الثلاثاء، 5 أكتوبر 2010

مصر .. مصر .. تحيا مصر !



أنا عاوز آخد دورة الآي سي دي إل في أجازة أولى ثانوي !

كنت عاوزة أخنق أخويا الصغير لما قالي الجملة دي  .. قال عاوز ياخد دورة الآي سي بتنجان دي .. قولتله بس لما ابقى آخدها أنا الأول ابقى خدها ياخويا .. ساعتها سألني أخويا الكبير وقالي هو انتي ناوية تاخديها امتى ؟! قولتله مش عارفة أنا أصلا مش بحضر .. قالي ازاي بقى هتاخديها وتمتحني من غير متحضري ؟!

ساعتها قولت يا حلولي دول بياخدوا غياب .. ويا حلولي تاني .. هو انا علشان آخد الامتحان لازم أحضر ؟!

********
********

هو انا هاخد إيه في تانية ثانوي ؟! 

للمرة التانية كان نفسي ساعتها أخنق أخويا الصغير الغلباوي .. هو انت لسة خلصت أولي ثانوي علشان تسأل .. وقال ايه خلاص قرر ياخد علمي وناوي يدخل كلية طب اسكندرية بدل كلية طنطا المقرفة دي على حد تعبيره .. وأحلى حاجة ان سيادتي قاعدة كدهو وبسمع ولا كأني موجودة من أساسه .. يعني عاوزيني أقوله ايه ؟! أدافع يعني عن كليتي وأقول لااااااااااااااااااااااااااااا .. دي كلية مش مقرفة أوي .. قال أدافع قال !

الغريبة ان الواد خلاص بقى قرر وقال ايه بقى بيقولي انه خلاص ناوي يدخل علمي علوم وبياخد رأيي ويشوفني هقوله إيه .. طبعا الرد الطبيعي لأخويا الكبير الي مشارك في الحوار منذ البداية ان آخر أحلام اختك دي هي إنها تلاقي ايد بتجري وراها في الحلم .. ولو عايز يابني تمشي وتعيش مع الناس اللي بتموت .. تفعص في الطحال والكبد والحاجات الحلوة دي .. ادخل علمي علوم .. ! وقدامك انا اهو واحد مهندس زي الفل

وأنا ............................................................. !

********
********

المرة دي أخويا الكبير بدأ يوصف قصة حياة طالب الطب .. قالك إيه أخويا - ولا حظ انه بيقول من وجهة نظر هندسية - طالب الطب ده بيقعد 6 سنين يحرت في الكتب .. ولسة في الآخر متخصصش .. وقال ايه السنة السابعة امتياااااااااااس .. وييجي في الآخر يرزعله تلات سنين سجن .. قصدي جيش .. يبدأ بعديها ياخد بقى ماجستير ودكتوراه يخلص تكوين نفسه شاب محترم عنده 36 سنة تبدأ بقى تضور على جواز وتشوف حياتك .. هما سنتين وهتودع علام تكون شفت وعشت حياة الدكتور المصري .. وتبقى الدكتور المرحوم ! 

طبعا بدأ يسرد التخصصات الموجودة في طب .. من أول الرمد مرورا بالمسالك البولية وانتهاءا بنسا وتوليد .. !

ساعتها بصلي أخويا الصغير وقالي : وانتي ناوية تتخصصي ايه بقى ؟! 

للمرة التالتة كان نفسي أقوم أخنق أخويا الصغير .. وساعتها ضحك أخويا الكبير وقال أكيد نسا وتوليد بما ان ستات مصر مبيبطلوش ولادة ليل نهار .. 
ساعتها برده ضحك أخويا الصغير وقال أحلى حاجة بقى ان ستات مصر مزجاتليه ميولدوش غير الساعة 5 الفجر ! .. مزجاتليه والله .. 
وبحس المهندس رد أخويا الكبير وقال لو اتطنطت قدامي مش قايم من النوم .. ! 

*********
*********

بدأت الحاجة الوالدة مع أخويا الكبير في تعديد مزايا طالب هندسة السعيد .. خمس سنين واقلب يا معلم .. ويا سلام عليهم بيتخصصوا من تاني سنة .. 
بيقولك مهندس  مدني ده ممكن يكسب ملايين لو بس بيعمل رصيف طريق وقال ايه خد نص سم بس من السمك بتاع الطريق وخادهم من المزانية يجيب ملايين .. 
مهندس عمارة مش بيعمل حاجة في حياته غير انه يكلم بنات ويشرب نسكافيه ! صله رايق بيقعد يرسم طول النهار ويعملك مبنى على شكل قلب وأوضة على شكل دبدوب .. هي دي شغلته !
مهندس ميكانيكا ده تبع المحركات ومختصين بأي حاجة تتحرك على الأرض ! ده اللى بييجي يصلح الغسالة .. ودول اللى بيهتموا بالآلة .. اللى مماشية العالم دلوقتي .. ياااه عالأهمية !
مهندس كهربااااااااااا .. وما أكثر أقسامه .. الكترونيات واتصاللات .. الكترونيات من أول الإبرة لحد الصاروخ .. بيبقى عارف كل حاجة في أى حاجة قدامه .. شبهها بواحد بيطبخ .. بيجمع حاجات كتير علشان يطلع أكله .. أو جهاز .. وده شغله ديق أوي .. أما اتصالات فده اللي شغال دلوقتي .. من أول الراديو لحد الستاليت ..  ده اللى بيخليك ترغي بالساعات قدام التليفون مع الجي اف .. وده اللي بيوصلك التليفزيون تتفرج على فوازير رمضان .. 

ناااااااااااااااااااس دمااااااااااااااااااااااااااااغ
كفاية عليكوا كده .. المهم ان في وسط الدوخة دي والمحاولات المتمادية في اقناع عقل أخويا الصغير بأن المهندس هو الأفضل والأحسن والأكثر انجازا ! ..
رد أخويا الصغير وهو يضحك  : .. وانا أقول ايه اللى جابلكوا الضغط !

وفي النهاية وضعوا أخويا الصغير الغلبان .. أديك شوفت طب وهندسة .. واختار انت !! 
أحلى حاجة نهم خادولي حقي من الواد الصغير ده .. زمانه بيلعن اللحظة اللي سأل فيها 

*********
*********

مش لازم أكملكوا الباقي لأنهم بدأو يخبطوا في كليات أداب والحاجات الحلوة دي .. بس لازم تلاقولي كلمة يا جماعة بما إني مش مشاركة في الحوار ده من ساعتها .. بجد أنا مقصدش إني أهين في أى كلية ولا أقلل من شأنها .. كل واحد له دوره .. بس بجد بتبقى حاجة تفرس لما تبقى رايح جاي قدام أخوك كل شوية يذلك علشان هيخلص السنة دي وأهو بيعمل مشرووووووووووووووووووع وبيفكر وبينجز وحده وبيعمل حاجة .. ولا لما تروح معاه المؤتمرات اللي بيروحها وتشوف الطالب اللى لسة سنة تالتة ورابعة وهما بيعملوا مشروعات وبيقدموها في مسابقة وبيروحوا لشركات تدعم المشروعات يتاعتهم .. والله أنا فاكرة يوم روحت مع أخويا ده مسابقة Made in University 
وعلى اللى تشوفه وتسمع الطلبة وهما بيقدموا الـ presentation اللي بيعملوها بنفسهم وبيناقشوا الدكاترة هما فكروا ليه في الإختراع ده والأخطاء والتشجيع والنقد  .. بجد تتحسر .. لما تلاقي طالب اتكبتت بجد كل مواهبه ودماغه وكل حاجة بتقل قدام انه يقعد يذاكر ويحشر معلومات في دماغه .. ولازم يبقى كويس ويكرس وقته للمذاكرة علشان يطلع دكتور ناجح في شغله .. وفعلا السنين كتير .. ووالله الطالب بيتظلم .. وبيعاني .. ودايما يتقال ان ده في كل الكليات .. بس بجد انا من أول سنة ودماغي لسعت .. ربنا يستر السنين الجاية هيحصل ايه ! 

أحلى حاجة وأجمد حاجة بقى ان احنا دفعة .. مقولكوووووووووووووووووش .. الكلية بتحبها حب !!!!!!!!!!  .. ياااااااه بحد دفعة محظوظة من يومنا .. من أول مدخلنا الكلية .. احنا اللى دايما بنفوق رؤساء الأقسام ونقولهم ان احنا بنحب النظام والإنضباط ولازم كل حاجة تبقى صح .. وطبعا برده دفعة محظوظة من أول امتحانات العشرين في المية لحد امتحانات آخر السنة .. متفقدوش الأمل .. صحيح القيادة نسائية .. ادعوا ربنا تعدي على خير !

طبعا السبب في إني متكلمتش طول كلامهم هو اني قاعدة بكتب الكلام ده .. وطبعا هتبقى المفجأة لما أحط اللينك بتاع الموضوع على وول أخويا .. مش قادرة استنى أشوف تعابير وشه :)

*********
*********

بس افتكرت من يومين الأغنية بتاعة يا أحلى اسم في الوجود .. 
ياا اا مصر 
يا اسم مخلوق للخلود 
ياا اا مصر ..

كل أما افتكر المدرسة وازاي زرعت فينا حب مصر وحب فلسطين وتمسكنا بانها عربية وعمرها مهتبقى أبدا صهيونية .. وأفتكر أستاذ نصر ومس أميرة ومس فاطمة وكلام المدرسات معانا .. بجد بفتقد الناس دي دلوقتي .. وزعلانة جدا على مدرستي اللي ضاعت منها الحاجات الحلوة دي .. مبقيتش بحس في الأجيال اللي طالعة نفس اللى كنت بحسه فينا .. حتى لما يكون فينا الوحش .. بس كان في الآخر بيرجع لمبدأ واحد هو حب بلده وعارف أوي يعني ايه فلسطين ومسجد أقصى وعارف القضية وفى أي وقت وف كل لحظة بيدافع عنها .. 

لسة فاكرة تهديد ابويا لما قالي لو نقصتي في ثالتة اعدادي همشيكي من مدرستك وأوديكي مدرسة قاسم أمين .. وفاكرة فرحتي لما حققت لأبويا اللي هو عاوزة وفضلت في مدرستي .. وقد ايه الواحد كان فعلا بيحسسها بيته التاني .. حاجات كتيرة دلوقتي وحشاني فيها .. وزي مضاع حب الطالب للمدرسة بدأ يضيع حب المصري لوطنه .. ودلوقتي مفيش غير عاوز أهاجر وأمشي أصل البلد دي مش بتقدرني .. قال يعني لما يروح بلد تاني هيلاقي فعلا حد يقدره .. ولازم نبقى عارفين ان الغلط مش فيها .. الغلط فينا احنا .. 

ساعات لما بلاقي ناس كتير حواليا أو أقرا في مدونات كتير وألاقي ناس بجد عاقلة أحس ان في أمل .. وأقول يا رب تتصلح والكل يقول تحيا مصر !


الأغنية دي بتهزني كل أما أسمعها 
سلاام يا بلدي سلااام  

15 قالوا رأيهم:

Noody يقول...

البلد دى عمرها ما قدرت حد
بس اقولك اما احنا نقدر قيمه نفسنا الاول نبقى نلوم ع البلد محدش عامل حساب لحد اصلا ف البلد دى ولا ف زمنا دا
انا واحده واخده الاى سى دى بتاع دا من سنتين لا اخدت الشهاده ولا ادونى قلوسى الى دفعتها يعنى خساره من الاتنين وانتى الصادقه بلد بتنجان بتنجان يعنى
بس بجد الى اقدر اقوله العيب فى تعاملنا احنا البشر مع بعضنا الاول اما نحترم راى بعض الاول نبقى نطلب من مصر ام الدنيا انها تحترمنا
وبعدين مالها علوم ما اهو اتخصصنا من اول سنه واخرتها ايه هقعد ف بيتنا واتجوز قولى لاخوكى الصغير دا مفيش احسن من اى معهد مع كام قرص يشتغل ف احسن شركه وياخد قد كدا
والله دا الى بيحصل دلوقتى طلبه بترول وتعدين اكبر كليه ف مصر قاعدين ع القهوه مستنين شغل وف اكبر محافظه للبترول ف السويس بذمتكم دا مش حرام
توبيك جامد بجد بس ياريت احنا نحترم بعض الاول وبعدين نروح نلوم البلد والدوله
:D

Rawan يقول...

هههههههههههههههههههههههههههههههههههههه و الله التوبيك ده حلو اوى ى ى ى ى ى و خرج الواحد من موده
ع فكره فى حاله اكتئاب ماشيه فى الجو و الله بجد انا كنت حاسه بعدم امل و بضياع من كام يوم و الواحد كان بيتعصب و ينكد من غير سبب
انا شاكه ان الاكل فيه حاجه

ع فكره منا اختى برده مهندسه زى الفل و برده قعدت كزه سنه من غير شغل و ف الاخر اشتغلت حاجه ملهاش علاقه بالهندسه ههههههههههههههههه بس هيا دلوقتى مبسوووطه كدااا
و كمان ع فكره و الله المهندسين مش بيكسبوا اوى و الله ميفرقوش عننا كتيييير
بس هما فعلا دماغهم حلوه
اما بالنسبه لطب فعلى فكره اينعم الولد بيبقى الدكتور المرحوم و الله ماهى البنت برده لازم تستنى اما تخلص و كمان تاخد تكليفها و بعد كدا تتجوز
ده لو واحده عايزه تفلح فى حياتها لان مستحيل بالنسبه لاى بنت فى طب الجواز فى الدراسه
يعنى اهى كمان التانيه بتبقى الدكتوره المرحووومه

و الله مش بتفرق ولد من بنت كتتييير

اما بالنسبه لاخوكى قوليله روان بتقولك الرزق بتاع ربنا المهم هو بيحب الرياضه و لا الاحياء ؟
و بجد محدش يفكر فى الشغل و كدا و الله ربنا بيستر و بيرزق الانسان من حيث لا يحتسب

Doha يقول...

تمام والله رأيك تمام :)

Doha يقول...

روااااااااااااااااااااااااااان
ألأف سلامة على اكتئابك يا روحي وفعلا ممكن يطلع الأكل فيه حاجة وبما انك بتاكلى الطبق كمان فأكيد فى حاجة .. :)

Smile .. your in the medical field .. You'll be a doctor :)

amany elshaer يقول...

wlahy btfkrony ba5oya brdh elso3'yr 2na b2olh shd yabny 3la tb tb2a yla kmlna dsth 6 dctra fi nfs elbit bmamtyf lma e5waty elkbar sm3ony 2aloly 3la gostna wlahy kfaya enty msm3tish elkalm w d5lty l2drk ama ya3iny elwad el3'lban dh yshd 3la hndsa may5bsh 5ibtna bs wlahy 2na shyfa en kl wa7d ma3da 7att aml w hdf yb2a 5las elmhm y7b elmgal ely fih ama b2a 7war klytna twilh w bta3 lih btbslha mn elganb elshy2 bso llganb elmshrk wlahy dh tb2a agmd 7agh 7 snin 3yshnhm m3 b3d b7lwha w mrha fiha eih wlahy 3la r2y e5waty ma3da m3ana es7aban yb2a elklya klha thon wlahy mafih a7sn mn ellma klan bnshark b3d fi elafra7 w ela7zan fi elklyh dh wlahy dh 3ndy bldonya klha hnstfid eih lma nt5rg bdry bla 5ibh aho zy mab2ol (akon 32lt shwyh w gnonty 5ft)w ama 3la 7war t7rir sina 7ram wlahy dh mafsh man3 nft5r bih w bta3 bs kda ktiir wlahy bldan klha fsad w 7agh t2rf w e7na 23din 3la elentsarat eladimh wlahy elmfrod gilan dh ely y3ml 7agh bma en elagayl ely aftt zy 2lthm bdl m7an ya3iny 23din 3la entsar 6 octobr dh

غير معرف يقول...

رايك جامد ياروان بجد
بس مش كل المهندسين دماغهم جامده
دا انا معايا فالشغل مهندسين مش فاهمين حاجه فى اى حاجه واسمه علينا مهندس
وفى دكاتره بردو والحمد لله تروحى عندك مرض تطلعى عندك خمسين مرض تانين وياريتك عالجتى مرضك الاولانى اصلاهههههههه
ربنا يصبرنا ع قدرنا دا المكتوب علينا فى البلد دى هنعمل ايه
قولى لاخوكى ادخل الى قلبك يقولك عليه عشان ميندمش بعد كدا انه سمع كلام حد يسمع كلام نفسه فى الحكايه دى


ana ba2a not be smile 5aaaaaaaals we ana mohandsa dlo2te

ياريت ارجع ثانوى وادخل ادبى واريح دماغى انا ايه خلانى اشتغل الشغلانه دى ياربنااااا

وانتوا ربنا معاكم فى الست سنين الجايين لو واحده فيكم جالها عريس توافق يابنات دى نصيحه انا حذرتكم اهو ف ازمه عرسان فى البلد ههههه

Ahmed Elfeky يقول...

الموضوع ده جبار بطريقة بشعة :D

Alice يقول...

قولى على الدنيا السلام
مفيش فايدة

shahenda shalaby يقول...

موضوع جمييييييييل اوووووووووى
بت ياضحى
فولى لاخوكى الصغنن اسمع كلام طنطك شاهنده ودوس ف طب
ومتسمعش لكلام اخوك الكبير هههههههههه
انا بهدى النفوس بس :D:D:D:D
وكمان من امتى طالب طب لما بيتخرج بيبقى الدكتور المرحوم
ماهو فى دكاتره كتير ستات ورجاله اتخرجو وعاملوا الماجستير والدكتوراه واتجوزوا و خلفوا وسافروا وراحو وجم
وعايشين عيشه زى الفل
اى نعم فى تعب وجهد وبيطلع عينا ايام الدراسه
بس اكيد هنلاقى ف الاخر ثمره تعبنا ده وربنا مش بيضيع تعب حد اجتهد وعمل الللى عليه
بصى يابنتى قوليله طنطك شاهى بتقولك اعمل اللى عليك وزاكر وسيبها ع الله :D:D:D:D:D

غير معرف يقول...

مفيش فى بلدنا حاجه نافعه لا المهندس عاجبه حاله ولا الدكاتره عاجبها حالها

ياما ناس اتخرجت من طب فيهم الى نجح وفيهم الى مش بيعرف حتى يقرى روجيته هى طب اه سبع سنين بس اصحابى شغالين فيها الله ينور يعنى مهو مش معقول واحد جايب 97 و98 % فى الثانويه العامه ويبقى فاشل ف كليته يعنى المشكله فلحظه الجنان الى بتحصلهم من كتر الدح هههه

وادى الحال ع المهندسين انا تخصص ميكانيكا باور وفى الاخر قاعد ع المكتب بشرف ع شغل بس يعنى انام فى بيتنا ارحملى
ونفسى اشوف حد من اصحابى المهندسين فيه المميزات الى مامتك قالت عليها دى اى نعم بناخد فلوس قد كدا بس بجد الواحد بقى بيستحرمها ف نفسه الفلوس دى
********
هو يصلى استخاره كدا ويذاكر ويعمل الى عليه
كان نفسنا نشوف رد فعل اخوكى معاكى احنا كمان :D

قبل العالم الأخير يقول...

طيران..لا طب ولا هندسة..طيران..:D

حاجة مفيش كتير بيشتغلوها ومش اى حد ينفع يكون زيه..و لو ع الفلوس ..فهيأبض بالرحلة :D...ويشوف هو بقى هيزور بلاد اد ايه..وثقافته هتبقى اد ايه

طبعا بهزر..هو يخش اللى هو عايزه ويختار احياء رياضة ادبى براحته..انا بس بنفس عن نفسى..على فكرة بجد لو مفيش عليه ضغوط..واعتقد مش هيبقى ان شاء الله بدام فى طب وفى هندسة فى البيت(بيت مصرى اكيد نفس النظام:D)..فبجد هو يشوف طريقه بمزاجه وميوله..وربنا يوفقه ان شاء الله..(بالمناسبة طيران بيخش رياضة وبيقدم بعدها فى اكاديمية طيران ولازم واسطة ويكون فت ولو مكنش فت الواسطة تخليه فت) :D

Doha يقول...

والله أولا شكرا لكل اللي رد على الموضوع واهتم بأي كلية هيدخلهاأخويا الصغير .. :D معلومة نسيت أقولها بس أمي عاوزة تدخله فنية عسكرية وهو دماغه رايحة لإقتصاد وعلوم سياسية :D:D

أماني مرسي على الكومنت الطويل اللي عانيت علام قريته :D

غير معرف شكرا جدا لرد حضرتك بس ياريت تعرنا بنفسك :D وربنا يعينك على هندسة

شكرا للإعلامي أحمد على التشجيع

إيمان .. لا تعليق .. بجد بلاش اكتئاب النهاردة يوم سعيد ولا ايه ؟

شاهنده .. أخويا أحيانا بيسألني انتوا بتاخدوا ايه في طب علشان أعرف .. ساعتها بقولك اطلع برااااااااااااااااااااااااااااااااا .. خليه ياختي يختار اللي في دماغه أحسن .. يجيلي الكلية يقرفني بقى ورايحة فين ومع مين .. خلينا بعيد عنه أحسن :D:D

د/يس يشق طريقه بمزاجه فعلا وبيتهيقلي طيران هو الأنسب بما انه واخدها بالطول والعرض وهيبقى فت بالثلث :D

shahenda shalaby يقول...

هيقرفك ليه يادودى
لما يسألك رايحه فين ؟؟
قوليلوه تحت الكوبرى هههههه
مع مين ؟؟
تردى وبكل ثقه مع شلبى
هههههههههههههه
:D:D:D:D:D

غير معرف يقول...

هههههه المهندس محمد
ايه عرفتينى!!!! حتى لو قلت الاسم انا عجبتنى المدونه ومكسل بصراحه اسجل وكدا كدا مش هتعرف
وبجد د\يس عنده حق لو دخل طيران هتبقى جميله جدا ونصيحه من مهندس مر بشكات كتيره وعارف الدنيا ماشيه ازاى
وربنا يوفقه يارب ف المجال الى هو عاوزه

أبو ربيع يقول...

يخش شرطه او حربيه لازم كل اسره يبقى ليها ظهر تتسند عليه فى البلد دى كام مره الرخصه بتتسحب وبتحتاج ترجعها ده لو عرفت تطلعها اصلا ولا اجراءات جواز السفر

فى اى مصلحه حكوميه او حتى مش حكوميه يبقى الواحد معاه كارت من فلان بيه وكل حاجه تمشى لازم الولد يكون مشروع استثمارى لباقى الاسره هههههههههه :D
وممكن تقنعوه بكده بانه لازم يخدم الوطن ويعيش عشان راحه الشعب وياسلام لو ربنا كرمه وبقى رئيس الجمهوريه :D :D :D

بجد بدام البيت فيه طب وهندسه خلاص يبقى يمشى براحته بس المهم يبقى محدد من الاول مش يقول على حسب المجموع عشان ربنا يكرمه
ويشوف ايه الى يناسبه ويعرف معلومات عن كل كليه ويقابل ناس متخرجين
ليه مثلا ميفكرش انه يجيب مجموع عالى ويخش auc بمنحه
عن نفسى كنت بحلم انى اخش الـauc وكنت بذاكر عشان كده والحمد لله ربنا كرمنى وجبت مجموع عالى وكان ممكن اقدم للمنحه بس للاسف خفت من التجربه
بجد سيبوه يقرر بنفسه ولازم برضه تساعدوه وتنصحوه
يعنى يقرر بنفسه بس بالعقل

وربنا يكرمه يارب ويجيب مجموع عالى اوى ويخش الكليه الى ربنا كاتبله فيها الخير

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة