حاجة غريبة !

هو ليه الواحد مبيتعلمش بالساهل لازم يعانى قبل مياخد الدرس ؟! كان ممكن يتفادى ده لو سمع نصيحة صغيرة اتقالت له !

ولا واحد يقسو على واحد علشان يعلمه درس يخرجه من التجربة دى انه مش قادر يستفيد باللى تعلمه .. زى مثلا واحد يعلم واحد الجرى ويقسو فى تدريبه لدرجة رجليه تتعب ويضطر يقطعهم !

هو ليه فى ناس بتبحث على اللى ملهوش وجود بس لمجرد انه تفضل تبحث وتقول انها بتبحث ؟!

هو ليه فى ناس بتكون عارفة الحقيقة جواها ولما حد يعلن الحقيقة دى بيتظاهروا انهم اول مرة يعرفوها وانهم متفاجئين بيها ويزعلوا عليها مدة ؟! مهم عارفين من الأول !

حاجة غريبة لما متعرفش ايه الطبيعى وايه الغريب من كثرة الغريب وانتشاره وسيادته !

حاجة غريبة برضه لما تسأل نفسك هو مين اللى ليه الحق انه يزعل انا ولا الشخص الآخر .. ألهذه الدرجة الامر ليس جليا ؟

حاجة وحشة لما تعاند مع نفسك تكون عايز حاجة بس تاخد التانية لمجرد العناد ..

عارفين احلى حاجة فى رمضان ايه ؟ بعد طبعا العبادة وكدة ان العيلة كلها بتتلم فى وقت واحد على الفطار والسحور فى الايام التانية الغدا مثلا بيتحط فى بيتكوا على الاقل تلات مرات وبتاكل لوحدك !

الانطباع الاول بيدوم دى حقيقة .. بجد صعب انه يتغير بعدها وخصوصا لو كان سئ!

شعور سئ لما فى موقف تتخلى عن صفة علشان صفة تانية اتحكمت بقوة اعلى .. صفة مش متناقضة لأ .. بس كان لها سلطة اعلى فى الموقف ده!

حاجة غريبة لما تقعد تنكر حاجة انت عارف انها صح ..  زى مثلا انا قعدت فترة كبيرة انكر ان الأخ لما بيتجوز بيفضل مراته على اخته وبقول ازاى وكدة بس هو ده بجد اللى حيحصل وبيحصل فى تقريبا كل البيوت !

شخبطة .. على ورقة مقلوبة !

كانت أول مرة امسك قلم من اول مخدت الأجازة , وأول مرة اكتب عربي من اول مدخلت الكلية !! خطي بقى زى خط تلميذ فى تالتة ابتدائي لسة بيخبط فى الحروف علشان تترسم على ورقة الكراسة في المدرسة وهو بيكتب .. بحبك يا مصر .. ! 

ولا اعرف ايه اللى خلاني خدت القلم وجبت ورقة وقولت هكتب أى حاجة تطلع في بالي .. يمكن بس صعب عليا القلم اللى مرمي جنب الكمبيوتر .. بعد ما استولت لوحة المفاتيح على مهمتة .. أو اني حسيت بوحدته .. فقولت أونسه .. زى زمان !

فاكر انت أيام زمان ؟! أول مرة مسكت القلم وكتبت .. أ .. ب .. ت .. ورا المُدرسة .. فاكر انت الكراسة التسع اسطر ؟! ولا انت مش هتفتكرها .. القلم الرصاص هوا اللى هيفتكر الكراسة دي والكراسة المربعات بتاعة الحساب والأستيكة .. وأكيد البراية .. مكناش بنعرف نعمل حاجة زمان غير اننا نبري القلم ونخلى سنة .. حسونة !

بضحك كتير على أيام زمان .. وأتمنى في يوم ترجع تاني  .. وكالعادة تطلعلي ام كلثوم وتقولي .. قول للزمان ارجع يا زمان !

طب ارجع يا زمااااااااااااااااااان 

ومين قال اني هقوله ارجع تاني .. مبحبش أتحايل على حد !

جربت أكتب على الورقة اى حاجة مفيدة .. ولاني حسيت ان شكل الورقة بقى غبي من نكش الفراخ اللى بقى عليها .. ونكش الفراخ ده خطى .. بطلت اكتب .. يدوبك كتبت الكلمتين دول : 

" أحلام اليقظة .. 

من غير كلام ولا سلام .. تقعد تهاني كل يوم قدام الشباك .. بتعمل ايه ياخويا متعرفش .. "

زهقت وطبقت الورقة على بعضها نصين اتنين بالتمام والكمال .. وبعدين اربعة .. - مانتش مضطر تكمل قراية خالص .. ! - المهم اني حسيت بملل فرسمت حاجة غريبة .. طلعت فى الآخر عنكبوت .. وبعديها رسمت وش واحد مخنوقة منه .. أو حاسه انه مخنوق مني فمش فارقة .. المهم ان فى خنقة فى النص .. قلبت الربع التاني .. وكتبت عليه ضحك ولعب وجد وحب .. رسمت شوية قلوب 

وقلبت الورقة تاني 

حاولت اجيب حتة فاضية .. بس أخيرا النت رجع .. قريت حاجة صغيرة .. والنت فصل تاني ورجعت للورقة .. وبدأت الشخبطة والخطرفة بكلمات ملهاش أى معنى ولا علاقة بأى حاجة  ..اه هكتبها .. تدوينة مملة أنا عارفة بس في رغبة ملحة اني اكتبها .. !

:

ها هو خيالها .. يتمايل في أحلامه .. مرة أخرى .. ترى ؟ هل تعاود ذكريات الماضي الغريب الظهور في قلب مشتت ؟!

هل تحبه هي ؟ .. لا أظن .. كنت أعتقد أنها معجبة به .. أخاف عليها .. حقا أخاف !! 

أكره تلك القصاصات الملقاة على عتبة أفكاري  ..

انتظرت .. وليت انتظاري .. يثمر .. وتكون السعادة قد كتبت لي  !!

أشباه أصوات تتعالى 

أشباه وجوه

حلم .. في منام .. 

بلا نائم !!

بحلم .. بكره .. بحب .. بخاف .. بخرف .. معرفش !!

Mad ?! Crazy ?! Insane ?! At least I've found something I could talk to .. instead of talking to  myself 

خلصت خربشة ورفعت الورقة قدام الشاشة وهي متطبقة .. النور بيعدي من الورقة ويخلى كل حاجة باينة .. بقى كل الكلام فوق بعضه .. اللى مايل واللى متظبط .. واللى مش باين بسبب كلام تاني جه فوقه .. والى واضح اوي لان مفيش حاجة تغطيه .. واللى بالمقلوب ..  عرفت ساعتها ليه بيقولوا أى حاجة بتتكتب يتبقى بتعبر عن اللى جواك !

ورقة ملهاش أى لازمة .. بس أدينا بنغير جو .. !

يـــا حــلــمـ

يا حلمـ عالي في الوجود
اعلى .. وكون حلمـ الخلود
اعلى .. و ع الدنيا السلامـ
وعدّي بينا كل الحدود

..

يا حلمـ عالي في السما
اعلى .. وكون فرح وهنا
اعلى .. واملا الدنيا غنا
خلّي السعادة مليون سنة

..

يا حلمـ غرقان في البحار
مهما .. يكون البرد نار
مهما .. زماننا علينا جار
خليكـ معانا وابدأ نهار

..

يا حلمـ موجود بين الرحا
اصحى .. وفوق شقشق ضحى
اصحى .. وكون للدنيا قيصر
واوعى في يومـ تكون جحا

..

يا حلمـ مكانه في القلوب
خدنا معاكــ خطّي الدروب
عيش وعيشنا معاكــ
واوعي تموت وسط الحروب

..

يا حلمـ موجود في الغيومـ
مهما تموت .. للفجر قومـ
مهما تغيب .. للدنيا دومـ
واركب معانا قطر الحياة

..



يا حلمي .. يا حلمـ الزمان
املى قلبي كل الأمان
خليني عايش ع الأمل
أنت الأمل .. نبض الحياة

..

كلمات مبعثرة

الدنيا جميلة ..هى فيها حروب وناس بتموت وفقر ومجاعات بس الدنيا جميلة .. فيها الاخ بيقتل اخوه والصاحب بيخون صاحبه ..بس هى جميلة ..فيها امراض وسرطان وناس محتاجة دم ومحدش بيتبرع .. بس هى جميلة .. فيها الناس مش حاسة ببعض وناس بتدوس على ناس وناس بتشترى ناس .. بس هى جميلة .. فيها ناس نايمين على ريش نعام وناس مش لاقيين حتة يناموا فيها وناس بتنام فى الشارع وناس مبتنامش من الخوف من صوت الرصاص والقنابل ...لأ الدنيا مش جميلة

الانسان عندما يكون سعيدا يرغب فى ان يكون كل من حوله سعداء قد تجد شخص لمجرد انه سعيد ممكن يعطى متسول مائة جنيه او كل المال الذى معه .. يعدى اشياء كثيرة كانت ستغضبه فى وقت آخر.. تلمحه يكاد يطير من شدة فرحه ..عينيه يكون لهما بريق خاص غريب يلمعان ممكن ان تلمحهما فى الظلام

ليس من الضرورى ان تعرف الشخص حتى تبتسم فى وجهه او تكون ودودا معه فى ناس عدوانيين مع الغرباء وفى ناس ودودين مع كل الناس حتى مع الغرباء اللى بيستريحوا لشكلهم

الانسان افضل له ان يكون عبد فى مملكة الواقع والصدق و الحقيقة على ان يعيش ملك فى مملكة الاوهام والزيف والكذب

لا تنتقد تصرفات الناس وتدقق فيها معلش شوف نفسك الاول ..لو كانت حاجة قاتلة روح قله علشان يغيرها .. وبعدين انت مين اصلا علشان تنتقد تصرفات حد ..وكل واحد حر فى تصرفاته ..انت مالك يعنى ..مثلا واحد بياكل بايديه مش بالشوكة والسكينة عادى ..

نقل الاعضاء ولا تجارة الاعضاء فى دول كتير بتسمح بيها منها تقريبا مصر هم مش مقدرين خطورة الحكاية دى ولا ايه ؟ .. كده الفقير حيبيع عضو منه علشان ياخد فلوس والغنى يشترى .. ده غير الدكاترة اللى معندهمش ضمير يقوموا واخدين كبد ولا حاجة من راجل بيعمل اى عملية تحت تأثير المخدر ويبيعوا الاعضاء دى .. ولا عمليات الخطف اللى بيكون هدفها انهم ياخدوا اعضائه .. انا سمعت مرة ان وصل بيهم فى الصين انهم بيخلفوا عيال علشان يبيعوا اعضائهم

عارفين حكاية ان الانسان يفضل انه يكون قاتل على ان يكون مقتول لأنها الطبيعة البشرية انا قعدت مدة طويلة انكر تلك الحقيقة بس هى صح للأسف .. بس هى على فكرة على حسب لو حد عزيز عليك تفضل طبعا انك تبقى المقتول

حكايات وبنعيدها

فى احد الدور المصريه من حوالى نصف قرن او ما يزيد .. المشهد التالى :


الجد : دستوووووووووووووووووووور ! حد كاشف راسه ؟


الام : لا يابا الحاج دى البت باتعه..


الجد : ازيك يا بت يا باتعه ..؟


باتعه : الحمد لله كويسه بحسك ونفسك يابا الحج .. انا هاجوم اجيبلك الشاى ..


الجد : ينورلك طريقك يا بت و اشوفك فى الكوشه جنب عريسك .

تقوم باتعه ليجلس الجد مع الام ويدور الحديث :

الجد يتوجه فى الحديث الى الام : تعالى اجعدى فى ريحى .. ويهمس فى اذنيها هيا البت باتعه مجلهاش عريس لحد دلوقتى ؟


الام : لا يا ابا .. دى البت داخله ع الخمستاشر و لسه مجلهاش عريس .. انا بدأت اتخرع يا ابا .. البت بارت يا ابا .. وهتقعد جنبى !!



الجد : عندك حق و الله اديكى شوفتى البت عنبه _ام سحلول _اتجوزت وجابت سحلول و هيا عندها 10 سنين .


الام : وانا سمعت ان هيا حبله فى العيل التانى اهه .!


الجد : خلاص انتى ايه رايك فى الواد هيما ابن كبريته ؟




الام : ايه الواد هيما ده مبعرفش يفك الخط يا ابا .. و البت بتعه ما شاء الله بفوووووو حابس كابس خارجه من 3 ابتدائى انت عايز ترمى البت و لا ايه يا ابا !!!!




الجد : يا بت ميبجاش عجلك تخين .. امال ميعبش الراجل الا جيبه ( و جزمته ) و الواد ماشاء الله كسيب وبواب جد الدنيا .. ده غير الجيراطين اللى ورثهم عن ابوه وعنده شوقه مطرحين وعفشه مايه .!




الام : يادى الهنا يا دى الهنا مطرحين .. ماشى يا ابا اللى تشوفه .. انت برده جدها وعارف مصلحتها .




الجد : خلاص انا هاكلم جده النهارده فى العشيه انا وهو بنقعد نلعب صلح فى الغيط .




ثم يستكمل الجد الحديث : يللا فوتكو بعافيه...... سوكى ع الشاى يا بت يا باتعه !




وينصرف الجد من باب الدوار .

تعالو احنا بقى نتكلم ونتحددث

الحوار ده كان بيحصل زمان .. تفتكروا ده مبيحصلش دلوقتى ؟؟؟ اعتقد ان الفرق انه كان زمان بيحصل فى بيت من الطوب اللبن انما دلوقتى فى بيت من الطوب الاحمر!

انتوا مصدقين فى موضوع ان الفكر اتغير و احنا اتقدمنا و الناس بقت ارقى و جو الكلام الحلو ده؟ ( هه ده احنا اللى طبخينه )

و ان موضوع تاخر الزواج ده مبقاش بيشغل بال الاهل ؟؟

انا شايفه ان كل اللى حصل ان قاسم امين دعا الى تعليم البنت زياده حبتين
فالبنات و الاهل اتشغلوا شويتين
و طلع عينيهم وشيقيوا فسوتين
فالموضوع بان

كان الناس عقلها اتقدم و ان الاهل مبيفكروش فى الجواز طبعا ده غير ان كل البنات بتبقى مشغوله فى الدراسه و بيخلصوا ع 21 سنه ( قابل للنقصان ) .. ده طبعا بعكس بنات طب اللى بيخلصوا ع 24( بس دى قابله للزياده )

بس لسه هو هو الحوار بيحصل فى كل بيت .. بس طبعا بعد سن العشرين و الكلام ده يبدأ ..

البت هاضيع

و البت هاتعيش وتموت وحيده

و تلاقى اللى يقولك البت معمولها عمل و مش هيتفك الا كمان 30 سنه

و اللى يقولك نفسى اشوف حته عيل يقولى يا تيته و جدو (عاجبانى اوى حته عيل طب ما يقولو طفل ؟ مش موضوعنا )

و الله انا حاسه ان مصر معمولها عمل ومش هيتفك اللى الابد

عشان متعلق فى نجم مبيظهرش الا كل مليون سنه

يا ترى معنى ان الفكره تتاخر كام سنه يبقى نقول الناس معدتش بتفكر زى زمان ؟؟؟؟

و بالمناسبه أبشروا اللى بيقولوا الغرب غزونا بافكارهم و ان احنا بقينا نقلدهم و ان احنا هنتخلى عن مبادءنا

متخافوش الناس لسه زى ما هيا الفكر زى ما هو و متقلقوش هيفضل زى ما هو .......... و دى حكايه من الحكايات اللى بنعيدها

( شكر خاص لامنيه سيف لمساعدتى ع اتقان هذه اللهجه وجلوسى معها ساعات طويله فى غرف الشات تسايرنى بهذه اللهجه )

سفينة النجاة

الحمد لله , جعل الصيام سببا موصلا للجنه , أنار به البصائر , وأيقظ به ما نام من الضمائر , وهدى به كل ضال وحائر , جامع الناس ليوم تشيب فيه الرؤوس وتعمى البصائر .. والصلاة والسلام على من اوضح الدرب لكل سائر , وبعد :
 
فها هو الفلك اكمل دورته واطلق شعاعه وبعث فى النفس املا جديدا بحلول فجر نرقبه ليعيد لنا صفاء النفوس , لينير للتائهين الدروب , ينادى من حجبته الغيوم وألهته المتع فنسى القدوم , من تاه فى بحار الحياه , ليوقف سفينه العمر قبل وداعها , وتحطم آمالها على شاطئ بر الامان ؛ لترسو بساحل رمضان , سفينه ابحرت , وللآخره اتجهت , انا وانت من ركابها , رمضان بالشاطئ ينادى لتقف مع هذا العمر وقفه , يدعو لترسو سفينه عمرك بشاطئه فتغشاها الرحمه وتعلوها السكينه .

ينادى ايتها المسكينه : اين تمضين ؟ واى طريق تريدين ؟ اياك ان تهزمى بل اصبرى واثبتى , وبالجنه ابشرى , احذرى ان تخدعى , وانزلى المرساه قبل ان تندمى , وفى غمرة الموت تغرقى !

اخى الحبيب :

هاهى سفينه المصطفى ابحرت منذ سنين تحمل الركاب للآخره والمسافرين , تتبعها صيحات الدعاه والمصلحين : اركبواا سفينه الحبيب ! , كل يوم يرتفع النداء , وتدق اجراس الانذار , بجنازه نراها , او حبيب نفارقه , فاذا بالزففرات تعلو ... رفيق دربى غادر الدنيا , دمر الموت جسده , وشطب اسمه , اغرقته امواج الذنوب والمعاصى , ولقى ربه وهو عاص , رفض ركوب السفينه , قد أُلغى اسمه من بطاقته , ورُفعت صورته مع جنازته , وكتب عليها المتوفى !

يا حفيد المصطفى :
هاهو شهر رمضان ينادي : يا باغى الخير أقبل .. ويا باغى الشر أقصر , هيا اغتنم أيامى وليالى .. ساعاتى .... دقائقى ... ثوانى . انتبه قد لا اعود إلا وأنت مربوط بالأكفان مغطى باللحود . قد نهش وجهك الدود !

رمضان ينااادى : اصلحوا ما فات قبل تلاطم الامواج , وشده السكرات .
 
يا ابن ادم , انزلت مرساتى , فتعلق بحبالى .

لا تتأخر ...... ادخل باب الريان قبل فوات الاوان !

شاطيء الأمان :

قيل للامام احمد رحمه الله : متى الراحه ؟
قال : عندما اضع اول قدم فى الجنه . 

جنه الرحمن هى شاطئ الامان والهدف من الصيام 

صخور ملقاه :

عوائق غيرت مجرى السفينه ووجهتها . ربما اعاقت موعد وصولها فتاهت فى طريقها , ولم تصل مناها الا بعد نهايه الزمن المحدد لها ؛ لذا قال ابن السماك رحمه الله : احذر ثم احذر ان تقدم على جنه عرضها السموات والارض وليس لك فيها موضع لقدم .
خسااااره !!! جنه هذا عرضها وليس فيها ملك قدم . انها حسره , اذن فتعال لاول الصخور

من يربح المليون ؟:

 

من يربح سباق المشاهدين , جوائز الفوازير او المليون على شاشات الفضاء . مكالمات وبطاقات هاتفيه , سهر وقلق , انتظار مشوب بالحذر , انصات وحرص شديد عند بدايه الفوازير , دقات القلب تعلو والنبض يزيد مع تحرك الكمبيوتر . من سيعلن فوزه ؟
ويسطر اسمه على الشاشه فتعلوه الابتسامه ؟!
ويرن جرس هاتفه : مبروك ربحت السباق
وآخر يضرب كفا على كف من الندم , بطاقه وراء بطاقه وليس لنا الا حظ اوفر فى المرات القادمه .


حلم المليون حوله الكثيرون لحقيقه علقوا عليها الامال , وسددوا الديون على امل الفوز بالمليون , ثم يتحول الحلم لسراب .
(يحسبه الظمئان ماء حتى اذا جآءه لم يجده شيئا ووجد الله عنده فوفاه حسابه والله سريع الحساب ) سوره النور ايه 39
عمل دؤوب لا يأس ولا انقطاع , الامل يحدوه ان لم نفز الليله , فغدا ايتها الفوازير لناظره قريب . استنفذت البطاقات المال من الجيوب على امل ان يفوز فى الليله الثلاثين


همسه :

أيها الأخ والأخت المسلمه : هذه هى نهايه سباق الدنيا وتعليق الامال عليها . عجبا لمن كان له من المسابقات اوفر نصيب ثم لم يسابق طوال هذا الشهر الفضيل , ليكن له جنه عرضها الموات والارض موضع قدم
فهل سابقت هذا السباق ؟! سباق لا يحتاج لبطاقات هاتفيه , فخطوط هواتفه مفتوحه داااااائما
كرر وقل : هل سأربح الجنه فى رمضان ؟
كم جزء تقرأ ونافله تصلى ؟؟؟؟

احذر سمك القرش :

أناس يصطادون فى الماء العكر . ليله مع صفحات الانترنت والدردشه او امام الفضائيات او فى التسكع فى الاسواق والشوارع , ونهاره فى النوم حتى حين موعد الافطار وان سألته رد : ذاك مرح وتسليه .
يا خساااااره من بنى بيتا بالنهار ثم هدم فى الليل اساسه .
 

المرفأ :

تعلق بحبال التوبه لتصل لبر الامان , ولا تنس ربط حزام الايمان . فالباب مفتوح فسارع قبل الاغلاق , واعلم ان الاعمال بالخواتيم .

واخيرااااااااا:

اعلم بان الرحال تشد , وعاريتك ترد , ومن بعدها التراب ينتظر الخد
اذن فالغنم قبل الغرم

تزود من التقوى فانك لا تدرى
اذا حل الليل هل تعيش الى الفجر
فكم من فتى بات ضاحك السن
وقد نسجت اكفانه وهو لا يدرى
وكم من صحيح مات من غير عله
وكم من سقيم عش حينا من الدهر

اللهم بلغنا رمضان بجودك يارحمن
وصلى الله على نبينا محمد وعلى آله وصحبه وسلم

اديني رمضان

 

رمضان كريم

الله اكرم

كل سنة وانت طيب

كلام كتير اوي بنسمعه في الشهر ده و طبعا اكتر حاجة كلنا بنسترخمها لما عمو او طنت يقولو

هو انت صايم و لا زي كل سنة ؟

( كلمة مستفزة جدا )

طبعا بنرسم ابتسامة صفرا و تقول لا زي كل سنة

***********************

للاسف كل ما بنكبر فرحتنا برمضان بتقل عما كنا اطفال مع ان مسؤليتنا فيه بتكبر

يعني زمان كنا نروح نشتري فانوس

تدفع للمسحراتي عشان يقول اسمك بالليل ( مع ان الناس بتكون نايمة )

تروح الصلاة عشان ترخم على الناس و تمشي بين الصفوف

و دي بصراحة اول ملاحظة المفروض ما نعملهاش

لان بقى فيه لماضة غريبة قي الاطفال

دا حتى النعش اللي في الجامع فاكريته لعبة

****************

السحور الكبير

سحور اول يوم في رمضان بيبقى له طابع خاص

المشكلة اننا كلنا مش بنفتكر ان رمضان بكرة

و يبقى الدكر يبنزل و يعرف يجيب سحور من عند اى بقال

لان اي بقال قدامه 100واحد على الاقل

اصل رمضان بكرة

كل سنة وانتو طيبين

*********************

فطار اول يوم في رمضان

عمرنا ما هنتعلم ابدا لازم ندبها في الاكل

و طبعا بنحتاج مساعدة علشان نقوم من على السفرة

و السنة دي في انتخة غريبة بعد الفطار

الناس بتبقى واقفة في الصلاة مش عارفة القبلة فين

و حالة من التتييس طبعا مع العرق من الحر

*************************

من اهم الاكتشافات السنة دي بالنسبة لي

ان مش كل الناس بتصلى الجمعة في الايام العادية

لان الجامع ما فيهوش مكان لرجل نملة

و تلاقي الراجل ساجد جنبك و بيقول

يا رب استجيب بقى يا رب

ايه قلة الذوق دي  !!!!!!!!!!!!!

********************

التراويح

وجبة رمضانية دسمة

وياسلام على تراويح النادي

بس بيكون تجمع حلو

و اكتر حاجة بتميزها العياط

في شيوخ متخصصة في الموضوع ده

طبعا في ايات الواحد بيقشعر او يعيط فيها

لكن العياط عمال على بطال ده لاي آيه كتير اوي

و ياسلام لما بكون فيه تصوير الناس بتابع الكاميرا

و اول ما تتسنتر عليه

يغوص في بحر من الدموع و يقول مع نفسه كده

ياالله

***************************

و اخيرا المسلسلات

اعلانات المسلسلات السنة دي تعمل لوحدها

وقت مسلسلين على الاقل

بس دي ظاهرة كويسة

لان اللي بيزيد عن حده بينقلب ضده

فالناس ممكن تتضايق من كترها

*****************

لكن رمضان يظل احسن شهر في السنة

ببلحه بخشافه بعرقسوسه اللي انا مش بحبه

و ربنا يوفقنا لصيامه و قيامه ان شاء الله

كاميرا

ابتعد ... ليس لك مكان فى الصورة ..ابتعد ..حتى وان اصررت على البقاء ..فلن تظهر فى الصورة ..وان عرضا ظهرت فستكون فى ركن مظلم يتم قصه من الصورة... وان كنت فى المنتصف.. فسيكون هناك خطب ما و شيئ غير طبيعى فى تلك الصورة المتجانسة بدونك ...عندها ستكون الصورة معيبة ليس لها حل سوى الحرق.. فمن الاحسن ان تبتعد منذ البداية فقد اكتمل العدد وتم رسم الابتسامة والجميع سعداء

حتى مع مرور العقود... ومحو الذاكرة مع تقدم العمر.. وتغير الوجوه ..وتغير الاسامى.. والانشغال فى الحياة ..فبمجرد ان تلمحه قلبها سيتذكره ربما لن تتذكر اسمه لكنها ستعرفه

يا ارض .. من زرعك ؟ لا اعلم ..من كان هنا؟ لا اذكر .. هل ستتذكرينى؟ كلا.. ياسماء؟ كلا.. يا رياح ؟كلا .. انا اقولها لكم لقد كنت هنا هنا تذكرتم ام لا فلقد كنت هنا يوما ولن يغير نسيانكم هذا من الامر شئ

هل احس احدكم عند النظر فى السماء انها ليست مستوية انها داخلة للداخل (مقعرة) عمييقة انك لو اقتربت منها حتى تلمسها سيتحتم عليك ان تتعمق اكثر مم كنت تتوقع

السحاب يبدو مثل غزل البنات ويبدو قرييبا جدا والسماء من ورائه بعيدة جدا .. تشعر بأنك لو كنت على مبنى عال ستلمسه وتمسكه .. له اشكال كثيرة هذه على شكل بطة وهذه على شكل وجه بها ثلاث فراغات فراغان للعينين وفراغ للفم شئ ظريف سرحان سأل احد ما هل ترى تلك البطة فى السماء اجاب الآخر بالنفى ... السحاب كل يراه بشكل على حسب تخيله

يكفيك ان ترى النور من عقب الباب حتى تستدل من ان النور مقاد فى الخارج ليس بالضرورة ان تفتح الباب حتى تتأكد

فى ناس ظرفاء يفرحون ان ضميرهم يؤنبهم كثيرا لأن هذا دلاله على يقظة ضميرهم المفروض يحزنوا لأن هذا دليل على كثرة ارتكابهم الاخطاء

يوم من الايام سرحان كان يمزح مع صديق له قائلا (مش لو الواحد مكنش عنده ضمير كان حيستريح ) وايده صديقه واخذا يضحكان لكن سرحان احس بتأنيب ضمير بعد ذلك من قال ان الانسان لو لم يكن عنده ضمير كان سيستريح ممكن بعد ان يرتكب ما يشاء من الاخطاء يحدث له شئ يستيقظ ضميره على اثره او ربنا يحاسبه بأن يصحى ضميره عندها سيقضى باقى حياته متحسرا نادما على ما فعل من كل تلك الاخطاء

سئمت من ذلك البريق والمظهر الزائف واتسائل كيف ينخدع الناس به ؟ وانا نفسى انخدع به

اضحكوا معى على تفكير سرحان يوما كان يفكر انه بمعرفته مزيد من الناس قلبه سيتقسم على هذا العدد وبهذا يقل حبه للأشخاص الذين يحبهم لأن الشخص الجديد سيأخذ مساحة وحيز من قلبه طبعا هذا الكلام كلام فارغ القلب والعواطف لا تنضب وليس لها حدود هى ليست قطعة ارض تقسم

وهكذا سقطت لويز !!

وهكذا سقطعت لويز !!

وهكذا  ضاعت

وهاهي تلملم ذيول الندم 

لتعبر بها 

فوق حطام الأمل .!

وها هي قد بكت 

وتساقطت من عينها الشريدة 

دمعة ..

وأخيرا  قد بكت !

وهكذا ضاعت لويز !!

وبألم الكراهية تُوجت 

في بلاد العدم 

لا تسألوا عنها 

فحياتها الأولى 

للوجود قد رواها الزمن !

فتاة .. قد عُرفت 

لأجل الحب قد غَنت 

وبنبع الصدق اغتسلت 

وبروح الحياة .. ابتسمت 

ولأجل ربها سجدت

ولنور الحق .. قد هُديت

وفي حصن الإيمان .. قد سكنت 

فتاة .. هي والبراءة ..
وجه صغير يضحك

فإلى أين بحكايتها تمضى ؟

وإلى أي مكان قد ذهبت ؟!

*****

لا تلوموني إن ساد الصمت برهة 

فأنا لا أعرف القصة 

لا أعرف إلى أين أسير بوفد حروفي الضالة 

ولا أعرف أى معان ممزقة قد ألقاها قلمي 

ولا أذكر متى 

ولا أعرف كيف 

قد سقطت .. هي 

ولا أعرف حتى 

من تكون ..

******

وسط ذلك الضجيج الصاخب 

لضحك سعيد ..

شعور طريد

وحزن وحيد

وقلب .. 

لا .. لا يوجد قلب

ولا روح 

ولا شىء .. !

فيا نفسي .. ما أبكاكي ؟!

.. وبس

انا بس كنت عايزة اقول انى فعلا سعيدة بالمدونة .. والناس المشاركين فيها .. واللى متابعينها .. انا حكتب اكتر المواضيع اللى عجبتنى هنا فى المدونة : ذكرى من انسانة احبتك بجنون , عيون الموناليزا , صدمات , رسائل , رسالة حب , خدعت نفسها , بحثت عنك , كلمات , اقنعة ولكن , تائه ام تأبى البيات , مجرد اسئلة , خلوا بالكوا , هندس عقلك , اللهم بلغنا رمضان , زور يقال , همسات , رابطة الإيمان , رحلة البحث عن حبيبتى , ببساطة مصر , خاطرة عقلك , حكاية روح , انا سعيد , مجرد ذكرى , عودة الى الماضى , سلسلة تزكية القدس و المسجد الاقصى .. وشعر يوهان جوته.. وسعيدة بأن عدد كبير مشارك عشرين ( ليس تسعة عشر ) وان شاء الله يكتر العدد .. دى حاجة تفرح

حاجة حلوة جامد ان ممكن اى حد يستغل المدونة انه يقول كلام يوصل 500 شخص ويؤثر فيهم بس برضة بيتحمل مسئولية الافكار اللى بيكتبها لو كانت سلبية

تبقوا تقرأوا تفسير القرآن بجد والله متعة وشعور رائع فعلا لما الواحد يفهم الآيات ويعرف الموقف اللى نزلت فيه الآية دى ونزلت فى مين

برضه حاولوا تقرأوا فى كتب الفقه بس المشكلة ( هى مش مشكلة اوى ) ان الواحد يعمل باللى يقراه ويحاسب فى تصرفاته من حاجات مثلا مكنش بيعملها مضبوط اوى علشان كدة مش حيبقاله حجة لأنه عرف

بجد ربنا يكرم تلك الزوجة الشابة الحامل التى تصلى التراويح

star Bucks Coffee

الكافيه ده بيقال انه بيقدم احلى قهوة ممكن تشربها وتلاقى فاتح فى اكبر المولات وعنده ناس زحمة انا بعمل دعاية ليه علشان محدش يتهمنى بالتشهير الكافيه ده كل خمس كوبايات قهوة تمن اربعة بيروح لإسرائيل ومش للتعمير والبناء لأ للسلاح الاسرائيلى حاجة تجيب الفخر وتلاقى مصريين كتير بيرتادوا هذا الكافيه ده حتى شعاره واحدة ست رمز لأميرة يهودية واسمه كمان المال اللى رايح للنجمة اللى هى نجمة اسرائيل

وبس

بلا سبب .. !

على الرغم من ضيق الوقت واقتراب آذان المغرب .. وتيقني من أنه لا يوجد من سيقرأ تلك الكلمات إلا بعدها بساعات .. قررت أن أفتح رسالة جديدة وأكتب .. !

لا أدري عم سأكتب لكني سـ -أدعبس - حتى أجد تلك الكلمات التي اختبأت بداخلي وظللت أدعم اختفاءها .. حتى يحين وقت خروجها .. والذي كنت موقنة من أنه لن يأتي .. على الأقل خلال التسعون سنة القادمة !

إحساس غير لطيف حين تكون أنت المظلوم .. وتمضي في إخقاء الابتسامة والتجهم .. والإهمال لمن حولك ..في محاولة لإخبارهم بأنك غاضب أو حزين ..  ثم تجدهم يفعلون الأمر ذاته معك .. ترى ؟ هل يدركون حقيقة أنك المظلوم .. ؟ أم أنهم سيلقون باللوم عليك .. لأنك المخطىء ؟ ..

أم أنه مجرد .. عناد ؟!

بداية جديدة .. على ما يبدو في أول أيام ذلك الشهر المبارك .. لا شىء أفعله .. جربت كل شىء .. حتى التلفاز لم أتركه بسلام .. لكنه ذلك الشعور بالرغبة في التغيير يطاردني .. فما الفائدة من الهرب ؟ .. علي المواجهه .. وربما .. أن أتغير بالفعل !

الحب .. أعمى .. يل هو أصم .. وأغبى كلمة سمعتها في حياتي .. ولا تسألوني عن السبب !

استمتعوا بالإفطار .. وأسرعوا بالقيام للصلاة .. واقرأوا القرآن .. كلمات تتردد كثيرا .. لكن هل من أحد يستشعرها بأعماق وجدانه ؟!

قليلون !

بحبك يا بلدي

بحـــــــــــــــــــــــبك يا بلدي

بحبك يا بلدي ومغلباني 

بحبك واحوالك مش عاجباني 

ولو بعدت عنك ثواني 

بيرجعني شوقي ليكي من تاني

حياة ناسك فيكي صعبه 

وحكومتنا عملالهم رهبه

والاسعار فيكي شايفينها عتمه

رغيف العيش ولا اللحمة

العيش بالمسامير اكلوه 

وكيلو اللحمة بقي حلم بيتمنوه

والمواصلات .. المواصلات بقت زحمة

مواردنا في بلدنا مرميه 

وشبابك كلهم عواطليه

والشغله بيتقدملها ميه

وياخدها صاحب الواسطة الي هي

المرتب من هنا بياخدوه 

ويوم عشرة بيخلصوه 

هيقضوا علي الغاز ولا الميه 

ولا الكهرباء والفول والطعميه

والناس التانيه في التكييف مريحين

واكلين وشاربين وعلي فلوسهم مش ملاحقين

وكان البلد من حقهم واحنا نفضل في الطين

بس لسه ميعرفوش ان مصر ام المصريين

ميعرفوش ان مصر مش ام المستثمرين

ان مصر ام المعدومين الشقيانين

بحبك يا بلدي ومغلباني 

شايفة يا بلدي ولا مكذباني 

حال شبابك بقي شكل تاني

ده بيضرب بانجو وده بيجرب صنف تاني

وده لما اتكلم صفوا دمه في ثواني 

وشبابك يا بلدي شردوه وقال ايه تهذيب سكاني

وكل ده باسمك يا بلدي

وبسكوتك ده مجنناني

شفتي الي بيحصل لابويا وامي في مصالحك 

ابويا بيتهان وبرده مسامحك

بيتذلل للموظف والغفير والامين

وبرده بيطلعوا من المصلحة خسرانين

يرضيكي يا امي الي هيجري لابني 

مش هلاقي حته ارض عليها ابني

بيت وسقف يضمني مع مراتي وابني

واخيرا يا بلدي مش هسكت واطاطي 

لاني بحـــــــــــــــــــبك يا بلدي