الخميس، 2 سبتمبر 2010

يارب ولد


انا مش عارفة الناس ليه بتحب تخلف ولاد عن البنات مع ان البنات رقاق واجمل الكائنات على رأى المغنية مش عارفة مين فى اغنية حاجة كدة .. تلاقى الزوج مستنى برة اودة العمليات (يارب ولد) .. لو ولد حيطيير من الفرحة لو بنت فى ناس طبعا عادى بتفرح باللى يجيبه ربنا بس فى ناس ياااه على الكآبة يوم ميسمعوا كلمة بنت ورجالة بتوصل لدرجة بتقول البت تسميها امها يعنى ايه دة ؟ هم مش عارفين احدث الدراسات اللى من خمسين سنة دى اللى بتقول ان الذكر هو المسئول عن تحديد جنس المولود وام الزوج تقعد تزن على ابنها يابنى اتجوز واحدة تانية مراتك دى خلفتها كلها بنات اتجوز تانى علشان يجيلك العيل اللى بتحلم بيه ويشيل اسمك فيقوم يتجوز .. دة فى ناس بتوصل بيهم الدرجة انهم لما يجيلهم ولد وبعديه بنات يزعق لمراته يقولها انه عايز ولد أخ لابنهم حاجة افتراء يعنى.. دة فى ناس حتموت انها تجيب عيل اصلا ولد بنت اى حاجة .. وفى ناس لما جالهم عيل قالوا احنا مكناش مخططين اننا نجيبه دلوقتى .. الولد الواحد وسط بنات بيكون مدلع جامد يعنى هم البنات هاديين ومطيعين ومبيخرجوش كتير وآخرهم يرجعوا البيت 7 .. سابعة ايه انا بهزر يعنى آخر معاد سمعته كان 11 من بنات لكن الولاد آخرهم سابعة الصبح سابعة ودقيقة الباب يتقفل ويتفتح سابعة وربع علشان يوم جديد .. واحدة مخلفتش بنات بتقول (اللى مخلفتش بنات يبقى مخلفتش ) هى جملة عجيبة بس عجبانى .. مرة فى منتدى فى موضوع صور كان فى واحدة حطه صورتين لبنتين جمال ماشاء الله واحد علق قال انا اخلف بنتين زى دول ومش عايز حاجة من الدنيا تانى .. دة طلع مش احنا بس حكاية حب خلفة الولد على البنت لأ فى فرنسا كمان يلا ماعلينا ... وكمان فى الدروس المدرسين فى ثانوى بينقسموا لو كان مدرس يبقى بيحب الولاد اكتر لاما مش فى دماغه الطلبة وعايز يخلص السنة دى وخلاص ماعدا مدرس كان بيحب البنات اكتر مدرسين يعنى كدة تلاتة اما بقى لو كانت مدرسة فهى بتحب الولاد اكتر بمراحل .. داحنا غلابة جامد .. وفى الكلية كمان مهضوم حقنا فى السكاشن .. يعنى الى حد ما .. شوية .. هى على فكرة على حسب الاغلبية ..تيجى مثلا فى امتحان العملىبتاع الاناتومى تلاقى الولاد مندفعين على البوابة انا الحمد لله يومها دخلت آخر شيفت مبحبش الزحمة وبرضه عملى الهستولوجى بس دة كنت انا عايزة ادخل آخر شيفت علشان اكمل الكراسة غير الزحمة ... وفى الكورسات برضه مهضوم حقنا جامد (بس احسن الحكاية دى ليها فوائد كتير) .. انا مش عارفة ايه السبب ممكن علشان البنات قصيرين اغلبهم مبيكسروش حاجز 190 سم ولا علشان نسبة ضئيلة لابسين نظارات دة غير الدكاترة females بيحبوا الولاد بيشوفوا فيهم عيالهم واغلب الدكاترة اللى فى الكلية females .. وكمان البنات ملهمش جيش وبيساعدوا فى شغل البيت ويعدن بمثابة حصالة للامداد بالاموال لأخوتهن .. يعنى مفيش اريح من كدة للأب والام


سؤال مشهور كان فى الرياضة لإما الاحصاء واحدة خلفت تمن بنات احتمال ان يجيلها ولد فى الولادة الجاية ايه ؟

6 قالوا رأيهم:

Doha يقول...

انا هجاوب على السؤال اللى فى الآخر
لان عينيا وجعتني من الكلام اللى قبله

الاجابة هي 50 فى المية !

Alice يقول...

We have a winner

miramar يقول...

بصراحه الموضوع يعتبر من الموضوعات المهمه
على الرغم من ان الرغبه دي مش بايد الانسان ومن حقه انه يتمنى ان يكون ليه ابن ولد زي ما بقولوا ينقل اسمه من جيل لجيل ويخلي الناس تفضل تفتكره كل ما يسمعوا اسم ابنه بالكامل وابنه ينقل الاسم لاولاده ويفتكروه لما يتسمع اسم احفاده بالكامل .
لكن الانسان مش بيفكر ان ارادة ربنا فوق كل شيء ويبدأ يعترض على نعمة ربنا لو كان كل اطفاله بنات .
ليه مش بيفكر ان كان ممكن يتحرم من الانجاب اساسا و يعيش وحيد طول عمره ..وف اواخر ايامه يتمنى انه كان يكون عنده ولد او بنت اي حد يؤنس وحدته ويساعده ف ضعفه وكبره .
او ليه مش بيفكر انه ممكن ينجب الولد إالي هو عايزه
ويكون فاسد وغير صالح
يسيء لسمعته ويبدد امواله
وبدل ما الناس تدعيله بالرحمه لما يذكروه بابنه يبقى ابنه سبب ان الناس تنفر من ذكره وسوء تربيته لإبنه

بصراحه الموضوع اكبر من اننا نتكلم فيه في كام سطر
والمشكله ليها ابعاد اعمق من كده وان هي تعتبر سبب من اكبر اسباب الانفجار السكاني ومشكال الفقر والتشرد في مصر لان الي بيفكر بالطريقه دي - ودول معظم الأفراد الغير متعلمين .. بينجب بكثره اما عشان يجيب الولد او اذا جالوا فبيبقى عشان يجيبله اخوات ..
ويتعلموا او لأ دي بئا مش مشكلته المهم هو لقاله عزوه وضهر

انا مش هطول اكتر من كده عشان عندي كلام كتييييييير
بس يلا عشان محدش يزهق
(:

Alice يقول...

كلامك عجبنى جامد يا نشوى ومظبوط
علقى براحتك محدش حيزهق

قبل العالم الأخير يقول...

دكتور سامح قالنا ان الجديد دلوقتى ان الست هى المسئولة:D...بجد مش هزار..لكن فعلا موضوع الرغبة ده شىء محتاج تغيير ثقافة كاملة..انا طبعا احب يكون عندى النوعين..لكن انى اجيب ولد عشان يشيل اسمى وكده..طب مهى ممكن تكون بنت وتشرفنى وتخلى رقبتى فى السما..وممكن يكون ولد ويزهقنى ويحرجنى اخر احراج..الموضوع طبعا لازم يكون فيه جانب الايمان من رضا واعتقاد فى الرزق....موضوع السيطرة الذكورية ده بصراحة مش صحيح خااااالص بل بالعكس ..من كتر ما الناس اياهم عمالين حقوق المرأة وبتاع..ضاعوا الرجالة..يعنى مين اولى يشتغل بالزمة..الراجل اللى هيفتح بيت ولا البنت اللى المفروض تقعد فى البيت..بجد البنات بينافسوا على فرص العمل فى كل الميادين وده بيضيق على فرص الشباب اللى وراهم بيوت هتتفتح وطبعا بالبنات ..بس البنات يقعدوا شوية بقى :D...يمكن بعدت شوية معلش وطولت برده..ومبرووووك للوينر :D

Alice يقول...

آه بجد دلوقتى بيقولوا ان الست هى المسئولة .. هى فى الاول وفى الآخر ارادة ربنا مهما كان وسائلها .. الرجالة طبعا اولى حتى اصلا الاب والام بيتوتروا فى الثانوية على الولد اكتر من البنت وبيزعلوا عليه اكتر لكن البنت فى اى كلية عادى .. بس على فكرة اكيد اصحاب الشغل بيقدروا لو واحدة او واحد متقدم اكيد حيختاروا الراجل هو الرجالة اكفأمن الستات فى كل شغلانة مرة العقاد لإما طه حسين قال ان حتى المجالات بتاعة الست الرجالة برعوا فيها زى اشهر شيف ومصمم ازياء .. دة حتى دكتور الولادة احسن دكاترة الولادة رجالة والستات بيسببوا مصايب .. بس برضه فى شغل ممكن تكون واحدة متقدمة احسن مليون مرة من حيث الخبرة والكفاءة من راجل متقدم فطبعا لازم يختاروها هى يعنى اقصد لو فى شغل راجل وست متقدمين ليهم نفس القدرات وكل حاجة بيختاروا الراجل لكن لو فى تفاوت بيختاروا الاحسن رجل او ست

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة