الثلاثاء، 28 سبتمبر 2010

دردشات محاضرة .. كلاكيت أول مرة ..


I love grapes:)
ya 3enaba :P:P
now I hate it so much :(

Why my sweetie ?
keda we 5alas :P:P:P

YA ra5amtek . It suits you very much :)
Ya salaaaaaaam , aho enty elly felfel ba2a hhhhhh :D

I love being felfel .. hhhh . :D
tayeb ya5ty etlhy ya mawkosa ba2a 3ayzen nrkz w nesma yemken nefla7 we el set shaklaha latefa we 5efa awyyyyyy ..

tayeb rakezy :D




هاي .. أحب أعرفكوا بنفسي .. أنا مزيكا .. بيقولوا عليا طالب في طب .. بس لسة متأكدتش من المعلومة دي لحد دلوقتي .. ساعات بينادوني ويقولولي يا دكتور .. بس فعلا مش عارف هما يقصدوا مين بالكلمة دي .. أـــ !


- ايه ؟! ومالك بتقولها بقرف كده ليه ؟ هي كلمة قبيحة ولا حاجة ؟! دي حاجة جامدة جداااا يابني !


سورى .. أحب أعرفكم .. ده زميلي في الكلية  .. شلبي .. بعزه أوي وبيعزني .. أحلى حاجة فيه انه دايما متفاءل .. ومركززززز !
حاليا أنا في محاضرة من النوع التقيل .. بيقولولي ان اسم المادة دي بايو .. وأنا لحد دلوقتي نفسي اعرف مين طنط دي ؟!


- يابني ركز شوية .. دي الدكتورة اللي بتشرحلنا المحاضرة !


مرسي أوي يا شلبي على المعلومة الخطيرة دي .. أهم حاجة اني فعلا قاعد وسط المحاضرة وكعادة كل المجهتدين قاعد في آخر صف .. بعيدا عن كل العيون .. ومعايا كشكولي وقلمي الرصاص .. آه والله الرصاص .. وأحلى حاجة اني قاعد بسمع في كلام ممكن يدخل أو ميدخلش بس على كل أنا مش فاهمه .. وأحيانا بفهم منه شوية كلمات بس لسة مش عارف ايه علاقة الكلام ده بالمادة وإيه علاقة المادة بالطب وإيه علاقتي بالكلية دي أساسا أصلا !


شلبي دايما يقولى ان الكلية دي كلية جميلة ومهمة .. ولازم أركز علشان أثبت وجودي فيها .. بس دايما بلاقي جوايا سؤال .. يعني ايه أثبت وجودي في الكلية ؟ يعني أقف في حرم الجامعة وأقول أنا موجود ؟!


- لا يابني مانتش فاهم .. أثبت وجودي يعني أتفوق وأقف على رجليا وأوصل لمكان عالي وترتيب على الدفعة .. فهمت ؟ يعني أثبت ان في حد في الكلية دي اسمه شلبي وهيبقى بعون الله دكتور ناجح ..


والله شكلك مهتعرف تثبت حتى أول حرف من اسمك طول مانت كده .. ركز يا حبيبي في المحاضرة شكلك فاهم .. وسيبني في حالي انا وكشكولي !


نشكر لشلبي هذه المداخلة الرقيقة .. بس بجد عاوز أعرف .. أنا هثبت وجودي ازاى في الكلية وأنا لسة مثبتش وجودي في أوضتي ؟!

عارفين أنا ليه سايب المحاضرة تضرب تقلب وقاعد بكتب الكلام ده ؟ علشان يمكن في يوم بعد السبع تمن تسع سنين الجايين أبقى أقرا كلامي تاني .. وأنا وحظي ساعتها .. ياضحك .. يا أعيط وألطم !!

أنا مش هكدب عليكوا .. أنا في سنة تانية .. يعني المفروض اني اتعودت على الكلية ونظامها .. بس الحقيقة ان سنة أولى كانت كلها ضرب ضرب ويوم النتيجة كانت الشتيمة .. مش مصدقيني عارف  .. زمانكوا بتقولوا : " اهو انتوا كلكوا كده يا بتوع طب .. تبقوا دحيحة وتقولا زعلانين واتقهرنا يوم النتيجة والواحد فيهم جايب امتياز ! " .. بس والله أبدا .. صحيح جايب مجموع عالي بس أنا في الحقيقة مش راضي عن نفسي ..
والحق إني ملقيتش حد راضي عن مجموعة أبدا .. ولو حابب أقسمهوملك زي الفسيولوجي أقسمهملك وأسمعك أحلى كلام ::
واحد ذاكر واجتهد وعمل اللي عليه وربنا وفقه وجاب مجموع عالي بس هو التاني في اصحابه .. يبقى لا ازاي .. لازم يبقى هو الأول ... ودول ما أكثرهم .
واحد ذاكر واجتهد وعمل اللى عليه واتظلم .. وممكن يكون اتظلم أوي ..
وواحد ذاكر واجتهد وده دحيح على الدرجة بيزعل وعاوز أكتر وأكتر .. 
وأحيانا بيبقى طموح انه يرسم مستقبله ويحدده بايده مش حد يحددهوله .. 

بس بجد مش عارف أقولكوا ايه ولا ألوم مين .. لأنه في الأول وفي الآخر توفيق ربنا .. وجهد اللي ذاكر .. بس كده !

مش هلوم الي زعلان علشان عاوز يبقى أحسن ولا اللي عنده طموح .. بس بجد المشكلة في ردة الفعل الغريبة قدام اللي مظلوم .. بتبقى عادي انه يجيب امتياز ويقول أنا مش عاجبني المجموع وواحد واقف جنبه جايب مقبول !! وهو متأكد انه مظلوم !

بس فعلا أحلى حاجة هتقابلها في الكلية في أول السنة الجديدة بعد عام مضى .. التعامل اللي بيتغير !

في ناس تفضل اصحابك وجنبك علشان بيحبوك .. والمذاكرة مش هتقف في طريق حب في الله .. لأن كل واحد عارف هوا عمل ايه وهيعمل ايه !
وناس تانية أول متشوفك وشها يتغير ويقلب ألوان .. ويبدأ التساؤل .. ليه ؟! واشمعنى ؟!
وناس لاليها في الطور ولا الطحين .. معاهم معاهم .. عليهم عليهم !

بس الحاجة الوحيدة اللي متغيرتش هي ان شلبي لسة مركز في المحاضرة وأنا تعبت وزهقت من كتر الحر والعرق والكلام اللي بيتقال وكله شبه بعضه .. 
وأخيرا المحاضرة خلصت وأنا بكتب الجملة دي وفي النهاية .. أحب أبعت إليكم بسلامي الخاص .. نتقابل تاني على خير .. معادنا الخميس الجاي في المحاضرة الجاية  .. 

- سي يو آجين جايز .. بيس :D




13 قالوا رأيهم:

shahenda shalaby يقول...

احم احم
ايه الفضايح دى ياضحى
هههههههههه
بس بجد الحوار الاولانى ده كان جامدوطلعنا من مود المحاضره شويه وادينا فوقنا بردو ولا ايه ؟؟؟ ويدل فعلا اننا كنا مركزين فى المحاضره وبذات انا :D:D:D:D:D
انتظرونا فى المحاضره القادمه واحنا مركزين بردو
:D:D:D:D

Doha يقول...

طيب !

قبل العالم الأخير يقول...

والله يا جماعة طنط اللى فى التوبيك دى انا بحس انها عااااالمة بجد :D
مفيش كلام طبعا ان انا مش بطيق حكاية طرد المتأخرين وموضوع الغياب او الغصب فى الحضور عشان الغياب والبلاك ليست بتاعتها وكده
بس بعيدا عن كل ده
انا ركزت معاها اخر محاضرتين وفهمت مية 100وببساطة
احساسى الداخلى (اللى بيخيب فى الاغلب :D)
ان طنط بتورينا الوش ده عشان النظام والشرح وكده لكن جواها طيب
احساااااس مش اكتر انا حتى عمرى ما كلمتها مباشرة
ومش هفكر طبعا:D:D:D

nice topic Felfelll & 3enabaaa :D:D

Doha يقول...

والله يا دكتور مفيش أى اعتراض على كلام حضرتك وفعلا هي بتقسو شوية علشان نستفيد ..

بس احنا مش فاهمين منها حاجة حتى في اول محاضرتين .. ومنقدرش طبعا نقول العيب في ايه بس فعلا المشكلة انها عالمة ومستوى عالي بتخاطب عقول لسة على قدها فبيحصل فرق فمش بنفهم او بنتوه ..

وموضوع انها طيبة باين في عينها مش محتاجة كلام والله :D
بحس فيها قلب أم .. :)

غير معرف يقول...

" اهو انتوا كلكوا كده يا بتوع طب .. تبقوا دحيحة وتقولا زعلانين واتقهرنا يوم النتيجة والواحد فيهم جايب امتياز ! "

عجبتنى اوى انكم عرفيين نفسكم يابتوع طب هههه بصى يابنتى لكل مجتهد نصيب خليكى بعد السبع سنين دول اما تيجى تقرى كلامك دا تضحكى احسن ما تعيطى انتى مش بتقضى سنه ولا اتنين ف كليه تربيه رياضيه وهتخرجى منها تشتغلى اى حاجه لا انتى هيبقى ف ايدك امانه ناس وارواحهم لازم تحافظى عليها

بس صح اشمعنه بتوع طب بيجيبوا امتيازات وبيبقوا زعلانين واحنا ف كليه ..... بنطلع بمواد ونبقى الاوائل وفرحانين ههههه

ولعلمك كلمه دكتور وباشمهندس بتتقال لاى حد دلوقتى حتى لو خريج معهد حاسب بس المهم انك تبقى مفتخره انها بتتقالك صح

واكيد شلبى هيعرفنى دلوقتى :D

غير معرف يقول...

بس الحاجة الوحيدة اللي متغيرتش هي ان شلبي لسة مركز في المحاضرة وأنا تعبت وزهقت من كتر الحر والعرق والكلام اللي بيتقال وكله شبه بعضه ..


هههههههههه
ربنا يوفقك ياشلبى وتنجح وينجحنا كلنا

manar يقول...

بجد التوبيك ده جامد وعسووووووووووول خالص يا دودى و بجد شاهى احلى حاجة فيها انها طبيعيه فى شخصيتها وبجد دى حاجة حلوة انها تكون خايفه ع مصلحتها وبجد ربنا يوفقك يا شاهى يا حبىىىىىىىىىىىىىىى ويهدينى كده يا رب واعبر المهزله والهبل اللى اسمه اجبارى حضور محاضرات ههههههه انا بقى دماغ مسيرى هتعلم من شاهى صحبتى وحبيبتى
بس بجد احب انوه الى معلومه يا جماعه انتو بتتكلمو فى ايه اللى بيذاكر وجاب تقدير كويس وبرضه زعلان معنى كده انه شخص كويس ونفسه فى اللى احسن واحسن وانه شايف انه تعب اوى وكان نفسه فى حاجة اكبر ده فى حد ذاته حاجة حلوة ومعلشى الناس الحقوده اللى بتقعد تقولك ده جايب امتياز وزعلان ده انا جايب مقبول وراضى والحمد لله ده كده ميت فل وعشرة . ايه ده فين الرضا بحكم ربنا؟
بجد انا بضحك ع الناس دى اوى عشان اللى جايب اى تقدير وخلاص وراضى وموش زعلان ده اصلا متعبشى ولا ذاكر كويس وكان خايف يشيل ولما عدى السنه كان فرحان اوى وتقعد الناس دى تتريا ع الناس اللى شايفه مصلحتها وعايزة تبقى اشخاص متميزة ف عملها بعد كده ما علينا الناس الحقوده الزبالة دى المفروض ولا نعبرهم بالجزمه القديمه عشان هيا ولا حاجة عشان كده بتقعد تتريا ع الكويس وهم نفسهم يبقوا ربعه اصلا

Doha يقول...

أنا معجبة بكومنتك يا منار
جو اون جيرل :)

Alice يقول...
أزال المؤلف هذا التعليق.
Alice يقول...
أزال المؤلف هذا التعليق.
shahenda shalaby يقول...

كومنتك رائع يا منااااااااااااار
وميرسى ياحبى
ده بعض ماعندكم
وانتى فعلا بينتى وجهة نظرنا فى حوار لوجبنا تقدير عالى
وبنبقى زعلانين
وده لاننا بنبقى عايزين الافضل دايما
ويارب يوفق الجميع يارب وينولهم اللى فى بالهم

غير معرف يقول...

جااااااااااامد كومنتك يامنار وانا معاكى بس للاسف ف كليات لو عديتى فيها يبقى حلو اوى بعد تعب ومذاكره بجد عشان كدا انا قلت ف كومنتى ان الحكايه ان الاول عندنا جايب جيد جدا بالعافيه دى بتبقى حاجه صعبه مش اكتر
ويارب يوفق الكل يااااااارب

manar يقول...

مرسى ربنا يخليكى وفعلا زى ما انتى قولتى بالظبط الموضوع بيختلف من كليه للتانيه وعشان كده مينفعشى حد فى كليه معينه يقارن نفسه بشخص تانى فى كليه تانيه عشان فعلا درجة الصعوبه او الامتحانات نفسها او الدكاترة بيختلفوا من كليه للتانيه .......... وبجد ربنا يعينك فى كليتك ويعينا معاكى فى كليتنا

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة