عـــرض الــمـــوســم

أهلاً بكــ عزيزي العميل في خدمة عملاء بلاكـ يير

أنت الآن ع نظامـ : طب كنكا

تمتع بأقوي العروض مدى الحياة وابئا قابلني

يمكنكـ الآن التمتع بخدمات بلاكـ يير لعملائها :

لخدمة الفيسبوكيولجي
physbookilogy
اضغط الدور التاني

-----------------------------

لنظامـ عايرني شكراً اضغط (( 1 ))

الآن مع نظامـ عايرني شكراً لديكـ الخيارات التالية :

إنكـ تذاكر اد خمسين خمسة وستين صفحة كدهــ من كل برانش .. وتمتحن عليهمـ امتحان ما تعرفلوش وش من قفا .. وتدخل تجيب الدرجة النهائية .. وابئا قابلني لو جبت بردهــ عشان هتلاقي كل معيد لازق في قفاكــ .. وهتلاقيه غالبا بيقيس مقاسه

او

إنكـ تذاكر اد خمس ست صفحات كدهــ من كل برانش .. وتدخل بردهـ ع نفس الامتحان اللي مش باينله وش من قفا .. وتجيب أقل من خمسة .. وتبئا كدهــ جيت ف ملعبنا يا معلمـ وحضر شبكتكـ اللي هتتملي أجوان

او

إنكــ تذاكر اللي يقدركـ عليه ربنا من كل برانش .. وتسهر تذاكر وأنت بتعد النجومـ .. وطبعاً عد النجومـ أرحمـ تلتلاف مرة من الكتاب اللعين اللي في ايديكـ .. وتدخل ع الامتحان هو هو أبو وش وقفا شبه بعض دهــ .. وتجيب درجة بين البينين وتبئا مامتكـ دعيالكـ .. وابئا قابلني لو دعاها نفع في امتحانات العشرين فالمية

--------

لنظامـ اقفلني شكراً اضغط (( 2 ))

الآن يمكنكـ مع نظامـ اقفلني شكراً انكــ تحضر محاضرة ساعة زي الفل في أول اليومـ تقفل بيه اليومـ كله .. وتاخد عليها كمان محاضرة كلها داتا شو ولا برنامج هالة شو .. وانكـ تفهمـ كلمة ؟ لأ طبعاً .. وفي الآخر تاخد كلمتين في جنابكـ وانكـ من جيل عديمـ المسئولية .. وابقوا سلمولي ع الكورسات

--------

لنظامـ هددني شكراً اضغط (( 3 ))

الآن يمكنكـ مع نظامـ هددني شكراً انكـ تقعد في نفس المحاضرة بتاعة الشو وتسمع كلمتين يسموا بدنكـ ويكبروا ودانكـ وتصيبكـ بالعمى المؤقت والشلل الكلي المقطعي والصممـ الكامل .. وتهديد ان الامتحان هييجي صعب للغاية .. للغاية .. وابئا قابلني لو عديتوا .. والنبي ما انتوا فالحين

  

لخدمة التسييح وولاد الأجنة
Anawentatomy
اضغط الدور الأرضي ((( ملحوظة في زرار عند أم رامي أول ما تنزل من ع السلمـ ، وزرار عند بوابة النجف من ورا كدهـ وانت راجع من مركز التطوير )))

----------------------------------------

لنظامـ سيحني شكراً اضغط (( 1 )) 

الآن مع نظامـ سيحني شكراً ممكن تقعد ساعتين .. عارف يعني ايه ساعتين ؟ يعني زي حفلة السيما كدهـ مع الاعتذار لصاحب السيما .. تقعد جوة مشرحة تمتد لاتساعها من الطلبة حتى العشر طلاب ودهـ اخرها عشان التهوية ام مروحة تاتا تم صنعها في غينيا قبل الحرب العالمية الاولى .. بس احنا بنستعبط وعملناها لخمسة وعشرين طالب ومع ذلكـ مش بتفهموا ..
طيب ليه ؟ ما اهو ونس اهوهــ .. معاكـ كذا واحد من زمايلكـ لازقين فيكـ والحياة عرق وفورمالين واشطة يعني .. دهـ انتوا جيل ما يعلمـ بيكوا الا ربنا ..
وهتقعد الساعتين تسمع ما يحلو لكــ من الكلامـ الاعجمي ما تفهمش منه كلمة واحدة غير اوريجين وانسيرشن .. لمجرد انكـ سمعتها في السكشن اللي فات بردهــ ..

---------

لنظامـ نقصني شكراً اضغط (( 2 ))

الآن ممكن تتاخد غياب وتنقص درجتين عشان غبت سكشن واحد من عشرة .. 
اها وحياة عمكـ زحلف ما بأكدب .. وهذا العرض ساري لفترة محدودة لغاية ما تخلص حصص الـ 24 ساعة بتاع مادة الفيسبوكيولوجي في مدينة صلصا .. بناءاً ع اتفاق سري تمـ بين القسمين .. وسكتمـ بكتمـ انت ما شفتش حاجة .. وكنت غايب ليه يا ابني ؟ اصلي كان عندي استبحس وكانت نفسي غامة عليا .. ربنا يغمها عليكوا كمان وكمان

لخدمة الجيلي والمهلبية الحيوية

biodaewoochemistery

اضغط الدرو التالت اودامـ العمدة

----------------------------------------------

لنظامـ اطردني شكراً اضغط (( 1 ))

الآن يمكنكـ مع نظامـ اطردني شكراً انكـ تحضر محاضرة زي العسل مدتها لا تزيد عن الساعة ونصف ولا تقل عن الساعة ونصف وعادة لا تكون ساعة ونصف .. وهذا بتوقيت كنكا 
محاضرة تقعدوا فيها حوالي تلتميت ربعميت طالب كدهـ بالوافدين والعيال بتوع الصبح .. تقعد زي الألف وتتثبت طول المحاضرة ولو بصيت جمبكـ بس او خدت نفسكـ بصوت واطي هتنطرد برهـ
بصوت واطي ؟ اها بصوت واطي .. انت ما تاخدش نفسكـ اصلاً  .. الله يخرب بيوتكوا

-----------

لنظامـ اخرعني شكراً اضغط (( 2 ))

الآن مع نظامـ اخرعني شكراً ممكن تقعد تذاكر كويز اسبوع ..
اسبوع ؟ اها وحياة عمكـ زحلف بردهـ اسبوع .. وتدخل تحل كويز ع عشرين خمسة وتلاتين صفحة كدهـ وتحله وتعديه رغمـ العوائق والملذات اللي فيه
وفجأة !!!!
ييجي حد من فوقكـ ويدلق عليكـ مية سقعة في عز الشتا ..

ويقولكـ :

عليكوا كويز تاني بعد العيد ع حوالي ميت صفحة مش مفهومة  .. ودهــ تبعاً للخطة الاكاديمية للرقي بمستوى الطالب  .. وحسبي الله ونعمـ الوكيل

لخدمةالشرايح والميكروسكوبات والأقلامـ الزرقا في أحمرة
histotology

اضغط الدور الأخير قبل السطوح

------------------------------------------

لنظامـ انجزني شكراً اضغط (( 1 )) 

الآن يمكنكـ مع نظامـ انجزني شكراً انكــ تخلص سكشن كامل تاخد فيه نص برانش في ساعة واحدة .. تخيل !!! .. لأ وترسمـ بالألوان الخشب اللي محتاجة براية دي وتحل اسئلة نظري كلها اكمل ما بين النقط وتشوف شرايح ملونة شبه رسومات مجلة ميكي تحت جهاز يعمل بالطاقة الكهربائية .. وغالباً الفيشة بتكون بايظة فـ ما تقلقش ..
كبرنا السكشن اعترضتوا صغرناهـ اعترضتوا .. جتكمـ البلا مليتوا البلد

---------

نعتذر عن توقف نظامـ فهمني شكراً إلى الأبد

الآن يمكنكـ التمتع بكل هذهـ الخدمات فقط على نظامـ طب كنكا

للتحويل من أي نظامـ تاني تعالالي الالي الالي يا حبيبي تعالالي

وبنفكركـ ان دخول الحمامـ زي خروجه يعني هتيجي في سنة جامعية هتمشي وانت ما زلت تنتمي لنفس هذهـ الدفعة

شركة بلاكــ يير تتمنى لكمـ مذاكرة مقبولة وامتحاناً غبياً
وكل بلاكــ يير وانتوا بخير

غابة و حظائر و اعملى طرزان !

بدون تلك المقدمات الرتيبة ، والتمهيدات الطويلة دعونى الان أنطلق بدون توقف !!

سأحكى لكم اليوم عن غابتنا .. غابة العلم ( أكيد معروفة ) .. غابتنا يرأسها أسد كبير .. يقال أنه مختلف .. يسمع للطلاب .. ويعشق التطوير ناهيك عن النظام الذى لا يوجد له مثيل فى غابات العالم جمعاء ..

فى غابتنا العديد والعديد من الحظائرعلى رأس كل حظيرة أسد صغير .. يقوم على خدمة حظيرته بعناية فائفة .. ويطور اعماله اليومية من رش المياه و تشغيل اذاعة القراّن الكريم فى الراديو (عشان البركة ) ثم يبدأ بمباشرة أعماله فى ربوع الحظيرة من تعليم البهائم والخرفان الصغيرة .. سأحكى لكم بإختصار الإختصار عن عدد من تلك الحظائر ..

الحظيرة الأولى :: حظيرة تزيد معدلات الذكاء (ان وُجد) .. مش موجود .. فاااااكس

تحمل هذه الحظيرة مهمة تدريس علم وظائف الأعضاء ( ايديك بتاكل بيها .. رجليك بتمشى عليها .. لسانك بتغيظ بيه العيال الصغيرة .. وطبعا فى حاجات بتفرقع من كتر التعليم فى الحظيرة دى .. ده فهم سواق تاكسى لعلم وظائف الأعضاء) ..علم أساسى يطلق عليه أبو الطب .. يحتاج لعقول نابهة بالطبع .. يرأس هذه الحظيرة أسد (غشيييم) .. يعشق النزاهة (ولأنه مصرى على حق فطبعا بيقول للكوسة لأ ) .. يتميز هذا الأسد (بالتكويس) علنا أمام جميع الخراف والماعز .. وبالطبع فى لجنة خاصة .. فليس من المعقول أن ُتختبر الأشبال مع الخراف والماعز .. المهم أن هذا الأسد (الغشيم) قد أخذ يطور فى حظيرته كثيرا كثيرا .. شروحات غاية فى الرقى والجودة .. كميات معقولة من الصفحات .. نظام عالى الأداء .. إختبارات دورية غير مفاجئة .. والأهم من ذلك .. النزاااااااهة .. وفى إحدى الفترات المجيدة التى أرسل فيها الأسد الكبير البيان الرسمى بضرورة الرقى أكثر و أكثر بالحظائر .. وضرورة تطبيق نظم الجودة الحظائرية .. حتى انشغل الأسد المسئول بمحاربة نمر قوى .. او لنقل انشغل بحرب النمور ولكن هذا النمر كان الأقوى و الأشهر فبالتالى كان الهدف الأول .. من الطبيعى أن ينشغل الأسد بهذه الحرب لأن حظيرته تسير على ما يرام .. وتشعر فيها البهائم بكونهم بهائم .. يأكلون .. يشربون .. يــ .. ينامون .. هم فى قمة السعادة فى الحظيرة فكيف لهم أن يذهبوا لذلك النمر الوضيع .. أراد الأسد أن يثبت (غشوميته) فأسرع بعمل اختبار منظم مخبر عنه مسبقا( بأسبوع ) لينال نقطة ثمينة من النمر على حساب البهائم .. لكن النمر هو الاخر غشيم .. فأسرع بالخرفان والمعيز محاولا اثبات انه ( مش بـيـتـثـبت ) .. وبالفعل أثبت ذلك .. ولكن الخراف والماعز لاحظوا تطورا ملحوظا فى معرفة الأسد بما يدبر له النمر .. ما يقول .. ما يرجح .. ما ينهج معهم ( سبحان الله..لا سحر ولا شعوذة ..صلى على رسول الله ).. انتهت الجولة الأولى .. وُهرست البهائم من ماعز وخراف فى المنتصف من هذه الحرب الشعواء ولا حول ولا قوة الا بالله ..

نستنج من هذه الحظيرة عدة ملاحظات هامة :

اولا : يتمتع أسد هذه الحظير بعقل كبيييييير نبييييييه مستنييييييير .. يعرف ما له وما عليه .. مصلحته الأولى هى البهائم وتعليمهم ..

ثانيا : يزداد صيت النمر يوما بعد يوم .. ويزداد عنده عدد البهائم ايضا ..

ثالثا : أن الحرب لم تكن نزيهة شريفة .. بل كانت هناك بعض العصافير فائفة السرعة التى تعمل على نقل اخبار النمر وما وصل اليه حرفيا الى الأسد ( يا ترى ليه؟؟ لو عرفت روح اعمل زيه ياعم حد طايل )

رابعا: خسائر الحرب بالتراكم ستصبح يوما فااااااااادحة !!

الحظيرة الثانية :: حظيرة النظام والدفتر الاسود

تحمل هذه الحظيرة مهمة تدريس علم الكيمياء الحيوية والتفاعلات الحادثة فى الجسم البشرى( لا بجد بتتعبوا يا بتوع الطب وكمان بتاخدوا كيميا دنا شيلتها فى الثانوية المادة بنت التييييييييت دى) ..علم هام للغاية أيضا.. وفى بعض الاحيان تنظر الى قطعة الخبز أو اللحم وتبتسم (قال يعنى عارف مصيرها وايه اللى بيحصلها بالظبط) .. المهم .. يرأس هذه الحظيرة أسد اخر .. عالم .. حصل على الدكتوراه من لندن كما قيل .. يعشق النظام .. لكنه يحمل الكثير من المفاهيم الغريبة والمثيرة للدهشة .. كما أنه لا ينصح بالتعامل المباشر معه.. هو خطير جدااا .. من الاشياء الغريبة تشبيهه لمن يرتدى ( كاب ) بعامل البنزين فى أمريكا .. اهتمامه الشديد بحضور البهائم الجلسات العبقرية حتى وان لم يشعروا بأهميتة تلك الجلسات .. الدفتر الأسود الذى يحمل نسب الغياب والمواجهة المخيفة فى الشفوى أيضا من أحب الاشياء الى قلبه .. الطرد بمجرد النظر .. يمتلك نظرة خاصة للإناث تجبر الذكور قليلى التعاطف مع الإناث بالطبع أن يتعاطفوا .. ناهيك عن كلماته الخاصة بالذكور .. كما أن (التوتوريل) له مفهوم خاص فى مخيلته .. فقد اخبرنا أن (التوتوريل) بالنسبة له يعنى أن يسأل فيما تم شرحه .. وإن لم تكن الاجابة .. كان الطرد والغياب .. أسدنا يدير حظيرة منظمة حقا وليس كالحظيرة الاولى .. تدعوا البهائم أن ُترحم وتنتهى حالة الفصل المنهجى (المهببة) التى لا تتبعها أى من الحظائر سواها .. أسد أسد أسد .. أكفر باللاة والوزة .. أسد أسد أسد !

الحظيرة الثالثة :: احفظ زى الجاموسة تعدى زى الناموسة

تحمل هذه الحظيرة مهمة تدريس علم التشريح( مشرحة بقى وحركات ماشى .. لو عايزين جثث انا ممكن اظبطكم .. بس عارفين أنا كنت عايز حاجة من علوم كده تعملنا خلطة تمام تكيفنا ) .. علم الجراحيين .. من اساسيات الطب كله .. يحتاج للحفظ الشديد والمراجعة المنتظمة والرسم الممل المفصل .. يرأس هذه الحظيرة أسد اخر .. جديد نوعا ما.. بشوش .. خفيف .. صدرت له الاوامر ايضا.. يحاول جاهدا الفوز فى معركته الخاصة .. التى يواجه فيها نمرا قويا جدااا .. يحاول فرض النظام( بغباوة ).. فعنده كراسة العملى من اهم ما يكون ..على الرغم من ان الجميع ( يكروتها واللى ملهوش اكلاشيه بيظبط الغياب بنفسه ).. يعتقد هذا الاسد انه اردانا بسؤال ( الهاند ) فى السنة السابقة .. وياله من واهم .. ويالهم جميعا من واهمين .. أسد هذا القسم يحاول الاستمرار وحقا نتمنى له النجاح ( بس بدماغ شوية اكتر من كده) ..

الحظيرة الرابعة :: روح يا شيخ ربنا يعمر بيتك

تحمل هذه الحظيرة مهمة تدريس علم الأنسجة والخلايا ( ان الحمد لله نحمده ونستعينه الله الوطن المرشد العام ) .. من العلوم الدقيقة الهامة ايضا التى لا يستقيم دراسة الامراض وما يحدث من تحولات على مستوى الخلايا والانسجة الا بفهم هذا العلم .. لكن فى الحقيقة هى الحظيرة الارقى والافضل .. لا يذاكرها البهائم طوال العام حتى فى فترة ( العشرين فى المائة ) كراسة الاختيارى تحفظ وتصم ( وربنا يسهل بعد كده ) .. بعد ذلك يتم تعليم الشرائح (صباع الفرخة ورأس الدبوس) .. ثم تأتى لحظات السباق مع الزمن والمذاكرة والاكتئاب والحفظ والرسم مع النهائيات .. النتيجة جيد جدا .. امتياز .. غياب هذه الحظيرة (عادى) .. اختباراته الدورية ( الكويزات عادى ) .. الاسود القائمين على التدريس يتمتعون بدرجة عالية من الطيبة .. والحمد لله .. اللهم بارك فى هذه الحظيرة حتى ولو لاّخر هذا العام وحسب..

ملاحظات هامة

اولا:: البهائم يعنى الخرفان والمعيز .. بحس ان اللى بيحصل مينفعش يحصل غير لبهائم .. خرفان ومعيز وبط وكله .. هما اه زى الفل .. بس عايزين حظائر تانية و نظام تانى .. هما يسدوا فى اى وضع وانا متأكد .. بس ربنا يستر عليهم لأن ده بيتراكم جوه ويكمن لما يكبروا يطلعوه ع اللى بعدهم .. و ده وارد اوى

ــــــــــــــــــ

ثانيا:: فى اول ثلاث حظائر اقتطعت من كلام سواقين تاكسى عاملين دماغ .. ومنهم واحد ان شاء الله ننزل تجربته مع الحشيش فى تدوينة قادمة .. لأنها تجمع الصعبانيات والفايدة الحقيقة

ــــــــــــــــــ

ثالثا:: لم احدد نوع الاسد .. ذكر كان أم أنثى .. لكننى اقولها بكل ثقة ان عبد الناصر ..لالا .. اقولها ان الحظيرة اللى ماسكها رااااااااجل بيفرق برده .. وحكاية المرشد العام ..لأنه يقال أن اسد هذه الحظيرة منتمى للإخوان .. شايفين النظام ..

ــــــــــــــــــ

رابعا:: سامحونى ع القلش الرخيص ده القلش بقى فى الهوا خلاص .. وربنا يسترها معانا ويعدينا من الغابة سنة سنة على خيييييير ان شاء الله

ما زال هناك الكثير والكثير عن غابتنا وحظائرها المختلفة المتألقة بضروب العجائب و النوادر .. وتذكر اننا لم نتعرض للأشبال حتى الان ..انتظرونا

انتبه .. هو فيروس معدي !!

حالة غريبة تعم أرجاء ونواحي حرم الجامعة - المصون - .. ظاهرة غريبة من ارتفاع أعداد الوافدين إلى منطقة - تحت الكوبري - .. بالإضافة إلى ملاحظة بعض التحركات الغريبة الغير مفهومة في مبنى الكلية نفسه .. دعتنا إلى التشكك في البداية في أن الكلية تخطط لإعلان حالة الإستنفار القصوى استعداد لحرب الكورسات وفعص الطالب !

وأخيرا وصلتنا الإخبارية اليوم عن ازدياد حالة الكآبة والإختناق لدى الطلاب .. دل على ذلك رؤية بعض الوجوه الغاضبة الساخطة اللاعنة المغمغمة بكلمات غير مفهومة مصاحبة بارتفاع اليدين إلى السماء وانبعاج الحواجب وبدء علامات البكاء على تلك الوجوه مما يدل على أنها على وشك الدعاء على أحد ما ..

كما وصلنا تقرير من مصدر موثوق منه من ازدياد عدد الكوابيس والأحلام المزعجة المفزعة مما ساعد على ازدياد نوبات الأرق والإكتئاب .. ولوحظ مؤخرا ازدياد عدد الضحايا من طلاب المجمع الطبي وخصوصا تلك الكلية المسماه بالطب البشري .. سببها ارتفاع ملحوظ في حموضة المدرجات .. وانخفاض نسبي في ضغط رؤساء الأقسام مصاحبا بانقطاع تام عن أكسجين النفس للطالب مما أدى في النهاية إلى وصول الطلاب لمنحدر عال بلا تردد في القفز .

 وفي النهاية قام مراسلنا في قناة - العذاب - بالبحث في أسباب الإكتئاب العام وبمساعدة بعض من العقول الرزينة والذكاء اللامع تم التوصل إلى السبب وهو فيروس من نوع - اللي مبيرحمش - .. أسموه فيروس - المذاكرة - وهو من النوع المعدي الخطير .. لكن الغريب في الأمر أن هذا الفيروس لا يصيبك مباشرة بل يقتلك ببطء .. كما أنه اكتشف حديثا إلى أنه لا يعديك بداء المذاكرة بل يعطيك مناعة فورية وقوية منها .. مما حذى بالعلماء إلى إطلاق لقب - وديني لاوربك - عليه .. واعتبروا هذا الإسم هو الاسم العلمي له .. أما عن الميكانيزم الغريبة فلم يتوصل إليها حتى الآن !

ـــــــــــــــــــــــــــــــــــــــــــــــــــــــــــ

كان هذا تقريرا صغيرا لكنه واقعي بكل ما فيه من كلمات وحروف .. فلا أعرف بالتحديد سبب ذلك الشعور الذي أخذ يعم على جميع من حولي .. حين تبدأ في السؤال عن الصحة والأحوال تجد الإجابة _ مخنوووووق .. من كل حاجة .. _ .. فتواسي صديقك بأنك تعاني من نفس الحالة ثم تفرج عنه قليلا بأن تخبره ووجهك عليه آثار اكتئاب بأنك قد استيقظت على كابوس مرعب .. فتجد عيناه قد اتسعت ليخبرك بأنه هو الآخر قد استيقظ على كابوس هو الآخر .. ليأخذ كل منكما ركن بجانب أحد الأعمده وتبدأوا في النحيب .. والدعاء على الدراسة والسخط على العالم ولعن تلك الكلية .. كلية العذاب !

ثم تكتشف تلقائيا بأنك في حاجة إلى رحلة إلى أي مكان بعيدا عن هم الكلية وهم الدراسة .. فتبدأ بالبحث عن أي رحلة لتقوم بالاشتراك لتوك وترقب ميعادها بفارغ الصبر .. وما أكثر سعادتك حين تجد أصدقاءك المقربين معك .. بعد أن فرقتكم الدراسة المملة .. فترتفع مؤشرات مزاجك قليلا .. وتبدأ في تمنية نفسك بيوم سعيد تكمل فيه مسيرتك .. أو صراعك مع النجاح .

حين تتذكر نفسك في الأجازة وكم بدأت في سرد القوانين والمبادئ التي ستكمل بها تلك السنة الجديدة .. تضحك أحيانا حين ترى أنك قد تنفذ بعضها وتتكاسل عن البعض الآخر .. فأنت بالفعل بدأت في أخذ حذرك من تلك الفئات المضللة .. بدأت في تقليل حساسيتك لبعض الأمور التافهة .. بدأت في إدراك أنك قد صرت أكثر نضجا وتفهما لما يحدث حولك .. لقد صرت أكبر بعام كامل .. ثم تتذكر كم كانت حماستك للمذاكرة والتشجيع عليها .. - وقال ايه هنذاااااااااااااااااااااااااااااااكر وندححححححححح - .. ثم تجد أنك تتعرض لما يسمى بالـ - فعص - أو - الهرس _ بمعنى الكلمة .. تخيل أنك عائد إلى منزلك في السادسة والنصف ليلا لتأخذ راحتك بالنوم على الأقل خمس ساعات .. ثم تستيقظ في تمام الحادية عشرة لتفتح إحدى الكتب فقط للتتذكر شكل الكتاب .. لمدة نصف ساعة كاملة تشاهد بعض الصور وأرقام الصفحات التي قد أخذوها في الكلية وعدد الصفحات التي قد ذاكرتها أنت .. لتبتسم ثم تبدأ في أخذ غفوتك الثانية لأنك ستستيقظ في السابعة في اليوم التالي ..

تشعر بأنك داخل دوامة لا تعرف كيف ا لخروج منها .. ثم تتعقد الأمور بوجود الكثير من الأشياء التافهة التي لا ينبغي أن تشغل بالك في ذلك الوقت لكنها تؤرقك .. وأنت في محاولاتك المستميتة لإخراجها لكنها تقبع وتزداد .. وعليك أن تتساءل عما أدخلها في أسك ولم لا تعرف كيف تقضي عليها .. وفي النهاية تضحك .. بلا سبب !

احساس غريب متعب .. علي تجنبه دائما وأن تكمل يومك بابتسامة سعيدة . 

دردشات محاضرة .. كلاكيت أول مرة ..

I love grapes:)

ya 3enaba :P:P

now I hate it so much :(

Why my sweetie ?

keda we 5alas :P:P:P

YA ra5amtek . It suits you very much :)

Ya salaaaaaaam , aho enty elly felfel ba2a hhhhhh :D

I love being felfel .. hhhh . :D

tayeb ya5ty etlhy ya mawkosa ba2a 3ayzen nrkz w nesma yemken nefla7 we el set shaklaha latefa we 5efa awyyyyyy ..

tayeb rakezy :D

هاي .. أحب أعرفكوا بنفسي .. أنا مزيكا .. بيقولوا عليا طالب في طب .. بس لسة متأكدتش من المعلومة دي لحد دلوقتي .. ساعات بينادوني ويقولولي يا دكتور .. بس فعلا مش عارف هما يقصدوا مين بالكلمة دي .. أـــ !

- ايه ؟! ومالك بتقولها بقرف كده ليه ؟ هي كلمة قبيحة ولا حاجة ؟! دي حاجة جامدة جداااا يابني !

سورى .. أحب أعرفكم .. ده زميلي في الكلية  .. شلبي .. بعزه أوي وبيعزني .. أحلى حاجة فيه انه دايما متفاءل .. ومركززززز !

حاليا أنا في محاضرة من النوع التقيل .. بيقولولي ان اسم المادة دي بايو .. وأنا لحد دلوقتي نفسي اعرف مين طنط دي ؟!

- يابني ركز شوية .. دي الدكتورة اللي بتشرحلنا المحاضرة !

مرسي أوي يا شلبي على المعلومة الخطيرة دي .. أهم حاجة اني فعلا قاعد وسط المحاضرة وكعادة كل المجهتدين قاعد في آخر صف .. بعيدا عن كل العيون .. ومعايا كشكولي وقلمي الرصاص .. آه والله الرصاص .. وأحلى حاجة اني قاعد بسمع في كلام ممكن يدخل أو ميدخلش بس على كل أنا مش فاهمه .. وأحيانا بفهم منه شوية كلمات بس لسة مش عارف ايه علاقة الكلام ده بالمادة وإيه علاقة المادة بالطب وإيه علاقتي بالكلية دي أساسا أصلا !

شلبي دايما يقولى ان الكلية دي كلية جميلة ومهمة .. ولازم أركز علشان أثبت وجودي فيها .. بس دايما بلاقي جوايا سؤال .. يعني ايه أثبت وجودي في الكلية ؟ يعني أقف في حرم الجامعة وأقول أنا موجود ؟!

- لا يابني مانتش فاهم .. أثبت وجودي يعني أتفوق وأقف على رجليا وأوصل لمكان عالي وترتيب على الدفعة .. فهمت ؟ يعني أثبت ان في حد في الكلية دي اسمه شلبي وهيبقى بعون الله دكتور ناجح ..

والله شكلك مهتعرف تثبت حتى أول حرف من اسمك طول مانت كده .. ركز يا حبيبي في المحاضرة شكلك فاهم .. وسيبني في حالي انا وكشكولي !

نشكر لشلبي هذه المداخلة الرقيقة .. بس بجد عاوز أعرف .. أنا هثبت وجودي ازاى في الكلية وأنا لسة مثبتش وجودي في أوضتي ؟!

عارفين أنا ليه سايب المحاضرة تضرب تقلب وقاعد بكتب الكلام ده ؟ علشان يمكن في يوم بعد السبع تمن تسع سنين الجايين أبقى أقرا كلامي تاني .. وأنا وحظي ساعتها .. ياضحك .. يا أعيط وألطم !!

أنا مش هكدب عليكوا .. أنا في سنة تانية .. يعني المفروض اني اتعودت على الكلية ونظامها .. بس الحقيقة ان سنة أولى كانت كلها ضرب ضرب ويوم النتيجة كانت الشتيمة .. مش مصدقيني عارف  .. زمانكوا بتقولوا : " اهو انتوا كلكوا كده يا بتوع طب .. تبقوا دحيحة وتقولا زعلانين واتقهرنا يوم النتيجة والواحد فيهم جايب امتياز ! " .. بس والله أبدا .. صحيح جايب مجموع عالي بس أنا في الحقيقة مش راضي عن نفسي ..

والحق إني ملقيتش حد راضي عن مجموعة أبدا .. ولو حابب أقسمهوملك زي الفسيولوجي أقسمهملك وأسمعك أحلى كلام ::

واحد ذاكر واجتهد وعمل اللي عليه وربنا وفقه وجاب مجموع عالي بس هو التاني في اصحابه .. يبقى لا ازاي .. لازم يبقى هو الأول ... ودول ما أكثرهم .

واحد ذاكر واجتهد وعمل اللى عليه واتظلم .. وممكن يكون اتظلم أوي ..

وواحد ذاكر واجتهد وده دحيح على الدرجة بيزعل وعاوز أكتر وأكتر .. 

وأحيانا بيبقى طموح انه يرسم مستقبله ويحدده بايده مش حد يحددهوله .. 

بس بجد مش عارف أقولكوا ايه ولا ألوم مين .. لأنه في الأول وفي الآخر توفيق ربنا .. وجهد اللي ذاكر .. بس كده !

مش هلوم الي زعلان علشان عاوز يبقى أحسن ولا اللي عنده طموح .. بس بجد المشكلة في ردة الفعل الغريبة قدام اللي مظلوم .. بتبقى عادي انه يجيب امتياز ويقول أنا مش عاجبني المجموع وواحد واقف جنبه جايب مقبول !! وهو متأكد انه مظلوم !

بس فعلا أحلى حاجة هتقابلها في الكلية في أول السنة الجديدة بعد عام مضى .. التعامل اللي بيتغير !

في ناس تفضل اصحابك وجنبك علشان بيحبوك .. والمذاكرة مش هتقف في طريق حب في الله .. لأن كل واحد عارف هوا عمل ايه وهيعمل ايه !

وناس تانية أول متشوفك وشها يتغير ويقلب ألوان .. ويبدأ التساؤل .. ليه ؟! واشمعنى ؟!

وناس لاليها في الطور ولا الطحين .. معاهم معاهم .. عليهم عليهم !

بس الحاجة الوحيدة اللي متغيرتش هي ان شلبي لسة مركز في المحاضرة وأنا تعبت وزهقت من كتر الحر والعرق والكلام اللي بيتقال وكله شبه بعضه .. 

وأخيرا المحاضرة خلصت وأنا بكتب الجملة دي وفي النهاية .. أحب أبعت إليكم بسلامي الخاص .. نتقابل تاني على خير .. معادنا الخميس الجاي في المحاضرة الجاية  .. 

- سي يو آجين جايز .. بيس :D

فاضل ع الحلو خمسة

السلام عليكم و رحمة الله و بركاته

لكل زمايلي في سنة أولى و بعد النتائج المبهرة ما شاء الله ( مش تريقة )

بحب أهديكم توبيك سبيشيال عشان خاطركوا

و بواقع خبرة سنة بحالها في الكلية دي بحب أنقل الخبرة المتواضعة دي للي

جايين بعدينا و أقولهم ( جووود لاك )

في كي جي وان طب

أول ما تدخل الكلية هتلاقي نفسك بتقول الليلة الكبيرة يا عمي و العالم كتييييييرة 

( طبعا الكلام ده مش لسنة الفراغ )

أمم و جموع غفيرة و هيطلبوا منك تشوف انت في انهي سكشن و الكشف متعلق 

في معمل الفسيولوجي

 

فسيولوجي ؟؟؟؟

دي شتيمة دي .؟؟؟

سوري أحب أعرفكم

الاسم : علم وظائف الاعضاء .

الدلع : فسيولوجي أو فسيو بعد حذف لوجي للتخفيف ..

الحالة الاجتماعية : أعزب محدش يشرفه انه يرتبط بيه . يرتبط بمين يا ناس ده 

عايز عمر تاني عشان يتذاكر بس أنا هقولك مصادر المذاكرة كويس :

1-كتب ملونة بألوان ملهاش علاقة بالموضوع و مهما كان تعليقك ع المكتوب هو

ده الصح . ( ليك في الجايتون يا استاذ اشتريه و قابلوني لو فهمتوا

حاجة منه ) ده إلى جانب كتاب كارديو مش هتعرف انه موجود غير آخر السنة .. 

2 - كراسة العملي و دي بقى كلامها حلو قوي بس سيبكوا من الكرفات

curves

لانها في الغالب بتبقى بقعة في الصفحة .

 

3- طبعا مننساش ان كل سكشن هيبقى فيه متبرع من الدفعة بجزء من دمه الغالي

لحد ما يعترف انه معندوش دم .

4- جهاز ضغط و سماعة هيتطلبوا منك في الأول و مش هتستخدمهم غير لما  

تبقى دكتور باطنة . 

5- كائنات حية رقيقة تدعى الضفادع تنتزع منها القلوب كما انتزعت من قلوبنا

الرحمة و بعدين هنعلقها على الكايموجراف عبرة لمن لا يعتبر .

( طبعا لغوا ده دلوقتي و الحمد لله )

*********

 " فاصل اعلاني اشتري العرض العائلي خمس ضفادع للدراسة المعملية بسعر 

تلاتة بس و خد عليهم كرفات النيرف و المصل هدية "

*********

المهم هتطلع من معمل الفسيولوجي هتلاقي العيال واقفة بيحددوا هياخدوا دروس

عند مين طبعا انت هتقول : لا على جثتي آخد كورسات

و هيجيلك الرد : خلاص خلي الاناتومي يعقدك

أناتومي ؟؟؟؟

 

بتشتم تاني ؟؟؟

سوري أعرفكم

الاسم : علم التشريح و الأجنة .

الدلع : اناتومي و مفيش تخفيف أبدا ابدا .

الحالة الاجتماعية : ميت من زمان مبيعشش في الذاكرة يومين على بعض بس أنا

هقولك تذاكره منين :

1 - كتب أخضر في ابيض مرسوم عليها حاجات مينفعش تتشاف بعد الاكل 

( ارميهم و خليك في الساماري )

2- هيكل عتيق مدهون ورنيش لزوم لمعان يدوم و يدوم .

3 - المشرحة ممنوع الدخول لأقل من سنة و نص .

4 - انسان ( أو بالمعنى الأصح كان يوم انسان )

متجوزش عليه إلا الرحمة ( اللهم اسكن موتى المسلمين فسيح جناتك )

5 - علبة فيها أدوات تقطع عرق و تسيح دم برضه مش هتستعملها غير لما

تبقى دكتور جراحة .

6 - ازازة نفتالين قصدي فورمالين انتم عارفين الكيف بيذل و انتوا هتتكيفوا 

من الريحة لأنها هتنعش الأغشية المخية و البصرية .

شكر خاص لأم رامي و عم صبحي على رعايتهم لينا في المشرحة و الشاي

اللي بيعملوه للدكاترة في السكشن

********

فاصل اعلاني سعر أي فقرة تيبيكال خمسة جنيه و الأتيبيكال تمانية جنيه 

و لفترة محدودة خصم عشرة في المية مع شرائك عمود فقري كامل

*********

المهم بعد ما اتخضيت من الاناتومي هتبص في الجدول هتلاقي عندك سكشن بايو

بايو ؟؟؟؟

يطلع ايه ده ؟؟؟

سوري اعرفكم

بايو ده الدلع

الاسم : كيمياء حيوية طبية و بالافرنجي بايوكيمستري .

الحالة الاجتماعية : لذيذ و روش و كل اصحابه بيحبوه  .

( أوعى تفكر انك من صحابه دول )

المصادر اللي هتدرسوا منها :

1 - كتاب طويييل في القياس هتندهش لما تعرف ان ليه جزء تاني على آخر

الترم الاول

2 - كراسة عملي لو نسيتها مرة يبقى يا ويلك يا سواد ليلك .

3 - طبعا هتاخد بعضك على أي محل بيع مستلزمات طبية و تقوله : وضبلي

بضاعة على مزاجك لزوم شغل البايو هتلاقيه جابلك ست أنابيب و فرشاة عشان

النظافة من الايمان و ستاند مينفعش تختار اللون بتاعه و ممساك مع ان ايدك

محروقة محروقة مفيش نقاش .

4 - نشكر القائمين على عمل المحاليل في المعمل و الدور جاي عليك عشان

تعرف طبيعة السائل في الانبوبة بعمل اختبارات معملية دقيقة عليه لاكتشاف

خصائصه الكيميائية و الحيوية و العفريتية التي تغير لونه و رائحته و أحيانا

طعمه فيسهل اكتشافه .

**********

فاصل اعلاني لسنا الوحيدين و لكننا الأفضل يوجد لدينا أفضل كواشف عرض

خاص بارفويد أصلي مية في المية و المفاجأة مبيقعش على الهدوم و لا بيحرق

الايد و مضمونة نتائجه ان شاء الله هذا العرض ساري حتى نفاذ الكمية أو انقضاء

فترة الامتحانات أيهما أقرب

*******

المهم هتخلص سكشن البايو و هتروح محاضرة هستولوجي

هستولوجي ؟؟؟

أنا مش متفائل بأولوجي دي

سوري أعرفكم

الاسم : علم الأنسجة و الخلايا .

الدلع : هستو بعد ما نشيل الكلفة .

الحالة الاجتماعية : مفقود بس لو لقيته هتلاقيه خفيف .

مصادر المذاكرة :

1 - كتاب طوييل برضه مرفق مع بعض او كل الكتب التالية

( كتاب رسومات و اطلس و كراسة عملي و ورقة فيها بيانات ساين إن

لموقع الكتروني )

2 - سكشن الهستو سكشن خفيف كله رسم في رسم في نوم في سرحان 

و في الآخر بتطلع و المراجعة في الآخر بتلم .

3 - قلم أحمر و قلم ازرق هتشتريهم من أي مكتبة هتقولهم :

أقلام هستولوجي لو سمحتم و هيجيلك الرد : الباشا في طب ؟ طبعا مش هتقدر

تداري الكسوف و هتاخد الاقلام و تروح بيتكوا تحاول تجربهم و هتفتكرهم الأول

مبيكتبوش بس هيطلعوا عينك على بال ما يحنوا على الورقة و يصبغوها بألوان

العذاب و كأنما صنعت لتعذيب الطالب في امتحان العملي اللي كله تنقيط بالمناسبة .

4 - كراسة العملي هتستلمها أول يوم و تسلمها يوم امتحان العملي و هترسمها

في نفس يوم امتحان العملي بالمناسبة باستخدام ألوان العذاب .

5 - الميكروسكوبات صديقك المخلص بس لما يتفرغلك الاول بعد ما تقف طابور

على الميكروسكوب ولا طابور الجمعية عشان تشوف شريحة و في الآخر تطلع

بتاعة الدرس اللي فات .

*********

فاصل اعلاني عرض الكومبو صندوق الشرايح الجديد من قسم الهستولوجي جميع

شرايح منهج أولى اشتريهم الآن و رجعهم بعد الامتحان و لفترة محدودة عرض 

( اللي مش واثق من نفسه ) اشتري صندوق الشرايح و تمتع بإطالة مدة العهدة

لما بعد الدور التاني

*********

طبعا هتلاقي نفسك عايز الارض تتشق و تبلعك

بس اصبر و خد الحكمة من أفواه المعذبين السابقين

هتخلص سنة اولى بدري بدري و تلاقي نفسك في سنة تانية زينا كده و لا ايه

يا دفعة ؟؟

التوبيك ده أنا كتبته لدفعتي احياء لذكريات مريرة قصدي عزيزة

بعد ما طلعت نتايجنا الحمد لله و مبرووك للكل و أحب أقولكم

فاضل ع الحلو خمسة

و جود لاك السنة الجاية ..

و آخر كل سنة هكتبلكوا توبيك زي دي .

و هنبتدي العد التنازلي نحو النهاية ( قصدي التخرج طبعا )

و في الآخر أحب أقول لزمايلي الصغيرين اللي في ثانوية عامة

لو حصل و دخلت طب

ركز في حقوق الانسان

مع تحيات Anastasia pop