الخميس، 16 سبتمبر، 2010

مشاهد ومقالب .......الجزء الاول

مشاهد ومقالب


كل سنة وانتو مطحونين طبعا محدش خالص مستعد لاستقبال عام دراسي جديد في كليتنا الرائعة بين المشرحة لسكشن البيو لسكشن فسيولوجي لهستولوجي والخ الخ الخ
 
والي في كليات تانيه برده مش مستعدين


بس عادي هتدخلوا هتدخلوا وهتذاكروا يعني هتذاكروا


انا عاوزة ارجع معاكو فلاش باك سنة كده لورا


هتقولولي الي راح راح ومتقلبيش في القديم يا فوزيه وبصي لقدام وانسي الي فات


هقولكوا لا هترجعوا معايا ولا ارجع لوحدي


عموما الي عاوز يرجع يكمل الموضوع والي مش عاوز هيرجع برده


كان يا مكان من سنة زمان استنينا التنسبق وقبل التنسيق كل الي جاب مجموع عالي كتب طب


منهم الي مكنش عاوزها ومنهم الي كان عاوزها ومنهم الي كان عامل نفسه مش عاوزها وهو هيموت عليها


وفي الاخر التلات انواع دول جالهم طب الي عاوزها اخدها وفرحان واللي مش عازوها رضي بالامر الواقع واللي كان عامل نفسه مش عاوزاها لسه عامل نفسه مش عاوزها


كلام ملخبط معلش خلونا ندخل علي ايام الكليه


اول لما دخلنا الكليه كل واحد فينا كان بيطلع الاول او التاني بالكتير علي المدرسة


فكله حاسس اوي بنفسه مع اول مرة في الكورس كان عادي لسه برده حاسس بنفسك


مع تاني مرة عادي برده بس شوية بشوية كلنا حسينا اننا ولا حاجة وان اللي تفوق تفوق ملهاش اي علاقة  بثانويه عاميه


وبدا الاحباط يدق الابواب ولكن فيه ناس اتغلبت علي الاحباط  بالرضا بالامر الواقع


ومنهم الي ذاكر واجتهد ومنا الي نفض وكبر وقال اعيش انا اصلا مليش فيه


الدراسه ممتعه ليست بالسوء الذي يتصوره الناس


ولكن السئ فعلا هو االامتحانات وما فيها والمذاكرة وما نجد في الكتب من عجائب وطلاسم وليس عليك الا ان تبتسم للكتاب وترحب به وتبد أ المعركه معه وحتما ستخسر في النهاية

ويستطيع الكتاب ان يفقدك شعورك ويجعلك تصرخ وتمزقه صفحاته صفحة صفحة


دعك من الكتب والمذاكرة اجمل ما يمكن ان تتعلمه في هذه المرحله هي اتقان التعامل مع كافه فئات الناس عامه والزملاء خاصة


انظروا معي وتخيلوا المشهد كما تخيلته ورايته وسمعته واعتقد ان كلكم قد شاهدتموه

  بنات وبنين ولا اعتقد ان احدا سيعترض بنتا كانت ام ولد

المقلب الاول


سلوي : ايه يا بت يا نجوي هتعملي  ايه لما تروحي


نجوي : انا هقعد علي الفيس واكل وانام


سلوي : ايه ده مش هتذاكري الامتحانات قربت

 نجوي : امتحانات ايه ده 20% انا مبتهزنيش الحاجات دي


سلوي : طيب يا بنتي فكري انا هروح اذاكر من اول صفحة واحد لحد اول سطر في صفحة 10 كده


نجوي : يا ستي انتي دحيحة سيبيني في حالي انا اعييييييييش


ويورحوا البيت سلوي فرحانه بنفسها دي هتذاكر كتير دي نجوي مش هتذاكر خالص


ويا خيبتها يا خيبتها متعرفش ان نجوي خلصت لحد السطر التاني مش الاول من صفحة عشرة


ده مقلب تاني


سلوي : انا هروح اتصل علي نجوي احاول اقنعها تذاكر


قامت وراحت للتليفون


رنت مرة واتنين انا هقفل


لا خلاص اختها ردت


سلوي : ازيك يا لوزة عامله ايه


لوزة: الحمد لله كويسة مين حضرتك


سلوي : انا سلوي صاحبه نجوي


لوزة: ازيك يا ابله سلوي


ابله ابله مش مهم كفاية ان البت محترمه وبتحترمني


سلوي : نجوي موجوده


لوزة : ثواني كده


يا ابله نجوي ابله نجوي


نجوي : نعم يا زفته خنقتيني وكرهت اسمي


لوزة: ابله سلوي عاوزاكي انتي موجوده


نجوي : لا اانا مش موجوده قوليلها مش موجوده راحت عند الجيران عاوزة اذاكر الله يخربيتكو


لوزة: حضرتك سمعتي هي مش موجوده عند الجيران


سلوي : شكرا يا حبيبتي


تفقل التليفون وتتفتح شلالات العياط عشان هي مش عاوزة ترد عليها


وياريتها اتعلمت !!

مقلب تالت

يوم الامتحان الصبح - وخلوا بالكو من يوم الامتحان الصبح دي -


سلوي بعد ما نسيت الي حصل في التليفون


ازيك يا نجوي عامله ايه


نجوي : زفت زفت زفت مخلصتش مخلصتش حاجة يا سلوي


وتبدا دموع التماسيح


سلوي : معلش معلش بس بالراحه كله هيتحل ان شاء الله اقعدي لحد الامتحان اعملي اي حاجة


نجوي: مفيش فايده يا بنتي باقيلي كتير اوي انا طالعة اللجنه معلش مش قادرة


سلوي : ماشي هطمن عليكي بعد الامتحان


قال يعني يوم الامتحان الصبح ومخلصتش اي حاجة خالص هي فعلا مخلصتش المراجعه التالته فمتأزمة


وكل امتحان علي الحال ده وده مشهد عواقبه مش بتظهر االا بعد فترة


يوم النتيجة وطبعا العاده السنوية للكليه بتاعتنا بيعلقوا النتيجة في السهرة

يعني نكون اتغدينا وريحنا شوية وتلاقي التليفون بيرن


ويقولك النتيجة ظهرت


اليوم ده سلوي كانت قلقانة علي نجوي اوي اوي عشان كانت يا عيني بتعيط


واول لما عرفت ان النتيجة هتظهر راحت بسرعة تستني عشان تطمن علي نتيجتها ونتيجه نجوي


راحت لقت نجوي هناك وشها عليه فرحة واطمئنان راحت تقولها متقلقيش يا نجوي


ربنا هيكرمك بس انتي ليه مذاكرتيش كويس عشان تبقي مطمنه يوم النتيجة


قالتلها انا مين قالك اني مكنتش بذاكر انا كنت بذاكر بس مش اوي يعني


وظهرت النتيجة وكانت الطامة نجوي من الاوائل وسلوي ربنا اداها علي قد ما عملت

  بس طبعا هي مكنتش بتبذل مجهود كبير عشان عارفة انها كده كويس بالنسبه لصاحبتها فباقل مجهود كانت بتحس انها عملت حاجة

بعد نتيجة ال20%كل واحد عرف عمل ايه وعرف اتعمل فيه ايه بس معتقدش ان حد اتعلم حاجة


متعلمناش الا في الطامة الكبري الا وهي امتحانات اخر العام


الموضوع طول جداااا ووالله الي مكتوب ده مش خيال ده حق وبيحصل

ونابع من الي شفناه ونابع من تجربه سنة لو مستفدناش منها علميا فاحنا استفدنا منها سلوكيا

تعيشوا وتاكلوا المقالب هكمكل باقي المقالب ان شاء الله مرة تانيه


6 قالوا رأيهم:

Ahmed Adel El-Feky يقول...

فى إنتظار الجزء الثانى بفارغ الصبر .. :D

نفس المقالب دى فى كل الكليات :D وهيا هياها فى الثانوية بس على صغير :D

Heidenröslein يقول...

والله أبويا ده بيفهم .. :)

برمجني في الثانوية العامة .. زى الطب
عادي بقى :)

A L-S A A D A N Y يقول...

لايك جدا جدا جدا :)

دى قصص حقيقيه ميه فى الميه ووالله مهما الواحد تخيل قصص من دى فهى فعلا بتحصل فى الحقيقه:)

الى بيحصل ده لازم يتعمل منشورات وتتوزع على الطلبه اول يوم فى الدراسه
طب انا واحد صاحبى واحد صاحبه كان قايله انا هشيل اناتومى وكان بيعيط...وصاحبى ده اتاثر اوى وكان زعلان عليه...لغايه يوم النتيجه اكتشف ان الى كان هيشيل اناتومى ده جاب امتياز :)
بس الغريب.....ليه الناس بتعمل كده ؟!؟

Rouan يقول...

الموضووووووووووووووووووووووووع ده جااااااااااااااااااااااااامد جدا و فعلا الحاجات دىىىىىىى بتحصل بس انا قولتلك قبل كدا يا دعاء
العيب ع اللى بيدى ودانه لصاحبه و اصلا انا قايلالك اما حد يسال على المذاكره او يتكلم فى الموضوع ده تقولى الحمد لله و خلاص انما ما نقعدش ندى تقريى مفصل عن يومينا زى الهبل كدا
بجد احنا مش هنخلى الناس تبطل تتكلم بس ممكن احنا نبطل نسمعهم

manar يقول...

لايك اوى يا دعاء. بس والله الحركات دى بقت مفؤوسه خلاص وبقت بتتفهم واللى بيعمل كده مبنوبوش غير عدم ثقة صاحبه فيه وانه بيقل فى نظر صاحبه. للاسف بس طبعا احنا مبنتعلمشى اصلا. الكلام ده طوووووول عمره بيحصل فينا واحنا عارفين وساكتين وهيحصل برضه وموش هنتعلم واللى يغيظك احيانا ان كمان فى اهالى بيحثوا اولادهم ع كده ويقولولك خبى ع شمعتك تقيد ويكونوا خايفين اوى من الحسد بس انا بكره الاسلوب ده كل واحد يخبى ويدارى ويضحك ع صاحبه والله انا ما بكره فى حياتى قد الكدب والنفاق بجد يا اعوذ بالله انا موش بانكر ان فى حسد .بس مينفعشى حد يبقى مبحبح ع الالخر ورايح جاى بيقول للناس هوا بيذاكر ازاى بس برضه مع صاحبه يكون صريح عادى معاه ما دام صاحبه هو كمان صريح . وبجد زى ما قالت روان يقول الحمد لله وخلاص ولا يبالغ ويفضح نفسه ولا ينافق بس فى رايى الموضوع ده مرفوض نهائى ما بين الاصحاب وبجد لو صاحب اكتشف فى صاحبه كده والله ما تنفع تبقى صحوبيه اصلا عشان اللى بيعرف ينافق بينافق فى كل حاجة ومبيبقاش موثوق فيه اصلا بجد الموضوع عجبنى جدا وجرئ اوى ويا رب ما يبقى ما بيننا كده ابدا ونبقى دايما صحاب بجد موش نص كم.

Doaa Helal يقول...

Ahmed Adel El-Feky

ان شاء الله الجزء التاني قريب وفعلا ده بيحصل
في اي كليه وحتي في اي مجال غير الدراسه والله

Heidenröslein

طبعا يا دودو عمو عادل عنده حق واي حاجة في الدنيا زيها زي الكليه وزي الثانوي

A L-S A A D A N Y

شكرا لحضرتك

علي فكرة حكاية هشيل دي اتكررت كتير مع ناس كتير
جايبة امتياز بس احنا الي غلطانين بنسمع ويصعب علينا وفي الاخر بناخد مقلب
وبالنسبه للمنشورات فانا كنت حاسه ان العشري في الميه دي كانت اكبر قلم خدناه واحنا الي متعلمناش منه مش عارفة ده قله تقدير للي بيحصل والا احنا الي طنشنا

Rouan

هحاول اتقبلك بجد ده انتي يا حاجة اول واحده كنتي بتطلعي من الامتحان تقولي انا دخلت للدكتورة وادتني الدرجة النهائية وقالتلي مبسوطة منك ياعني داري علي خيبتك بقي عشان الفضايح
بس اخر جمله عجبتني

manar
كومنتك جميل بس المواضيع دي بتحصل بين الاصحاب
وانا من رايي لو حد خايف فعلا علي صداقته ميدخلش فيها المذاكرة خالص عشان كله بيجي عند دي ويعمل ستوب وممكن يخسر اصحابه فيها فعلا
فاعملوا زيي اقتدوا باختكو الكبيرة العظيمة دعاء واوعوا اوعوا اوعوا تفكروا تسالوا حد ذاكرت ايه امبارح او هتذاكر ايه انهارده عشان متبداش تاخد حبوب ضغ من صغرك
وشكراا للجميع

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة