السبت، 26 يونيو 2010

collections




*ناس عجيبة

سعات فى مواقف الواحد مبيكونش عارف يعمل ايه لو رد واخد حقه بدراعه حيقولوا عليه ده قليل الادب وبلطجى ولو مردش حيقولوا عليه بارد ويستغربوا من موقفه

الناس انا شوفتهم بينقسموا لنوعين فى رد الفعل تجاه الاسامى مثلا على الفيس بوك نوع بيقعد يفكر فى الموضوع ولو شاف حد كاتب اسمه الحقيقى حيقول (هو فرحان باسمه كدة ليه ) ولو شاف حد كاتب اسم مستعار النوع ده حيقول( ليه هو فاكر نفسه مين ومدى اهمية لنفسه كدة ليه علشان يخاف يتعرف ) النوع التانى عاقل ومبيفكرش فى الموضوع دة اصلا

كتير بنشوف فى اخبار الحوادث ان الراجل العجوز وجدوه ميتا منذ اسبوع فى شقته بعد ماكسروا باب الشقة نتيجة تسرب روائح تعفن انزعج لها الجيران انا اللى بيضايقنى فى الموضوع مش حكاية ان رجل عجوز مات مهو احنا كلنا حنموت اللى بيضايقنى ان الناس وصلت للدرجة دى ان محدش يسأل عليه طول اسبوع ومحدش يفتقده طب فين عياله

انا بزعل اوى لما الاقى عزا فاضى مفيهوش ناس كتير طب حتى يا ناس روحوا اسمعوا قرآن .. هو الناس بقت وحشة



*جمل

عارفين جملة اللى اتكسر عمره محيتصلح .. لأ على فكرة اللى اتكسر ممكن يتصلح بس مش حيرجع زى زمان

جملة اللى فات مات غلط بنسبة 600% ل 900%

جملة اذا لم يكن من الموت بد فمن العجز ان تكون جبانا .. على حسب فهمى يعنى طب لو كان فى بد يبقى الواحد جبان ويتوسل علشان يعيش وإلا انا فاهماها غلط

جملة اكثر الناس بؤسا هو من لا قرار له .. يا سلام حيكون يعنى اكثر بؤسا من اللى مات ابوه وامه واخواته

جملة بإمكانى ان اؤكد لكم ان الصين بلد كبير وبه عدد كبير من السكان .. يا مرعب .. لأ اضفت وابدعت

جملة انت مسئول عن عقلك اذا انت مسئول عن تصرفاتك .. معلش يا روان بس جملة بديهية آخر عشر حاجات واحدة صاحبتنا عملت جملة زيها انت مسئول عن قلبك اذا انت مسئول عن عواطفك

جملة حكيم ومتفتح الذهن .. نو كومنت

المهم يعنى اطلعوا من المجموعة دى ان مش اى حد مشهور يقول كلام يبقى اكيد حلو وناخده على علته انحنا يعنى ندقق منعديش



*فساد متربى

ان واحد ميسرقش من جيرانه او الناس اللى فى الحتة وميسرقش من ستات ولا من عواجيز ولا اطفال ويسرق الاغنياء فقط اللى ثرائهم وصل للافتراء

واحد ميعاكسش صحبات اخته

واحد بيشرب سجاير لكن ميقدرش يعمل كدة ادام ابوه او امه مش حكاية خوف حكاية احترام انا مرة شوفت واحد كان بيشرب سجاير فى الشارع قدام بيته والدته بصت من الشباك علشان تكلمه على طول رمى السجارة اللى لسه حالا مولعها ووقف مضبوط برضه حكاية احترام مهى مامته عارفة انه بيشرب

2 قالوا رأيهم:

Rouan يقول...

بت يا ايمى الموضوع ما شاء الله حلو و ظريف بس انا حاسه انك مدايقه ليه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

بصى مش مهم اللى حواليكى بيفكروا ازاى المهم انا بفكر ازاى وانتى قبل كده قولتيها ان الواحد مش مسئول ا يفهم اللى حواليه وجهه نظره

وبعدين جمله انا مسؤل عن نفسى اذ انا مسؤل عن تصرفاتى

انا بقولها من باب تحمل المسؤليه وان كل واحد لازم يتحمل المسؤليه وميرميش نتيجه فكره الخاطى ع الاخرين

وجمله متفتح الذهن متقدريش تقولى عليها نص كلمه

Era يقول...

شكرا يا روان

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة