الأحد، 3 أبريل، 2011

أدينا بندردش ..... اضحك لها تضحكلك . اضحك لها من قلبك

يااااااه بقالي كتير مكتبتش حاجة
يمكن عشان عيني بتوجعني لما أركز قوي .. ينطبق ده على المذاكرة برضه طبعا
و لا يمكن كسل
و لا يمكن عشان أنا عارفة نفسي هنافق زي الإعلام اليومين دول و أقول كلام مش جوايا
طول عمري بكتب في ملخص المواضيع التالية
تفائل
ابتسم
الثقة بالنفس
و غلاوتنا عندك ما تزعل
عيش .. حب الناس و عيش
و المواضيع دي
عمري ما كتبت و قلت
الدنيا غدارة
أنا لوحدي
حياتي بائسة
رحلة البحث عن الحب الضائع
شخصيا مبعرفش أقول كده
رغم اني ساعات ببقى عايزة أشتم في الدنيا و الناس و اللي بيحصلنا
ببقى عايزة اصرخ و اقول
محدش يدي ثقة لحد
مفيش حاجة تستاهل ضحكتي
الزمن قاسي قوي
و لكن للآسف فيا عيب رهييب
مبعرفش أفضفض و لا أشتكي
لما يحصلي موقف وحش بزعل مع نفسي يوميها
و أنام و أصحى ألاقي كل حاجة أوكى
بس للأسف
الجرح لو اتداوى كده يسيب علامة
كل ما تتك عليها توجع
أمال أعمل ايه ؟؟؟؟
ساعات بنحتاج نقف قدام المراية
أو ندفن وشنا في المخدة
و نبكي
من غير ما نكلم حد
و يبقى ده هو الدوا
ساعات بنحتاج نروح مكان بعيد و نصرخ
و يبقى هو ده الدوا
ساعات بنحتاج ننفعل و نزعق و نشخط و نشوح بايدينا في الهوا
و يبقى ده الدوا
ساعات بنحتاج نكتب احزانا في ورقة كبيرة عريضة طويلة
و نخلص بيها أقلام
و بعدين نحرقها أو نقطعها
و تبقى ذكرى مع الأيام
و يبقى ده الدوا
ساعات بنحتاج من اللي زعلنا حضن أو عذر
ساعات لما يزعلنا حد نفتكرله أيام عزيزة
عشان نتحسر عليها
و بدل كده نلاقينا بنفتكرها و نضحك و ننسى الهم
و يبقى ده هو الدوا
ساعات حزنك يبقى من نفسك
و متعرفش تشتكيها غير لربك
و تقوله زهقت
انا محتاجلك
و يبقى دا الدوا

اعمل اللي تشوفه يريحك
و ينسيك همك
بس في الآخر
اضحك
ابتسم لنفسك في المراية
زي ما تكون ماشي في طريق لوحدك
شوفت صاحبك من بعيد
ابتسم لك و ابتسمت له
و كملتوا طريقكم
اعمل كده لنفسك في المراية
بص و حاول تبتسم
و عامل انعكاس صورتك على انه صاحبك
لما يبتسم لك تضحك له
لما يزعلك تعاتبه
افتكر له لحظات حلوة و اندم انك عديت النهاردة من غير متكون ليك معاه ذكرى
عامل نفسك كإنسان قبل أي حد
اعطف عليها قبل اي حد
حبها زي ما هي قبل أي حد
واسيها في زعلها
هنيها في فرحها
كفاية اني اقولك
اضحكلها من قلبك
هتضحك لك
...............
و افتكروا أنا بس بدردش

4 قالوا رأيهم:

Heidenröslein يقول...

عامل نفسك كإنسان قبل أي حد
اعطف عليها قبل اي حد
حبها زي ما هي قبل أي حد
واسيها في زعلها
هنيها في فرحها
كفاية اني اقولك
اضحكلها من قلبك
هتضحك لك

وحشتني دردشاتك .. :)
وحاضر هضحكلهامن قلبي مع إن وشها عكر :P:P

غير معرف يقول...

هو مين اللى كاتب يا جماعه الكلام ده ؟؟

Anastasia pop يقول...

وش ايه بس يا دودو ده انتي قمر و الله الواحد يضحكلك أول ما يشوفك
مرسيه يا عسل :D:D

Anastasia pop يقول...

غير معرف
أنا اللي كاتبة الكلام ده
رنا من طب طنطا
انضميت مؤخرا لمدونة ضحك و لعب و مشرفني جدا اني أكتب فيها حرف
يا ريت الموضوع يكون عجبك

إرسال تعليق

هنا مساحة للتعبير عن رأيك بحرية ..

ازاي أنا رافع راسك وانتي بتحني في راسي ازاي ؟!

ازاي أنا رافع راسك وانتي بتحني في راسي ازاي ؟!

بحبك يا بلادي

بحبك يا بلادي

جمعة النصر : )

جمعة النصر : )

كلنا ايد واحدة

كلنا ايد واحدة