تخاريف آخر الليل

احنا اللى بنجلب الشقاء لنفسنا سرحان بيكون عارف ان اللحن ده كئيب برضه بيسمعه بيكون عارف ان الفيلم دة بيتعب اعصابه برضه بيتفرج عليه فالمفروض ميلومش حد غير نفسه

الكلمات بجد حاجة غريبة سعات بتحمل مشاعر دافئة وسعات بتبقى جافية على اى حال اللى انا مستغرباله ان سعات كتير الواحد بيفضل يستخدمها رسالة بدل من المواجهه بتبقى اخف صدمة على الطرفين بحيث لما يتقابلوا محدش يجيب سيرة الموضوع

ناس كتير لغاية دلوقتى مش عارفة ايه الفرق بين الذكاء والمعرفة يعنى بيقولوا على اللى عنده معلومات كتير انه ذكى ولا مرة كان فى راجل اخد لقب اذكى رجل فى انجلترا حاجة زى كدة المهم كان فى برنامج زى من سيربح المليون وكسب الجايزة الكبرى اخويا غاظنى وقالى الراجل ده فعلا يستحق لقب اذكى راجل فى انجلترا ايه علاقة ده بده دلوقتى احنا نطلق عليه انه اذكى رجل فى موقف تانى لكن مش فى موقف اساسه قايم على المعلومات

برضة فى ناس بتنطق Ali ألى مش على لما بيكون الاسم وسط جملة انجليزى يعنى هم اللى برة مبيعرفوش ينطقوا العين احنا بنعرف ننطقها فبنقوم بنقلل من نفسنا ونقلدهم وننطق ألى حاجة مستفزة

كتير بسأل نفسى بقول لو مكنش نيوتن قال ان فى حاجة اسمها الجاذبية اكيد كان فى حد حيقولها علشان دى حاجة بديهية مرة قضيت النهار كله فى اكتشاف علاقة جديدة بين الارقام وقلت لنفسى ايه ده انا اكتشفت قاعدة رياضية ولا ايه طلعت فى الأخر ماهو معروف بالمتوسط او الوسط الحسابى

شعور سئ جدا لما يكون فى حد معملكش حاجة تعامله فى مرة وحش فيرد عليك بطيبة وبراءة وبحسن.. وبرضة شعور سئ جدا لما تقسو على حد فى اعطائه نصيحة ما ويكون رد فعله انه يسمعها طب ياريته ماكن سمعها على الاقل كان الشعور حيبقى احلى

سعات غصب عن الواحد بيتجاوز حدوده

حاجة جميلة لما الواحد يدع الخلافات جانبا ويبتدى بداية جديدة ده مش ضعف بس محاولة ان الواحد ينقى قلبه

يعنى بجد فى ناس فاشلين فى كل حاجة ييجوا يقسو يرجعوا على طول يحنوا يقرروا ينسوا يرجعوا على طول يفتكروا

شئ غريب اخشى ما اخشاه ان اكون مثل الآنسة مى قرأت كتاب عن قصة حياتها وجدت اشياء كثيرة متشابهة بيننا فى التفكير لكن نهايتها كانت مأساوية

شئ ظريف هناك جروح لا تشعر بألمها الاحين يذكرك احد بها او او تنظر اليها فيا عزيزتى لقد كنت نسيت الامر وداويت الجرح انت اعدتى فتحه وتركته مفتوح للزمن يداويه

طيلة حياتى اؤمن بأن من الممكن ان يكون شخص خريج معهد وتعلم فى مدرسة صنائع ان يكون احسن بمئات المرات من واحد فى طب من حيث الاخلاق

نسيان بعض الاشخاص لبعض الاشخاص صعب جدا ان لم يكن مستحيلا

مش انا الفت لغة عبارة عن كلمات رسومية لها معنى زى مثلا انا تتكتب عين بحترم تتكتب قبعة يعيط تتكتب دمعة كلمة انت تتكتب حدوة حصان كلمة بشدة تتكتب بحر يعنى مثلا لو انا عايزة اقول انا بحترمك جامد اكتب عين قبعة حدوة حصان بحر او عايزة اقول انا بعيط تتكتب عين دمعة كدة يعنى ممكن كل جماعة تتفق على لغتها يلا اديكوا اتعلمتوا لغة جديدة

حاجة حلوة لما الواحد يصفى اعماله قبل الرحيل

الهواء اصبح مسموما ثقيلا

ومفيش حد مقدر حاجة ولا الاهل ولا الاصحاب

انا تعبت بجد الناس اللى عايزين دم ضرورى ومحدش بيتبرع بدمه

حروب وامراض ناس بتموت وواحد يقتل صاحبه علشان واحدة او اخوات يموتوا بعض علشان الورث ومجاعات وفقر استغفر الله انا لا اعترض على حكمك بس انا تعبت

الايام بتمر العالم بيزداد وحاشة ووحشية الانسان بيفقد انسانيته بيتحول لعبد لاطماعه وشهواته ناس يتدوس على ناس حلوة جملة كل حاجة فى الزمن ده بتغلى الا الانسان بيرخص ناس اسهل حاجة عندها انها تدمر حياة ناس وتخرب بيوتهم وتشرد عيالهم

انا آسفة فعلا على حال الدنيا