الأحد، 13 فبراير 2011

مصر جنة . و هنبقى ملائكتها


بداية أهنئ الشعب المصري العظيم بالحرية التي طالما حلم بها
و استحقها عن جدارة
خلاص العصر اللي فات انتهى و مات
و من بكرة هنعيش حياة جديدة
بنمط جديد
هنسطر فيه التاريخ بأقلامنا
و هنعيش دايما راسنا مرفوعة كأجمل جيل عاش فيكي يا بلد

يا جماعة

أثناء الأزمة الأخيرة الدنيا كلها كانت مقلوبة
أخبار مصر متصدرة الصحف العالمية
و البورصة اتضربت
و قامت مظاهرات في الشرق و الغرب
فضلا عن ردود الفعل الدولية . كل رئيس يطلعلكم يقول كلمتين عن الوضع في مصر و لا كأنها تركة المرحوم
بعد ده كله لو لسه مقدرناش قيمتها يبقى احنا جاحدين
مصر ادتنا كتير يا جماعة
بس النظام الفاسد أخد مننا اكتر
و الآن
ماذا بعد رحيل النظام ؟
لم يبق الا نحن جيل الثورة و مصرنا الغالية
..............
لازم نعرف اننا اتعلمنا الدرس
اتعلمناه كويس
ادينا درس للأنظمة الحكومية بأنه لا تهاون في حكم بلد هي أحلى البلدان
مفيش نظام هيجرؤ يفسدك تاني بإذن الله يا أرض الصالحين
و لازم نعرف برضه اننا فئة مستهدفة من الدرس ده
و اتعلمنا كتير
...........................................................

الدرس الأول

الشارع شارعنا . هو مكاننا . بنقابل فيه بعض كل يوم و يوم معوزنا نعبر عن رأينا نزلنا و اتجمعنا في الشوارع
يبقى أدعى نحافظ من هنا و رايح على نضافته
ابتدى بنفسك
مترميش ورقة في الأرض
و متنسوش ان إماطة الأذى عن الطريق صدقة
عشان انت مصري بلدك نضيفة
..............................................................

الدرس التاني

يوم ما كانت اشارات المرور بايظة نزلوا ولاد مصر ينظموا الشوارع
و دلوقتي بعد ما هترجع الحياة الطبيعية ان شاء الله
أدعى ان احنا نحافظ على النظام
ابتدي بنفسك
متكسروش اشارة
متقفوش مخالف
راعوا أماكن المستشفيات و المدارس
ساعدوا واحد محتاج يعدي الشارع . خد بإيده و عديه
عشان انت مصري بلدك منظمة
.....................................................

الدرس التالت

في ظل غياب الأمن و الأمان رجعلنا الإحساس ده بسرعة بولاد و شباب مصر الجدعان
اللي عملوا دوريات مراقبة و حماية للمساكن والممتلكات العامة و الخاصة
شوفنا إزاي وقفوا ايد واحدة و كونوا دروع بشرية حولين المتاحف و المستشفيات
يا ريت لو نفضل على طول ايد واحدة ضد الإرهاب
لأن مصر داخلة على مرحلة عصيبة ممكن ناس كتير تستغلها
لكن بشعب زي ده أنا مطمنة على مصر و صدق الله العظيم عندما قال
( ادخلوا مصر ان شاء الله آمنين )
عشان انت مصري بلدك آمنة
..........................................................................

الدرس الرابع

صلينا الجمعة وسط حماية اخواتنا المسيحيين
و أقاموا قداسهم في حمايتنا
و أظن أثبتنا للعالم اننا إيد واحدة
و لما نقول مصر يبقى مبنقولش مسلم و مسيحي
بنقول مصري
مصري يعني وحدة
مصري يعني قوة و عزيمة و اصرار
من النهاردة مش هندي فرصة لحد يفرق ما بينا أبدا
لأن كلنا مصريين و كلنا هنبني بلدنا تاني
ايدينا في ايد بعض
.....................................................

الدرس الخامس
ابدأ إصلاح أي نقطة اعترضت عليها من نفسك
متدفعش رشوة
متغشش في لجنة
متنجحش كوسة
اد واجبك كاملا سواء كنت طالب أو موظف أو مربي
اجعل نيتك انك تخدم بلدك و حط ربنا قدامك
و راعي ضميرك في كل حاجة
و خليك متيقن ان كل ده عائد عليك بالنفع في النهاية
الدنيا مخربتش الا لما الناس باعت ضمايرها و ذممها للفلوس و المناصب
و احنا مش زيهم
لأننا المصريين اللي على حق
اللي قالوا للفساد لأ
...............................................................
و غيرها كتير من الدروس و القواعد اللي لو طبقناها هنبقى أسعد شعب
لأن ربنا واهبنا جنة على أرضه
مش باقي غير نعمرها ملايكة
و لعل أفضل درس تعلمناه

هو اننا نقول لأ للسلبية
و نخرج مارد الحرية و التعبير من القمقم اللي فضل محبوس فيه سنين
و صعب يرجع تاني لقمقمه
من النهاردة مش هنسكت على فساد
مش هنسكت على طغيان
مش هنسكت على باطل
مش هنسكت عن حقوقنا . بعد ما نعمل واجباتنا
كل واحد مننا هينتخب رئيسه بحرية و نزاهة
مفيش تزوير
مفيش محسوبية
مفيش كوسة
في ضمير
في عقل
في نية صافية
في مصريين شرفاء ردوا لمصر حقها المسلوب و الذي نقسم اننا لن نضيعه مرة أخرى

معلش لو الموضوع طويل شوية
بس دي كلمة لقيتني لازم أقولهالكوا كلكوا
من بكرة الصبح هصحى . هتوضى و أصلي . و أبتدي بنفسي
و أنا متأكدة ان كلكوا كده

لأن خلاص مصر عدت من مصفاة الظلم و البقاء الآن للشرفاء
و ليس للأقوياء
يا ريتني أنا كمان أسمع اقتراحاتكوا و توجيهاتكوا لينا
أكيد عندكوا مبادئ نفسكم تطبقوها
متسكتوش خلاص ادخلوا و اكتبوها و آمروا الناس بيها
و شمس الحرية كافية تنور طريقي و طريقك
لغد أفضل و مستقبل أحلى و أحلى

في بلدي الحبيب
مصر

1 قالوا رأيهم:

غير معرف يقول...

من بكرة الصبح هصحى . هتوضى و أصلي . و أبتدي بنفسي
و أنا متأكدة ان كلكوا كده

هو ده مطلبي الوحيد لكل فرد من شعب مصر الغالية ، ودروس جميلة من الثورة قدمتيها ياريت فعلا نحافظ عليها بعد كده

التغيير ه سنة الحياة ولابد منه باستمرار وهو بالفعل مطلب سعينا ليه وحققناه بارادتنا وعزمنا ، بس ياريت نفهم الحرية والديمقراطية بعقل وياريت مش أي فكر يحركنا ولا أي رأي نقتنع بيه بسهولة إنما يكون نابع من داخل أفكارنا واعتقاداتنا النقية لإن فيه وراء الستار أياد خفية وجماعات متطرفة تشعلل الأمور وتخلط الافكار للنيل من مطامعها الشخصية لأن الفترة القادمة هي أصعب من الثورة نفسها لانها الفترة اللي هاتترسم فيها ملامح التغيير وربنا يستر من اللي جاي

بلاش نردد كلام وخلاص
هي دي رسالتي للشباب يارب تكون صلت

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة