رسالة

الغريب أو حقول إنه بقى معتاد بالنسبه ليا بعدم الإعتماد على قرارات خدتها وأخرها عدم الكتابه أو الدخول فى أى مناقشات فى وضع البلد الحالى .. وده برده ممينعشى إنى كنت بدخل فى مناوشات مع الزميل العزيز على غرابه واللى إستمرت لساعات وساعات  ..

واللى خلانى حسيت إنى لازم أقول حاجه شعور عجيب النهارده .. زى ما كلنا شوفنا حلقه العملاق وائل غنيم أو إسم الشهره أدمن خالد سعيد .. شاب نقى ! أنا فى الحقيقه معرفوش غير إن كنت شوفت فيديو ليه على اليوتيوب بيتكلم عن الإنترنت وكده .. يعنى المشكله بقى من إننى على الرغم من معرفه الجميع بيا ببروده أعصابى الشديده مع مشاهده الحلقه وخاصه مقطع الشهداء حسيت بأحساسيس مختلفه تماما لم أشعر بها منذ أن شاهدت فيلم Armmageddon .. لأول مره لم أشعر بنفسى إلا وإنى فى الحمام أتوضأ فى لحظه لم أشعر بها من وقت طويل فات من الصفاء والتوافق الذهنى والروحانى .. وشرعت فى أداء صلاه الغائب على روح الشهداء ! .. فى الحقيقه أنا ذات نفسى مش عارف أنا بكتب الكلام ده لييه ؟! يمكن لإنى كنت سعيد جدا لإننا أثبتنا لكل الأجيال إننا مش فشله .. وإن دى مش غلطتتنا !!  دى غلطه كل واحد فى السلطه ومتبت فيها .. أو كنت بضحك جدا وأنا بتفرج على أستاذ عمار الشريعى وهوا بيهزأ فى التليفزيون المصرى أو أو أو أو أو ................. !

بدأت فى التفكير فى كل الأيديولوجيات اللى عمال الواحد يحشرها فى دماغوا ويفكر ويحلل كأنه أجدع محلل سياسى .. لقيت إن كل ده بينهار أمام دمعه واحده من شاب أنا معرفوش ! .. بس صدقتوا صدقتوا لإنى نجح إنوا يخرج منى مشاعر وأفكار كنت نسيتها ؟! 

وفى النهايه يا ساده أنا معرفشى بكره في إيه أو ممكن إحنا حنعمل إيه ؟! .. بس اللى أعرفوا إننا خلاص إبتدينا طريق ومينفعشى نقف فى وسطيه وعن نفسى بإذن الله لن أستسلم بسهوله  !!!

وفى النهايه بعتذر عن الكلام اللى مش مترتب واللى فى الغالب مش حيتفهم هوا نازل من دماغى على الكيبورد على طول من غير تعديل أو إى حاجه !