السبت، 30 يناير 2010

هنبص بأدب ...منه لله اللي بيصور

السلام عليكم ورحمة الله وبركاته




مش عارفة ليه خطر فى بالى مشهد من أحد افلام أحمد رزق وفتحى عبد الوهاب وأحمد عيد فى فيلم (فيلم ثقافى) وهما فى شقة الواد بطرس ولقوا الشغالة نايمة هناك ولاقت معاهم شريط الفيديو اللى عليه الفيلم الثقافى وعرضت عليهم تفرجهم على الطبيعى بدل الفيديو ..............وكان شرطها الوحيد على الفرجة أنهم يبصوا بأدب ...



نفس الجملة خرمت دماغ أخونا الصغير حمادة سبع الليل وهوا بيتفرج على التليفزيون الساعة ستة الصبح لغاية ما هرى قنوات الأفلام الأجنبى والعربى ومش لاقى حاجة يعملها فسرح كده بالريموت ووصل لقنوات الأغانى ربنا يخليهالنا وقعد يسمع او يتفرج على الكليبات ....



المفروض يعنى ان الأغانى بتتسمع مش بتتشاف ..الله يرحم أم كلثوم لما كانت الناس تستناها بالأسابيع على الراديو على أمل أنهم يسمعوا حلقة من حلقاتها ويعلن الصمت التام فى بيت العيلة والقهوة والست وهيا بتغنى ...هوا عمنا حمادة سبع الليل طبعا معاشى أيام الست أم كلثوم وشاف الحاجات دى بس هوا أكيد متأكد أن ده حصل فى يوم من الايام كان هوا لسه فى علم الغيب ....



المهم نرجع لموضوعنا ...وصاحبنا راقد على الكنبة كده والريموت بيلعب فى ايده وهوا بيغير فى قنوات الكليبات شوية مولتى على مزيكا على زوم ......لاقى مغنية عجيبة كده قال لما يسمع ....متفهمشى بقى لا كلام والا ألحان والا أى بتنجان ....كل اللى فى الأغنية ...او نقدر نقول عليها شبيهة الأغنية واحدة واقفة بتتمايص وتتلايص قدام الكاميرا ...حبية يمين وحبة شمال ......



الغريبة بقى فى الموضوع مش انها بتتمايص وكده لا ..سيبك من الكلام ده كل المغنيين بيعملوه ..والا حتى لا الكلمات والا الألحان ...احنا فى عصر كوز المحبة اتخرم يا حج ...الغريبة انه فجأة يبقى وش المغنية يبقى واكل كل الشاشة ...وانت بتتفرج على الأغنية لا بيك والا عليك تلاقى وسطها ظهر فجاة ...على ما تيجى تفوق من هول المنظر وتفتح عينيك يا عمنا تلاقى وسطها اختفى وبرضه لا بيك والا عليك تلاقى المنطقة الشمالية ما فوق الجيبة وما تحت الرأس ظهر فجأة ...



يا سنة حوسة يا ولاد ...انا لو طب أبويا عليا دلوقتى هروح فى ابو زعبل ....ويا سلام بقى لو أختى الصغيرة طبت عليا ...هتيجى عليا وتضربنى وتقولى يا قليل الأدب ..وتتطلع تجرى ...بس بالعقل كده مين هيبقى صاحى ستة الصبح .......



مش عارفة تصرف المصور الغريب ده ...يجيب الأغنية عادى والصورة من بعيد وفجاة تلاقى الدنيا قلبت أبيض على احمر على حاجات تانية غريبة ...وتحدى أنها تقعد اللقطة ثانية على بعض ...بيتهيألى المغنية المحروسة اسم النبى حارسها وصاينها قالت للمصور أنا عاوزك تصورنى بس وأنت بتصورنى ابقى بص بأدب ....



مش عارفة امتى الكليبات بتاعنا بتتقدم كده وتعرض المشهد كله لوكشة واحدة .......ما علينا المهم احنا الحمد لله بنحمد ربنا وبنبوس ايدينا ورجلينا وش ودقن ان المصور مؤدب ومصورشى حاجات خارجة عن السياق الفنى للأغنية العربية أو شبيهة الأغنية العربية ....

4 قالوا رأيهم:

Ahmed Elfeky يقول...

تناول لذيذ ولو ان الموضوع مكرر :D

وحلو موضوع حماده سبع الليل ده
:D

Doaa helal يقول...

حلوة اوي يا دودو الي الامام وكمليلنا بقي بقية السلسله
بس ايييييييييييييييييه الالفاظ ماشيه معاكي

يارب يحفظنا من المغنيات والمغنيات والكليبات والكلام الفارغ الي ملا العقول ده

Alice يقول...

عندك حق فى كل كلمة

Doha يقول...

بس تنويه بسيط
مش انا اللى كتبت الموضوع
ده اخويا

وده بيتهيقلى لاحظتوه لان ده مش كلام واحدة مطحونة في طب
ده كلام واحد مهيس في هندسة

هو بدأ اول موضوعين وانا نويت اكمل على منواله
عشان هو مش فاضي للكلام الفاضي ده

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة