تخاريف

عارفين ان المانيا خسرت فى الحرب العالمية الاولى بعد ما كنت مبهدلة بريطانيا وفرنسا وبعدت الاتحاد السوفيتى بس اصابها الضعف رجالة كتير ماتوا كان اى حد قادر على القتال بياخدوه لغاية متبقاش غير النساء والاطفال والشيوخ فى المانيا فاتشال اللى كان بيحكم المانيا وقتها والمانيا قالت نعمل هدنة ونوقف الحرب فمضت على معاهدة المعروفة انها الاكثر اذلالا فى التاريخ عشان الى كان فيها اعتراف المانيا أنها السبب فى الحرب ودفع كل التكاليف للدول المعادية وحاجات كتير اذلال المهم من ده كله ان المعاهدة دى اتمضت فى عربة قطار نفس عربة القطار اللى بعديها بعشرين سنة المانيا مضت فيها معاهدة وهى منتصرةعلى دول كانت معادية ليه فى الحرب العالمية الاولى بقيادة هتلر حاجة غريبة .. بحس ان كل حاجة وحشة الواحد بيعملها بترجعله واحد ظلم واحد حييجى واحد ويظلمه واحد عسر سير امور لواحد بييجى واحد ويوقفله اموره عاجلا ام آجلا بس الحكاية دى بتحصل كأن الواحد بيخرج منه سهم راسه بترجعله واحد كان عاق لوالديه عياله طلعوا كدة برضه معاه فهى يعنى مسألة دين ولازم يتسدد مهما بعد الوقت لازم حيتسدد ووقتها يفتكر اللى كان بيعمله ويحس بالندم بس خلاص فات الوقت للتصحيح ودلوقتى وقت الدفع

حاجة غريبة لما يبقى اللى انت عايزه حاجة واللى انت مقتنع وانت بتختاره حاجة تانية

برضه حاجة جميلة لما واحد يقعد يقنع نفسه انه شباب والناس تقنعه انه لسه صغير فى السن بس اول ميقرب يقتنع بكده يلاقى الشيب ظهر فى شعره

ولا برضه حاجة حلوة لما مثلا تقعد تعيط على ناس ماتوا تلاقى فى اليوم اللى بعديها ناس مش مقدرين شعور الناس اللى زعلانة على اللى ماتوا

ولا برضه واحد مثلا فى مدرسة مية سخنة تتكب وتقع على ايده تسببله حروق فيتهمه المدرس بأنه هوة الى عمل كدة فى نفسه عشان ميعملش الواجب ويقرر يعاقبه معلش بس المدرس ده من الناس اللى لازم تتشتم

الآن فقط ادركت كم ظلى وحيد 20 2 2012 - 8 6 2012 - 16 6 2012

يا ترى ما مدى سوء الحالة عندما يدعو شخص بأن ينقذه ربنا مما هو فيه

لا اعلم لماذا تذكرت ذلك الشخص عندما توفى قريب له بالسرطان لم يحزن لكنه امتلأ غضب ووجهه نحو الاطباء

لا اعلم لماذا عندما علمت بموت بعض الاشخاص لم احزن كل ما فعلته هو محاولة اقناع نفسى بأنى حزينة حتى استسلمت فى النهاية وقلتها بصوت عالى عادى محنا كلنا حنموت

مش معنى انك تلاقى واحد فيه شبه فى التفكير بينكوا انه نصك التانى

معرفة ان ناس بيكرهوك وانت معملتلهومش حاجة لازم تفرحك وتحس بأهمية كبيرة وفى النهاية اللى مش عاجبه حاجة فيك يتحرق

انا حاسة انى شفت الصورة دى قبل كدة

 حاجة وحشة لما تكون مخنوق ويتتصل باى حد عشان تتكلم معاه محدش يرد
انتخابات الرياسة زى الاختيار بين الاتنين فى طيور الظلام
الواحد ماشى فى الكلية دى بجد جنب الحيط فى كل حاجة مش خوف ولا حاجة بس مبدأ انه مش عايز مشاكل .. انا عمرى مفتكر انى ابتديت مشكلة قبل مدة يعنى لما معيدة تيجى وتقولك وانت قاعد فى امان الله فى الامتحان متكلمش اللى جنبك انا مش عارفة يكون الرد ايه وتقولك انت بتزعقلى ؟؟ ولا فى الآخر تزهق وتقولها تتحرق الدرجة عادى
ولا ناس وصل بيهم الفراغ والتفاهة انهم يعلقوا ع اللبس اللى مش عاجبه حاجة فى يتحرق اعمله ايه يعنى ؟
والكلية الحقيرة دى مكنوش لاقيين فيها  البتاعة اللى بيطفوا بيها الحرايق وآل جودة آل
وفى ناس برضه اقصى مشاكلهم فى الدنيا هى الدراسة بجد .........
ولا كمية التفاهة اللى موجودة ع الجروبات بتاعة الكلية برضه دفعة جميلة

حلوة جملةلو دخل كل منا قلب الآخر لأشفق عليه السؤال هو لغاية امتى حتقعد تلتمس الاعذار وتصبر

فى الخطوبة هى كانت سعيدة بخطبتها وفستانها واصحابها والموقف نفسه وهو لم تتغير ابتسامته طيلة الوقت .. لم اشعر بفرحة كل منهما بالآخر

مرة اتقال فى قصة البطل فيها متجوز اتوصف انه من ذلك الطراز الذى احب فتاة واعطاها احلى ما فيه وعندما تزوج كان فارغ لم يجد يئا يعطيه لزوجته .. برضه اللى بيحب كتير قلبه حيبقى مستهلك

شعور حلو لما تقعد على حاجة عالية ومدلدل رجلك شعور خيالى بالضياع كل الناس بتحبه ممكن عشان ده فعلا حقيقة وان محدش مرتكز على ارض حقيقية او ممكن عشان السبب الارق انك بتشوف مين حيمدلك ايده وينزلك الا لو كان عندك مبدأ انك متعتمدش على حد وتنط لوحدك اللى يزعل فعلا انك ترفض ايد وتمسك فى ايد تانية ده حيدل فعلا انك معنكش مبدأ من الاساس

اطفال الشوارع لما تسمع عنهم عينك يعنى حتدمع لكن لما تشوفهم فعلا بتكون عايز تخلص منهم بأى شكل المشكلة ان ييجى الواحد يقولك ادينى مثلا الساندويتش ويكون ماسك فى ايده التانية كيس مليان اكل او يطلب فلوس لو اديتله يروح للجنبك عمرهم مبيكتفوا

فى ناس كتير مثلا لما بتلاقى حد فى حاجات كتير مشتركة مبينهم يقولوا ده توأم روحى لازم يبقى صاحبى او يقول ده نصى التانى اللى عايز اكمل معاها بقية حياتى .. اى حد فعلا اى حد فى بينك وبينه حاجات مشتركة بس هى الصدفة اللى جمعت حاجات كتير مع الشخص ده ورا بعض وخلتك تاخد بالك

انا بحس ان الانتخابات بتعتمد اكتر على مدى كراهية الناس لخصوم حد اكتر من مؤيديه

تحتاج لأن تمشى لوحدك ليلا تفكر فيما آلت اليه الامور وعن مدى التدهور الذى وصلت اليه .. انت بحاجة لأن تعيد الامور لنصابها ان توقف كل شئ فجأة نفس فكرة الصدمات الكهربية على امل ان يعود رتم حياتك الطبيعى مرة اخرى

كيف يطالبنى احد بتذكر شئ ليس فى الذاكرة

آه افتكرت الصورة دى متعلقة فى اوضتى

لا تنتظر احدا .. لن يأتى احد