مصر .. مصر .. تحيا مصر !

أنا عاوز آخد دورة الآي سي دي إل في أجازة أولى ثانوي !

كنت عاوزة أخنق أخويا الصغير لما قالي الجملة دي  .. قال عاوز ياخد دورة الآي سي بتنجان دي .. قولتله بس لما ابقى آخدها أنا الأول ابقى خدها ياخويا .. ساعتها سألني أخويا الكبير وقالي هو انتي ناوية تاخديها امتى ؟! قولتله مش عارفة أنا أصلا مش بحضر .. قالي ازاي بقى هتاخديها وتمتحني من غير متحضري ؟!

ساعتها قولت يا حلولي دول بياخدوا غياب .. ويا حلولي تاني .. هو انا علشان آخد الامتحان لازم أحضر ؟!

********

********

هو انا هاخد إيه في تانية ثانوي ؟! 

للمرة التانية كان نفسي ساعتها أخنق أخويا الصغير الغلباوي .. هو انت لسة خلصت أولي ثانوي علشان تسأل .. وقال ايه خلاص قرر ياخد علمي وناوي يدخل كلية طب اسكندرية بدل كلية طنطا المقرفة دي على حد تعبيره .. وأحلى حاجة ان سيادتي قاعدة كدهو وبسمع ولا كأني موجودة من أساسه .. يعني عاوزيني أقوله ايه ؟! أدافع يعني عن كليتي وأقول لااااااااااااااااااااااااااااا .. دي كلية مش مقرفة أوي .. قال أدافع قال !

الغريبة ان الواد خلاص بقى قرر وقال ايه بقى بيقولي انه خلاص ناوي يدخل علمي علوم وبياخد رأيي ويشوفني هقوله إيه .. طبعا الرد الطبيعي لأخويا الكبير الي مشارك في الحوار منذ البداية ان آخر أحلام اختك دي هي إنها تلاقي ايد بتجري وراها في الحلم .. ولو عايز يابني تمشي وتعيش مع الناس اللي بتموت .. تفعص في الطحال والكبد والحاجات الحلوة دي .. ادخل علمي علوم .. ! وقدامك انا اهو واحد مهندس زي الفل ! 

وأنا ............................................................. !

********

********

المرة دي أخويا الكبير بدأ يوصف قصة حياة طالب الطب .. قالك إيه أخويا - ولا حظ انه بيقول من وجهة نظر هندسية - طالب الطب ده بيقعد 6 سنين يحرت في الكتب .. ولسة في الآخر متخصصش .. وقال ايه السنة السابعة امتياااااااااااس .. وييجي في الآخر يرزعله تلات سنين سجن .. قصدي جيش .. يبدأ بعديها ياخد بقى ماجستير ودكتوراه يخلص تكوين نفسه شاب محترم عنده 36 سنة تبدأ بقى تضور على جواز وتشوف حياتك .. هما سنتين وهتودع علام تكون شفت وعشت حياة الدكتور المصري .. وتبقى الدكتور المرحوم ! 

طبعا بدأ يسرد التخصصات الموجودة في طب .. من أول الرمد مرورا بالمسالك البولية وانتهاءا بنسا وتوليد .. !

ساعتها بصلي أخويا الصغير وقالي : وانتي ناوية تتخصصي ايه بقى ؟! 

للمرة التالتة كان نفسي أقوم أخنق أخويا الصغير .. وساعتها ضحك أخويا الكبير وقال أكيد نسا وتوليد بما ان ستات مصر مبيبطلوش ولادة ليل نهار .. 

ساعتها برده ضحك أخويا الصغير وقال أحلى حاجة بقى ان ستات مصر مزجاتليه ميولدوش غير الساعة 5 الفجر ! .. مزجاتليه والله .. 

وبحس المهندس رد أخويا الكبير وقال لو اتطنطت قدامي مش قايم من النوم .. ! 

*********

*********

بدأت الحاجة الوالدة مع أخويا الكبير في تعديد مزايا طالب هندسة السعيد .. خمس سنين واقلب يا معلم .. ويا سلام عليهم بيتخصصوا من تاني سنة .. 

بيقولك مهندس  مدني ده ممكن يكسب ملايين لو بس بيعمل رصيف طريق وقال ايه خد نص سم بس من السمك بتاع الطريق وخادهم من المزانية يجيب ملايين .. 

مهندس عمارة مش بيعمل حاجة في حياته غير انه يكلم بنات ويشرب نسكافيه ! صله رايق بيقعد يرسم طول النهار ويعملك مبنى على شكل قلب وأوضة على شكل دبدوب .. هي دي شغلته !

مهندس ميكانيكا ده تبع المحركات ومختصين بأي حاجة تتحرك على الأرض ! ده اللى بييجي يصلح الغسالة .. ودول اللى بيهتموا بالآلة .. اللى مماشية العالم دلوقتي .. ياااه عالأهمية !

مهندس كهربااااااااااا .. وما أكثر أقسامه .. الكترونيات واتصاللات .. الكترونيات من أول الإبرة لحد الصاروخ .. بيبقى عارف كل حاجة في أى حاجة قدامه .. شبهها بواحد بيطبخ .. بيجمع حاجات كتير علشان يطلع أكله .. أو جهاز .. وده شغله ديق أوي .. أما اتصالات فده اللي شغال دلوقتي .. من أول الراديو لحد الستاليت ..  ده اللى بيخليك ترغي بالساعات قدام التليفون مع الجي اف .. وده اللي بيوصلك التليفزيون تتفرج على فوازير رمضان .. 

ناااااااااااااااااااس دمااااااااااااااااااااااااااااغ

كفاية عليكوا كده .. المهم ان في وسط الدوخة دي والمحاولات المتمادية في اقناع عقل أخويا الصغير بأن المهندس هو الأفضل والأحسن والأكثر انجازا ! ..

رد أخويا الصغير وهو يضحك  : .. وانا أقول ايه اللى جابلكوا الضغط !

وفي النهاية وضعوا أخويا الصغير الغلبان .. أديك شوفت طب وهندسة .. واختار انت !! 

أحلى حاجة نهم خادولي حقي من الواد الصغير ده .. زمانه بيلعن اللحظة اللي سأل فيها 

*********

*********

مش لازم أكملكوا الباقي لأنهم بدأو يخبطوا في كليات أداب والحاجات الحلوة دي .. بس لازم تلاقولي كلمة يا جماعة بما إني مش مشاركة في الحوار ده من ساعتها .. بجد أنا مقصدش إني أهين في أى كلية ولا أقلل من شأنها .. كل واحد له دوره .. بس بجد بتبقى حاجة تفرس لما تبقى رايح جاي قدام أخوك كل شوية يذلك علشان هيخلص السنة دي وأهو بيعمل مشرووووووووووووووووووع وبيفكر وبينجز وحده وبيعمل حاجة .. ولا لما تروح معاه المؤتمرات اللي بيروحها وتشوف الطالب اللى لسة سنة تالتة ورابعة وهما بيعملوا مشروعات وبيقدموها في مسابقة وبيروحوا لشركات تدعم المشروعات يتاعتهم .. والله أنا فاكرة يوم روحت مع أخويا ده مسابقة Made in University 

وعلى اللى تشوفه وتسمع الطلبة وهما بيقدموا الـ presentation اللي بيعملوها بنفسهم وبيناقشوا الدكاترة هما فكروا ليه في الإختراع ده والأخطاء والتشجيع والنقد  .. بجد تتحسر .. لما تلاقي طالب اتكبتت بجد كل مواهبه ودماغه وكل حاجة بتقل قدام انه يقعد يذاكر ويحشر معلومات في دماغه .. ولازم يبقى كويس ويكرس وقته للمذاكرة علشان يطلع دكتور ناجح في شغله .. وفعلا السنين كتير .. ووالله الطالب بيتظلم .. وبيعاني .. ودايما يتقال ان ده في كل الكليات .. بس بجد انا من أول سنة ودماغي لسعت .. ربنا يستر السنين الجاية هيحصل ايه ! 

أحلى حاجة وأجمد حاجة بقى ان احنا دفعة .. مقولكوووووووووووووووووش .. الكلية بتحبها حب !!!!!!!!!!  .. ياااااااه بحد دفعة محظوظة من يومنا .. من أول مدخلنا الكلية .. احنا اللى دايما بنفوق رؤساء الأقسام ونقولهم ان احنا بنحب النظام والإنضباط ولازم كل حاجة تبقى صح .. وطبعا برده دفعة محظوظة من أول امتحانات العشرين في المية لحد امتحانات آخر السنة .. متفقدوش الأمل .. صحيح القيادة نسائية .. ادعوا ربنا تعدي على خير !

طبعا السبب في إني متكلمتش طول كلامهم هو اني قاعدة بكتب الكلام ده .. وطبعا هتبقى المفجأة لما أحط اللينك بتاع الموضوع على وول أخويا .. مش قادرة استنى أشوف تعابير وشه :)

*********

*********

بس افتكرت من يومين الأغنية بتاعة يا أحلى اسم في الوجود .. 

ياا اا مصر 

يا اسم مخلوق للخلود 

ياا اا مصر ..

كل أما افتكر المدرسة وازاي زرعت فينا حب مصر وحب فلسطين وتمسكنا بانها عربية وعمرها مهتبقى أبدا صهيونية .. وأفتكر أستاذ نصر ومس أميرة ومس فاطمة وكلام المدرسات معانا .. بجد بفتقد الناس دي دلوقتي .. وزعلانة جدا على مدرستي اللي ضاعت منها الحاجات الحلوة دي .. مبقيتش بحس في الأجيال اللي طالعة نفس اللى كنت بحسه فينا .. حتى لما يكون فينا الوحش .. بس كان في الآخر بيرجع لمبدأ واحد هو حب بلده وعارف أوي يعني ايه فلسطين ومسجد أقصى وعارف القضية وفى أي وقت وف كل لحظة بيدافع عنها .. 

لسة فاكرة تهديد ابويا لما قالي لو نقصتي في ثالتة اعدادي همشيكي من مدرستك وأوديكي مدرسة قاسم أمين .. وفاكرة فرحتي لما حققت لأبويا اللي هو عاوزة وفضلت في مدرستي .. وقد ايه الواحد كان فعلا بيحسسها بيته التاني .. حاجات كتيرة دلوقتي وحشاني فيها .. وزي مضاع حب الطالب للمدرسة بدأ يضيع حب المصري لوطنه .. ودلوقتي مفيش غير عاوز أهاجر وأمشي أصل البلد دي مش بتقدرني .. قال يعني لما يروح بلد تاني هيلاقي فعلا حد يقدره .. ولازم نبقى عارفين ان الغلط مش فيها .. الغلط فينا احنا .. 

ساعات لما بلاقي ناس كتير حواليا أو أقرا في مدونات كتير وألاقي ناس بجد عاقلة أحس ان في أمل .. وأقول يا رب تتصلح والكل يقول تحيا مصر !

الأغنية دي بتهزني كل أما أسمعها 

سلاام يا بلدي سلااام