السبت، 12 يونيو، 2010

انا مش عاجز

انا مش عاجز... ومش من الشباب العجايز ..

انا ممكن اصرخ بأعلى صوت ..

وعارف انه هيترد سكوت ..

بس المهم انا مش هسكت ..

وبسكوتي عمري ما اكون مبسوط ..

وبضعفي عمري ما اكون فايز ..

عشان انا مش عاجز ..

انا شايف بعنيا كتير ..

شباب ف الارض بيندفن ..

واحلام اهالي في الهوا بتطير ..

ونضرب كف بكف ونقول الصبر ..

وحسبنا الله وربنا كبير ...

واحنا الخوف جوانا ساكن ..

وفي الجبن ناخد جوايز ...

بس انا مش هسكت ..

عشان انا مش عاجز ...

صحيح مش عارف هعمل ايه ...

ولا منين ابتدي ولا فين اروح ..

بس انا عمري ما اعيش مدبوح ..

واهون عليا اموت دلوقتي ..

ولا اني بكره اكون مجروح ..

واعيش في وسط الناس صنم ..

كوم عضم من غير روح ..

انا اقدر اعدي كل الحواجز ...

عشان انا مش عاجز ..

بس حد يدلني ... فين الطريق

حد يشدني ...انا غريق ...

جوايا الم .. جوايا غضب ...

وحياة الذل دي مش هطيق ..

بس اعمل ايه ؟؟؟ .. اعمل ايه ؟؟؟

وانا ولا عارف عدو من صديق ..

ولا صح من غلط ...

ومش قادر يصدق قلبي البرئ

ان انا فعلا عاجز ..

لما اشوف الناس بتموت ...

واقول سلام ..

وادعي ربنا وارفع ايدي ..

واقوم انام ...

واكتشف ان كل الي قلته ..

مجرد كلام ...

يبقى انا فعلا عاجز


وانا صغير كانوا يسألوني ..

رايح فين ..

رايح المدرسه ..

رايح ليه ؟.. وخايف الوقت يفوت ؟

عشان عندي درس ..

بيقولوا عليه مظبوط ..

هتعلم السكوت ..

وازاي يكونلي صوت ..

مخنوق ضعيف مهزوم ..

مجروح مقهور مكبوت ..

هتعلم ازاي اخاف ..

واعيش جوه الجحور ..

وانسى عيشة البيوت ..

رايح اتعلم كتير ..

ازاي اكون طيب امير ..

ولا افتح بقي ولا اتكلم ..

ولا عن عسكري ولا عن وزير ..

وان اي حاجه ميري ..

على راسي حتى لو غفير ..

علشان اعيش حياتي مبسوط ...

هيدوني دروس كتير مهمه ..

ازاي ادافع عن حياتي بهمه ..

ودي ملهاش غير حل بسيط ..

اقتل عزيمتي واخنق الذمه ..

وادوس على كرامتي بالجزمه ..

والبس انا بمذاجي العمه ..

يعني اعيش بينهم كتكوت ..




6 قالوا رأيهم:

miramar يقول...

انا عارفه انها مش قد المستوى ...
بس دي تعبير عن افكار ...بغض النظر عن الناحيه الادبيه ..

مجرد اعتراض على الحال ...
وبعتذر عن الاتنين ..

yasmina يقول...
أزال المؤلف هذا التعليق.
yasmina يقول...

جميله اووووى يا نشوى
انا مسحت الكومنت اللى فات عشان كنت فاكره الكلام بيظهر عربى طلع انجليزى فكتبته تانى بالعربى
:D

Just like a heaven يقول...

kalam gameel awii

..

begad

elsayed heeba يقول...
أزال المؤلف هذا التعليق.
miramar يقول...

اعتقد كلنا حاسين بنفس الاحساس ..عايزين نعمل ومش عارفين ..

thanks drs .

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة