من عندنا .. 

الفراعنة اللى بنوا الحضارة القديمة كان عندهم داء الكتابة على اى حاجة تقابلهم .. ورق بردي .. حجارة .. رمل .. أى حاجة بيكتبوا عليها .. مكانش في حاجة بتصعب على المصري المحنك .. ولسة الداء ده موجود لحد دلوقتي .. 
الشاب المصري مش بيسيب حاجة إلا ويكتب عليها .. من أول الدكة بتاعة المدرسة لحد تمثال تحتمس السابع والعشرين .. 
طب هما زمان كانوا بيكتبوا حضارة وأساليب زراعة وفن وحكم .. صحيح كان في حاجات تانية ملهاش لازمة بس دلوقتي ليها قيمة .. 

ومن نفس المنطلق بيبدأ المصري المحنك يكتب على الحيطان .. على أمل ان في يوم في عام 2215654 هيجوا السياح من كل أنحاء العالم يتفرجوا على حضارة مصر البهيمية في زمن الإنفتاح .. وتبقى جملة " ميدو حمادة .. موبايل 0132665414 وايميل Shdf_er@yahoo.com .. كلمني في أى وقت وابقى قابلني لو رديت " .. أو مثلا  " بتنجانة بتحب عدس إلى الأبد " .. إلى مالا نهاية من الكلمات الأثرية في وقتها .. هتبقى لا تقدر بثمن .

سؤال بس بيترنح في بالي دلوقتي .. الى بيحط نمرة موبايله ده في ناس بتتصل بيه فعلا ولا ايه ؟! ..
عاوزين الحق .. فكرت مرة أجرب علشان أشوف ايه اللى يحصل .. بس تراجعت عن الفكرة .. بس ساعتها اتأكدت ان في ناس هبلة بتتصل  .. 

وبرده من نفس نقطة المنظور اسمحولى أكتب على حيطة المدونة اسمي ورقم تليفوني  .. والميل كمان عادي بقى 
" ضحى عادل    0156954785

على الله بقى تطلع نمرة رئيس مباحث ولا حاجة يسبب للى هيتصل قضية إزعاج سلطات .. !




نفسي أغمض عيني وافتح
وألقى نفسي 
في الأجازة 
دي الحياة من غير مذاكرة 
حلوة أوي 
في الذاذة 

( دي الكلية بتاعتنا )
وأديها راحت الأجازة .. نفسي ألاقى صورة واحدة بتصوت وبتشد في شعرها وبتقول لا حرام .. 
كل سنة وانتوا طيبين 

الأجازة خلصت 
وهنبدأ الدراسة السبت الجاي .. :S:S







هما الصوماليين احتلوا البيت عندنا ولا ايه ؟!


!!

9 قالوا رأيهم:

Ahmed Elfeky يقول...

الموضوع ده فاجر :D

Doha يقول...

دي حاجة كويسة صح ؟:D
شكرا يا فندم

Ahmed Elfeky يقول...

دى حاجة كويسة أوى اوى اوى كمان :D


وربنا أنتى تُحفة بجد .. مواضيعك فعليا بتطور بصورة رهيبة من أول موضوع ليكى هنا .. لا لا لا بجد ماشاء الله عليكى .. أوعى تبطلى كتابة فى يوم من الأيام :D


ملحوظه :
تم حذف الكومنت السابق بواسطتى لشعورى بالتجاوز قليلا أثناء الكلام .. ! أعتذر

Doha يقول...

:))
مفيش أى مشكلة والله انا سعيدة ان الأسلوب بيتطور وان شاء الله مش هبطل كتابة لحد متجوز :P
بما انها االنهاية الحتمية :D

Ahmed Elfeky يقول...

:D ربنا معاكى ومش تبطلى كتابة حتى لما تتجوزى :D

Yasmin lotfy يقول...

راااااااااااااااااااااااااااااااااااااااااااااااااااائع

Rouan يقول...

ماشاء الله التوبيك ده حلو اوى و عجبتنى الحته بتاعه الحب مسؤليه
و مقاطع الاغانى اللى فى الوسط تاثير رااااائع
و عاجبانى اوى حته الكتابه ع الحيطه و الناس اللى بتكتب حاجات غريبه و الله انا باقرا ساعات ناس كاتبه قصه حياتها ع الحيطه

بس التوبيك ده اكثر من الرااااااااااااااااااااااااااااااااااااااااااااااائع
استمرى يا كوكىىىىىى

قبل العالم الأخير يقول...

بجدالصور كلها حلوة اوى اوى .. خصوصا التالتة :D ..اختيارات موفقة جدااااااا .. موضوع ميتملش منه بالعكس لذيذ جدااااا وسريييييع..

Doha يقول...

ربنا يخليكوا على التشجيع ده :)

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة