الثلاثاء، 29 يونيو 2010

I'm back ..

بسم الله الرحمن الرحيم

بعد الغياب
والعذاب
والدموع
والأهات

I'm back

معرفش ايه اللى فوق ده
بس على العموم ركزوا معايا كويس اوي فى اللى جاى

كلام مهم
ولازم رأيكوا يتقال

اه وربنا رأيكوا مهم ..

بما ان عودتي الحميدة كحاكمة شرعية للبلوج تقتضي - بل تحتم على - إني أطبق مبادىء الديموقراطية الحكومية بعرض جميع الآراء ثم أخذ الموافقة على اللى يدخل دماغي وبس .. قررت اني آخد رأيكوا ..


 اول حاجة 
الاسكن بتاع البلوج اللى عاملنا دوشة ومكانش فى ولا سكن مظبوط إلا اللى فات بتاع السحب المطيرة ده ( ده اذا صرفنا النظر عن ان سكن الوردة المكفية كان رائع الجمال ) .. وبما ان الاسكن الجديد عليه اعتراض فانا هحطلكوا كام لينك لكذا سكن شوفوا اللى يعجبكوا وهعملكوا فوت تصوتوا على الاسكن الs3eeeeed....

 (1)



 (2)




(3)




(4)




(5)



(6)



(7)



(8)



(9)



(10)


دول الى عرفت اظبطهم على المدونة


ده مبدأيا .. 

طبعا في 170 بوست على المدونة ما شاء الله ربنا يزيد ويبارك .. 
التصنيفات عاوزة تتظبط كلها لو حد عنده اقتراحات للأسماء اللى ممكن نحطها يقول .. وياريت تقولوا عشان بحتاس :D


************



أما عن الأقسام الجديدة اللى هتنضاف ففي كذا فكرة .. 

أولها طبعا عنوان اسمه ( للعوانس فقط ) من أفكار إيمان واعتراض دعاء على الإسم فقررنا تغييره إلى ( للعوانس فقط الله اكبر علينا يعني ) ... :D

المهم اننا تحت العنوان ده هنتكلم عن أهم المشاكل اللى بتقابل الشباب فى موضوع الجواز 
وأهم أسباب العنوسة عند البنات 
ده غير التحكيمات الغريبة اللى البنات يطلعوا فيها ساعة الخطوبة ..
هي دعاء يعتبر نزلت موضوع قبل كده اسمه (ناس عسل وناس بصل) نقدر نحطه تحت العنوان ده ..
مواضيعه هتبقى دمها خفيف بتتناول المشكلة بنقد ساخر وأسلوب حلو .

أى حد من البنات أو الشباب ممكن يكتب فى الموضوع ده براحتكوا خالص .. 


**********



 تاني عنوان ملقيتوش لسة ...

بس هو هنحط تحتيه أى مشكلة تواجهنا فى حياتنا بأى طريقة ..
الفكرة ان المدونة زى مبتطلع إبداعنا يبقى لازم تطلع فكرنا ووجهة نظرنا ورأينا من اللى بيدور حوالينا .. 
عارفة ان فى كذا موضوع قبل كده اتحطوا فى نفس الإطار بس الفكرة هنا هتبقى ان الكل مطالب انه يقول رأيه فى الموضوع ونتناقش بجدية ونوضح الصح من الغلط ووجهة نظرنا ..
الفكرة كانت موجودة من زمان بس مستنية التنفيذ وبما اننا فى أجازة وما شاء الله مش فاضيين فلازم الفكرة تتنفذ إن شاء الله ...
 المفروض العنوان اللى احنا حاطينه هو ( جد .. بجد لازم نتغير )


**************


الفكرة التالتة قيد النقاش ................ !


**********



الفكرة الرابعة اننا عاوزين ندخل الناس اللى بتعرف ترسم ... وتنزل رسوماتها هنا ..
بالاسكنر أو الموبايل المهم اننا ندخلهم معانا ونشجعهم
ولو الرسمة او اللوحة فيها فكرة نحاول نطلهعها ونقول حسينا ايه اول مشوفنا اللوحة ..
انا هكلم البنات اللى اعرفهم وياريت برده لو الشباب يعرفوا حد تكلموهم  وتقنعوهم يدخلوا معانا ...


**********



فى فكرة اننا نحط مكان لشغل الجرافيكس او فوتوشوب .. ايه رأيكوا ؟؟


********



الفكرة كلها من المواضيع دي ان المدونة تبقى شاملة لكل حاجة تخصنا كشباب ومستقبل واعد وجيل طلائع .. ( حلوة طلائع دي )


*********



كنت شفت كلام عن التنظيم فى المدونة
انتوا رأيكوا التنظيم يكون ازاى ؟
قولوا الأفكار ونتناقش فيها سوا ونشوف الأحسن وننفذه ..


***********




موضوع تاني هو موضوع الاغاني 
لو عاوزين أغاني احطهالكوا قولولي حابين ايه 
ولو مش عاوزين بلاش خالص 
كانت دعاء طلبت مني اني احط سامي يوسف وحطيته بس معجبش الناس برده 
انا بحاول اختارلكوا حاجة هادية وبعيدة عن الرومانسية قدر الإمكان 
هو انا ممكن اسيبلكوا حرية الاختيار او تخلوني انا اللى اختارلكوا :D
وتكونوا من المؤيدين لي ولسياستي تأييدا مطلقا ( واخدين بالكوا ... ) أو تكونوا لا سمح الله من المعارضين .............. !



يا مرحب بالناس اللى دخلوا معانا 
ويا مرحب بالناس اللى كتبت لأول مرة 
ومستنيين كتابات اللى مشاركوش خالص 
وأى حد حابب ينضم لينا يا أهلا وسهلا بيه ..


************


فى في دماغي فكرة كده اعملهالكوا عشان صندوق الشكاوي والمقترحات بس مؤقتا هفتحلكوا توبيك على صفحة المدونة تكتبوا فيها لحد منشوف الفكرة هتنفع ولا ايه ...


كده خلاص كلامنا على ضحك ولعب وجد وحب

************

كنت فى الدراسة وفجأة دون سابق إنذار عملت مدونة اسمها مذكرات طبيب
وكنتوا مش فاهمين ايه فايدتها ولا هنكتب فيها ايه 

 http://mozakerat-doctor.blogspot.com/

هي المدونة دي معمولة عشان حياتنا كأطباء 
هنناقش فيها أى مشكلة تواجهنا من وجهة نظرك كطبيب ..
أو المشاكل اللى بتواجهنا فى دراستنا وعملنا واللى شايفيه صح والغلط ..
هيبقى فيها قسم ان شاء الله اسمه يوميات دكتور ميزو ..
يحكي عن الطالب ويومياته بكل الزهق اللى بيلاقيه ..
وهيبقى فى عنوان اسمه ( سماعة ) ترد على اللى يقوله دكتور ميزو بس بالعقل وبالمنطق ..

وان شاء الله نحط فيها مادة علمية تفيدنا فى دراستنا 
ان شاء الله لسنة تانية ولو فى حد من سنوات تانية دخل معانا هنحط مواد علمية لكل سنة .. 
وان شاء الله كمان يبقى في مواضيع عن أهم الكتشافات العلمية فى المجال الطبي 
سواء كنا هننقل الموضوع ونقول نقلناه منين او نكتب رأينا فيه ونحط لينك للموضوع 
.. 

ان شاء الله أبعت ريكويست لكل اللى فى المدونة 
اللى حابب يدخل معانا يقبله
واللى ملوش مزاج ينفضله ...
**************************************************************




فى الآخر بس بجد عاوزة اشكر دعاء لأنها ما شاء الله عرفت تصحصح المدونة تاني وتحافظ عليها من المعتدين وبجد انا مشوفتش نشاط زى النشاط اللى شوفته لما دعاء كانت موجودة مما يدع لي مجالا للتفكير فى التنحي .. ( آه  طبعااااااااااااااااا   بهزر )

بجد ربنا يكرمك ويخليكي ليا يا توحفتي 
والف شكر ليكي ..



وسقفة بقى يا جدعان ................












16 قالوا رأيهم:

Alice يقول...

خامس وعاشر اسكن حلوين
والتالت برضة حلو كدة فيه شقاوة وكدة بس فى ناس مش حتوافق عليه
كويس ان دعاء كانت ادمن دة كان فى فترة العملية كانت حتنام خالص بس دعاء نشطتها على البيج
غيرى اغانى المدونة بس سيبى مون لايت

shahy يقول...

احم احم ماشى يا ضحى
مذاكرتيش انجازاتى ليه
على العموم انا مش بحب اكلم عن نفسى كتيييير
هههههههههه
الافكار حلوه طبعا
ومعاكو طبعا
بالنسبه للاسكن لسه هشوف وابقى اقول

shahy يقول...

انا عاجبنى الاسكن رقم 3 و 7

Doaa helal يقول...

دودو شكرا يا حبيبتي المدونة اصلا مكنش ليها طعم من غيرك ومن غير موضوعاتك بس الشباب كانوا قايمين بالواجب
عموما عودا حميدا واتمني االمدونة تكون افضل وافضل باذن الله وانا قلتلك علي الاسكن الي عاجبني بس انا مش عارفة هو رقمه كام
ان شاء الله المدونة في تطور دايماااااا
وانتي يا شاهي يا بتاعت مجانيت ومش عارف بشميل انتي وروان كنتوا قايمين باحلي واجب الصراحة

Rouan يقول...

بصى يا ضحى هما اخر اتنين حلوين وع العموم ده مش اسكن الى ما نهايه ان شاء الله كل اسبوعين ابقى غيرى الشكل

قبل العالم الأخير يقول...

اوووووووووووووووووووووووووووووه + تصفيق حااااااد :D
اولا
ارجوا ان يدخل الاسكن الرابع دماغ الحاكم الديمقراطى :D:D
وفعلا يا ريت يتغير كل مدة ومش لازم كل مرة نختار يعنى


موضوع العوانس ده حلو اوى بس ياريت نناقشه من منطلق الولاد برده لأن احنا كمان شكلنا هنعنسسسس وعانس تجوز للذكر والانثى لغويا كمان على ما اعتقد :D


اه برده بقترح قسم بإسم دواير او بنلف فى دواير نكتب فيه المواضيع اللى بنكون عايزين نكتبها فى لحظات الضعف والوقوع فى المعاصى او الانين من الحياة طبقا لما يخصنا كشباب ولاد غالبا وبنات برده
ويعنى بدل ما يكون فى قسم للخواطر الشخصية فممكن تكون تحت نفس القسم ده لأن احيانا بنبقى عايزين نكتب خواطر شخصية يمكن محدش يفهمها لكن الواحد بيلاقى الوضع مش ملائم



بالنسبة للتنظيم بقى
التدوينات بتيجى بظروفها يعنى انا مثلا مش فى دماغى انى اكتب كل مدة فانا بقترح ان كل واحد ينزل اى تدوينة فى وقت لكن فى نهاية كل اسبوع نعمل عدد للمدونة وتختار كذا موضوع من كذا قسم وينزلوا فى العدد ده ويتجمعوا فى تدوينة واحدة ونبعتها على جروبات الفيس مثلا وده هيساعد على انتشار المدونة ان شاء الله
ولو مثلا اتزنقنا فى الدراسة نخليها كل شهر المهم انها تكون على هيئة اعداد منمقة كده ومش بعيد لو الموضوع نجح اوى نطبع الاعداد ونوزعها فى المجمع بنفسنا وده حصل زمان فى الجيل المسلم (مجلة بلا قيود ) ومش بعيد بقى نلاقى بيبسى جاية تطلب اعلانات :D:D



موضوع النقاشات الحيوية اللى كله يقول فى رأيه ده جااامد جدااا و بيحيب نتايج حلوة


بيتهيألى برده قسم للقصص والروايات هيبقى كويس وهيشجع الناس تطلع اللى عندها من قصص او روايات حتى ولو قصيرة للغاية


طبعا موضوع الرسم والجرافكس حاجة حلوة جدااااا ويارب تنجح والناس تتفاعل


اه وبالمناسبة المدونة محتاجة لوجو ابن ناس كده بالاسم بتاعها وانا كنت بعت لموقع تصميمات بس نفضلى لأنه اجنبى وانا كنت كاتبله يكتب الاسم بالعربى واقعدت اشرحله انه على اسم اغنية مصرية شهيرة وكده فشكله زهق منى يعنى ونفضلى:D فإن شاء الله اشوف حد من اصحابنا اللى ليه فى الفوتوشوب وحضراتكم برده لو تعرفوا



وبالنسبة للأغانى فأنا من المؤيدين التأييد المطلق لسيادة الحاكم واعوذ بالله ان اكون من المعارضين:D


بالنسبة لمدونة مذكرات طبيب فأنا بقترح تأجيلها لحين تظبيط المدونة هنا واهو هنكتسب منها خبرة ان شاء الله وهنشوف النظام ايه لأن مذكرات طبيب هتكون على نطاق ضيق للمهتمين وكده لأن معتقدش ان فى حد هيهرب من الطب عشان يكتب فى طب غير طبعا المواضيع العلمية وقرف الطب يعنى هتشتغل ان شاء الله بس مش بنفس نطاق هنا والله اعلم

يارب كل الاقتراحات نستفيد بيها ونستمتع هنا اكتر واكتر ونشتغل اكتر واكتر

كده خلصت اللى عندى والتنفيذ تحت سلطتكم الموقرة التى نثق فيها تمام الثقة
بجد :D

وشكراااااااااااااااا

Doaa helal يقول...

دكتور يس رد حضرتك جميل جدااااااااااا
وكمان ما شاء الله الافكار فيه رائعة وبالذات حته دواير مغلقه لان الواحد فعلا بيكون في حاجة للفضفضه علي اي حاجة هو اتعرضلها وممكن كلنا نستفيد من ده وبالنسبه برده للخواطر الواحد بيبقي نفسه يكتب حاجات كتير عل وعسي (حلوة عل وعسي دي) حد يفهمه او حتي لو محدش فهمه يكفي انه خرج الي جواه واحنا والله هدفنا من المدونة دي بعد الكتابة واخرج المواهب ان الواحد يعبر عن الي جواه اذا كان مضايقه او مفرحه ويحس ان فيه حد بيحس بهمه وفرحه انا كده بدات ادخل في صعبانيات وبالنسبه اللوجو فكرته جميله جداااا وياريت انتو يا شباب تحاولوا تصمموه بنفسكو ويطلع زي ما يطلع اكيد هيكون حلو طالما اجتهدوا فيه وانا برده هحاول ليا واحده صحبتي بتحب الفوتوشوب اوي هكلمها
واحنا والله كانت في بالنا اننا نعمل مجله للمدونة عشان ننشرها علي قد لما نقدر فحضرتك كده شجعتنا
مش عارفة ليه لما قرات الرد حسيت بامل كبيييير اوي ان المدونة دي بالناس الي فيها هتقدر تعمل حاجة جديده
وان شاء الله الاسكن هيتغير كل فترة من باب التجديد وبالنسبه للاغاني فانا بصراحة مش فارقة معايا انا الحمد لله مع اول صرخة من الاغنيه بقفل الصوت بس ياريت ما لو ضحي هتنزل تنزلكوا حاجة هاديه عشان تتناسب مع جو القراءة

Doha يقول...

ايمان
هعملك ركن لوحدك اسمه مسودات منزوية عشان تنزلى فيه مواضيعيك

شاهي روح قلبي عارفة انك وروان كنتوا قالبين الدنيا
ربنا يخليكوا للبلوج وأهله

روان هعدي ان ردك جه على الاسكن بس ومفيش رأى عل اى فكرة تانية

دودو والله يا بنتي انا مش عارفة من غيرك كنت عملت ايه

د/يس رد حضرتك جميل فعلا وحلوة جدا فكرة دواير
وان شاء الله نقدر ننفذ كل حاجة وموضوع اللوجو انا كلمت حد ممكن يعملنا حاجة

شكرا لدودو انها ردت بدالى دايما كده حامية ضهرى
ان شاء الله المدونة تتطور
على ايدينا

Alice يقول...

هو راحت فين المواضيع
رجعيها

Doha يقول...

يا ايمان قولتلك اختارى موضوع ونزليه واحد بس مش الاربعة كلهم فى وقت واحد
كل شوية ابقى نزلى موضوع فيهم عشان الناس تلحق تقرا وتتابع

Unknown يقول...

سوري جدا يا جماعه على الانقطاع عن المدونه لفتره .. بس عشان ظروف الامتحانات وكده ( قال يعني كنا بنذاكر ) ... D:
بس ان شاء الله المدونه دي هتقدر تعمل حاجه كويسه ونحقق بيها هدف سامي .. ( ومحدش يسأل سامي مين D: )


نيجي للكلام الجد بئى
- اولا بالنسبه للسكن ف لسه هشوف وابقى اقول رأيي ان شاء الله ... بس الصراحه الموجود دلوقتي دا رقيق وبسيط وعاجبني شخصيا يعني ..
- ثانيا ..تأييد لفكرة دكتور يس في موضوع قسم الدواير المغلقه دي ... وتأييد كمان ان ركن العوانس دا يكون للكل ... مش احنا لوحدنا يعني . D:
- ومعاكي يا ضحى ان ممكن يكون فيه اقسام للرسم والتصميم والفوتوشوب ...
وكمان للشعر العامي او شعر الاغاني بمعنى اخر يعني قسم منفصل عن الفصحى عشان الي يزور المدونه لأول مره يبقى عارف هيقرا فين بالظبط الحاجه الي عاوزها .
- وندي فرصه اكبر للتأليف القصصي سواء روايات او قصص قصيره
-واعتقد لو فكرة تصويت كل اسبوع او كل شهر عن افضل عمل في كل قسم ممكن تدي روح حلوه للشغل وتخلي فيه اتقان وحماس اكبر ..

وف الاخر كل دي مقترحات ( على اساس ام فيها حاجه جديده اصلا D: ) ..
بدون معارضه للسلطه طبعا
احنا مع الحكومه ..
(:

وان شاء الله مش هنغيب عن المدونه تاني
وشكرا بجد للناس الي شالتها ايام الامتحانات .. تتردلكوا ف التقدير ان شاء الله (:
والله ولي التوفيق

miramar يقول...

رودينا دي انا يا جماعه عشان بس حسابات جوجل دي بتخرف
Nashwa badawy
miramar يعني
(:

Doha يقول...

مرسي أوي يا أنوش على ردك وبجد وحشتينا جدا
وان شاء الله المدونة تتحس ويبقى فى تقدم
المهم اننا نكون سوا
:D

Alice يقول...
أزال أحد مشرفي المدونة هذا التعليق.
Alice يقول...
أزال المؤلف هذا التعليق.
Alice يقول...
أزال المؤلف هذا التعليق.

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة