الأربعاء، 8 سبتمبر، 2010

notes


احنا عندنا مبدأ الاستخسار وخصوصا ستات البيوت ستات كتيريلاقوا باقى اكل بيستخسروا يرموه وفى نفس الوقت مينفعش يقعد فيقوموا ياكلوه ده سبب الوزن الزائد للاغلبية

كلمة (هوة انا حدفع حاجة من جيبى ) لازم نمحيها من قاموسنا تلاقى حتى الراجل اللى شغال فى شركة لو حد اداله الصلاحية مثلا يعزم عملاء يصرف بتبذير واضح ويقول هو انا حدفع حاجة من جيبى دة حتى فى الكلية والمدارس بيقولوا للاولاد جاوبوا كل سؤال فى صفحة متوفروش هوة انتوا بتوفروا للحكومة مادام الحاجة مش بتاعة الفرد بيبقى مش حريص عليها .. اصل اكيد حد هوة اللى حيدفع وانت بدورك اكيد حييجى يوم وحتدفع فهى العملية يا جماعة دايرة بتلف على الكل وكما تدين تدان

اتحكالى ان مرة واحدة عجوز كانت بتطلع مكروباص لإما بتنزل فكانت حركتها طبيعى بطيئة شوية عادى .. المهم واحد قالها المفروض العواجيز ميخرجوش من البيت ...ايييييه قلة الذوق دى .. يعنى تقعد فى بيتها تستنى الموت ولا ايه يعنى .. والراجل دة اكيد حيجيله يوم ويكون عجوز يرضى حد يقوله كدة .. وبرضه الابن العاق ولاده اكيد برضه حيعملوا فيه زى ماكان بيعذب ابوه المسكين وامه الغلبانة بل ممكن اكتر

واحد كان مرة بيتكلم قال اسوأ انواع السجن انك تكون فاكر نفسك حر بس انت مسجون .. فى سجن سهل بتكون شايف القضبان وعارف ان ده سجن وانك مسجون بس فى نوع تانى مبتكونش شايف القضبان وفاكر نفسك انك حر بس انت مسجون .. وبرضه مرة قال الحكام آخر حاجة عايزينها شعب ذكى ناقد يقعد يركز معاهم وفى فلوس الدولة والاملاك .. هم عايزين شعب ذكى لدرجة بسيطة تكفيه يعرف كيفية تشغيل الآلات وغبى لدرجة كبيرة انه يجرى ورا الشغل والأجر الكبير وساعات العمل الطويلة يجرى ويلهث ورائهم ويدفع الضرايب وينسى الحكم او اى حاجة تانى اصلا مش حيكون عنده وقت لكدة

يعنى سؤال برئ هو ليه كراتين الاطفال بيقى فيها لازم شخصية شريرة وكتير بيقى فيها عنف وتلاقى فى عيال صغيرين بيكسروا لعبهم

حاجة غبية لما مبتكونش واخد بالك من حاجة وعادى .. ييجى حد يقولك الشخص الطبيعى بياخد باله من كذا وكذا فتبتدى تاخد بالك من هنا ورايح السؤال هوة انت كنت حتاخد بالك لو مكنش الراجل قالك ؟ معتقدش ... دى حاجة غبية

انت عمرك محتعرف الحقيقة فين طول منت متعود تاخد الحاجات على علاتها من غير نقاش اقتناعا منك ان المصدر الوحيد اللى انت بتشوفه موثوق منه

هو مين اللى عمل حاجة اسمها افلام وانترنت واغانى .. حتبص تلاقى الحاجات دى بقت اساس يومى فى حياتنا ونقول اليوم قصر.. اليوم قصر ايه بس لما تقعد تتفرج على فيلم ساعتين او تقعد على الفيس تلات ساعات مثلا .. الحاجات دى مفيش خير فيها وبتفسد العقول

قعدت فترة افكر يعنى ايه كلمة قرآن فى حد ذاتها جايز يكون معناها قراءة ..يقرأ فى كل آن .. جه فى بالى سعتها ان اول آية نزلت على الرسول صلى الله وعليه وسلم كانت ( اقرأ ) .. فى كل آية بيقى فيها ذكر لامرأة لوط بييجى فى الآية كلمة الغابرين او مشتقاتها .. قصص الانبياء بتتكرر كتير على مدار سور القرآن بس حتلاقى ان فى كل مرة ( الاغلب) بييجى حاجة جديدة مختلفة تعرفها مكنتش فى السورة اللى قبلها يعنى بتعرف معلومة جديدة عن القصة

حاجة غريبة لما تلاقى واحد بيقول كلام كبير وعاقل وموزون والناس مش مصدقينه وبيضحكوا عليه وبيقولوا عليه مجنون وواخدين كلامه هزار ميعرفوش انه اعقل منهم كلهم وان الكلام عالى عليهم مش فاهمينه علشان كدة بيضحكوا منه

الاجازة خلصت بسرعة

وما الجدوى ؟

النهاردة الوقفة فكل سنة وانتوا طيبين

2 قالوا رأيهم:

غير معرف يقول...

في كذا نقطة عجبوني
أحسنتي يا بت يا إيمان :)

Alice يقول...

شكرا يا ضحى

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة